1, 2. Ibhidi iahi ia bhiti na-iu Jefete ni mon’ê?

O KILUMBA ki lenga phala kutambulula tat’ê. Muéne ua sangulukile kiavulu, mukonda tat’ê ua tundu mu ita, maji né kiki, uala kiambote. Muéne ua mu kuimba ni kutonoka ni kisangusangu kioso, mukonda tat’ê ua tolola o ita. Maji nange o kima kia bhange tat’ê, ni ima ia mu tangela, ia mu tukumukisa. O tata u tandujula o izuatu iê, anga u dikôla: “Aiué! mon’ami, tata! ua ngi bheka mu kubhondalala.” Mu kusuluka, muéne u tangela mon’ê kuila, ua kanena kima kua Jihova, kieji lungulula o muenhu uê katé ku hádia ni hádia. Mukonda dia kikanenu kia bhangele, o mon’ê keji kazala mba kuvuala mon’a. Maji o mon’a ua xikina ni muxima uoso, anga u suínisa tat’ê ku kumbidila o kikanenu kia bhangele kua Jihova. Mukonda dia kuxikina, muéne ua londekesa kuma, ua dielele ni muxima uoso kuila, kima kioso kioso kia mesenene Jihova kokué, kima kiambote. (Afundixi 11:34-37) Kioso kia  mono o kixikanu kiê, o tata ua sanguluka ni mon’ê, mu kuijiia kuila, Jihova ueji sanguluka ni muéne, mukonda ua xikina kudibhakula mu sidivisu iê.

² Jefete ni mon’ê, a dielele kua Jihova ni muxima uoso. Ene a dielele ué mu ukexilu uê ua kubhanga o ima. Né muene mu ithangana ia bhonzo, ene a mu dielele. Ene a mesenene kukala ni ukamba uambote ni Jihova. Mukonda dia kiki, ene a solo kubhanga o vondadi iê.

3. Mukonda diahi o phangu ia Jefete ni mon’ê i tena ku tu kuatekesa?

³ Saí bhabha, ki bhonza kulondekesa o ufiiele uetu kua Jihova. Ku bhinga nguzu phala “kuzokela o kixikanu” kietu. (Juda 3) Tu di longe kiebhi Jefete ni mon’ê kia di bhana ni ibhidi iâ, n’i tu kale ué ni nguzu phala kukolokota mu ufiiele uetu. Kiebhi kia kolokota mu ufiiele uâ kua Jihova?

4, 5. (a) Kitendelesu kiahi kia bhanene Jihova ku akua Izalaiele, kioso kia bokona mu Ixi ia a Kanene? (b) Kala kilondekesa o divulu dia Jisálamu 106, ihi ia bhiti ni kifuxi kia Izalaiele, mukonda dia kubhukumuka kuâ?

⁴ Nange izuua ioso, Jefete ni mon’ê, akexile mu lembalala o ibhidi ia bhitile na-iu o akua Izalaiele, mukonda dia kubhukumukina Jihova. Ku hama jitatu ja mivu ku dima, Jihova ua tumine akua Izalaiele kujibha o abhezi oso a makutu a tungile mu Ixi ia a Kanene, maji ene ka belesela. (Matendelelu 7:1-4) Avulu bhu kaxi ka Izalaiele, a mateka kukaiela o phangu ia akua Kanana, akexile mu bheza o jinzambi ja makutu, ni kubhanga o ufusa.​—Tanga Jisálamu 106:34-39.

⁵ Kuma o akua Izalaiele a bhukumukine, Jihova ka a lange ku jinguma jâ. (Afundixi 2:1-3, 11-15; Jisálamu 106:40-43) Mu kithangana kieniókio, nange o miji ia zolele Jihova, ia bhange nguzu iavulu phala kukolokota mu ufiiele uâ. Maji o Bibidia i zuela kuila, saí athu alondekesa o ufiiele, kala Jefete ni mon’ê, Elikana, Hana ni Samuuele. Ene a mesenene kusangulukisa o muxima ua Jihova.​—1 Samuuele 1:20-28; 2:26.

