1. Mukonda dyahi Jihova mwene ngó twa tokala ku mu bheza?

JIHOVA mwene o Mubhangi, mwene wa tu bhana o mwenyu. Kyenyiki-phe, mwene ngó twa tokala ku mu bheza. (Dij. 4:11) Maji sayi kilwezu. Sumbala twa zolo Jihova, tu mu xila kyavulu, ima ya mukwa i tena kukala dingi ni valolo phala etu, anga i tu fidisa kuzola ni kubheza ngó Jihova. Kima kyambote kwijiya se kiki ki bhita kyebhi. Maji kya dyanga, tu mone se ihi ilombolola kubheza ngó Jihova.

2. Kala kilondekesa Makatukilu 34:14, ihi i twanda bhanga se tu zola Jihova ni muxima woso?

² Mu Bibidya, o izwelu kuzola Jihova ni muxima woso kyene kimoxi ni izwelu kubheza ngó Jihova. Ki twanda kwehela muthu mba kima kyoso-kyoso kutambula kokwetu, o ubhezelu wa tokala ngó kwa Nzambi.—Tanga Makatukilu 34:14.

3. Mukonda dyahi twamba kuma, twala ni ima yavulu i tu bhangesa kuzola Jihova?

³ Ima yavulu i tu bhangesa kuzola Jihova. Tu bheza Jihova mukonda dya kidi ki twa dilongo ya lungu ni mwene. Twa wabhela o idifwa yê yambote, ya yuka. I tu bhangesa kudiwana. Etu twa mwijiya, twa wabhela o ima ya wabhela, twa zembe o ima ya zembe. Twejiya we se mukonda dyahi wa tu bhange. Twala ku mbandu yê, tu mu kwatekesa ku kumbidila o vondadi yê ya lungu n’etu. Tu divwa kwila, ujitu wonene kukala tu makamba-mê. (Jisá. 25:14) Yoso i tu dilonga ya lungu ni Mubhangi wetu, i tu zukamesa dingi kwa mwene.—Tiya. 4:8.

4. (a) Dyabhu u sota kuzozesa o hanji yetu ya kubheza ngó Jihova bhu kaxi ka ima yebhi? (b) Ihi i twanda dilonga mu mbandu yiyi?

 ⁴ Dyabhu mwene wa mu kwendesa o ima ku mundu yú wayibha. Mwene u sota ku tu bhangesa kuta kituxi bhu kaxi ka jihanji ja xitu. (Efezu 2:1-3; 1 Nzwá 5:19) Mwene ka mesena kwila tu zola ngó Jihova. Wa mesena kwila tu zola we o ima yengi, kana ngó Jihova. Tu mone mawukexilu ayadi a sota kubhanga kiki. Kadyanga, mwene u tu tendala phala kusota o jimbongo mba kitadi. Kayadi, u tu funyisa kusola itonokenu yayibha.

5. Mukonda dyahi twa tokala kudilanga phala ki tu zole o kitadi?

⁵ Ki kima kyayibha kusota kitadi phala kudikila o ibhindamu ya mwenyu, kala: O kudya, izwatu ni inzo phala kukala. Maji twa bhingi kudilanga phala ki tu zole o kitadi. Avulu a tokala ku mundu wa Satanaji “lnjenji,” kifwa a zolo o kitadi ni ima ya tena kusumba. (2 Tim. 3:2) Jezú wejidile kwila, o maxibulu-mê eji bhinga kudilanga phala ka zole o kitadi. Kiki kyene kya mu bhangesa kuzwela: “Kana muthu u tena kubhikila ngana jiyadi. Mukonda bhu kala ni yú u mu zemba, o yú u mu zola; mba yú a di tuma, o yú a di bhonza. Enu we ki mu tena kubhikila Nzambi ni Mamunu (kilundu kya jimbongo).” (Mat. 6:24) O muthu wa mu bheza Jihova, maji u sota we kulunda jimbongo ja mundu yú, tu tena kuzwela kwila, wa mu sota kusidivila ngana jiyadi Mwene ka mu bheza ngó Jihova.

