1-2. (a) Kwa kambe ngó o jinguvulu ja mundu anda bhanga ngolokela yahi? (b) Ibhwidisu yebhi ya bhingi kitambwijilu?

XINGANEKA kwila, o jinguvulu ja ngongo ja bhange kyá o ngolokela ya kwila “kwa batama, kwa tululuka.” Ene a tena kuzwela kwila, mu ngongo ki mwala dingi kilwezu. Kutululuka ngó. O ifuxi yanda mesena ku tu dyelelesa kwila, ene a tena kuzubha o maka mu ngongo. Maji mu kidi, ene kala ni kutena kwa kulenga o izulukutu yanda kayela! Mukonda dyahi? Kala kya kanena o Bibidya, “a kà tukumuka kibwika kyâ kya tula! . . . “kana bhuma bhwa bhitila n’a lenge”—1 Tes. 5:3.

² Kyenyiki-phe, sayi ibhwidisu ya bhingi kitambwijilu: Ihi yanda bhita mu kithangana kya “hadi ya dikota?” Jihova wanda mesena kwila tu bhanga ihi mu kithangana kya hadi ya dikota? Ni kyebhi ki tu tena kudipelepalala kindala phala ni tu tene kukala fiyele mu kithangana kya hadi ya dikota?—Mat. 24:21.

3. Kala kilondekesa Dijingunwinu 17:5, 15-18 Nzambi wanda bwika kyebhi o “Babilonya ya Dikota”?

³ Tanga Dijingunwinu 17:5, 15-18. “Babilonya ya Dikota” anda i bwika! Kala ki twa tumbula kudimatekenu, o ifuxi ki yanda tena kulenga o izulukutu yanda bhita mu kithangana kiki. Mukonda dyahi? Mukonda “Nzambi [wa kà ta] ku mixima yâ, o kubhanga kya mu kala mu kilunji kyê.” Kixinganeku kyahi? O kixinganeku kyala ku muxima wa Nzambi, o kubwika o jingeleja joso ja makutu, kumoxi ni Kidistandade. * Nzambi wa kà ta  o kixinganeku kyê ku muxima wa “kwinyi dya lumbinga” dya “kyama kya kusuka.” O kwinyi dya lumbinga ilombolola o jinguvulu jene mu kwatekesa o “kyama kya kusuka,” kifwa, o ji Naçôes Unidas. (Dij. 17:3, 11-13; 18:8) O hadi ya dikota yanda mateka, kyoso o jinguvulu jiji kyanda lungulukila o jingeleja ja makutu. Kiki, kizulukutu kya dikota! Kyanda bhekela ibhidi ku athu oso mu ngongo.

4. (a) Nange ihi yanda bhangesa o jinguvulu ja mundu ku bwika o jingeleja ja makutu? (b) Nange ihi yanda bhanga o athu a tokalele mu jingeleja jiji?

⁴ Etu ki twejiya se ima yahi yanda bhangesa o ifuxi kubwika Babilonya ya Dikota. Nange ene anda zwela kwila, o jingeleja ja mu fidisa o kutululuka, ja mu di ta kyavulu mu maka a jinguvulu. Mba a tena kuzwela we kwila, o jingeleja jala ni jimbote javulu. (Dij. 18:3, 7) Tu tena kuxinganeka kwila, o kibwika kya Babilonya ya Dikota, ki kilombolola kwila, o athu oso a bhanga mbandu ya jingeleja jiji anda ku a bwika. Mu veji dya kiki, nange o ifuxi yanda bwika ngó o isangela ya jingeleja. Kyoso kyanda bwika o jingeleja, o athu a tokalele-mu anda mona kwila, manyi o atwameni-mâ a lémbwa. Anda bhanga yoso phala ku tunda mu jingeleja jâ.

