1. Kikwatekesu kyahi kyenemubhana o jiphange jahatu mukilunga, ibhidi yebhi yenemudibhana nayu? (Tala o foto yakapa.)

KISANGUSANGU kyadikota kukala ni jiphange javulu ja ahatu akalakala kyavulu mu kilunga! Mukifika, ene abhanga mbandu mu yônge, aboka, alonga o njimbu yambote. Akwatekesa mu kikalakalu kya kuyudika Ididi ya Ubhezelu, alondekesa kwila azolo o jiphange. Mukidi, ene adibhana ni ibhidi. Amoxi amulanga o jitata jâ jakuka. Amukwa amukolokota mu izukutisu yajindandu. Amukwa amusasa o ana ubhekawâ, akalakala kyavulu phala kwadikila.

2. Mukonda dyahi twatokala kubhanga nguzu phala kuswinisa o jiphange ja athu?

² Mukonda dyahi twatokala kuswinisa o jiphange jetu ja ahatu? Mukonda o athu kumundu kaxila o ahatu kala kyatokalele kwaxila. Kumbandu yamukwa, o Bibidya ituswinisa kwakwatekesa. Mukifika, poxolo Phawulu wadimuna o jiphange ku kilunga kya Loma. Tambululenu Fibe, “mu mu kwatekesa we, se wala ni maka ma mi bhinga enu.” (Loma 16:1, 2) Kyoso Phawulu kyexile Falize, mwene watokalele kukibuka kya athu kyexile mu xinganeka kwila o ahatu kala ni valolo yavulu. Maji kyoso kyakituka Kidistá, mwene wakayela o phangu ya Jezú, yakuxila o ahatu ni kwakwatela henda.—1 Kol. 11:1.

3. Kyebhi Jezú kyatalatala o ahatu? Kyebhi kyexile mumona o ahatu exile mubhanga ovondadi ya Nzambi?

³ Jezú wexile muxila o ahatu oso. (Nzwá 4:27) Mwene kexile mwatala kala o atwameni a Jijude. Sayi divulu dizwela maka alungu ni Bibidya dyambe: “Jezú kazwela kima kilondesa kukamba kuxila o ahatu.” Jezú wabetele kota mukuxila o ahatu exile mubhanga o vondadi ya Tatê. Mwene wa exana jiphange jami, kala kyexile mu kwixana o mala abhangele mbandu ku mwijiwe munzumbi.—Mat. 12:50.

4. Ihi itwandadilonga mumilongi yiyi?

 ⁴ Jezú wexile polondo phala kukwatekesa o jiphange jê munzumbi ithangana yoso. Wa alondekesa kwila exile ni valolo, wa azokela. Tumone kyebhi kitutena kukayela o phangu ya Jezú mukulondekesa okisakidilu kyetu ku jiphange jahatu.

5. Mukonda dyahi sayi Jiphange kwene mwabhonza kukala ni jiphange?

⁵ Etwenyoso kikale o jiphange jamala kikale o jiphange j’ahatu, twabhingi makamba ambote. Sayi ithangana kubhonza o jiphange ja ahatu kukala kumoxi ni jiphange ni akwa. Mukonda dyahi? Ivwa yazwela amoxi. Sayi phange amwixana mana Madalela * wambe: “Kuma ngidikudi, kyenemungibhonza kusanga o kididi kyami mu kilunga, mu kiki, ngidivwa kwila, kingibhangemu mbandu.” Mana Tita, wayele muboka mukididi kyengi, wambe: “Kyoso kiwuya mukilunga kyengi, udivwa ubheka.” Sayi jiphange atena we kudivwa kiki. Yo atungu ni mwiji kamubheza Jihova, kyenemumubhonza kukwata ukamba ni jindandu, udivwa we kala wadisandula ni jiphange mu kilunga. Sayi jiphange nange adivwa ubheka mukonda akate, katena kutunda, amukwa nange amulanga jindadu jamukata. Mana Anita wambe: “Kingexile mutena kukala ni jiphange mukonda eme dingi ngexile mulanga mametu.”

