“Kyoso kingadikwata ni mwebhu’ami, ngamuxina bhuxingu, ngamuphuphu kuphalelu. Ngamesenene kumujibha.”—Paul.

“Eme kubhata ngexile mufutuluka ni kama kosokoso, ngexile mubula o ima yosoyoso yexile mumaku mami, kikale itonokenu, ibaka, mba meza kubhata.”—Marco.

Eavulu mudyetu, ki twene mufutuluka kala o athu mu ifika iyadi yiyi. Maji né kiki sayi ithangana kitubhonza hanji kulanga o jihânji. Kiki kibhita mukonda twalundula o kituxi kya diyala dyadyanga, Adá. (Loma 5:12) Amoxi, kala Paul ni Marco, kya’abhonza kulanga o njinda. Amukwa kyabhonza kulanga o ixinganeku yâ. Mukifika, akala ni hele yavulu mba aluwala. O amukwa nange kyabhonza kulenga o jihânji ja kubhanga o ufusa, kunwa uholwa, ni jidroga.

O athu alembwa kulanga o ixinganeku, o jihânji ni ibhangelu yâ, atena kuzanga o mwenyu wâ. Maji etu tutena kubhanga kima, phala kikibhite n’etu. Kyebhi? Mukusota kulanga o jihânji. Phala kutukwatekesa kubhanga kiki, twanda tambwijila o ibhwidisu itatu yiyi: (1) O kuditumina o jihânji ihi? (2) Mukonda dyahi kiki kyatokala mwene? (3) Kyebhi ki tutena kukala ni kidifwa kiki kyala bhukaxi ka “ibundu iyma o nzumbi?” (Nga. 5:22, 23) Mukusuluka, twandazwela ihi itutena kubhanga se sayi kithangana tulembwa kulanga o jihânji jetu.

O muthu wala ni ukexilu wakuditumina o jihânji, k’ehela kwila jene ji mu tumina. Muveji dya kiki mwene ulanga o ukexilu wé wakuzwela ni kubhanga o ima, phala kaluwalese Nzambi.

Jezú watulondekesa se ihi ilombolola o kulanga o jihânji. O Bibidya yamba: “O kyamuxingile, kavutwile ndaka. Kya mukwamene, katele ndumu, maji mulonga wêphe wa wehela Nzambi mwenyó mukwa kufundisa kyayuka.” (1 Phe. 2:23) Jezú wa ditumina o jihânji, kyoso o jinguma kyamuxongwena, anga amuphaphe kuthaka. (Mat. 27:39-44) Ithangana kudima, mwene watumina o jihânji jê mu ukexilu wengi wabetakota, kyoso o atwameni a jingeleja kyamubhange ibhwidisu yavulu phala kusota kumutatela makutu. (Mat. 22:15-22) Watuxila we phangu yadikota, kyoso o jijude afutulukile ni njinda, anga abonga matadi phala kumutakula! Muveji dya kuvutula phonzo, “Jezú phe udisweka, anga utunda mu Tembulu.”—Nzwá 8:57-59.

O kwila tutena kukayela o phangu ya Jezú? Xé! Tutena! Poxolo Phetele wasoneka: “Mbata Kidistu kyene kyatutalela hadi, yú watuxila o phangu, phala tumukayele mu makanda.” (1 Phe. 2:21) Sumbala twakwa ituxi, etwenyoso tutena kukayela o phangu ya Jezú ya kulanga o jihânji. Mukonda dyahi etwenyoso twatokala mwene kubhanga kiki?

Etu twabhingi kuditumina o jihânji phala kusangulukisa o muxima wa Jihova. Né mwene se twamusidivila Jihova ni ufiyele woso mumivu yavulu, tutena kuzanga o ukamba wetu ni mwene se tukamba kudilanga mu ima itubhanga ni ima ituzwela.

 Tala o phangu ya Mozé, wexile o “muthu waxididika, athu oso mu ngongo ndenge,” mu thembu yê. (Dya. 12:3) Mumivu yavulu, Mozé wevwile akwa Izalayele ni mwanyu woso kyoso kyexile muzokanê. Maji mukizuwa kimoxi kyakambe kulanga o njinda, wazange o ukamba wê ni Nzambi. Mwene wexile ni njinda kyoso akwa Izalayele kyadikalanganza mukonda dya kukamba o menya! Mwene wazwela kyayibha kyoso kyambe: Enu mwabhukumuka, kindala ivwenu: manyi o mu ndanji’umu tutundisamu o menya phal’enu?”—Dya. 20:2-11.

Mozé katena kudilanga. Mwene kabhanene kijingu kwa Jihova, yò wabhange o madiwanu phala kwabhana o mwenya. (Jisá. 106:32, 33) Mukonda dya kiki, Jihova kamwehela kubokona mu Ixi ya akanene. (Dya. 20:12) Mozé kumwenyu wê woso nange wadyela mukonda dya kukamba kulanga o jihânji jê.—Mate. 3:23-27.

