1. Kyebhi ki tu tena kukala ni unjimu? O unjimu u tu kwatekesa kyebhi?

O UNJIMU u tunda kwa Jihova. Mwene u u bhana ku athu. O divulu dya Tiiaku 1:5 dyamba: “Se say muthu mudyenu wa kambe unjimu, a u bhinge Nzambi, mwène anga u mu bhana-u. Mbata mwène ubhana kyavulu, mukwa kwila ene oso u a bhana ni vondadi, kene mu bawla.” Tu tena kukala ni unjimu mu kuxikina ku tu bazela kwa Nzambi. Kubhanga kiki ku tu bhangesa kulenga o mubhetu wa kuluwalesa Jihova, ku tu kwatekesa kukala fiyele kwa mwene. (Jisabhu 2:10-12) Twa-nda kala ni kidyelelu kya mwenyu wa kalelaku.—Juda 21.

2. Kyebhi ki tu tena kuzola ku tu bazela kwa Nzambi?

² Mukonda dya kukamba o kuyuka, mba o ukexilu wa tu sase, say bhabha, kubhonza kuxikina ku tu bazela mba kumona kwila, ku tu bazela kulondekesa henda. Maji se tu tendela o mbote ijila mu ku tu bazela kwa Nzambi, twa-nda mona kwila, mwene wa tu zolo kyavulu. O divulu dya Jisabhu 3:11, 12, di tu tangela: ‘Mon’ami o kulonga kwa Jihova ki ku ku kwate usudi . . . Kuma Jihova, woso wa mu zola u mu longa.’ Tu tena kudyelela kwila, Jihova wa mesena o mbote  yetu. ( Tanga Jihebeleu 12:5-11.) Kuma Nzambi wa twijya kyambote, o ukexilu wê wa ku tu bazela wa fwama, wene mwene u twa bhindamena. Mu milongi yiyi, twa-nda dilonga ima iwana ya lungu ni kubazela: (1) kudibazela mba kuditumina, (2) o kibazelu kya tokala kubhana o jitata ku twana twâ, (3) o kibazelu ki tu tambula mu kilunga, ni (4) ihi i tu bhekesa dingi ndolo, o ku tu bazela kwa Jihova ndenge.

3. Kyebhi o kambonga ka tena kwijiya o kudilanga? Bhana phangu.

³ Se tu kala ni kifwa kya kudibazela, twa-nda langa o ukexilu wetu ni ixinganeku yetu. Ka tu vwala ni ukexilu wa kudibazela etwene, maji twa bhingi kudilonga-nakyu. Mu kifika, Se kambonga ka mu dilonga kwendesa bixi, o tata mba o mama u kwata o bixi phala ka dibhale. Maji mu ku bhita thembu, wenda ni kumwehela kya bhofele. Kupholo, ka bhingi dingi kukwata o bixi, o jitata a mwehela kyá sé hele. Kyene wê kimoxi kyoso o jitata kya bazela ni kinhenge kyoso o ana. Mu ‘ku a longa kyoso kya tumu Jihova,’ ene a a kwatekesa kubandekesa o ukexilu wâ wa kudilanga ni kukala ni unjimu.—Efezo 6:4.

4, 5. (a) Kyebhi ki twejiya kwila, o kuditumina kubhanga mbandu ya “muthu wobhe?” (b) Mukonda dyahi ki tu bhingi kuluwala se tu lweza?

⁴ Kyene we kibhita ni athu yó a dilonga ya lungu ni Jihova mu ukota. Sumbala ala kyá ni ukexilu wa kudibazela, ene ka kulu luwa mu nzumbi. Maji kyoso kya mateka kukayela o idifwa ya “muthu wobhe” anga a bhanga yoso phala kukayela Kidistu, ene a kula mu nzumbi. (Efezo 4:23, 24) O ukexilu wa kudibazela, u tu kwatekesa ‘kweha o kubhuma ni jihânji jayibha ja mundu, phala twende mu ngongo mwenhumu ni kilunji, ni kuyuka.’—Tito 2:12.

