1, 2. (a) Mukonda dyahi o phangu ya jiphange a kolokota mu kuboka mu ididi mwala athu avulu ka mesena kwívwa, i tu swinisa? (Tala o foto ya dyanga.) (b) Ihi ya zwela Jezú ya lungu ni kuboka mu mbambe ‘mwa twijiya kyambote’? (Tala ku lwiji.)

SERGIO NI OLINDA dikaza dya aboki a thembu yoso ku Estados Unidos. Kyadi kya a bhiti kyá ku 80 a mivu. Izuwa yiyi, inama yene mu a kata, ka mu tena dingi kwenda kyambote. Maji, kala kyene mu bhanga kyá mu mivu yavulu, mu kamene ku sambwadi dya ola, ene enda katé mu kitanda kyala mu mbanza yâ, kyene mu kwizala. Emana mu kididi kya ku kwata o maximba, a bhana madivulu ku athu a mu bhita. Athu avulu ka a bhana matwí, maji Olinda ni Sergio a kala mu kididi kyá, olela ni yó a mu a tala. Ku mediya, ni kubata, ene a vutuka kubhata dyâ. Mu kizuwa kyengi mu kamene, ku sambwadi dya ola, ene a vutuka dingi mu kididi kya ku kwata o maximba. Ene a boka kiki izuwa isamanu mu semana, muvu woso.

 ² Kwene jiphange javulu ja fiyele, ene mu kayela o phangu ya Sergio ni Olinda mu kuboka mu mivu yavulu mu mbambe yâ, sumbala athu avulu kene mu a évwa. Nange eye wene mu boka we mu mbambe kala yiyi. Se kyene, twa kuximana kyavulu, mukonda wa swina ni kuboka né mwene ni ibhidi. * (Tala ku lwiji.) O phangu yé, yene mu kolokotesa jiphange javulu, katé mwene ni yó ene mu boka kyá mu mivu yavulu. Say tufunga twa ilunga a zwela: “Kyoso ki Ngi kalakala ni jiphange ja fiyele mu sidivisu ya kuboka, phangu yâ, i bhangesa o muxima Wami kufulujuka.” “O ufiyele wâ u ngi bhangesa kukolokota ni kuswina mu ukunji wami.” “Phangu ya i ngi bhana nguzu.”

3. Ibhwidisu itatu yebhi ya-nda tambwijila o milongi yiyi?

³ O milongi yiyi, ya-nda tambwijila ibhwidisu itatu: Mukonda dyahi tu tena kuluwala? O kwima ibundu ki lombolola ihi? Ihi ya-nda tu kwatekesa kusuluka ni kwima ibundu? Kwijiya o itambwijilu ya ibhwidisu yiyi, kwa-nda tu swinisa kusuluka kubhanga o sidivisu ya kuboka ya tu bhana Jezú.

4. (a) Kyebhi kya divu Phawlu mukonda dya ukexilu wa yibha wa Jijudé? (b) Mukonda dyahi Phawlu wa divu kiki?

⁴ O kwila wa luwalele kyá, mukonda o athu mu mbambe yé ka mesenene kwívwa o njimbu ya Utuminu? Se kyene wa-nda tendela kyebhi kya divu poxolo Phawlu. Mwene wa boko mu 30 a mivu, wa kwatekesa athu avulu kukituka Jikidistá. (Ikalakalu 14:21; 2 Kolindo 3:2, 3) Maji mwene ka tena kukwatekesa Jijudé javulu kukituka Jikidistá. Mu veji dya kiki, a ditunu kwívwa Phawlu ene a betele kota. Say yá a mu zukutisa. (Ikalakalu 14:19; 17:1, 4, 5, 13) Kyebhi kya divu Phawlu ni ukexilu yú wa athu? Mwene wambe: ‘Ngala ni malamba mavulu mwene, o kukata ki kwene kubhwa mu muxima wami.’ (Loma 9:1-3) Mukonda dyahi mwene wa divu kiki? Mukonda mwene wa zolele o kuboka, wa zolele we o athu. Phawlu wa zolele o Jijudé, wa divu kyayibha kyoso ene kya ditunu o henda ya Nzambi.

5. (a) Ihi i tu bhangesa o kuboka? (b) Mukonda dyahi say ithangana ki kima kyayibha kuluwala?

