MBANDU YAKUDILONGA 7
Sota Kutendela o Ungana Wala Nawu o Tufunga Mukilunga
‘Kidistu o mutwameni wakilunga, ni mubhuludi wamukutu.’—EFE. 5:23.
MWIMBU 137 Ahatu a Fiyele
ITWANDADILONGA *
1. Mukonda dyahi omundu wa Jihova adibhana kyambote, ala ni kutululuka?
TWAWABHELA kubhanga mbandu yamundu wa Jihova. Mukonda dyahi omundu wa Jihova watululuka, adibhana kyambote? Mukonda etu enyoso tubhanga yoso phala kuxila yó a abhana ungana kwala Jihova. Mukidi, kyoso kitutendela kyambote o kijila kiki, tudibhana dingi kyambote.
2. Ibhwidisu yebhi itwandatambwijila mumilongi yiyi?
2 Mumilongi yiyi twandamona se ananyi ala ni ungana mukilunga. Twandatambwijila we o ibhwidisu yiyi: Kikalakalu kyahi kyabhana Jihova kujiphange ja ahatu mukilunga? Okwila ojiphange joso jamala ala atwameni a jiphange joso ja ahatu? Okwila o ungana walanawu otufunga mukilunga wene umoxi ni ungana walanawu o jitata kubhata? Kyadyanga, twandadilonga kyebhi kitwatokala kumona ojiphange ja ahatu mukilunga.
KYEBHI KITWATOKALA KUMONA OJIPHANGE JETU JA AHATU?
3. Ihi yandatukwatekesa kubhana dingi valolo mukikalakalu kyenemubhanga ojiphange jetu ja ahatu?
3 Etu twawabhela okikalakalu kyoso kyene mubhanga o jiphange jetu ja ahatu phala kulanga o mwiji, kuboka onjimbu yambote ni kukwatekesa okilunga. Setuxinganeka kyebhi Jihova ni Jezú kya amona, twandakwabhana valolo yavulu. Tutena we kukatula mbote mukudilonga kyebhi opoxolo Phawulu kyakexile mutalatala o ahatu.
4. Kyebhi o Bibidya ilondekesa kwila Jihova umona o ahatu ni mayala mu ukexilu umoxi?
4 O Bibidya ilondekesa kwila Jihova umona o ahatu ni mayala mu ukexilu umoxi. Mukifika, mu izuwa yajipoxolo, Jihova wabhana onzumbi yê ikôla ku ahatu ni kumayala phala kubhanga madiwanu, kala okuzwela mumadimi avulu. (Ika. 2:1-4, 15-18) Kikale mayala ni ahatu, ene mwa unda ni nzumbi ikôla phala kukala ni kidyelelu kyakutumina ni Kidistu kudyulu. (Nga. 3:26-29) Ahatu ni mayala andatambula odibesá dyakukala ni mwenyu wakalelaku mu ixi. (Dij. 7:9, 10, 13-15) Okikalakalu kyakuboka ni kulonga onjimbu yambote akibhana kumayala ni ahatu. (Mat. 28:19, 20) Mukifika, odivulu dya Ikalakalu dizwela yalungu ni phange yamuhatu amwixana Pidisila. Mwene ni munumye, Akwila, ajimbulula kyambote okidi kyamaka a Nzambi ku Apolo, diyala wadilongele kyavulu.—Ika. 18:24-26.
5. Odivulu dya Luka 10:38, 39, 42 dilondekesa ihi yalungu ni ukexilu wa Jezú wa kutalatala o ahatu?
5 Jezú wexile muxila o ahatu ni kwabhana kijingu. Mwene kadifwile ni Jifalizewu. Exile muzwela kwila omayala abetakota mukukala ni valolo, o ahatu ndenge. O Jifalizewu kexile muxikina kuzwela ni ahatu bhukaxi kamundu, kexile we muxikina kuzwela yalungu ni Mak’â Nzambi ni ahatu. Maji Jezú kexile mubhanga kiki, mwene walongo o Mak’â Nzambi kikale ku ahatu ni mayala. * (Tanga Luka 10:38, 39, 42.) Kyoso kyayi muboka mujimbanza, mwene wehela we o ahatu kumuxinjikila. (Luka 8:1-3) Jezú wabhana we ku ahatu o ujitu wakutangela kujipoxolo kwila mwene amufukununa.—Nzwá 20:16-18.