6. Ihi itutena kudilonga yalungu ni kyebhi Jezú kyakwatekesa Malata ni Madya, kala kilondekesa Luka 10:38-42?

⁶ Jezú wabhiti ithangana ni jiphange jê jahatu mu nzumbi, wexile dikamba dyambote phala ene. Xinganeka mu ukamba wa Madya ni Malata, nange kiyadi kyâ exile akudi. (Tanga Luka 10:38-42.) Kikale o ibhangelu ni izwelu ya Jezú kyabhangesa kudivwa kyambote. Mukifika, Madya wadivu kyambote mukuxikama mu inama yê kala dixibulu. * Kyoso Malata kyaluwalele mukonda dya Madya kukamba kumukwatekesa kulamba, mwene wadivu kyambote mukuzwela okixinganeku kyé kwa Jezú. Mu usuku wenyo, Jezú wakwatekesa o ahatu ayadi yâ kukatula mbote mu ima yalongo. Mwene walondekesa kwila wazolele o ahatu ayadi yâ ni phange yâ Lazalu, mukwakunda dingi mu ithangana yengi. (Nzwá 12:1-3) Mukiki kyoso Lazalu wakatele kyavulu Madya ni Malata ejidile kwila ejitena kwixana Jezú phala kwakwatekesa.—Nzwá 11:3, 5.

7. Mu ukexilu webhi dingi ututena kuswina o jiphange jetu jahatu?

⁷ Sayi Jiphange amona kwila o yônge yene o ithangana yambote yalanakyu phala kwaswinisa ku jiphange. Mukiki kima kyambote kwasangesa mu kithanagna kiki, kuzwela nawu, ni kwalondekesa kwila twazolo. Mana Madalela, amutange kudimatekenu, wambe: “Kingiswinisa kyavulu kyoso o jiphange kyangixima mukonda dya itambwijilu yami mu yônge, kyoso kyatunda n’eme m’ukunji ni kyoso kyalondekesa kwila angiswu.” Twatokala kulondekesa ku jiphange jetu kwila ene ala ni valolo yavulu phala etu. Mana Kabasa wambe: “Kyoso ki ngifonga mu kyônge ngejiya kwila o jiphange andangisonekena jinjimbu phala kwijiya se ngala KYAMBOTE. Kiki kingikwatekesa kuma kumona kwila o jiphange angizolo kyavulu.”

8. Mu mawukexilu ebhi dingi utena kukayela o phangu ya Jezú?

⁸ Kala Jezú, tutena kusota kithangana phala kukala ni jiphange jetu jahatu. Nange tutena kwa exana kubata dyetu phala kudya ni kutonoka kumoxi. Kyoso kitubhanga kiki twatokala kuzwela kima kiswinisa. (Loma 1:11, 12)  O tufunga atokala kuxinganeka kala kyexile muxinganeka Jezú. Mwene wejidile kwila o ukudi phala amoxi weji kwabhekela ibhidi, maji okusanguluka kwa kidi kikwijila mukonda dya kukazala mba kukala ni twana. (Luka 11:27, 28) Muveji dya kiki okusanguluka kwakidi kwijila mukonda dya kuta o kikalakalu kya Jihova kupholo.—Mat. 19:12.

9. Ihi itena kubhanga o tufunga phala kukwatekesa o jiphange jahatu?

⁹ Bengebenge o tufunga atokala kutalatala o Jikidisatá ahatu kala jiphange ni jimama mu nzumbi. (1 Tim. 5:1, 2) O tufunga abhanga kyambote kudizwelesa ni jiphange andi dyakumateka kyônge ni kudisukilu dya kyônge. Mana Tita wambe: “Sayi kafunga wamona kuma ngexile mubhanga ikalakulu yavulu, yu wamesene kwijiya kyebhi kingexile musokejeka o ima. Ngawabhela o ukexilu wê wakulondekesa kwila wangi suwu.” Kyoso o tufunga kyazwela ni jiphange jâ mu ithangana yoso, ene alaondekesa ni kidi kyoso kwila ene azolo. * Mana Anita, amutumbula kudima wajimbulula ombote ijila mu kuzwela ni tufunga ithangana yoso. Mwene wambe: “Eme we nga ejiya dingi kyambote, ene we angijiya kyambote. Mukiki, kyoso kingamudibhana ni ibhidi ngidivwa kyambote mukwabhinga kikwatekesu.”

