1, 2. Maka-hi a dibhanene nau phange Robert? Ihi ia bhange muene?

ROBERT a mu batizala kioso kiexile ni 15 kia mivu. Maji, kexile mu bhana valolo iavulu ku milongi ia Bibidia. Muene uambe: “Eme ki ngexile mu bhanga kima kiaiibha, maji ngexile mu kaiela ngó akuetu. Bhu pholo dia athu ng’edile kala nga kudile mu nzumbi, mukonda ngexile muia mu iônge, sai bhabha ni kusidivila kala muboki ua ithangana ni ithangana. Maji kua kambele kima.”

² Robert kexile mu mona se ihi ia kambele. Muene ua mateka ngó kutendela o kima kia kambele kioso kia kazala. Mu kubhanga o ubhezelu ku muiji, muene ni muhatu’ê akexile mu dibhanga ibhuidisu ia Bibidia. O muhatu’ê uejidile kiambote o mikanda ikola, mu kiki ua kexile mu tambuijila kiambote o ibhuidisu. Maji Robert kejidile kutambuijila o ibhuidisu ioso, mukonda dia kiki, ua kexile mu divua kiaiibha. Muene uambe: “Nga kexile mu divua kuila, ki ngejidile kima. Nga kexile mu zuela ku muxima: ‘Se nga mesena kukala ngi mutuameni ua  muhatu uami, nga tokala kubhanga kima.’” Mu kiki, muene ua bhange kima, iú uambe: “Nga mateka kudilonga ni ku tokuesa dingi o milongi ia Bibidia, mu kiki nga mateka kutendela kiambote o Bibidia. Nga mono kuila, o kima kia beta-o-kota o kukala ni ukamba uambote ni Jihova.”

3. (a) Ihi i tu tena kudilonga ku musoso ua Robert? (b) Ihi i tua-nda dilonga mu milongi iii?

³ Tu tena kudilonga madisá avulu ku musoso ua Robert. Etu tu tena kuijiia o milongi ia Bibidia, ni kuia mu iônge semana joso, ni kuboka, maji kiki ki kilombolola kuila tua kulu mu nzumbi. Mba nange tu bhanga ioso phala kukula mu nzumbi, maji kioso ki tu di tonginina kiambote tu mona kuila, tua bhingi dingi kubhanga kima. (Filipe 3:16) Mu milongi iii, tua-nda tambuijila ibhuidisu itatu: (1) Ihi ia-nda tu kuatekesa kuijiia se tua kulu mu nzumbi inga kana? (2) Kiebhi ki tu tena kukala ni kixikanu kia kolo? (3) Kiebhi o kukula mu nzumbi ku tu kuatekesa mu ima i tu sola?

4. O kitendelesu kiala mu divulu dia Efezo 4:23, 24 ki di kumbidila kua nanhi?

⁴ Kioso kia tu batizala, anga tu mateka ku sidivila Nzambi, tua lungulula ima iavulu ku muenhu uetu. Maji, o batizu dimatekenu ngó. O Bibidia i tu tangela: ‘Bilukenu kiengi mu ilunji ienu ni mu mixima ienu moxi.’ (Efezo 4:23, 24) Kuma tu akua ituxi, tua bhingi ku suluka ni ku bhilula o ukexilu uetu, né muene se kua bhiti kiá mivu iavulu tundé ki tua mateka ku sidivila Jihova. Tua bhingi hanji kubhanga nguzu phala ku kolesa o ukamba uetu ni Muene.—Filipe 3:12, 13.

5. Ibhuidisu iebhi i tena ku tu kuatekesa kuijiia se tua kulu mu nzumbi?

⁵ Kikale tu minzangala mba tu adiakime, tua bhingi ku di tonginina kiambote. Tu dibhuidisa: ‘O kuila nga mu di mona kuma nga mu kula dingi mu nzumbi? O kuila nga mu londekesa o idifua ia Kristu? Ihi i londekesa o ukexilu uami kioso ki ngiia mu iônge? O jithathe jami ji londekesa ihi ia lungu ni ima i nga-ndala ku muenhu? Ihi ilondekesa o idifua iami ia ku dilonga o Bibidia, ni ia kuzuata? Ngi divua kiebhi kioso kia ngi bazela? Ngi bhanga kiebhi kioso ki ngi dibhana ni tendasá? O kuila nga kulu kiá mu nzumbi?’ (Efezo 4:13) O ibhuidisu iii, i tu kuatekesa kuijiia se tua kulu mu nzumbi.