Disá dyebhi ditwakatula? Né mwene se twamusidivila kyá Jihova mu thembu yavulu, kitwatokala kuzwela kyayibha kwa yó atuluwalesa mba yó abhingi kwabazela. (Efe. 4:32; Kol. 3:12) Kyoso kituya ni kukuka, kibhonza dingi kulondekesa o mwanyu. Maji lembalala o phangu ya Mozé. Etu kitwamesena kuzanga o ukamba wetu ni Jihova, mukonda dya kukamba kuditumina o jihânji. Maji ihi itwatokala kubhanga phala kukala ni kidifwa kya kuditumina o jihânji?

Samba mu kubhinga o nzumbi ikôla. Mukonda dyahi? Mukonda o kuditumina o jihânji, kidifwa kibhanga mbandu ku ibundu iyma o nzumbi ikôla ya Nzambi. Jihova ubhana o nzumbi yê kwa yó amubhinga. (Luka 11:13) Bhukaxi ka nzumbi yê, Jihova utena kutubhana o kutena kutwabhindamena. (Fil. 4:13) Mwene utena kutukwatekesa kukala ni idifwa yengi ibhanga mbandu ku ibundu iyma o nzumbi ikôla, kala o henda. O henda itukwatekesa kukolokota ni kulanga o jihânji jetu.—1 Kol. 13:5.

Lenga o ima yoso ikubhonzesa kulanga o jihânji jê. Mukifika, suluka ni kudilanga ni ima iwusanga mu internete ni itonokenu itena kukubhangesa kutondala kuhádya. (Efe. 5:3, 4) Mukidi, twatokala kulenga o ima yoso itena kutubhangesa kuta kituxi. (Jisa. 22:3; 1 Kol. 6:12) Mukifika, o muthu wene mubhânga kyá ni jihanji jayibha tunde ukulu, utena kusola kwila, katokala kutanga madivulu mba kutala jifilime jiswinisa o ufusa.

Etu nange kitubhonza kukumbidila o ndunge yiyi. Maji se tubhanga nguzu phala ku ikumbidila, Jihova wanda tubhana o kutena kutwabhindamena phala kulanga o jihânji jetu. (2 Phe. 1:5-8) Mwene wanda kutukwatekesa kulanga o ixinganeku ni ibhangelu yetu. Phala kulondekesa kwila  kiki kidi, Paul ni Marco, utwatumbula kudimatekenu, adilongo kulanga o njinda yâ. Tala we phange wexile ni njinda mu ithangana yoso. Mukwendesa o dikalu, kate mwene wexile kudisokesa ni akwâ. Ihi yabhange mwene? “Eme ngexile musamba izuwa yoso ni kufulujuka. Ngexile kudilonga madivulu exile muzwela yalungu ni kuditumina o jihânji, ngexile we mubhaka jivelusu jingikwatekesa. Sumbala ngabhingile kubhanga kiki mumivu yavulu, yangikwatekesa kukala ni kutululuka mu kamene. Kuma ngamesenene kubhixila ni lusulo, ngexile mutunda selu kubhata phala kingikale mu munonono wa Makalu.”

Sayi kithangana etwenyoso tulembwa kulanga o jihânji jetu. Se kiki kibhita, nange tukala ni jisonyi ja kusamba kwa Jihova. Maji mu ithangana yiyi, yene dingi itwabhindamena kusamba kwa Jihova. Kyenyikiphe, twatokala kusota Jihova bhukaxi ka musambu ni lusololwoso. Bhinga muloloki, bhinga kikwatekesu kyê, bhanga yoso phala ki uvutuke kubhanga dingi o kitondalu kiwatele m’ukulu. (Jisá. 51:9-11) Kana kuxinganeka kwila Jihova kandakwívwa o musambu uwanda bhanga ni muxima, ni kidi kyoso. (Jisá. 102:17) Poxolo Nzwá watulembalesa kwila, o manyinga a Mon’â Nzambi ‘atuzelesa ku ituxi yetu yoso.’ (1 Nzwá 1:7; 2:1; Jisá. 86:5) Lembalala kuma, Jihova wambela ku jiselevende jê phala kudiloloka mu ithangana yoso. Kyenyikiphe, utena kudyelela kwila, mwene we wandakuloloka.—Mat. 18:21, 22; Kol. 3:13.

Jihova kasangulukile kyoso Mozé kyalembwa kulanga o njinda yê mu kikangalakata. Né kiki, Jihova wamuloloka. O Mak’â Nzambi atutangela kuma, Mozé wexile diyala dya fiyele, twatokala kukayela o phangu yê. (Mate. 34:10; Jihe. 11:24-28) Jihova k’ehela Mozé kubokona mu Ixi ya Akanene, maji Mwene wanda mwehela kutunga mu palayizu mu ixi, wanda kumubhana o mwenyu wakalelaku. Etu we tutena kukala ni kidyelelu kiki, se tusuluka ni kubhanga yoso phala kukala ni kidifwa kya kuditumina o jihânji.—1 Kol. 9:25.