6. Kyebhi poxolo Phawulu kyalondekesa kwila wexile muxila o ahatu?
6 Poxolo Phawulu watendelesa Timote kubhana kijingu ku ahatu. Phawulu wamutendelesa kutalatala “o ikulakaji ya ahatu kala mama, ni ana-ilumba kala jiphange.” (1 Tim. 5:1, 2) Phawulu wabhange ima yavulu phala kukwatekesa Timote kukala diyala dyakulu munzumbi. Maji Phawulu wejidile kwila Timote adyangele kumulonga o “Mikanda Ikôla” kwa manyâ ni kukwê yamuhatu. (2 Tim. 1:5; 3:14, 15) Mumukanda ku akwa Loma, Phawulu wamenekena jiphange ja ahatu mukutumbula omajina mâ. Phawulu kexile mumona ngó okikalakalu kyakexile mubhanga ojiphange jiji ja ahatu, maji wexile we mwaximana mukikalakalu kyoso kyexile mubhanga kala akunji a Utuminu.—Loma 16:1-4, 6, 12; Fil. 4:3.
7. Ibhwidisu yebhi itwandatambwijila?
7 Séku velusu mu Bibidya ilondekesa kwila omayala abetakota o ahatu ndenge. Ojiphange jetu ja ahatu akwatekesa kyavulu okilunga ni tufunga, phala mukilunga mukale okutululuka, ni kudibhana kyambote. Maji sayi ibhwidisu yabhingi ku itambwijila. Kala yiyi: Mukonda dyahi sayi ithangana Jihova ukingila kwila o ahatu avunga omutwe? Kuma ojiphange jamala ene ngó ene mwasola phala kukala tufunga ni akwatekexi atufunga, okwila kiki kilombolola kuma ojiphange joso jamala ala atwameni ajiphange joso ja ahatu mukilunga?
OKWILA OJIPHANGE JOSO JAMALA ALA ATWAMENI AJIPHANGE JOSO JA AHATU?
8. Kala kilondekesa Efezu 5:23, okwila ojiphange joso jamala ala atwameni ajiphange joso ja ahatu? Jimbulula.
8 Kana ngana! Séku phange wala mutwameni wajiphange joso mukilunga. Kidistu, mwéne ngó omutwameni wa athu oso. (Tanga Efezu 5:23.) Kumwiji, odiyala mwéne omutwameni wamuhatwê. Omona adiyala nemwene se amubatizala kya, kimutwameni wa manyâ. (Efe. 6:1, 2) Mukilunga, o ungana watufunga kujiphange ja ahatu ni jamala, wala ni mbambe. (1 Tes. 5:12; Jihe. 13:17) Ojiphange ja ahatu, akudi, kamutunga dingi ni jitat jâ, atokala kusuluka kuxila ojitata jâ ni tufunga. Maji kala omayala mukilunga, ene ala ngó ni mutwameni umoxi, Jezú.
Akudi Jezú mwéne omutwameni wa akudi oso atundu kya kumabhata ajitata jâ (Tala okaxi 8)
9. Mukonda dyahi sayi ithangana o ahatu abhinga kuvunga omútwe?
9 Mukidi, Jihova wene musola mayala phala kukala kupholo mu ubhezelu ni mukikalakalu kyakulonga mukilunga, mwene kene mubhana okikalakalu kiki ku ahatu. (1 Tim. 2:12) Mukonda dyahi? Mukonda dyakima kya mubhangesa kusola Jezú phala kukala omutwameni wamayala—kifwa, phala okilunga kyende ni kuyuka. Sayibhabha, ophange yamuhatu nange wabhingi kubhanga kikalakalu kyatokalele kukibhanga kuphange yadiyala. Mu ithangana yiyi Jihova ukingila kwila omuhatu uvunga omutwe. * (1 Kol. 11:4-7) Jihova utuma o ahatu kubhanga kiki, phala ene kulondekesa kwila axila yó a abhana o ungana kwa Jihova. Kiphala kwabhangesa kudivwa kwila kala ni valolo mba kwaxongwena, kana. Kyenyiphe tutena kya kutambwijila okibhwidisu kiki: Ungana wahi wala nawu o atwameni amiji ni tufunga?