6. Ihi iene mu bhanga o athu lelu, ni ihi i tua tokala o kubhanga?

⁶ Mu izuua ietu, o athu a banza, a bhanga o ima kála kiexile mu bhanga akua Kanana. Ene a zolo o kitadi, a bhanga o undumbu ni usuéia. Maji Jihova u tu bhana itendelesu. Muéne ua mesena ku tu langa, kála kia mesenene kulanga akua Izalaiele ku ukexilu ua iibha ua mundu. O kuila o ima ia bhangele i tu longa disá? (1 Kolindo 10:6-11) Tua tokala kubhanga ioso phala ku dituna o ukexilu ua iibha ua mundu iú. (Loma 12:2) O kuila tua-nda bhanga ioso phala kulenga o ukexilu iú?

7. (a) Ihi ia bhange o mundu ua Jefete? (b) Ihi ia bhange Jefete?

⁷ Mu izuua ia Jefete, o akua Izalaiele a tale hadi iavulu bhu maku ma akua Fidíxia ni akua Amone, mukonda dia kubhukumukina Jihova. (Afundixi 10:7, 8) Jefete ka kexile mu dibhana ngó ni izukutisu ia ifuxi, iexile ni unguma ni ene, ua kexile ué mu dibhana ni izukutisu ia jiphange jê, ni atuameni a Izalaiele. Kuma o jiphange jê a mu zembele, ni kuila akexile ni difuba, a mu  kaie mu ixi iê. (Afundixi 11:1-3) Jefete kehela o ukexilu uâ ua iibha, kulungulula o ukexilu uê. Kiebhi ki tuejiia o kidi kiki? Kioso o tufunga kia mu bhingi kikuatekesu, muéne ua a kuatekesa. (Afundixi 11:4-11) Ihi ia kuatekesa Jefete kulondekesa o ukexilu uambote?

8, 9. (a) Nange iebhi o ijila mu Kitumu Kia Mozé, ia kuatekesa Jefete? (b) Ihi iexile o kima kia betele-o-kota phala Jefete?

⁸ Jefete uexile kindanda, muéne uejidile kiambote o musoso ua akua Izalaiele ni Kitumu Kia Mozé. O ukexilu ua Jihova ku dibhana ni mundu Uê, ua mu kuatekesa kuijiia o ibanzelu ia Nzambi ia lungu ni ima ia uabha ni ima ia iibha. (Afundixi 11:12-27) Ni kikuatekesu kia itumu íii, Jefete ua batula o maka oso a moneka ku muenhu uê. Muéne uejidile kiambote ihi i banza Jihova ia lungu ni njinda, ni kuvutula phonzo. Uejidile ué kuila, Nzambi ua mesena kuila, o mundu Uê a di zola mudiê. O Kitumu kiki, kia mu longo ué kiebhi kia tokalele kutalatala akuâ, katé muéne ni ió a mu zembele.​—Tanga Makatukilu 23:5; Ijila 19:17, 18.

⁹ Nange, o phangu ia Zuze ia kuatekesa ué Jefete. Nange muéne ua di longo kiebhi Zuze kia londekesa o henda ku jiphange jê, sumbala a mu zembele. (Dimatekenu 37:4; 45:4, 5) Nange, o kuxinganeka mu ukexilu iú, kua kuatekesa Jefete kubhanga o ima mu ukexilu u sangulukisa Jihova. O ima ia mu bhangele o jiphange jê, ia mu bhekela ndolo ku muxima. Maji Jefete ua mono kuila, o kuzokela o dijina dia Jihova ni kubhângela o mundu uê, kuexile kota, o ndolo ia kexile mu kuívua, ndenge. (Afundixi 11:9) Muéne ua mesenene kulondekesa o ufiiele uê kua Jihova. Mukonda dia ukexilu uê uambote, Jihova ua mu besoala kumoxi ni kifuxi kia Izalaiele.​—Jihebeleu 11:32, 33.

10. Kiebhi ki tu tena kuehela kuila, o itumu ia Bibidia i tu kuatekesa kubhanga o ima kala kia tokala kubhanga o Jikidistá lelu?

¹⁰ O kuila tu tena kukatula mbote mu phangu ia Jefete? Ihi i tua-nda bhanga se o jiphange jetu mu kilunga ji tu bhanga kima kia iibha? Ki tu tokala kuehela kuila, o ndolo i tuívua i tu fidisa kusidivila Jihova. Kana kudituna kuia mu iônge, mba kudituna kudiongeka ni jiphange mu kilunga. Tu kaiele o phangu ia Jefete ni kubelesela Jihova. O kubhanga kiki, kua-nda tu kuatekesa ku dibhana ni ibhidi. Mu kiki, tu tena kulondekesa ué o ukexilu uambote.​—Loma 12:20, 21; Kolose 3:13.

