Sayi phange a mwixana Sala, * wambe: “Eme ngi mukwa jisonyi, ki nga di dyelela kyavulu. Kyenyiki, ki ngi divwami kyambote bhu kaxi ka athu a di dyelela kyavulu, azwela yoso ya xinganeka. Maji ngi divwa kyambote bhu kaxi ka athu a batama, alenduka. O athu ala ni ukexilu yú, ngi tena kwa tangela kyebhi ki ngi divwa, se hele. Nga atangela we o ibhidi yami. O makamba mami a muxima, o athu a difu kiki.”

O izwelu ya Sala ilondekesa kwila, se tu kala athu a batama, akwetu anda mesena kukala makamba metu. O kubatama, kusangulukisa we Jihova. O Maka-Mê a tu tendelesa: “zwatenu muxima . . . ni kubatama.” (Kol. 3:12) Maji-phe, o kubatama ihi? Kyebhi Jezú kya londekesa o kubatama? Kyebhi o kidifwa kiki kitena kubandekesa o kusanguluka ku mwenyu wetu?

O kubatama, kidifwa ki ukala nakyu ku muxima, kyoso ki ukala u muthu usota o kutululuka. O muthu wabatama, utalatala akwâ ni kilendu, ni henda. Utululuka, né mwene se ima ikwatesa njinda, ibhita ku mwenyu wê.

O kubatama, ki kijimbwete kya muthu wazoza, mba wa kambe o nguzu, kana. O kizwelu mu Ngeleku, kyolungulule kubatama, a kitumbula we phala kulombolola kabhalu ka muxitu, ka longo phala kudibhana kyambote ni athu. O nguzu ya kabhalu, yale hanji mu ifuba. Maji kuma a ka longo ni mwanyu woso, kene kabheleketa. Kyene we kimoxi n’etu. Kyoso ki tulondekesa o kubatama, kifwa, tu bheleketesa o kubhuma kwa tu vwala naku, anga tu tululuka, tu dibhana kyambote ni akwetu.

Maji nange tu xinganeka: ‘Eme ki ngi muthu wabatama’. Mu ngôngo mu twala, athu avulu indanda, kene ni mwanyu. Kiki, ki tu bhonzesa kyavulu kulondekesa o kubatama. (Loma 7:19) Kyenyiki-phe, kubhinga nguzu phala kukala muthu wabatama, maji o nzumbi ikôla ya Jihova yanda ku tu kwatekesa kukala tu athu abatama. (Nga. 5:22, 23) Mukonda dyahi twa tokala kubhanga yoso phala kukala tu athu abatama?

O kubatama kidifwa kibhangesa o athu ku tu zukama. Kala kyambe Sala, a mu tumbula kudimatekenu, etu tu divwa kyambote kyoso ki tu kala bhu kaxi ka athu abatama, alenduka. Jezú phangu yakatunda mu kulondekesa o kubatama, wexile muthu wambote. (2 Kol. 10:1) Sumbala o tumbonga ka wabhela kukala ni muthu woso-woso, ene exile mu divwa kyambote kumbandu ya Jezú.—Mál. 10:13-16.

 O kubatama ku tu langa, kulanga we o athu a tu kondoloka. Se tu kala tu athu abatama o muxima, ki twanda futuluka ni lusolo mba kukala ni njinda. (Jisa. 16:32) Ki twanda luwalesa akwetu. Kyenyiki, ki twanda ditatela ku muxima mukonda dya kuluwalesa o athu u twa zolo. Akwetu anda katula we mbote, mukonda anda divuwa kyambote kumbandu yetu, mukonda tu langa o wendelu ni uzwelelu wetu, phala ki tu bhange kima kya a xixima ku muxima.

Sumbala Jezú wexile ni ikalakalu yavulu, mwene wexile mu londekesa o ukexilu wê wabatama ku athu oso. Mu thembu yê, o athu exile mu dibhana ni ibhidi yabhonzo ya tûndu o nguzu yâ, abhingile kiximbakatesu. Sé phata, ene adivu kyambote kyoso Jezú kya ambela: ‘Zenu kokwami, . . . mukonda nga batama, nga lenduka muxima’!—Mat. 11:28, 29.