10. Ihi itena kukwatekesa o jiphange jetu jahatu kusanguluka?

¹⁰ Etwenyoso, kikale o mala kikale ahatu, tusanguluka kyoso akwetu kyamona o mawuhetu metu ni kutusakidila mukonda dya kikalakalu kitubhanga. Maji se seku muthu ulondekesa o kisakidilu mu mawuhetu metu ni mukikalakalu kyetu, kiki kitena kuzozesa. Abigail muboki watembu yoso wambe: “Sayi ithangana ngidivwa kwila angijimbi, ene angijiya ngo kala phange yangaji muxitu mba mona ngaji. Sayi ithangana ngidivwa kwila seku muthu wamungimona.” Tala, yazwela phange mana Phawula. Mwene dikudi wasidivila mivu yavulu kala mukunji wa jixi jengi. Kuphlolo dya kwenda mwene wavutuka phala kukunda o jitata jê. Mwene muboki kate lelu sumbala wala kya ni 70 (makwinyi a sambwadi) a mivu. O phange mana Phawula wambe: “O kima kyene mungiswinisa okisakidilu kya jiphange.”

11. Kyebhi Jezú kyalondekesa kwila wabahanene valolo ku jiphange jahatu ja fiyele amukwkatekesele mu ukunji wê?

¹¹ Jezú walondekesa kisakidilu kwa ahatu afiyele amukwatekele ni “jimbongo jâ.” (Luka 8:1-3) Mwene kabhanene ngo o ujitu wakukalala ni mwene, maji walongo we okidi kyalungu ni vondadi ya Nzambi. Mukifika, mwene watangela kwila mwene wejifwa maji ejimufukununa. (Luka 24:5-8) Mwene waphelephalala kyambote o ahatu yo exile jiphoxolo jê yalungu ni ibhidi yeji kwiza kupholo. (Mál. 9:30-32; 10:32-34) Sumbala o jiphoxolo jê amulengele kyoso kyamukwatele, sayi ahatu amukwatekesele exile kumbandu yê kyoso kyamuphaphela kuta.—Mat. 26:56; Mál. 15:40, 41.

12. Kikalakalu kyebhi kyabhana Jezú kwa ahatu?

¹² Jezú wabhana kikalakalu kyadikota kwa ahatu. Mukifika, athu adyanga kubhana umbangi walungu ni difukunukinu dyê exile ahatu afiyele. Mwene wabhana o kikalakalu kwa ahatu yó kyakutangela ku jipoxolo jê kwila amufukununene kyá. (Mat. 28:5, 9, 10) Kyoso o maxibhulu kya undu ni nzumbi ikôla mu muvu wa 33 K.K., mu Pendekoxi, nange kwexile ku ahatu. Se kyene ene atambula o uhete wakuzwela mumadime engi, ni ujitu wakutangela akwa “o ima yamakota mba yamadiwanu ya Nzambi.”—Ika. 1:14; 2:2-4, 11.

13. Ihi yenemubhanga o Jikidistá ja ahatu lelu? Kyebhi kitutena kulondekesa okisakidilu kyetu mu ima yenemubhanga?

¹³ O jiphange jetu jahatu atokala kwaximana mu yoso yemubhanga mu kikalakalu kya Jihova. O kikalakalku kiki kyalungu ni kutunga, kuyudika, kuboka ni ibuka ya madimi yakwa jixi jengi, ni kukwatekesa ku Betele. Ene akwatekedesa kyoso kikumoneka mavuwa, alungulula o madivulu metu, asidivila kala aboki athembu yoso ni akunji ajixi jengi. Kala o jiphange jamayala, o ahatu we abhanga o xikola ya thembu yoso, Xikola ya Akunji a Utuminu ni Xikola ya Ngidiyale. Kumbandu yengi o ahatu ene mukwatekesa o anumi yâ kulanga o kikalakalu kya mukilunga kya Nzambi. O jiphange jiji “mawujitu” abhanga sidivisu yavulu phala kukwatekesa akwa amaji kyeji kwabhonza kyavulu se ene kexile ni kikwatekesau kya ahatwa. (Efe. 4:8) O kwila utena kuxinganeka mawukexilu akukwatekesa o jiphange jiji mukikalakalu kyenemubhanga?