5. Ya lungu ni hadi ya dikota, ihi ya kanena Jihova ni mukonda dyahi?

⁵ O Bibidya ki ijimbulula o kithangana kyanda laleka o kibwika kya Babilonya ya Dikota. Maji twejiya kwila, ki kyanda laleka lwavulu. (Dij. 18:10, 21) Ya lungu ni kithangana kya hadi ya dikota Jihova wa tu kanena kwila “o izuwa yenyóyo” mwene wa kà “i tolesa” mukonda “dya yó a a solo.” O ubhezelu wa kidi, wanda nangenena. (Mar. 13:19, 20) Maji ihi yanda mesena Jihova ko kwetu tunde kudimatekenu dya hadi ya dikota katé mu Alumajedone?

6. Mukonda dyahi kubatula o ukamba ni jingeleja ja makutu ki ku soko?

⁶ Kala ki twa dilongo mu milongi ya tundu-mu, Jihova wa mesena kwila, o abhezyê a di kexidila, ka tokala kudilunga ni Babilonya ya  Dikota. Maji mwene ka mesena ngó kwila, tu batula o ukamba ni jingeleja ja makutu. Wa mesena we kwila tu zokela ni nguzu yoso o ubhezelu wa kidi, o ubhezelu wa zele wa Jihova. Twa tokala kubhanga kiki mu mawukexilu ayadi.

7. (a) Kyebhi ki twa tokala kusuluka ni kuzokela o itumu ya Jihova ya lungu ni wendelu wa muthu? (b) Kyebhi Jihebelewu 10:24, 25 i jimbulula o mbote ya yônge yetu, benge-benge mu izuwa ya lelu?

⁷ Kya dyanga, twa tokala kusuluka ni kuzokela o itumu ya Jihova ya lungu ni wendelu wa muthu. Ki twa tokala kukayela o wendelu wa bolo wa mundu. Mu kifika, etu ki tu xikina o mawufusa a mundu, kala o kifwa kya diyala kukazala ni diyala, mba muhatu ni muhatu. (Mat. 19:4, 5; Loma 1:26, 27) Kayadi, twa tokala kusuluka ni kubheza kumoxi ni Jikidistá ni akwetu. Tu bhanga kiki, mu Kididi kya Ubhezelu, ku mabhata a jiphange jetu mba kididi kyengi, né mwene mu kaswekele. Etu ki twehela o ibhidi ku tu fidisa kudyongeka phala kubheza Nzambi. Mu kidi twa bhingi kudyongeka “kota-kota dingi kyoso ki [tu] mona o Kizuwa kya Ngana kí zukama.”—Tanga Jihebelewu 10:24, 25.

8. Nange o njimbu i twa mu boka lelu, ku hádya yanda kala kyebhi?

⁸ Mu kithangana kya hadi ya dikota, o njimbu i twanda tula nange yanda lunguluka. Lelu, twene mu boka o njimbu yambote ya Utuminu ni kubhanga maxibulu. Maji mu kithangana kya hadi ya dikota, nange twanda zwela sé kubhana jihonda. O Bibidya i sokesa o njimbu yiyi ni m’vula ya matadi. (Dij. 16:21) Nange twanda boka o njimbu ya kwila kwa kambe ngó o mundu wa Satanaji anda u bwika. Kyanda bhixila o kithangana, twanda kwijiya o njimbu i twanda boka ni kyebhi ki twanda i boka. O kwila twanda i boka kala ki twene mu i boka tunde ukulu? I nga twanda boka mu ukexilu wengi? Ki twa kijiya. Maji twejiya ngó kwila, twanda kala ni ujitu wa kuboka o njimbu ya Jihova ya kufundisa!—Ize. 2:3-5.