Ihi i twa tokala kubhanga phala kubatama, kala kyexile Jezú? Twa tokala kudilonga o Mak’â Nzambi, phala kumona kyebhi Jezú kya talatala o athu, ni kyebhi kya dibhana ni ibhidi yabhonzo. Mu kusuluka, kyoso ki tu dibhana ni bhidi ilola o kubatama kwetu, twa tokala kubhanga nguzu, phala kubhanga o ima kala kyeji bhanga Jezú. (1 Phe. 2:21) Tala ima itatu ya kwatekesa Jezú kulondekesa o kubatama.

Jezú wexile muthu walenduka o muxima. Jezú wambe kwila, wexile muthu wa ‘batama’, wa ‘lenduka o muxima.’ (Mat. 11:29) O Bibidya itumbula o idifwa iyadi yiyi kumoxi, mukonda o kubatama kwenda kumoxi ni kulenduka. (Efe. 4:1-3) Kiki kibhita kyebhi?

O kulenduka ku tu kwatekesa phala ki tu divwe kyayibha ni kama koso-koso kabhanga akwetu. Kyebhi Jezú kya dibhana ni athu ambele kwila, mwene wexile “kidyakhaji, hôlwa”? Mwene wehela o phangu yê yambote kujika o makanu a athu a mu tatela o makutu. Ni kulenduka kwoso, mwene wambe kwila, ‘o unjimu a u tongolola bhu kaxi ka ibhangelu yê.’—Mat. 11:19.

Se kukala muthu u kubhanga kasekelu mukonda dya kikonda kyê, mukonda udiyala mba muhatu, mba-phe mukonda dya ijila ya ixi yê, sota kutambwijila ni kubatama kwa muxima. Phetele, kafunga mu ixi ya Africa do Sul, wambe: “Se ngi futuluka mukonda dya kima kya bhange mba kya zwela mukwetu, eme ngi dibhwidisa, ‘Kyebhi Jezú kyeji dibhana ni maka yá?’” Mwene wambe dingi: “Nga dilongo kwila, ki nga tokala kudixinganeka kyavulu.”

Jezú wejidile kwila, o athu akwa ituxi. O maxibulu a Jezú amesenene kubhanga o ima yatokala, maji mukonda dya kukamba o kuyuka, mu veji javulu ka tenene kubhanga o ima yatokala. Mu kifika, mu usuku ande dya kufwa kwa Jezú, Phetele, Tiyaku, ni Nzwá alembwa kutona o mesu, kala kya abhingile kwala Jezú. Jezú waxikina ni kidi kyoso kwila, o “nzumbi ya mesena kubhânga ni jitendasá, maji o xitu ya bhwila.” (Mat. 26:40, 41) Kuma wa tendelela o kukamba o kuyuka kwâ, Jezú ka futuluka ni jipoxolo jê.

Sayi phange amwixana Madiya, m’ukulu wexile ni kifwa kya kulongolola mba kuzwela kyayibha ku akwâ. Maji lelu wa mu sota kukayela o kubatama kwa Jezú. Mwene wambe: “Ngi sota kuxikina kwila, o athu akwa ituxi mu mawukexilu oso. Ngi bhanga we nguzu phala kutala o idifwa ni ima yambote ibhanga akwetu. Kyene kibhanga we Jihova.” O ukexilu wa Jezú wa kwijiya kwila, o athu akwa ituxi, wa tokala ku tu kwatekesa kulondekesa o kubatama, mu kudibhana ni akwetu.

Jezú wehela o maka bhu maku a Nzambi. Kyoso kyexile mu ixi, Jezú wa kolokota mu itatesu yoso ya bhitile nayu. Mwene a mu tendela kyayibha, a mu sebhulula, a mu tutula. Né kiki, mwene wa londekesa jinga kubatama, mukonda “mulonga wê wa wehela Nzambi, mukwa kufundisa kyayuka.” (1 Phe. 2:23) Jezú wejidile kwila, Tat’ê ya dyulu, weji mu langa, weji kaxtikala oso a mu talatala kyayibha, mu kithangana kya tokala.

Se a tu talatala kyayibha, anga tu thathamana, twanda bandekesa ngó dingi o maka metu. Kiki kyene kibhangesa o Bibidya ku tu lembalesa, kwila: “o kuthathamana kwa muthu, ki ku bheka kima ki wabhela Nzambi.” (Tiya. 1:20) Né mwene se twa lungu mu kukala ni njinda, o kukamba o kuyuka, kutena ku tu bhangesa kuzwela mba kubhanga kima kyayibha.