⁵ Maji etu enyoso tu akwâ ituxi. (Ndongixi 7:20) O kwila kulweza kulombolola kwila, ki twejiya kuditumina jihânji? Kana. O divulu dya Jisabhu 24:16, dizwela: “O muthu wa yuka, né wa dibhale lusambwadi, ubalumuka.” Ihi ya-nda tu kwatekesa ‘kubalumuka dingi?’ Ki tu balumuka mu nguzu yetu kana, maji ni kikwatekesu kya nzumbi ikola ya Nzambi. (Tanga Filipe 4:13; 2 Kolindo 4:7.) O kibundu kyima o nzumbi yiyi, kya lungu we ni kuditumina jihânji, kidifwa kya difu ni kudibazela.

6. Kyebhi ki tu tena kukala tu adilongi ambote a Mak’â Nzambi? (Tala o foto ya dyanga.)

⁶ Kusamba, kudilonga o Bibidya ni kuxinganeka mu milongi i tu dilonga, kwa-nda tu kwatekesa kukala ni kilunji mba kuditumina o jihânji. Abha se u mona kwila ku bhonza kudilonga o Bibidya mba kuwabhela ku ki bhanga? Kana kubhwila. Dyelela kwila, se u mwehela ku kukwatekesa, Jihova wa-nda kubhangesa ‘kuwabhela’ o Maka mê. (1 Phetele 2:2) Bhinga kwa Jihova phala ku kukwatekesa kukala ni kilunji, u tene kusota kithangana kya kudilonga o Bibidya. U tena kumateka kudilonga ithangana yofele. Ku pholo dya kwenda, ki kwa-nda ku bhonza dingi, maji wa-nda wabhela kyavulu kudilonga. Wa-nda sanguluka kyavulu mu kukatula kithangana phala kuxinganeka mu ibanzelu ya katunda ya Jihova.—1 Timote 4:15.

7. Kyebhi o kuditumina ku tu kwatekesa kukumbidila o jimbambe ji twa xindi mu sidivisu ya Jihova?

⁷ O kukala ni kilunji ni kusokejeka kyambote o kithangana kyetu, kwa-nda tu kwatekesa  kuxinda jimbambe mu kilunga kya Jihova. Mu kifika, say tata wa mono kwila wa kexile mu zoza mu nzumbi, mukonda dya kiki, mwene wa xindi mbambe ya kukala muboki wa thembu yoso. Kyebhi o kukala ni kilunji kwa mu kwatekesa? Mwene wa tange milongi mu madivulu metu ya lungu ni sidivisu ya thembu yoso, yú wa sambe ya lungu ni maka enyá. Kubhanga kiki, kwa mu kwatekesa kukala dingi ni ukamba wambote ni Jihova. Mwene wa mateka kukalakala kala muboki wa ithangana ni ithangana. Phang’yetu kehela kima kyoso-kyoso ku mu fidisa, mu veji dya kiki, wa suluka mu kusuwa o kikalakalu kya mesenene. Mu kubhita ithangana, wa kituka muboki wa thembu yoso.

8-10. Phala o twana kusidivila Jihova ihi i tena kubhanga o jitata? Bhana phangu.

⁸ Jihova wa bhana ku jitata o kikalakalu kya kusasa o twana ‘kyoso kya tumu Jihova.’ (Efezo 6:4) Kubhanga kiki kubhonza kyavulu mu izuwa yetu. (2 Timote 3:1-5) Kyoso o ana kya a vwala, kejiya kutungula o ima yambote mu ima yaybha, ene we kala luwa ni kilunji. Mu kiki, a bhingi kwa longa kyebhi kya tena kubhanga kiki. (Loma 2:14, 15) Say mukwa kutokwesa o Bibidya  wambe kwila, o kizwelu “kulonga” mu Ngeleku kilombolola we “o ukudilu wa mona,” mba kusasa o mona phala kukala mwadyakimi wa sungu o kilunji.