6. Ihi i tu dilonga mu izwelu ya Jezú ku kilunga kya Lawdiseya?

⁶ Ku disukilu dya hama ya dyanga K.K., kwexile kilunga mu mbanza ya Lawdiseya. A tokalele mu kilunga kiki exile mu dinanza kiki: “Ngi mvwama, nga mono jimbongo, yoso ngala na-yu ki nga bhindamena kima.” Maji ki kyene kyexile mu tala Jihova  ni Jezú. Jezú wa ambela: “Nga kijiya ngó kwila wala u sébhwe, wa tate! Wala u ngadyama, u kifwôfo, u mukwa tuxi!” Jezú ka a bazela mukonda dya kukala jimvwama, kana. Wa a bazela mukonda, o kuzola o kitadi kwexile mu zanga o ukamba wâ ni Jihova. (Dij. 3:14-17) Se tu tonginina kwila, ku muxima wetu twa mu mateka kuzola o jimbongo, twa tokala kubhanga kima ni lusolo, phala kulungulula o ixinganeku yetu. (1 Tim. 6:7, 8) Se tu kamba kukibhanga, muxima wetu wanda kala bhu kaxi, mbandu Jihova, mbandu o umvwama. Se kiki ki bhita, Jihova kanda xikina o ubhezelu wetu. Mwene “Nzambi ya difuba.” * (Mate. 4:24) O kitadi ki tena kukituka kima kya valolo yavulu ku mwenyu wa muthu. Kiki ki bhita kyebhi?

7-9. Ihi i wa dilonga mu phangu ya kafunga a mwixana Davidi?

⁷ Tala o phangu ya Davidi, kafunga wa tungu ku Estados Unidos. Mwene wexile mu ku kalakala kyavulu, kala kya zwela mwene. Ku salu yê exile mu mu xila kyavulu, a mu bhana ikalakalu ya katunda, mwene wala bhu kaxi ka akalakadi a beta-kota mu ixi yoso. Davidi wambe: “Mu ithangana yóyo, ngexile mu xinganeka kwila, o kijingu ni iximanu i ngexile mu tambula, exile mabesá a Jihova.” Maji o kwila exile mwene?

⁸ Mu kusuluka, Davidi wa mateka kutonginina kwila, o salu yexile mu zozesa o ukamba wê ni Jihova. Mwene wambe: “Kyoso ki ngexile mu yônge, katé mwene mu sidivisu ya kuboka eme ngexile mu xinganeka-mi mu maka a lungu ni salu, ithangana yoso. Ngexile mu nganyala kitadi kyavulu, maji nga tatele, ukaza wami ki wexile kyambote.”

 ⁹ Davidi wa mono kwila, wa tokalele kulungulula o ima yexile mu bhana dingi valolo. Mwene wambe: “Nga tonginina kwila, nga bhingile kubatula o maka ni lusolo.” Davidi wa mesenene kulungulula o ima kusalu. Kyenyiki-phe, wa zwela ni xefe yê. Wa bhingi phala ku mu sosolola o kithangana, wa mu jimbulwila kyebhi kya mesenene. Ihi ya bhiti? Davidi a mu kaye kusalu! Ihi ya bhange? Mwene wambe: “Mu kizuwa kya kayela, nga soneka o mukanda phala kusidivila kala muboki wa ithangana-ni-ithangana mu jimbeji javulu. Phala kudikila o ibhindamu, Davidi ni muhatu’ê a mateka kubhanga salu ya kukomba o jinzo. Mu kubhita kithangana, Davidi wa kituka Muboki wa thembu yoso; muhatu’ê wa mateka we kukalakala kala muboki wa thembu yoso. O dikaza didi, dya xikina kubhanga salu ya kukomba o jinzo, sumbala athu avulu ka wabhela kubhanga o salu yiyi. Mudyâ, o kya beta-kota ki o salu, kana, maji o kudibhakula mu sidivisu ya Ngana. Sumbala o kitadi kya tambula ki soka ngó dikwinyi ku hama (10%), dya kitadi kyexile mu tambula m’ukulu, ku disukilu dya mbeji a kala ni kitadi kya soko phala kudikila o ibhindamu yâ. Ene a mesena kuta Jihova kupholo. A mono kyebhi Jihova kya langa oso a ta kupholo o ibhindamu ya Utuminu.—Mat. 6:31-33.