⁵ Kala Phawlu, tu bokela o athu mukonda twa a zolo, twa mesena ku a kwatekesa. (Matesu 22:39; 1 Kolindo 11:1) Etu twejiya kwila, kusidivila Jihova wene o ukexilu wa mwenyu wa beta o kota, mukonda kyene ki tu divwa. Twa mesena kukwatekesa akwetu kumona kwila, se a bhanga we kiki, mwenyu wâ kyene ki wa-nda kala we! Kyene ki twene mu a swinisa kudilonga o kidi kya lungu ni Jihova ni vondadi yê phala o athu. Kiyedi kala twa mu a bhomba kuxikina kima kya yuka ki twa sumbu: ‘Nga kudyondo, xikina.’ Kinyiki kyoso ene kya dituna o ujitu, muxima u tu kata kala kya divu Phawlu. Kudivwa kiki, ki kulombolola kukamba kixikanu kana, maji kulombolola henda ya kidi ku athu. Mu kiki sumbala say ithangana tu luwala, maji tu suluka ni kuboka. Tu tena kuxikina o izwelu ya phange Elena, wexile muboki wa thembu yoso mu 25 a mivu, kyoso kyambe: “O sidivisu ya kuboka ya bhonzo mwene. Né kiki, ki kwala kikalakalu kyengi ki nga beta-o-kota o kuwabhela.”

6. Kibhwidisu kyebhi kya-nda tambwijila o milongi yiyi kindala?

⁶ Mukonda dyahi tu xikina kwila twa-nda di tunda kyambote mu ukunji wetu, kabasa kididi ku tu bokela? Phala kutambwijila o kibhwidisu kiki, tu dilonge ifika iyadi ya Jezú ilondekesa kwila twa bhingi mwene “kwima ibundu.” (Matesu 13:23) O kifika kya dyanga kya lungu ni muxi wa muvidi.

7. (a) Mu kifika kya Jezú, nanyi u lombolola o “kidimakaji,” o ‘muxi wa muvidi’ ni “jithangu?” (b) Kibhwidisu kyebhi kya-nda tambwijila o milongi yiyi?

⁷ Tanga Nzwá 15:1-5, 8. Mu kifika kiki, Jezú wa jimbulula kwila Jihova mwene o “kidimakaji,” Jezú mwene o “muxi wa muvidi,” o maxibulu mê “o jithangu.” * (Tala ku lwiji.) Mu kiki Jezú wambela o jipoxolo jê, wixi: ‘Kyene ki bhekela athu kuximana Tata yami, se enu mwima ibundu yavulu, anga mu kala jinga mu jixibulu jami.’ Ihi-phe ilombolola kwima ibundu? Mu kifika kiki, Jezú ka tumbula kima ki lombolola o ibundu yiyi, maji mwene wa bhana ndunge i tu kwatekesa kusanga o kitambwijilu kya kibhwidisu kiki.

8. (a) Mukonda dyahi o kifika kya Jezú kya lungu ni kwima ibundu, ki ki lombolola kubhanga maxibulu a ubhe? (b) Ihi i banza Jihova, kyoso kya tu bhinga kubhanga kima?

⁸ Jezú wa zwela ya lungu ni Tat’ê, wixi: “Thangu yoso yala mo mwami, maji i kamba kubhana ibundu, mwène u i batula.” Mu izwelu yengi, kifwa tu kala ngó tu jiselevende ja Jihova se twima ibundu. (Matesu 13:23; 21:43) O kwima ibundu mu kifika kiki, ki kulombolola kubhanga maxibulu a ubhe kana. (Matesu 28:19) Se kyene, o kixikanu kya jiselevende ja fiyele ka bhange luwa maxibulu kyeji difwa kála o jithangu ki jimi ibundu. Maji kiki ki kidi! Mukonda dyahi? Mukonda etu ki tu tena kujijidika o athu kukituka maxibulu. Jihova muthu wa henda. Mwene ka tu bhingi kubhanga kima se ki tu tena ku ki bhanga. Mwene u tu bhinga ngó o ima i tu tena kubhanga.—Matendelelu 30:11-14.

9. (a) Kyebhi ki twima ibundu? (b) Kifika kyebhi ki twa-nda dilonga?

⁹ Ihi ilombolola kwima ibundu? Kiki kilombolola kima ki tu tena kubhanga etu enoso. Kikalakalu kyebhi kya bhana Jihova ku jiselevende jê joso? O kikalakalu kya kuboka o njimbu yambote ya Utuminu. * (Tala ku lwiji.) (Matesu 24:14) O kifika kya Jezú kya lungu ni mukuni, kilombolola kyambote o maka enya. Kyene o kifika kya kayela ki twa-nda dilonga.

10. (a) Ihi ilombolola o mbutu ni mavu mu kifika kya Jezú? (b) O kixina kya tiliku ihi?