9. Nange kyebhi kyanda divwa o ifuxi kyoso kyanda kwívwa o njimbu yetu? Maji ihi i tu tena kudyelela ni kidi kyoso?

⁹ O njimbu yetu nange yanda bhekela njinda ku ifuxi ya ngongo. Ene anda mesena kufidisa o kikalakalu kyetu kya kuboka. Ku hádya twanda bhinga kudyelela kwa Jihova, kala ki twa dyelela lelu. Mwene wene mu tu kwatekesa kuboka o njimbu yambote. Tu tena kudyelela kwila, Nzambi yetu wanda tu bhana o nguzu i twa bhindamena phala kukumbidila o vondadi yê.—Mik. 3:8.

10. Kala kya kanena Luka 21:25-28, kyebhi kyanda divwa o athu mu kithangana kya hadi ya dikota?

¹⁰ Tanga Luka 21:25-28. Mu kithangana kya hadi ya dikota athu anda sasumuka kyoso kyanda mona kwila, o ima yoso yexile mu mona kuma yeji nangenena, ya mateka kubhwa. Ene anda kala ni “mukôndo,” anda thandanganya kwila anda fwa mu kithangana kiki kya bhonzo. (Sof. 1:14, 15) Mu kithangana kyenyókyo, o mwenyu wanda bhonza dingi, né mwene phala o mundu wa Jihova. Kuma etu ki tu bhange mbandu ya mundu yú, nange twanda tala hadi. Nange sayi ima i twanda bhindamena.

11. (a) Kyoso kyanda bwika o jingeleja ja makutu, mukonda dyahi o athu ni jinguvulu ja mundu anda lunga o muxima ku Jimbangi ja Jihova? (b) Mukonda dyahi ki twa bhingi kukala ni wôma wa hadi ya dikota?

¹¹ O athu a tokalele mu jingeleja jo bwike, anda kala ni dixinga, mu kumona kwila o Jimbangi ja Jihova ya a bhanga hanji o kikalakalu  kyâ. Sé phata ene anda londekesa o njinda ya tu kwatela, bhu kaxi ka internete ni mawukexilu engi a minangu. Kuma etu ngó twanda subhuka-ku, o ifuxi ni mutumini wê, Satanaji, anda tu zemba. Kuma ene a lembwa kukumbidila o mbambe yâ ya kubwika o jingeleja joso ja ngongo, anda lungila o muxima wâ kokwetu. Mu kithangana kiki, o ifuxi yanda kituka Ngongo dya Mangongo. * Ene anda dyongeka phala kubhânga ni mundu wa Jihova. (Ize. 38:2, 14-16) Nange tu tena kuthandanganya mukonda ki twejiya yoso yanda bhita mu kithangana kya hadi ya dikota. Maji ki twa bhingi kukala ni wôma wa hadi ya dikota. Jihova wanda tu bhana itendelesu yanda tu bhulula o mwenyu. (Jisá. 34:19) Etu twanda tena “kwimana, ni kubhetula o mítwe [yetu],” [nwt] mukonda twanda kwijiya kwila o “kubhuluka kwetu kwa zukama.” [nwt] *

12. “O kimbadi kya fiyele kya dimuka” kya tu pelepalala kyebhi phala ni tu kale fiyele ku hádya?

¹² “O kimbadi kya fiyele kya dimuka” kya tu pelepalala phala ni tu kale fiyele mu kithangana kya hadi ya dikota. (Mat. 24:45) A bhange kiki mu mawukexilu avulu, kala o yônge ya makota ya mivu 2016-2018. Kuma o kizuwa kya Jihova kya zukama, o madiskulusu a yônge yóyo, a tu swinisa kukolesa o idifwa i twanda bhinga phala kubhuluka. Tu bhitulule bhofele o idifwa yiyi.