10. Kyebhi ki tu tena kulanga o muxima wetu?

¹⁰ Kikale se tu jingadyama mba tu jimvwama, etwenyoso twa bhingi kulanga o muxima wetu. Kyebhi? Kana kuzola o mawumvwama. Kana kwehela o salu yê kukala dingi ni valolo, o ubhezelu wê kwa Jihova u kale ndenge. Kyebhi ki utena kwijiya se kiki kya mu bhita kyâ neye? Utena kudibhwidisa: ‘O kwila ngene mu xinganeka ku salu yami kyoso ki ngi kala mu yônge mba mu sidivisu ya kuboka? O kwila ngene mu tandanganya ni kuxinganeka se nganda kala ni kitadi kya soko ku hádya? O kwila o kitadi ni jimbote ja mu bhekela maka mu ukaza wami? O kwila ngi xikina kubhanga salu yene mu dituna o athu, se yene yanda ngi bhana kithangana phala kubhanga dingi mu sidivisu ya Jihova?’ (1 Tim. 6:9-12) Mu kuxinganeka mu ibhwidisu yiyi, lembalala kwila Jihova wa ku zolo kyavulu. Lembalala we mu kikanenu kya bhange kwa yó a bheza ngó mwene: “Eme nuka nga kà mi xisa, ki nga kà mi ehelela we, kana.” Kiki kyene kya bhangesa poxolo Phawulu kusoneka: “Ki mu kale mu akwa lwimbi lwa kitadi.”—Jih. 13:5, 6.

11. Ihi i tena kubhita ni muthu mukonda dya itonokenu ya sola?

¹¹ Jihova wa mesena kwila tu sanguluka ku mwenyu. O itonokenu i tena ku tu bhekela kusanguluka. O Mak’â Nzambi a tu tangela: “Manyi ki kima kyambote mwene o muthu kúdya ni kúnwa, o mwenyu wê ni u kembe mu mbote ya kikalakalu kyê?” (Ndo. 2:24) Maji, kwene itonokenu yavulu ku mundu, i tena ku tu bhanga kyayibha. I bhangesa athu kuxikina ni kuzola o ima yofidise mu Bibidya.

12. Kala kilondekesa 1 Kolindu 10:21, 22, mukonda dyahi twa tokala kusola kyambote o itonokenu yetu?

¹² Etu twa mesena kubheza ngó Jihova. Kyenyiki-phe, ki tu tokala ‘kudya ku meza ya Jihova ni ku meza ya madimonyo.’ (Tanga 1 Kolindu 10:21, 22.) Kudya kumoxi ni muthu, mu veji javulu kulondekesa ukamba. Se tu sola itonokenu ilondekesa usweya, wanga, ufusa, jihanji ni mawukexilu engi a xitu, mu kidi twa mudyâ ku meza imoxi ni jinguma ja Nzambi. Éne a lambe o kudya. O kudya kwa lambe o jinguma ja Nzambi ku tu bhanga kyayibha, kuzanga we o ukamba wetu ni Jihova.

13-14. (a) O itonokenu tu tena ku usokesa ni kudya mu ukexilu webhi? (b) Kala kilondekesa Tiyaku 1:14, 15, mukonda dyahi twa tokala kudilanga phala ki tu kale ni jihanji jayibha? Bhana phangu.

¹³ O itonokenu tu tena ku i sokesa ni kudya. Kyoso ki twa mu dya, tu tena kusola yoso i tu ta mu kanu dyetu. Maji kyoso ki tu minya kyá o kudya, o jivitamina mba jinutrientes ji bokona mu mukutu wetu. Kudya kwambote, ku tu bhekela sawidi, o kudya kwa bolo ku tu bhekela uhaxi. Mu kithangana kyenyókyo, ki tu ki mono luwa, maji tu kimona ku hádya.

¹⁴ Kyene we kimoxi ni itonokenu. Etu twala ni kutena kwa kusola yoso i twanda tonoka na-yu. Maji yoso i tu sola, i tena funyisa o kilunji ni muxima wetu. Itonokenu yambote i tu ximbakatesa, o yayibha, i tu bhekela ngó ibhidi. (Tanga Tiyaku 1:14, 15.) Ku dimatekenu ki tu mono o dikokolo dibhekela o itonokenu yayibha, maji mu kubhita kithangana, dimoneka mwene. Kiki kyene kibhangesa o Bibidya ku tu dimuna: “Kana ku di nganala, Nzambi kene ku mu tobhesa. Kuma muthu kyoso kya kuwa, kyene kyandù bhongolola. Woso u kwila ima inda o xitu, ku xitu yê wandù bhongolola kalunga. Maji woso u kunina ku ima yandala o nzumbi ya Nzambi, ku nzumbi wandù bhongolola mwenyu ki wabhwa.” (Nga. 6:7, 8) Kyenyiki-phe, twa tokala kulenga o itonokenu yoso ilondekesa o ima ya zembe Jihova!—Jisá. 97:10.