¹⁰ Tanga Luka 8:5-8, 11-15. Mu kifika kya mukuni, Jezú wa jimbulula kwila, o mbutu o “mak’â Nzambi,” mba o njimbu ya Utuminu wa Nzambi. O mavu o muxima wa muthu. O mbutu yó kune mu mavu ambote ya sabhuka ya bhana jindanji ya kituka muxi u bhana ithulu. Mu kiki-phe, o kixina kya bhana, “hâma ya jimbutu.” Se o kixina kyexile kya tiliku kyeji kwima ibundu yebhi? Mítwe ya tiliku? Kana, kyeji kwima jimbutu, ku pholo dya kwenda, kyeji  kula ni kukituka tiliku. Mu kifika kiki, o lumbutu lumoxi lwemi 100 ya jimbutu. O kifika kiki ki tu longa ihi ya lungu ni ukunji wetu?

11. (a) Ihi i tu longa o kifika kya mukuni kya lungu ni ukunji wetu? (b) Kyebhi ki twima jimbutu jya ubhe?

¹¹ Kyoso o jitata jetu Jikidistá mba mbangi yengi ya Jihova, kya tu longo ya lungu ni Utuminu wa Nzambi, kyedile kala exile mu kuna mbutu mu mavu ambote. Ene a sangulukile kyavulu kyoso kya mono kwila, twa xikina o njimbu. O mbutu ya suluka ni kukula katé ki ya mateka we kwima ibundu. Kala o kixina kya tiliku ki twa zwela kindala ki kiymi kixina kya ubhe, maji kibundu kya ubhe, etu ki tu bhange maxibulu a ubhe maji ibundu mba mawkexilu a ubhe. * (Tala ku lwiji.) Kyebhi ki tu bhanga kiki? Kyoso ki tu tangela akwetu ya lungu ni Utuminu wa Nzambi ithangana yoso, kifwa twa mu sokolola o mbutu ya sabhuka kyá ku muxima wetu etu twa mu i kuwa. (Luka 6:45; 8:1) Kyoso ki tuya ni kuboka o njimbu ya Utuminu wa Nzambi, twa mu “kwima ibundu ni mwanu.”

12. (a) Ihi i twa dilongo mu kifika kya muxi wa muvidi ni kifika kya mukuni? (b) Kyebhi ki u dívwa mu kwijiya o ilombolwelu ya ifika yiyi?

¹² Ihi i tu dilonga mu ifika ya Jezú ya muxi wa muvidi ni ya mukuni. Twa dilongo kwila, ki kale se athu évwa o njimbu mba kana, tu tena “kwima ibundu.” Kwa bhingi ngó tu suluka ni kuboka. Kyene we kya zwela Phawlu kyoso kyambe: “Kala muthu-phe hinu wa kà tambula o nganyu yê kwa Nzambi, kyoso kya tokala mu kukalakala kwê.” (1 Kolindo 3:8) Jihova wa-nda tu futa mukonda dya kikalakalu ki twa mu bhanga, ki kale se a tu xikina mba kana. Matilda, wexile muboki wa thembu yoso mu 20 a mivu wambe: “Kwijiya o kwila Jihova u besowala o nguzu i tu bhanga, ku ngi sangulukisa.”

13, 14. Kala kya londekesa o divulu dya Loma 10:1, 2, ima yebhi ya swinisa Phawlu kusuluka ni kuboka?

¹³ Ihi ya-nda tu kwatekesa “kwima ibundu ni mwanu”? Tu dilonge kyambote o phangu ya Phaulu. Twejiya kwila, Phawlu wa luwalele mukonda o Jijudé a ditunu kwívwa o njimbu ya Utuminu. Maji, Phawlu ka bhwila, wa suluka ni ku a bokela. Mwene wa jimbulula kyebhi kya kexile mu divwa ya lungu  ni Jijudé, kyoso kyambe: “Kya solo o muxima wami woso, o kwila mwiji wami eme-mwene a bhuluke. Eme ngene, mu ku a dyondela jinga kwa Nzambi. Mukonda eme ngi mbangi yâ kuma Nzambi a mu swinina kyavulu mwene. Maji o kuswina kwâ kwene kwa kukamba kutongoloka kwa kidi.” (Loma 10:1, 2) Ihi-phe ya bhangesa Phawlu kusuluka ni kuboka?