O UNGANA WA ATWAMENI AMIJI NI WATUFUNGA
10. Mukonda dyahi sayi bhabha okafunga utena kubanza kuta ijila yê mukilunga?
10 Otufunga azolo Kidistu, ene azolo we “ojimbudi” ja abhana Jihova ni Jezú phala kujilanga. (Nzwá 21:15-17) Kuma okafunga ulanga okilunga, sayibhabha utena kubanza kwila, mwene tata yajiphange mukilunga. Kyenyikiphe mwene utena kubanza kwila, kala otata ubhana ijila phala kulanga omwiji wê, okafunga nange utena we kubhana ijila mukufika kwila yene yandalanga omundu wa Nzambi. Sayi jiphange jamala ni ja ahatu, aswinisa otufunga kubhanga kiki mukwabhinga phala kubatula maka mukididi kyâ. Maji okwila o ungana watufunga mukilunga wene umoxi ni ungana wa atwameni amiji?
Otufunga alanga ojiphange munzumbi ni kwabhangesa kudivwa kwila a azolo. Jihova wa abhana okikalakalu kyakuzelesa okilunga (Tala ojikaxi 11-12)
11. Mu ukexilu webhi o ungana wa atwameni amiji wadifu ni watufunga?
11 Poxolo Phawulu walondekesa kwila o ungana wamutwameni wamwiji sayi bhabha wadifubhofele ni ungana walanawu otufunga. (1 Tim. 3:4, 5) Mukifika, Jihova wamesena kwila o athu atokala kumwiji abelesela omutwameni wamwiji. (Kol. 3:20) Mwene we wamesena kwila o yó ala mukilunga, abelesela otufunga. Jihova ukingila kwila, kikale o atwameni amwiji, kikale otufunga, alonga kyambote yó a abhana phala kwalanga, na zole Jihova. Maji kiyadi kyâ atokala kubhangesa o athu amulanga kudivwa kwila a azolo. Kala kibhanga o atwameni ambote amiji, otufunga asota kukwatekesa we yó amudibhana ni maka mba ibhidi. (Tiya. 2:15-17) Jihova ukingila we kwila kikale otufunga, kikale o atwameni amiji, akwatekesa akwâ kukayela o itumu Yê. Mwene u adimuna phala ‘kasomboke o ima yoso yosoneke’ mu Bibidya.—1 Kol. 4:6.
Atwameni amiji Jihova wa abhana o ungana wa kwendesa omijiyâ. Ande dyakusola mba kubatula maka, omutwameni wamwiji wahenda, udyanga kudizwelesa ni muhatwê (Tala okaxi 13)
12-13. Kala kilondekesa Loma 7:2, mu ukexilu webhi o ungana walanawu o atwameni amiji kiwadifu ni watufunga?
12 Maji o ungana wamutwameni wamwiji ni watufunga kiwadifu mumawukexilu avulu. Mukifika, Jihova wenemusola tufunga phala kufundisa, yu wa abhana okikalakalu kyakukaya mukilunga omukwa ituxi wakambe okudyela.—1 Kol. 5:11-13.
13 Sayi kikalakalu kyabhana Jihova ku atwameni amiji, maji otufunga kana. Mukifika, o atwameni amiji ala ni ungana wakubhana ijila kumiji yâ, ni kukingila kwila ene a ibelesela. (Tanga Loma 7:2.) Omutwameni wamwiji mwéne usola se ola yebhi otwana atokala kubhixila kubhata, mwene we wala ni ungana wakubazela otwana se kabelesela okitumu kiki. (Efe. 6:1) Mukidi, omutwameni wamwiji wahenda, udyanga kudikunda ni muhatwê ande dyakusola ima phala omwiji, mukonda kiyadi kyâ “xitu imoxi” ngó. *—Mat. 19:6.
XILA KIDISTU OMUTWAMENI WAKILUNGA
Jezú, amutuma kwa Jihova kwendesa okilunga (Tala okaxi 14)
14. (a) Kala kilondekesa Máluku 10:45, mukonda dyahi kima kyambote Jihova kusola Jezú phala kukala omutwameni wakilunga? (b) Kikalakalu kyahi kyalanakyu o Kibuka Kya Utuminu? (Tala o kaxa “ Okikalakalu Kya Kibuka Kya Utuminu.”)