6. Ihi dingi ia-nda tu kuatekesa kuijiia se tua kulu mu nzumbi?

⁶ Sai bhabha tu bhinga kikuatekesu kia akuetu phala kuijiia se tua kulu mu nzumbi. O poxolo Phaulu ua jimbulula kuila, o muthu mu xitu, ka tena kutendela kuila o ukexilu uê ki u sangulukisa Nzambi. Maji o ua kulu mu nzumbi uejiia kiambote kiebhi Nzambi kia tala o ima. Uejiia kuila, Jihova ka xikina o ukexilu ua kubhanga o ima mu  xitu. (1 Kolindo 2:14-16; 3:1-3) O tufunga kuma ala ni ixinganeku ia Kristu, kioso kia tala kuila phange ka mu kuenda kiambote mu kilunga, ene a kuatekesa. Se tufunga a ku kuatekesa, o kuila ua-nda xikina ku lungulula o ukexilu uê? Se tu ki bhanga, tua-nda londekesa kuila tua mesena muene ku kula mu nzumbi.—Ndongixi 7:5, 9.

7. Kiebhi ki tuejiia kuila o muthu ua kulu mu nzumbi ki ió ngó uejiia kiambote o Bibidia?

⁷ O kukala ni kuijiia kua lungu ni Bibidia ki ku soko phala kukala tu athu a kulu mu nzumbi. Sobha Solomá uejidile ima iavulu ia lungu ni Jihova. Sai izuelu ia Solomá, iala mu Bibidia. Maji mu kubhita thembu, o ukamba uê ni Jihova ua zozele, muene kexile dingi ni kixikanu kia kolo. (1 Jisobha 4:29, 30; 11:4-6) Mu kiki, ihi dingi i tua bhingi phala kukala ni ukamba uambote ni Nzambi? Tua bhingi kusuluka ni kukolesa o kixikanu kietu. (Kolose 2:6, 7) Kiebhi ki tu bhanga kiki?

8, 9. (a) Ihi ia-nda tu kuatekesa kukala ni kixikanu kia kolo? (b) Mukonda diahi tuene mu dilonga ni kuxinganeka mu milongi ia Bibidia? (Tala o foto ia dianga.)

⁸ Ku hama ia dianga, poxolo Phaulu ua suinisa o Jikidistá ku di sunga “ku pholo, ku uadiakime.” (Jihebeleu 6:1) Kiebhi ki tu tena kukumbidila o kitendelesu kiki? Kia dianga, tua bhingi kudilonga o divulu “Kala Mu Henda ia Nzambi.” Kiki kia-nda tu kuatekesa kutendela ni kukumbidila o itumu ia Bibidia ku muenhu uetu. Se ua dilongo kiá o divulu didi, sai hanji madivulu a mukuá a tena ku kukuatekesa kukolesa o kixikanu. (Kolose 1:23) Tua bhingi ue kuxinganeka mu ima i tu dilonga, ni kubhinga kua Jihova, phala ku tu kuatekesa kumona kiebhi ki tu tena kukumbidila o milongi.

⁹ Kioso ki tu dilonga ni kuxinganeka mu milongi, tu kala dingi ni vondadi ia kusangulukisa ni kubelesela Jihova. (Jisálamu 40:8; 119:97) Tua bhingi ue kudituna kima kioso-kioso ki tu fidisa ku kula mu nzumbi.—Tito 2:11, 12.

10. Ihi i tena kukuatekesa o minzangala kukala athu a kulu mu nzumbi?

¹⁰ Se u munzangala, o kuila ua suu mbambe? Sai phange ua mu sidivila ku Betele,  mu iônge ia ilunga uene mu zuela ni minzangala ala kiá mu kitala kia kua batizala. Uene kua ebhuidisa o jimbambe jâ. Muene ua mono kuila, avulu mudiâ, a xinganeka kiá kiebhi kia mesena kusidivila Jihova ku hádia. Sai iá a banze kiá kukala mu sidivisu ia thembu ioso, mba kuia mu kididi mua bhindamena dingi aboki. Maji, amukuá kejiia luua kiebhi kia-nda sidivila Jihova. O kuila kiki kilondekesa kuma, ene ka suu hanji mbambe? Se u munzangala, dibhuidise: ‘O kuila ngene muia mu iônge ni mu sidivisu ia kuboka, mukonda dia jitata jami? Inga ngala ue ni ukamba ni Nzambi?’ Mu kidi, kikale se tu minzangala mba tu adiakime, etu enioso tua bhingi kusuua jimbambe. O jimbambe jiji, ja-nda tu kuatekesa kukolesa dingi o kixikanu kietu.—Ndongixi 12:1, 13.