¹⁴ Kya dyanga, Phawlu wambe kwila, wa bokela o Jijudé mukonda ‘kyene o kima kya mesenene kubhanga ni muxima woso.’ Mwene wa mesenene kwila, ene a bhuluka. (Loma 11:13, 14) O kima kya kayadi kya tumbula mwene o “ku a dyondela jinga kwa Nzambi.” Phawlu wa dyondela kwa Jihova phala kukwatekesa o Judé joso kuxikina o njimbu ya Utuminu. Kya katatu, Phawlu wambe: “Nzambi a mu swinina kyavulu mwene.” Phawlu wa tumbula o ima yambote ya athu, yú wa xinganeka kwila, ku hádya eji tena kusidivila Jihova. Mwene wejidile kwila, o Jijudé eji tena kukituka maxibulu a Kidistu kála kya bhitile ni mwene.

15. Kyebhi ki tu tena kukayela o phangu ya Phawlu? Bhana phangu.

¹⁵ Kyebhi ki tu tena kukayela o phangu ya Phawlu? Kya dyanga, twa tokala kubhanga yoso phala kusanga “oso a a sola, a fwamena o mwenyu ki wabhwa.” Kayadi, tu bhinga kwa Jihova phala kukwatekesa o athu ala ni mixima yambote, kwívwa kyoso ki tu a bokela. (Ikalakalu 13:48; 16:14) Kiki kyene  kya bhange Silvana, wexile muboki wa thembu yoso mu 30 a mivu. Mwene wambe: “Ande dya kuya mu boka ngi bhinga kwa Jihova phala ngi kale ni ixinganeku yambote ya lungu ni athu.” Etu tu samba we phala o jyanju ku tu kwatekesa kusanga athu a mesena kwívwa. (Matesu 10:11-13; Dijingunwinu 14:6) Robert, wexile muboki wa thembu yoso mu 30 a mivu ndenge wambe: “O jyanju, ejiya yoso ya mu bhita ku myenyu ya jivizinyu jetu, ujitu wa dikota kuboka na-u kumoxi.” Katatu, tu mona o ima yambote ku athu ni kuxinganeka kwila, kupholo ene a tena kusidivila Jihova. Carl, kafunga tunde kya mu batizala kwa bhiti kyá 50 a mivu, wambe: “Ngi sota kijimbwete ki londekesa kwila o muthu mukwa kidi, se mwene wolela n’eme, u ngi tala ni ujitu mba u bhanga kibhwidisu ni muxima woso.” Se tu bhanga o ima yiyi, twa-nda tena “kwima ibundu ni mwanu,” kala kya bhangele Phawlu.

16, 17. (a) Mbote yebhi i tu tena kukatula mu divulu dya Ndongixi 11:6? (b) Kyebhi o njimbu i tu boka, i tena kutula ku mixima ya athu a tu tala?

¹⁶ O njimbu i tu boka, i tena kutula ku mixima ya athu né mwene a moneka kala ka mu twívwa. (Tanga Ndongixi 11:6.) O athu ene mu tu tala. A mona kwila, tu zwata kyambote, tu xila, tu dibhana kyambote ni athu. Say bhabha ene a diwana, o akexile mu tu xinganeka kyayibha, a lungulula o ibanzelu yá. Kyene kya mono Sergio ni Olinda.

¹⁷ Sergio wambe: “Mukonda dya uhaxi, twa bhiti tembhu yavulu sé kuya mu kitanda mu twa kexile mu boka mu kididi kya kukwata o maximba. Ki twa vutuka, o athu akexile mu bhita ebhwidisa: ‘Ihi ya bhiti? Twexile ni ngunzu.’” Ni kisangusangu Olinda wa bandekesa: “Say akwa kwendesa o maximba a tu lekela o maku, amukwa a tu handekela, ‘Kalakalenu kyambote!’ Ene katé mwene a bhingi o madivulu metu.” Say kizuwa, Sergio ni Olinda a diwana kyavulu kyoso dyala dya zukama mu kadikalalu, phala ku a bhana jifololo, yú wa a sakidila mukonda dya kikalakalu kyâ.

18. Mukonda dyahi eye wa mesena kukolokota “kwima ibundu ni mwanu”?

¹⁸ Kyoso ki u suluka, há ‘lukwaku lwê ki lu bhwila’ mu kubokela o njimbu ya Utuminu wa Nzambi ku akwenu, wa mu kwatekesa kyavulu mu kikalakalu kya “kubhana umbangi ku akwa jixi joso.” (Matesu 24:14) O kima kya beta o kota, u tena kukala ni kisangusangu mukonda wejiya kwila wa mu sangulukisa Jihova. Mwene wa zolo oso “ema ibundu ni mwanu”!