13. Kyebhi ki tu tena kukolesa o ufiyele wetu kwa Jihova ni mukonda dyahi twa tokala kubhanga kiki kindala?

¹³ Ufiyele: O kyônge kya dikota kya muvu wa 2016, kyexile ni dyambu “Kolokota mu Ufiyele wê kwa Jihova!” O madiskulusu a kyônge kiki, a tu longo kwila, se tu kolesa o ukamba wetu ni Jihova, twanda tena kukala fiyele kwa mwene. A tu lembalesa we kwila, tu tena kuzukama kwa Jihova bhu kaxi ka misambu ni kutanga o Maka-mê izuwa yoso. Kubhanga kiki, kwanda tu bhana nguzu phala kutolola katé mwene o ibhidi ya bhonzo kyavulu. Kyoso mundu yú wa Satanaji ki uya ni kuzukama ku disukilu dyé, tu tena kukingila ibhidi ya bhonzo dingi, yanda lola o ufiyele wetu kwa Nzambi ni ku Utuminu wê. Nange o athu anda suluka ni ku tu sebhulula. (2 Phe. 3:3, 4) Kiki kyanda bhita benge-benge mukonda ki twene mu kwatekesa o mundu wa Satanaji. Kindala kyene o kithangana phala kukolesa o ufiyele wetu, phala tu tene kukolokota mu kithangana kya hadi ya dikota.

14. (a) Ya lungu ni jiphange endesa o kikalakalu ku mundu woso, ihi yanda lunguluka? (b) Mukonda dyahi twanda bhinga kulondekesa o ufiyele mu kithangana kiki?

¹⁴ Mu kithangana kya hadi ya dikota, sayi kima kyanda lunguluka, ya lungu ni jiphange ja mu kwendesa o kikalakalu ku mundu woso. Ande dya Alumajedone, o Jikidistá a a undu anda subhuka mu ngongo, anda kwa ambata ku dyulu, phala kubhânga ku ita ya Alumajedone. (Mat. 24:31; Dij. 2:26, 27) Kiki kilombolola kwila, o Kibuka kya Utuminu ki kyanda kala dingi n’etu mu ngongo. Maji né kiki, o mundu wavulu wanda suluka mu kukala ni muxima umoxi. Jiphange ja tokala ku jimbudi ja mukwá, ene anda kwendesa o  kilunga. Twanda bhinga kulondekesa o ufiyele wetu mu kukwatekesa o jiphange jiji ni kukayela o itendelesu ya tambula kwa Nzambi. O kubhuluka kwetu, kwanda kwijila mu kubelesela o jiphange jiji!

15. Kyebhi ki tu tena kubandekesa o kukolokota kwetu ni mukonda dyahi twa tokala kubhanga kiki kindala?

¹⁵ Kukolokota: O kyônge kya dikota kya muvu wa 2017, kyexile ni dyambu “Kana Kubhwila!” O Madiskulusu a kyônge kiki, a tu kwatekesa kubandekesa o uhete wa kukolokota mu ibhidi. Twa dilongo kwila, o kukolokota kwetu ki kwijila mu ima ya mu bhita ku mwenyu wetu. Tu bandekesa o kukolokota kwetu mu kudyelela kwa Jihova. (Loma 12:12) Ki tu jimbe o kikanenu kya Jezú: “Woso-phe u kolokota katé bhu dizubhilu, mwène wà [ka] bhuluka.” (Mat. 24:13) O kikanenu kiki, kilombolola kwila, twa tokala kukolokota sumbala ni ibhidi i tu dibhana na-yu. Se twenda jinga ni kukolokota mu ibhidi i moneka kindala, twanda kala dingi ni nguzu kyoso kyanda mateka o hadi ya dikota.