14 Bhukaxi kasata yakukula, Jihova wasumbu omwenyu wa athu oso abhanga mbandu yakilunga, ni wayó axikana Jezú. (Tanga Máluku 10:45; Ika. 20:28; 1 Kol. 15:21, 22) Kuma Jezú wabhana omwenyu wê kala sata, kyafwama mwene kumusola kwa Jihova phala kukala omutwameni wakilunga. Mukonda dya kiki, Jezú wala ni ungana wakubhana itumu ku athu, kumiji, ni kukilunga kyoso. Ni kukingila kwila ene a ibelesela. (Nga. 6:2) Maji Jezú kabhanangó itumu, mwene udikila, uzola kala muthu mudyetu.—Efe. 5:29.
15-16. Ihi iwadilongo mu ima yazwela phange yamuhatu amwixana Marley ni phange Benjamin?
15 Ojiphange ja ahatu alondekesa kwila axila Kidistu, mukukayela o itendelesu yayó a asolo kwala Kidistu phala kwalanga. Jiphange javulu ja ahatu axikina mu izwelu yaphange Marley, watungu ku Estados Unidos, mwene wambe: “Ngibhana valolo mu ujitu wami wakukala muhatu ni phange mukilunga, ngenemubhanga yoso phala kuxila o ungana wabhana Jihova kumunumi wami ni kutufunga. Maji omwadiwami ni jiphange jamala mukilunga kene mubhonzesa o ima, mukonda ene angixila, angiximana we mu ikalakalu yoso ingibhanga.”
16 Ojiphange jamala alondekesa kwila atendela okijila kya kukala atwameni, mukuxila ni kubhana kijingu kujiphange ja ahatu. Benjamin, phange watungu ku Inglaterra, wambe: “Ngenemudilonga kyavulu mu itambwijilu ibhana ojiphange ja ahatu muyonge, ni kukatula mbote kujindunge jabhana jalungu ni kudilonga ni kuboka. Okikalakalu kibhanga ojiphange jiji kyala ni valolo yadikota.”
17. Mukonda dyahi twatokala kuxila o kijila kyakukala atwameni?
17 Kyoso athu oso mukilunga, kikale mayala, ahatu, atwameni amiji ni tufunga, kyatendela ni kuxila okijila kyakukala atwameni, okilunga kyoso kikala ni kutuluka. Okyabetakota kyoso kitubhanga kiki tubhana kijingu kwa Tata yetu yakazola, Jihova.—Jisá. 150:6.
MWIMBU 123 Ni Ufiyele Woso tu Tumakyenu o Itumu ya Nzambi
^ kax. 5 Kikalakalu kyebhi kyabhana Jihova ku ahatu mukilunga? Okwila ojiphange joso jamala ala atwameni ajiphange joso ja ahatu mukilunga? Okwila o ungana walanawu o tufunga wadifu ni ungana walanawu o atwameni a mwiji? Mumilongi yiyi twandatambwijila o ibhwidisu yiyi, ni kumona phangu ya athu a atange mu Mak’â Nzambi.
^ kax. 5 Tala omilongi ni dyambu: “Swinisa o Jiphange ja Ahatu mu Kilunga,” mukaxi 6, O Mulangidi wa Katutu ka muvu wa 2020.
^ kax. 9 Tala okaxa “ Mukithangana Kyebhi Omuhatu Watokala Kuvunga Omutwe?”
^ kax. 13 Phala kwijiya dingi se nanyi watokala kusola se omwiji usidivila mukilunga kyebhi, tanga ojikaxi 17-19 mumilongi ni dyambu “Xila o Kididi Kya Akwenu mu Kilunga Kya Jihova,” O Mulangidi wa Kakwinyi ka 2020.
^ kax. 59 Phala kwijiya dingi yalungu ni maka enyá, tanga o divulu ‘Kala mu Henda ia Nzambi,’ mudifwe 209-212.
^ kax. 64 Phala kwijiya dingi yalungu ni kikalakalu kya Kibuka Kya Utuminu, tanga O Mulangidi 15 ya Kavwa kamuvu wa 2013, mafwe 20-25.