Sayi phange amwixana Katidi, ku Alemanha, wexile mu xinganeka kiki: ‘Se ukamba kudizokela, séku muthu wanda kuzokela.’ Maji o ixinganeku yê yalunguluka, kyoso kya mateka kudyelela dingi kwa Jihova. Mwene wambe: “Ki nga bhingi dingi kudizokela. Ngi londekesa kubatama, mukonda ngejiya kwila, Jihova wanda yudika o ima yoso yayibha mu ngôngo mumu.” Se a ku talatala kyayibha, ejiya kwila, kukayela o phangu  ya Jezú, mu kudyelela kwa Nzambi, kwanda kukwatekesa we kulondekesa jinga o kubatama.

Jezú wambe kwila, se twa mesena kuzediwa ku mwenyu, twa tokala kubatama mba kulenduka. Mwene wambe: “A zediwa alenduka mba a batama.” (Mat. 5:5) Tala se kyebhi, o kubatama ku tu kwatekesa mu ithangana yiyi ya ibhidi.

O kubatama kutululukisa o ukaza, kyoso ki kumoneka maka. Sayi phange amwixana Betu ku Austrália, waxikina ni kidi kyoso kwila: “Eme nga zwela ima yavulu ixixima ku muxima, kwa muhat’wami. Maji o kima ki wa zwela kyá se kuxinganeka, ki utena dingi ku kijima. Nga divu kyayibha, kyoso ki nga mono kwila, nga luwalesa kyavulu muhat’wami.”

‘Etwenyoso twene mu tondala mu ithangana yavulu’ mu kuzwela kwetu. O ima i tu zwela se kuxinganeka, itena kubhekela ibhidi mu ukaza wetu. (Tiya. 3:2) Mu ithangana yiyi, o kubatama ku tu kwatekesa kutululuka ni kulanga o dimi dyetu.—Jisa. 17:27.

Betu wa bhange yoso phala kutululuka ni kudilanga. Ihi yabhiti? Mwene wambe: “Lelu, kyoso ki kumoneka tu maka mu ukaza wetu, ngi sota kwívwa kyambote, kuzwela ni kubatama, ngi bhanga yoso phala ki ngi thathamane. Kindala o ukamba ni muhat’wami wala dingi kyambote, m’ukulu ndenge”

O kubatama ku tu kwatekesa kudibhana dingi kyambote ni akwetu. Oso a dizangala ni lusoso, kala ni makamba avulu. Maji o kubatama-phe, ku tu kwatekesa ‘ku di bhaka . . . mu dijikita dya paze.’ (Efe. 4:2, 3) Phange Katidi, twa mu tumbula kudima, wambe: “O kubatama, ku ngi kwatekesa kuwabhela kukala ni akwetu, katé mwene ni athu yó abhonzo-ku bhofele.”

O kubatama ku tu bhekela kutululuka kwa muxima. O Bibidya isokesa “o unjimu u tunda bhulu” ni kubatama ni kutululuka. (Tiya. 3:13, 17) O muthu wabatama, ukala ni kutululuka mba “muxima wa batama.” (Jisa. 14:30) Phange Martins, wa bhange yoso phala kukala muthu wabatama, wambe kiki: “Kindala, ki ngene mu jijila dingi kwila, o ima a ibhanga kala ki nga mesena. Lelu, ngala ni kutululuka kwa muxima, nga zediwa dingi ku mwenyu.”

Mu kidi, kubhinga hanji kubhanga jinga nguzu, phala kukala tu athu abatama. Sayi phange wambe: “Mu kuzwela o kidi, né mwene kindala kiki, sayi ithangana ngene mu fuluka hanji ni njinda.” Maji Jihova, u tu swinisa kukala tu athu abatama, wanda ku tu kwatekesa mu nguzu i tu bhanga. (Iza. 41:10; 1 Tim. 6:11) Mwene utena ku tu “tenesa”, ni ku tu “swinisa.” (1 Phe. 5:10) Kala kya bhitile ni Phawulu, mu kubhita kithangana, etu we twanda tena kulondekesa mu kizuwa ni kizuwa, o ‘kubatama ni henda ya Kidistu.’—2 Kol. 10:1.