14. Kala kilondekesa o Jisálamu 68:11, o tufunga twa unjimu abhanga ihi?

¹⁴ O tufunga twa ujimu ejiya kwila o jiphange jahatu “kifuxi kyadikota”, ene ala polondo phala kukalakala ithangana yoso, ene dingi abetakota mukuboka o njimbu yambote. (Tanga Jisálamu 68:11.) Mukiki o tufunga abhanga yoso phala kudilonga jiphange jiji. Abigail,  amutumbula kudima wixi wadivu kyambote kyoso o jiphange kyamubwididsa se ihi yenemubhanga phala kumateka kuzwela kyambote ni athu mumbambe? Mwene wambe, “Kiki kyangikwatekesa kumona kwila Jihova wangibhana kikalakalu kyadikota phala kubhanga mu kilunga kyê.” Kumbandu yengi o tufunga ejiya kwila o adyakimi ya ahatu ala ni uhetu wakukwatekesa o mizangala ya ahetu kyoso kyamudibhana ni ibhidi. (Titu 2:3-5) Se phata o jiphange jetu jahatu atokala kwaximana!

15. O jiphange jetu jahatu abhingi kwalanga ni kwakwatekesa mu ithangana yebhi?

¹⁵ Sayi ithangana o jiphange jetu jahatu abhingi kwalanga kyoso kyamudibhana ni ibhidi. (Iza. 1:17) Mukifika, mutudi mba phange wabatula o ukaza, nange abhingi kikwatekesu phala kubhanga o kima kyexile mubhanga o munumi yê. O phange yamuhatu wakuku nange ubhinga muthu phala kuzwela ni jidotolo. Mba pahange yamuhatu muboke watembu yoso wenemubhanga ikalakalu yavulu mu kilunga kya Jihova, nange ubhinga muthu phala kumulunga kyoso kyamulokalala mukonda kyenemuboka dingi kala kibhanga o aboki engi. Mu ukexilu webhi dingi utena kukwatekesa o jiphange jetu jahatu? Tumone dingi o phangu ya Jezú.

16. Kala kilondekesa Máluku 14:3-9, Jezú wakwatekesa kyebhi Madya?

¹⁶ Jezú wexile mulanga o jiphange jê mu nzumbi kyoso kyexile mwafika ima yayibha. Mukifika , mwene wazokela Madya kyodo Malata kyamufikele ima yayibha. (Luka 10:38-42) Mwene wazokela Madya muveji yakayadi kyoso akwa kyamufikile ima yayibha mukonda dya ima yasolele kubhanga. (Tanga Máluku 14:3-9.) Jezú watendela o kima kyabhange, wamuximana, yu wambe: “Mwene wangibhange kima kyambote. . . . Muhatu yú wa bhange kyoso kyatena.” Mwene wakanena kwila o henda yalondekesa Madya eji ku itumbula “Kwoso-kwoso kwa kà tula o Njimbu Yambote, mu ngongo,” kala kyamulondekesa o milongi yiyi. Kima kyambote kwijiya kwila Jezú wazwela kuma o njimbu yambote eji ku itula mu ngongo yoso kyoso kyazubha kuximana Madya mukonda dya henda yalondekesa! O izwelu yê nange kyaswinisa kyavulu Madya kyoso kyamufikile ima yayibha!