⁹ Kyoso o jitata kya longa mba kya bazela o twana ni henda, o twana a divwa kyambote. Ene a mona, bhebhi bhu suka o ufôlo wâ, ni kwila, yoso ya bhanga yala ni futu yê. Mu kiki, kima kyambote phala o jitata Jikidistá kudyelela mu unjimu wa Jihova phala kwa kwatekesa kusasa o twana twâ. O ukexilu wa kusasa o twana ki u difu mu ididi yoso, u lunguluka we. Maji, o jitata ji belesela Nzambi, kala dingi ni phata se ihi ya tokala o kubhanga mba se a bhingi kudyelela mu nguzu yâ, ni mu ibanzelu ya athu.

¹⁰ Tu tena kudilonga ku phangu ya Nowé. Kyoso Jihova kya mu tangela phala kutunga o alaka, Nowé kejidile kyebhi kyeji i bhanga. Mwene wa bhingile kudyelela kwa Jihova. O Bibidya yamba kwila, mwene wa bhange kala kya mu tumu Jihova. (Dimatekenu 6:22) Ihi ya bhiti? O alaka ya bhulula o mwenyu wa Nowé ni wa mwiji wê! Nowé wexile tata yambote. Mukonda dyahi? Mukonda wa dyelele mu unjimu wa Nzambi. Nowé wa longo kyambote an’ê, wexile we phangu yambote phala ene, sumbala kya bhonzele kyavulu mu thembu yoyo.—Dimatekenu 6:5.

11. Mukonda dyahi o jitata a bhingi kubhanga nguzu phala kulonga kyambote o twana?

¹¹ Se u tata, kyebhi ki u tena kubhanga “kala kya tumu Nzambi?” Ivwa Jihova. Mwehele na ku kwatekesa kusasa o twana twê. Kayela o itendelesu ya Maka-Mê ni kilunga Kyê. Kupholo, mon’e wa-nda ku sakidila kyavulu! Say phange wa soneka: “Ngi sakidila o jitata jami mu ukexilu wa ngi sase. A bhange yoso phala ku ngi longa kyambote.” Mwene wambe kwila, jitata jê a mu kwatekesa kuzukama kwa Jihova. Maji, né mwene o jitata ja bhange yoso, se o mon’a ka dilange, u tena hanji kubhana dikunda kwa Jihova. Maji o tata ya bhange yoso ya tena phala kulonga mon’ê, wa-nda tululuka ni kudyelela kwila mon’ê hádya wa-nda vutuka kwa Jihova.

12, 13. (a) Se mona a mu kaye mu kilunga, kyebhi o jitata kya tena kulondekesa kwila a belesela Nzambi? (b) Kyebhi mwiji kya katula mbote mukonda dya jitata kubelesela Jihova?

¹² Say jitata, kyoso o mona kya mu kaya mu kilunga, kibhonza kyavulu kubelesela. Say phange ya muhatu wambe: “Nga kexile mu sota milongi mu madivulu metu phala kubhita kithangana ni mon’ami, ni mulawl’ami.” Maji mwadi wê, ni henda yoso wa mu kwatekesa kumona kwila, mon’ê wa kulu kyá, mwene kyá u sola. Ene a tokala kulondekesa ufiyele kwa Jihova.

¹³ Mu kubhita mivu, mon’a wa vutuka mu kilunga. Mama yambe: “Lelu mwene wene mu ngi xinda ni ku ngi tumikisa jinjimbu izuwa yoso! U tu xila mukonda twa kexile ngó mu belesela Nzambi.” Se mon’e a mu kaya mu kilunga, o kwila wa-nda “dyelela kwa Jihova ni muxima wé woso”? O kwila wa-nda Mu londekesa kuma, ‘kudyelela mu kilunji kyé?’ (Jisabhu 3:5, 6) Lembalala kwila o kibazelu kya Jihova kilondekesa o kwijiya ni henda yê kokwetu. Kana kujimba kwila, mwene wa bhana Mon’ê Jezú phala kubhulula o athu; kiki kya lungu we ni twana twé. Nzambi wa mesena kwila, etwen’iyoso tu tambula o mwenyu wa kalelaku. (Tanga 2 Phetele 3:9.) Mu kiki, jitata, né mwene kya bhonzo kubelesela, dyelelenu  kwila o kibazelu ni itendelesu ya Jihova yene ya beta-o-kota. Belesela o kibazelu kya Nzambi kana kudituna-kyu.