11, 12. Ihi ia kanena Jefete kua Jihova, ni ihi ilombolola o kikanenu kiki?

¹¹ Jefete uejidile kuila, ua bhingile o kikuatekesu kia Nzambi, phala kubhulula Izalaiele bhu maku ma akua Amone. Muéne ua kanena Jihova kuila, se ua Mu kuatekesele kutolola o ita, kioso kieji vutuka bhu bhata, o muthu ueji dianga kutunda  bhu kanga, muéne ueji Mu bhakuila kala “sata ia kuoha.” (Afundixi 11:30, 31) Ihi ilombolola o sata íii?

¹² Jihova ka xikina kuila, oha o athu kala sata. Mu kiki, Jefete keji kuoha muthu. (Matendelelu 18:9, 10) Mu Kitumu Kia Mozé, o sata ia kuoha, ia lungile ni ujitu ua kexile mu bhana kua Jihova, katé ku hádia ni hádia. Mu kiki, Jefete ua kanena kuila, muéne ueji bhana o muthu phala kusidivila Jihova mu tembulu, katé ku hádia ni hádia. Jihova uevu o musambu ua Jefete, iú ua mu kuatekesa kutolola o ita. (Afundixi 11:32, 33) Maji nanhi eji ku mu bhakula kua Jefete, phala kusidivila Jihova?

13, 14. Ihi ilondekesa o izuelu mu divulu dia Afundixi 11:35, ia lungu ni kixikanu kia Jefete?

¹³ Xinganeka mu musoso u tua tange ku dimatekenu dia milongi íii. Kioso Jefete kia tundu mu ita, o muthu ua dianga kutunda bhu kanga phala ku mu tambulula, o mon’ê umoxi ua kazola! O kuila Jefete ueji kumbidila o kikanenu kiê? O kuila muéne ueji bhakula mon’ê umoxi kua Jihova, phala ku mu sidivila mu tembulu katé ku hádia ni hádia?

¹⁴ Kala ki tua tange kiá, nange o Kitumu Kia Nzambi kia kuatekesa Jefete kubhanga o kima kia tokala. Nange muéne ua di lembalala o izuelu mu divulu dia Makatukilu 23:19, i tendelesa o mundu ua Nzambi kubhana o kima kia beta-o-kota kua Jihova. O Kitumu kizuela ué kuila, se muthu u kanena kima kua Jihova, ka tena dingi “kualuluka bhu dimi; ki kale u kumbidila kioso kia mu tundu ku dikanu diê, kiene kia bhanga.” (Dialuilu 30:2) Kála kia bhangele Hana, Jefete ua kumbidila o kikanenu kiê, sumbala uejidile kiambote ihi ieji bhita ni mon’ê ni muéne. Nange Hana ua tungile mu izuua iê. Kuma o mon’ê ueji sidivila mu tembulu, muéne keji vuala an’a. Mu kiki,  sé-ku muthu ueji lundula o dijina dia Jefete ni dibhata diê. (Afundixi 11:34) Maji né kiki, Jefete ua zuela ni muxima uoso: “Nga jikula dikanu diami kua Jihova, ki ngi tena-phe dingi kualuluka.” (Afundixi 11:35) Jihova ua xikina o sata ia dikota ia mu bhanene Jefete, anga u mu besoala. O kuila ueji londekesa o ufiiele ua londekesa Jefete?

15. Kikanenu kiahi ki tua bhange, ni kiebhi ki tu tena kulondekesa o ufiiele uetu?

¹⁵ Kioso ki tua di bhakula kua Jihova, tua kanena kubhanga o vondadi iê katé ku hádia ni hádia. Tuejidile kuila, saí bhabha, kieji bhonza kukumbidila o kikanenu kiki. Maji kiebhi ki tu divua, kioso kia tu bhinga phala kubhanga kima kia tu ibhila? Se tu xisa o hele, anga tu belesela Nzambi ni muxima uoso, tua-nda kumbidila o kikanenu kietu ni ufiiele uoso. Nange o sata i tu bhana i tu bhekela ndolo, maji o mabesá a Jihova a beta-o-kota. (Malakiia 3:10) Maji ihi i tuamba ia lungu ni mon’a Jefete? Ihi ia bhange kioso kiévu o kikanenu kia bhangele tat’ê?