16. Ihi ilondekesa se tu athu a swina mba kana? Kyebhi ki tu tena kukolesa o kuswina kwetu kindala?

¹⁶ Kuswina: O kyônge kya dikota kya muvu wa 2018, kyexile ni dyambu “Kála u Muthu wa Swina!” O madiskulusu a kyônge kiki, a tu lembalesa kwila, o mawuhete metu ki ene a londekesa se tu athu a swina mba kana. Phala kukolokota, twa bhingi kudyelela kwa Jihova. Kyene kimoxi we ni kuswina. Phala kukala ni kuswina kwa kidi, twa bhingi kudyelela kwa Jihova. Kyebhi ki tu tena kubandekesa o kidyelelu kyetu kwa Jihova? Mu kutanga o Maka-mê ni kuxinganeka kyebhi Jihova kya bhulula o mundu wê m’ukulu. (Jisá. 68:20; 2 Phe. 2:9) Kyoso o ifuxi kyanda kwiza mu bhânga n’etu ku hadi ya dikota, twanda bhinga kuswina ni kudyelela kwa Jihova, m’ukulu ndenge. (Jisá. 112:7, 8; Jihe. 13:6) Se tu dyelela kyá kwa Jihova kindala, twanda kala dingi ni kuswina kyoso Ngôngo kyanda kwiza mu bhanga n’etu. *

17. Yalungu ni Alumajedone mukonda dyahi ki tu bhingi kukala ni wôma? (Tala o foto ya kapa.)

¹⁷ Kala ki twa mono mu milongi ya tundu-mu, avulu mudyetu a vwala ya a mu kudila mu  izuwa ya sukidila-ku. Maji etu twala we ni kidyelelu kya kubhuluka ku hadi ya dikota. O ita ya Alumajedone yanda kala o disukilu dya ima yoso ya ibha, mukonda, yanda bwika o mundu wa Satanaji. Maji ki tu bhingi kukala ni wôma. Mukonda dyahi? Mukonda yiyi yanda kala ita ya Nzambi. Etu ki twanda bhingi kubhânga. (Jisa. 1:33; Ize. 38:18-20; Zak. 14:3) Kyoso kyanda bhixila o kithangana kya Jihova, Jezú Kidistu wanda kwendesa o ilômbo yeta ya Nzambi, phala o ita. Ku mbandu yê kwanda kala o Jikidistá a a undu a a fukununa kyá, ni mazunda ni mazunda a ji anju. Kumoxi, ene anda bhânga ni Satanaji, o madimonyo ni masoladi a ifuxi ya ngongo.—Dan. 12:1; Dij. 6:2; 17:14.

18. (a) Ihi mwene ya tu kanena Jihova? (b) Kyebhi Dijingunwinu 7:9, 13-17 di tu bhana kidyelelu kyambote kya lungu ni hádya!

¹⁸ Jihova wa tu kanena kwila: “Falamenda yoso-yoso yòbhange phala ku ku kwama, ya-nda kulweza.” (Iza. 54:17) Bhu kaxi ka abhezi a fiyele a Jihova, “mundu wavulu” wa ka ‘tunda mu hadi ya dikota’ ni mwenyu! Ene anda suluka ni ku mu sidivila. (Tanga Dijingunwinu 7:9, 13-17.) Sé phata, o Bibidya i tu bhana kidyelelu kyambote kya lungu ni hádya! Etu twejiya kwila, Jihova Nzambi, “Ngana u tambula konda ya jifiyele.” (Jisá. 31:23) Oso a zolo Jihova, anda sanguluka kyavulu mu kumona kwila, o dijina dikola dya Nzambi a di zelesa.—Ize. 38:23.

19. Mbote yahi i twanda tambula ku hádya?

¹⁹ Xinganeka hanji: Kyebhi kyeji kala o izwelu ya 2 Timote 3:2-5 se yexile mu jimbulula o athu ku mundu wobhe, sé o kifunyisu kya Satanaji? (Tala o kaxa “ Kyebhi Kyanda Kala o Athu ku Hádya?”) Phange George Gangas, * wa sidivila mu Kibuka kya Utuminu, wa ki jimbulula mu ukexilu yú: “O ixi yanda kala kidi kya fwama, kyoso athu oso kyanda bheza ngó Jihova, oso anda kala jiphange! Kwa kambe ngó, eye wanda tambula o ujitu wa kukala ku mundu wa ubhe. Jihova kanda kukwehela kufwa. Twanda kale ni mwenyu wa kalela-ku.” Sé phata, kiki kidyelelu kya katunda!