15. Phala ku tu sangulukisa, ujitu webhi wa tu bhana Jihova?

¹⁵ Avulu a wabhela kutala o JW Broadcasting^®, o televizá yetu mu internete. Sayi phange a mwixana Marilyn, wambe: “O JW Broadcasting ya ngi kwatekesa kukala ni ixinganeku yambote, ki kubhingi kudilanga kyoso ki nga mu i tala. Se nga luwala mba nga mu divwa ubheka, ngi tala diskulusu dya ubhezelu wa matina, di ngi swinisa. Ngi zukama dingi kwa Jihova ni ku kilunga kyê. O JW Broadcasting ya lungulula o mwenyu wami.” O kwila eye wa mu katula we mbote mu ujitu yú wa tu bhana Jihova? Katu-ku o milongi ya mbeji joso, mu JW Broadcasting mwala we minangu yengi ya awudyu, jividyu ni mimbu i utena kukatula.

16-17. Mukonda dyahi twa tokala kulanga o kithangana ki tu bhita mu itonokenu, ni kyebhi ki tu bhanga kiki?

¹⁶ Twa tokala kusola kyambote o ukexilu wa itonokenu yetu. Maji twa tokala kulanga we o kithangana ki tu bhita mu kutonoka. Se tu kamba kudilanga, twanda bhita dingi ithangana mu itonokenu, mu sidivisu ya Jihova ndenge. Avulu kyene mu a bhonza kulanga o ithangana ya bhita mu itonokenu. Phange a  mwixana Abigail, wala mu kitala kya 18, wambe: “Mu kithangana kya kunyoha, nga wabhela kutala televizá, kyoso ki ngi zubha o salu. Maji se ngi kamba kudilanga, ngi tena kubhita ji ola javulu ni kutala o televizá.” Phange ya munzangala, a mwixana Samuel, wambe: “Nga tonginina kwila, ngene mu tala jividyu javulu mu internete. Ngi mateka ni kutala ngó imoxi, ngi tala ya mukwá, ki ng’etwina, kwa bhiti kyá ola jitatu mba jiwana.”

¹⁷ Kyebhi ki u tena kulanga o kithangana ki u bhita ni kutonoka? Kya dyanga, wa tokala kwijiya se kindala kiki wene mu ngastala ola jikuxi mu itonokenu. Soneka o ithangana i u bhita mu itonokenu mu semana imoxi? Mu Kalendadyu soneka o ji ola ji wa bhiti ni kutala o televizá, kutokwesa mu internete, mba kujokala ji joko mu mutelembe wé wa kafwetele. Se u mona kwila wene mu ngastala ithangana yavulu, sota kubhanga yoso mu kithangana kyê. U dyanga kubhanga o ima ya beta-kota, kyene kyuwa ki u tonoka. Kayadi, bhinga kikwatekesu kwa Jihova, phala ni u dikwatenene mu programa yê. Se kyene ki u bhanga, wanda kala ni kithangana ni nguzu phala kudilonga ubheka, kubhanga o ubhezelu ku mwiji, kuya mu yônge, kuboka ni kulonga maxibulu. O jindunge jiji, janda kukwatekesa kutonoka ni kisangusangu, mukonda wanda kala ni kitongolwelu kya zele.

18-19. Kyebhi ki tu tena kulondekesa kwila twa mu bheza ngó Jihova?

¹⁸ Kya zubha kusoneka ya lungu ni disukilu dya mundu wa Satanaji ni wijilu wa mundu wobhe, o poxolo Phetele wambe: “Enu akwetu, nga mi zola, kuma mwa kinga o Kizuw’okyo, kwatenu mwanu phala ki mi sange mwala ku paze ni Nzambi, sé ngó dixaka, sé kwêla, ku mesu mê.” (2 Phe. 3:14) Se tu kayela o kitendelesu kiki, anga tu bhanga yoso phala kukala ni wendelu wambote, ni kuzela mu nzumbi, twanda londekesa kwila, twa mu bheza ngó Jihova.

¹⁹ Satanaji ni mundu wê, anda suluka ni ku tu tendala phala ni tu te ima yengi kupholo, mu veji dya ubhezelu kwa Jihova. (Luka 4:13) Maji twa dyelela kwila, sumbala ni ibhidi i tu dibhana na-yu, ki twanda kwehela muthu mba kima kyoso-kyoso kutambula kokwetu, o ubhezelu wa tokala ngó kwa Nzambi. Ni muxima woso, twa mesena kubheza ngó Jihova, mukonda kya mu tokala!