16. Ihi ia bhange o mon’â Jefete, kioso kiévu o kikanenu kia bhangele tat’ê? (Tala o foto ia dianga.)

¹⁶ O kikanenu kia Jefete, ki ki difuile ni kia Hana. Hana ua kanena kubhakula mon’ê Samuuele, phala kukalakala mu tembulu kala Nazilé. (1 Samuuele 1:11) O ji Nazilé akexile mu kazala ni kuvuala an’â. Maji Jefete ua bhakula mon’ê, kala “sata ia kuoha.” Mu kiki, o mon’ê keji mona o kisangusangu kijila mu ukaza, mba kuvuala an’a. (Afundixi 11:37-40) Mu kiki, xinganeka! Nange muéne ueji kazala ni diiala dia dikota, mukonda tat’ê uexile mutuameni ua Izalaiele. Maji mukonda dia kikanenu kia bhangele tat’ê, muéne ueji kituka selevende mu tembulu. Ihi ia bhange o kilumba kiki? Muéne ua londekesa kuila, o sidivisu ia Jihova ia beta-o-kota, mu kutangela tat’ê: “Ngi bhange kioso kia tundile mu kanu dié.” (Afundixi 11:36) Muéne ua ditunu o jihanji jê ja ku sokana ni kuvuala an’a, phala kubhanga o sidivisu ia Jihova. Kiebhi ki tu tena kukaiela o ukexilu uê ua ku dibhakula?

17. (a) Kiebhi ki tu tena kukaiela o kixikanu kia Jefete ni mon’ê? (b) Kiebhi o izuelu mu divulu dia Jihebeleu 6:10-12, i ku kuatekesa ku dibhakula mu sidivisu ia Jihova?

 ¹⁷ Minzangala iavulu mu kilunga, ki kale o ahatu mba o maiala, a mu dituna o ukaza ni kuvuala an’a. Mukonda diahi? Mukonda ene a mesena kubhanga dingi mu sidivisu ia Jihova. Adiakimi avulu, a dituna ué kukala kumoxi ni an’â mba alaul’â. Ene a bhanga kiki, mukonda a mesena kubhanga dingi mu sidivisu ia Jihova. Avulu mudiâ, a kuatekesa o kikalakalu kia kutunga o ididi ia ubhezelu, mba aia mu Xikola ia Akunji. Kioso kia zubha o xikola, aia mu kuatekesa o ilunga mua bhindamena o aboki. A mukuá, a disokejeka phala kubhanga dingi mu sidivisu ia Jihova mu kithangana kia Lembalasa. Jihova ka-nda jimba o ima ioso iene mu bhanga o jiselevende jiji ja fiiele. (Tanga Jihebeleu 6:10-12.) Abha eie? O kuila ueji dituna o jihanji jê, phala kubhanga dingi mu sidivisu ia Jihova?

18, 19. Ihi i tua di longo mu musoso ua Bibidia ua lungu ni Jefete ni mon’ê, ni kiebhi ki tu tena kukaiela o phangu iâ?

¹⁸ Ihi ia kuatekesa Jefete ku dibhana ni ibhidi? Muéne uehela Jihova kuendesa o muenhu uê. Muéne ua ditunu o ukexilu ua iibha ua mundu ua mu kondolokele. Muéne ua kolokota mu ufiiele uê, né muene kioso kia mu bhangele ima ia iibha ku akuâ. Mukonda dia ku dibhakula kuê ni mon’ê, Jihova ua a besoala. Bhu kaxi kâ, muéne ua kuatekesa o athu kubhanga o ubhezelu ua kidi. Sumbala o athu a mukuá a bhuila mu kubhanga o ima ia tokala, Jefete ni mon’ê a kolokota mu ufiiele uâ kua Jihova.

¹⁹ O Bibidia i zuela: “Mu fikisa ió oso a xikana, ni muanu uâ, phala mu tambule jipolomesa mu kuxikana Nzambi ni kinhenge.” (Jihebeleu 6:12) Tu kaiele o phangu ia Jefete ni mon’ê, mu kuijiia kuila, kioso ki tu kolokota mu ufiiele uetu kua Jihova, muéne u tu besoala.