11. (a) Ihi i tua tokala kubhanga phala tu kale tu athu a kulu mu nzumbi? (b) Phangu iebhi ia Bibidia i tu tena kukaiela?

¹¹ Kioso ki tu mona kuebhi ku tua bhingi kulungulula, tua tokala kubhanga lusolo phala kulungulula o ima. Kubhanga kiki, kima kia beta-o-kota mukonda kua lungu ni muenhu uetu. (Loma 8:6-8) Jihova uejiia kuila, tu akua ituxi hanji, mukonda dia kiki u tu bhana o nzumbi ikola phala ku tu kuatekesa. Maji tua tokala kusuluka mu kubhanga nguzu. O Phange John Barr, ua sidivila mu Kibuka Kia Utuminu, ua jimbulula o divulu dia Luka 13:24, iú uambe: “Athu avulu kala ni kixikanu kia kolo, mukonda ka  bhanga nguzu phala kukula mu nzumbi.” Tua tokala kukaiela o phangu ia Jakobo ua bhânge ni anju sé kubhuila katé kia tambula o dibesá. (Dimatekenu 32:26-28) Né muene kudilonga o Bibidia ku touala, ki tua tokala ku kingila kuila iene ila kala novela, kana. Tua tokala kubhanga nguzu phala kutokuesa o milongi ia zongo ia-nda tu kuatekesa ku muenhu.

12, 13. (a) Ihi ia-nda tu kuatekesa kukumbidila o divulu dia Loma 15:5? (b) Kiebhi o phangu ni kitendelesu kia Phetele ki tu kuatekesa? (c) Ihi i u tena kubhanga phala ku kula mu nzumbi? (Tala o kaxa “ Ihi i u Tena Kubhanga Phala Kukala u Muthu ua Kulu mu nzumbi?”)

¹² Se tu bhanga nguzu phala ku kula mu nzumbi, o nzumbi ikola ia Nzambi ia-nda tu kuatekesa kulungulula o ibanzelu ietu. Bhofele-bhofele tua-nda mateka kubanza kala Kristu. (Loma 15:5) O nzumbi ikola i tena ku tu kuatekesa kutolola o jihânji jaiibha ni kukala ni idifua i sangulukisa Nzambi. (Ngalásia 5:16, 22, 23) Se tu mona kuila, tua mu banza dingi ku jimbongo mba itonokenu, tua tokala kusuluka mu kubhinga kua Jihova o nzumbi ikola, phala ku tu kuatekesa kubanza mu ima ia tokala. (Luka 11:13) Lembalala ia bhiti ni poxolo Phetele. Sai ithangana kexile mu banza kala Kristu. (Matesu 16:22, 23; Luka 22:34, 54-62; Ngalásia 2:11-14) Maji Phetele ka bhuila kana, mukonda dia kiki Jihova ua mu kuatekesa. Bhofele-bhofele ua mateka dingi kubanza kala Kristu. Etu tu tena ue kubhanga kiki.

¹³ Mu kubhita thembu, Phetele ua tumbula idifua i tena ku tu kuatekesa ue. (Tanga 2 Phetele 1:5-8.) Tua bhingi kubhanga nguzu phala ku di tumina o jihânji, kukolokota, kudizola, ni kukala ni idifua ia mukuá iambote. Izuua ioso tua tokala kudibhuidisa: ‘Kidifua kiebhi ki nga tokala kulondekesa lelu, kia-nda ngi kuatekesa kukala ngi muthu ua kulu mu nzumbi?’

14. Kiebhi ki tu tena kulondekesa kuila, tua kulu mu nzumbi?

¹⁴ Se tu kala ni kixinganeku kia Kristu, o ukexilu uetu ku salu, mu xikola, o uzuelelu uetu, ni kiebhi ki tu sola o ima ku muenhu, ua-nda fuama dingi. O ima i tu sola, ia-nda londekesa se tua mu bhanga ioso phala kukaiela Kristu mba kana. Mukonda dia kukala tu athu a kulu mu nzumbi, ki tu bhange kima kieji zanga o ukamba uetu ni Jihova. O kukala muthu ua kulu mu nzumbi, kua-nda tu kuatekesa kulenga o jitendasá. Ande dia kusola kima ku muenhu, tua-nda dibhuidisa hanji: ‘Milongi iahi ia Bibidia i tena ku ngi kuatekesa ku maka iá? Ihi ieji bhanga Kristu se ua bhitile mu maka iá? Ihi ia-nda sangulukisa Jihova?’ Ku dibhuidisa kiki, kia tokala kukala kifua kietu kiá. Mu kiki-phe, tu zuele maka a tena kumoneka ku mienhu ietu. Tua-nda mona milongi ia Bibidia ia-nda tu kuatekesa kubatula o maka a tena kumoneka.