14. Mbote yebhi i tu katula mu milongi ya Jihova i tu bhana o ‘kimbadi kya fiyele?’

¹⁴ Jihova u kanena kulanga, ni kulonga o kilunga kyê. Mwene u bhanga kiki mu mawkexilu avulu. Mu kifika, mwene wa bhana kwa Mon’ê o kikalakalu kya kulanga o kilunga. Mu kiki, Jezú wa bhana ku ‘kimbadi kya fiyele’ o kikalakalu kya kubhana o kudya mu nzumbi phala ku kwatekesa o Jikidistá kukolokota mu ufiyele wâ. (Luka 12:42) O ‘kimbadi’ kiki, ki tu bhana itendelesu ya katunda. Nange eye u tena kuxinganeka o kithangana ki wevu diskursu mba wa tangele milongi mu madivulu metu, ya ku kwatekesa kulungulula o ibanzelu yê ya lungu ni kima, mba kubhanga kima mu ukexilu wa tokala. U tena kusanguluka mu kulungulula o ukexilu wé, mukonda kiki ki londekesa kwila, wa mu kwehela Jihova ku kubazela mba ku kulonga.—Jisabhu 2:1-5.

15, 16. (a) Mbote yebhi i tu katula mu kikalakalu kya tufunga? (b) Kyebhi ki tu tena kubhebhulukisa o kikalakalu kya tufunga?

¹⁵ Jezú Kidistu wa solo tufunga, tu langa o kilunga ni henda yoso. O Bibidya izwela kwila o jiphange jiji ‘mawjitu a mayala.’ (Efezo 4:8, 11-13) Kyebhi ki tu tena kukatula mbote mu kikalakalu kya tufunga? Tu tena kukayela o kixikanu kyâ, ni phangu yambote ya bhana. Tu tena we kubhanga kiki, mu ku kumbidila o itendelesu ya tu bhana bhu kaxi ka Bibidya. (Tanga Jihebeleu 13:7, 17.) O tufunga a tu zolo, a mesena kwila tu kala ni ukamba wambote ni Nzambi. Se a mona kwila twa mu fonga mu yônge mba twa mu zoza mu sidivisu yetu kwa Nzambi, ene a sota ku tu kwatekesa ni lusolo. Ene a-nda twívwa ni mwanyu, a-nda tu swinisa ni henda, ni ku tu bhana itendelesu ya unjimu bhu kaxi ka Bibidya. O kwila u mona o kikwatekesu kyâ kala kilondekesu kya henda ya Jihova?

¹⁶ Lembalala kwila, nange kibhonza phala o tufunga ku tu bhana itendelesu. Mu dyê, kyebhi kya divu o polofeta Natane kyoso kyay mu zwela ni Sobha Davidi, kya tele kituxi yú wa mesenene ku ki sweka? (2 Samuuele 12:1-14) Twejiya kwila Phetele wa tokalele mu kibuka kya 12 kya jipoxolo akexile ku pholo. Mu kenyiki xinganeka kyebhi kya divu poxolo Phaulu kya bhingile ku mu bhana itendelesu mukonda dya kutalatala dingi kyambote o Jijudé, akwâ jixi jéngi ndenge? Kwa bhingile kuswina phala Phaulu kubhanga kiki. (Ngalásia 2:11-14) Mu kiki, kyebhi ki u tena ku bhebhulukisa dingi o kikalakalu kya tufunga kya kubhana itendelesu? Kala u muthu wa lenduka, londekesa kisakidilu, kana kukala u muthu wa bhonzo phala kuzwela n’eyé. Sota kumona o kikwatekesu kyâ kala kilondekesu kya henda ya Nzambi. Se u bhanga kiki, wa-nda katula mbote yavulu, o tufunga a-nda sanguluka we mu kubhanga o kikalakalu kyâ.