17. Phangu yalungu ni kithangana kitwabhingi phala kuzokela o phange yamuhatu?

¹⁷ O kwila wenemuzokela o jiphange jê jahatu mu nzumbi kyoso kyabhindama? Mukifa, tala o phangu yakayela. Sayi aboki amona kwila phange yamuhatu wala ni mwadiwe kamusidivila Jihova, muveji javulu alaleka mukubhixila mu kyônge, o kizubha o kyônge atunda ni lusolo. Ene amona kwila, mwene waxisa o twana twê kubata. Kyenyiki, ene abhanza ima yayibha yalungu ni jiphange jiji, axingeka kwila hinu o jiphange jiji ejibhinga ku anumi yâ phala kwa ehela kwambata o twana twâ mu kyônge. Maji ene kejiya kwila o phange yú wamubhanga yoso yatena. O ima yoso kiyala mukutena kwê, mukonda kimwene o mutwameni wa mwiji. Ihi i utena kubhanga? Se uximana o phange yamuhatu anga utumbula o ima yambote yenemubhanga nange utena kubatula o ixinganeku yayibha yamuzwela akwenu.

18. Mu ukexilu webhi dingi ututena kukwatekes o jiphange jetu jahatu?

¹⁸ Tutena kulondekesa ku jiphange jahatu kwila twamenesa kwalanga, mukudibhakula phala kwakwatekesa. (1 Nzwá 3:18) Mana Anita, phange wakexile mulanga manya wakatele wambe: “Sayi makamba exile mukwiza kulanga mametu kiki kyexile kungibhana kithangana kyakubhanga kuma kyengi, ni kutubhekela kudya. Kiki kyangibhangesa kudivwa kwila angizolo ni kwila ngala ni kididi mu kilunga kya Jihova.” Mana Madalela we watambula kikwatekesu.  Sayi phange wamukwatekesa kuyudika dikalu dyê. Mwene wambe: “Kima kyambote kwijiya kwila o jiphange amesena kwila ngidilanga mukwendesa o dikalu.”

19. Mu mawukexile ebhi dingi o tufunga atena kukwatekesa o jiphange jahatu?

¹⁹ O tufunga abhanga yaso phala kulanga o ibhindamu ya jiphange jahatu. Ene ejiya kwila kiki kyene kyamesena Jihova kuma atalatala kyambote. (Tiya. 1:27) O tufunga kayela o phangu ya Jezú yakutetuluka ene kadikwatenena mu ijila se amona kuma atena kulondekesa henda ni kutetuluka. (Mat. 15:22-28) Kyoso o tufunga kyabhanga nguzu phala kwakwatekesa, ene alondekesa ku jiphange jiji kwila Jihova ni kilunga kyê azolo. Kyoso o mutamene wakibuka kya kuboka kwatokalele, kyevu kwila mwene weji longela, wamukwateksa ni lusolo lwoso. Mana Kia wambe kwila: “Kiki kyangikwatekesa kutululuka. Mu kungiswinisa ni kungikwatekesa, o tufunga alondekesa kwila angala ni kididi mu kilunga, kingala ubheka se kumoneka ibhidi.”

20-21. Kyebhi kitutena kulondekesa kwila twazolo o jiphange jetu joso jahatu?

²⁰ Lelu kyoso ki tutala mu kilunga kyetu, tusangamu jiphange javulu jahatu akalakala ni ngunzu yoso, ene abhingi kikwatekesu kyetu. Kala kitwadilongo mu phangu ya Jezú, tutena kulondeksa kwila twazolo mukukala nawu kithangana ni kusota kwa ejiya kyambote. Tutena kulondekesa o kisakidilu kyetu mu ima yoso yenemubhanga mu kikalakalu kya Jihova. Tutena kwalanga ni kwazokela se kubhinga kubhanga kiki.

²¹ Mu mukanda wasoneka akwa Loma poxolo Phawulu watumbula divwa dya Jikidistá jahatu mu majina mâ. (Loma 16:1, 3, 6, 12, 13, 5) O ahatu yó se phata sangulukile mukwivwa o umenekenu ni kiximanu kyê. Etu we tutena kubhanga kiki mukukwatekesa o jiphange jetu joso mukilunga. Kyoso kitubhanga kiki, twalondekedesa kwila ene abhanga mbandu ya mwiji wetu.