15, 16. Kiebhi o kukala ni kilunji kia Kristu ki tu kuatekesa kusola (a) o muthu u tua-nda kazala nê? (b) o makamba metu?

¹⁵ Kusola muthu phala ku kazala. Milongi ia Bibidia ia lungu ni maka iá tu i sanga mu 2 Kolindo 6:14, 15. (Tanga.) Phaulu ua londekesa kuila, muthu ua kulu mu nzumbi ka difu ni muthu mu xitu. Ene a tala o ima mu maukexilu ka difu. Kiebhi o milongi iii i kukuatekesa mu kithangana kia kusola muthu phala ku kazala?

¹⁶ Kusola o makamba metu. O milongi ia  Bibidia ia lungu ni maka iá tu i sanga mu 1 Kolindo 15:33. (Tanga.) O muthu ua kulu mu nzumbi ka-nda bhanga ukamba ni athu a tena ku zozesa o kixikanu kiê. Xinganeka kiebhi ki u tena kukaiela o milongi iii mu maukexilu avulu ku muenhu. Mu kifika, xinganeka kiebhi o milongi iii i ku kuatekesa kusola se u kala ni makamba mu internete? Kiebhi o milongi iii i ku kuatekesa kusola se u jokala mba kana ni athu ala mu jixi jengi mu kaxi ka internete?

17-19. Kiebhi o kukala muthu ua kulu mu nzumbi ku ku kuatekesa (a) kukamba ku di ta mu ima sé valolo? (b) Kusuua jimbambe jambote mu kilunga kia Nzambi? (c) kubatula maka a moneka?

¹⁷ Ima i tena ku ta o ukamba uetu ni Nzambi mu kiluezu. O milongi ia mukuá tu i sanga mu Jihebeleu 6:1. (Tanga.) O kizuelu “ibhangelu ia di fuila” ki lombolola ihi? Kifua, ikalakalu ia kambe o valolo, i tena ku tu zozesa mu nzumbi. O milongi iii ia-nda tu kuatekesa ku tambuijila o ibhuidisu kala iii: ‘O ki nga-nda bhanga kia-nda ngi bhekela mbote inga kana? O kuila nga tokala muene ku di ta mu uenji iú? Mukonda diahi ki ngi tokala ku dibunda ni ibuka ia mesena ku iudika o ukexilu ua mundu iú?’

¹⁸ Ku suua jimbambe mu kilunga. Mu diskursu dia bhange mu Mulundu Jezú ua tu bhana itendelesu iambote ia lungu ni kusuua jimbambe. (Matesu 6:33) O muthu ua kulu mu nzumbi u ta o Utuminu ua Nzambi ku pholo, ku muenhu. O milongi iii iene ia-nda tu kuatekesa kutambuijila o ibhuidisu iii: ‘O kuila nga tokala muene kubokona mu xikola ia katunda? O kuila nga tokala kuxikina salu ioso-ioso i moneka?’

¹⁹ Kioso ki moneka maka bhu kaxi ka jiphange. O itendelesu ia poxolo Phaulu ku Jikidistá akua Loma i tena ku tu kuatekesa kioso ki tu kala ni maka ni akuetu. (Loma 12:18) Tu kaiela o phangu ia Kristu kioso ki tu sota kukala “ku paze ni athu oso.” Ihi i tu bhanga kioso ki tu kala ni maka ni akuetu? O kuila kiene ku tu bhonza kuxikina o ibanzelu ia akuetu? Inga a tuijiia kala tu akua paze?—Tiiaku 3:18.

20. Mukonda diahi ua mesena kusuluka ni ku kula mu nzumbi?

²⁰ O itendelesu iii ilondekesa kuila, o itumu ia Bibidia i tena ku tu kuatekesa kusola o ima idikisa kuila, a mu tuendesa kuala o nzumbi ikola ia Nzambi. Se tu kula mu nzumbi, tua-nda sanguluka ku muenhu. Robert, tua mu tumbula ku dimatekenu, uambe: “Kioso ki ngeza mu kala ni ukamba uambote ni Jihova, nga kituka ngi munumi ni tata iambote. Lelu, nga sanguluka dingi.” Se tu bhanga ioso i tua tena phala ku kula mu nzumbi, tua-nda katula mbote javulu. Lelu, tua-nda sanguluka ku muenhu, ku hádia tua-nda tambula “o muenhu ua kidi.”—1 Timote 6:19.