17. Kyebhi o tufunga twa kwatekesa phangy’a muhatu?

¹⁷ Say phange ya muhatu wambe kwila, kya mu bhonzele kuzola Jihova, mukonda dya ibhidi ya dibhanene na-yu m’ukulu. Mwene wa kexile ni kikote ku muxima. Mwene wambe: “Nga kijidile kwila, nga tokalele kuzwela ni tufunga. Ene ka ngi tatela kana, maji a ngi swinisa, a ngi kolokotesa.  Semana joso ku disukilu dya yônge ene akexile mu ngi’bhula kyebhi ki ngexile mu divwa, né mwene se a kexile ni ikalakalu yavulu. Mukonda dya ima yokulu, nga kexile mu divwa kwila, ki nga fwamene ku ngi zola kwa Nzambi. Bhofele-bhofele bhu kaxi ka jiphange ja kilunga ni tufunga, Jihova wa ngi londekesa kwila wa ngi zolo. Ngene mu samba phala ki ngi mu xise dingi.”

18, 19. Ihi i beta ku tu bhekela ndolo, o kibazelu kya jihova ndenge? Bhana phangu.

¹⁸ Ku dimatekenu, o kibazelu ki tena ku tu bhekela ndolo, maji o ibhidi ijila mu kudituna o kibazelu kya Nzambi ya beta-o-kota. (Jihebeleu 12:11) Tu tena kudilonga ku phangu yayibha ya Kayni ni Sobha Zedekiya. Kyoso Nzambi kya mono kwila, Kayni wa zembele phang’yê, yú wa mesenene ku mu jibha, mwene wa dimuna Kayni: “Eye njinda yahi i wala na-yu? wa sonokena-hi o pholo? Se u bhanga kyambote, manyi ka ku xikina? Ki wila-phe u bhanga kyayibha, kituxi kya ku batamena bhu mwelu; kya ku hamena kwene, maji eye wa tokala u ki tumina.” (Dimatekenu 4:6, 7) Kayni wa ditunu o kibazelu kya Jihova, wa jibha phang’yê, yu wa mono ibhidi yavulu ku mwenyu. (Dimatekenu 4:11, 12) Se Kayni wa bhanene mátwi kwa Nzambi, hinu ka bhitile mu ibhidi.

¹⁹ Zedekiya wexile muthu wayibha, mukwa wôma. Kyoso kyexile Sobha o athu mu Jeluzaleme, a tale hadi yavulu. Mu veji javulu Jelemiya wa dimuna Zedekiya kwila, wa bhingile kulungulula o ukexilu wê. Maji mwene wa ditunu o kibazelu kya Jihova, kyenyiki wa bhiti mu ibhidi. (Jelemiia 52:8-11) Jihova ka mesena kwila, tu bhita mu ibhidi yoso yiyi!—Izaia 48:17, 18.

20. Ihi ya-nda bhita ni athu a xikina o kibazelu kya Nzambi ni yó ka ki xikina?

²⁰ Mu izuwa ya lelu, athu avulu ka bhana mátwi ku itendelesu ni kibazelu kya Nzambi. Maji kwa kambe bhofele, oso a dituna o itendelesu ya Nzambi, a-nda bwika. (Jisabhu 1:24-31) Mu kiki, ‘twividilenu kya tu longa, ni tu dimuke.’ O divulu dya Jisabhu 4:13 dyamba: “O ulongelu wa ku kubazela, ku wehe; lunda-u mwene, kuma wene o mwenyu wé.”