1, 2. Kiebhi o jiselevende ja Nzambi kia divua ku mundu iú ua iibha ni kiebhi kiala ni inzo?

 O KUILA u divua kiambote ku mundu iú? Se kua mu divua kiambote, kiene ué kia kexile mu divua o jiselevende ja Nzambi m’ukulu. Tundé ukulu o ió a zolo Jihova ene mu divua kála asonhi ku mundu iú ua iibha. Mu kifika, kioso kiexile mu tunga mu ididi ni ididi mu Ixi ia Kanana, o abhezi a fiiele a Nzambi, “a di fisala kuila asonhi, jingenji mu ngong’umu.”—Jihe. 11:13.

² O Jikidistá a undu a tokala “ku diulu,” a di mona ué kála a ‘asonhi, jingenji’ ku mundu iú ua iibha. (Fil. 3:20; 1 Phe. 2:11) O ‘jimbudi ja mukuá’ ja Kristu, ‘ka tokala ué ku mundu kála [Jezú] ka tokalele ku mundu.’ (Nzu. 10:16; 17:16) Maji né kiki, o mundu ua Nzambi ki u kambe “inzo.” Mu kidi, etu tu sanguluka mukonda tuala ni dibhata mu tu sanga o ku kondama, o dibhata didi tu tena ku di mona ngó se tu kala ni kixikanu. Mozé ua soneka: ‘Jihova eie ua di bhange kála inzo ietu ia kusuamena, ku tunda muiji kuíza muiji.’ (Jisá. 90:1) Kiebhi Jihova kia kexile ‘mbonge ia kidi’ phala o jiselevende jê ja fiiele m’ukulu? Kiebhi muéne kiala ‘kála inzo ia kusuamena ia kidi’ phala o mundu uê lelu? Ni kiebhi muéne kia-nda kala inzo ia kusuamena ku hádia?

3. O diambu, ni kifika, ni ima ia difu i tu sanga mu divulu dia Jisálamu 90:1 ihi?

³ O izuelu iala mu Bibidia mu divulu dia Jisálamu 90:1 iala ni diambu, ni kifika ni ima ia difu.  O diambu, Jihova. O kifika, o inzo mba o dibhata. Ima iavulu ilondekesa kuila Jihova ua difu ni inzo. Mu kifika, Jihova u langidila o mundu uê. Kiki kidi, mukonda o Bibidia i longa kuila, muéne henda. (1 Nzu. 4:8) Muéne ué mukua ku tululuka, u bhangesa o mundu uê ua fiiele ku kala bhu kididi kia “kondama.” (Jisá. 4:8) Mu kifika, xinganeka kiebhi kia dibhana ni jifiiele kála Mbalahamu m’ukulu.

4, 5. Kiebhi Nzambi kiexile ‘kála inzo ia kusuamen ia kidi’ phala Mbalahamu?

⁴ Tu tena ku tendela ngó kiebhi kia divu Mbalahamu a mu ijidile mu dijina dia Mbalamu kioso Jihova kia mu ambela kuila: “Katuka m’oxi ienu, ni mu jindandu jenu . . . ua k’àie ixi iengi.” Se Mbalahamu ua kexile ni hele, sé phata muéne ua sange kikuatekesu kioso kiévu o izuelu ia Jihova, iambe: “Eme-phe nga-nda ku ku sokolola, n’ukala u muiji ua dikota ngi jingisa o dijina dié . . . nga kà benzela oso a ku benzela eie nga kà bhubhidila oso a ku bhubhidila eie.”—Dim. 12:1-3.

⁵ O izuelu íii ilondekesa kuila Jihova ueji kala kididi kia kondama phala Mbalahamu ni mbutu iê. (Dim. 26:1-6) Jihova ua kumbidila o kikanenu kiê. Mu kifika, muéne ua fidisa Falaó mukua Ijitu ni Sobha Abimeleke mukua Jelale ku ta phánda kua Sala ni ku jibha Mbalahamu. Muéne ua langidila ué Izake ni Bebeka ku ukexilu iú. (Dim. 12:14-20; 20:1-14; 26:6-11) Tu tanga: “[Jihova] kehela muthu ku a bhanga phulu; ua bazela makota a jingana mukonda diâ-ene, Uixi: Athu ami ng’a undu ni maji, kana ku a kuata; o jipolofeta jami, ki mu ji kuame.”—Jisá. 105:14, 15.

6. Ihi ia zuelela Izake kua Jakobo ni kiebhi kia divu Jakobo?

⁶ O jipolofeta jiji, Mbalahamu ni mulaul’ê Jakobo. Kioso kia mesenene Jakobo ku sota muhatu’ê, o tat’â Izake ua mu ambela: “Eie kana ku [kazala] muhatu ku ana- ilumba ia akua Kanana. Balumuka, uie ku Padalane, ku dibhata dia Betuuele, tata ia [mamenu,] ua kà sole muhatu koko ku an’a Labano.” (Dim. 28:1, 2) Jakobo ua belesela Izake. Jakobo ua xisa o muiji uê a tungile mu ixi ia Kanana, iu uende o njila katé mu ixi ia Halane. (Dim. 28:10) Nange muéne ua dibhudisa: ‘Thembu kuxi nga-nda tunga mu ixi iéngi? O kuila o sekulu’ami ua-nda ngi tambulula kiambote ni ku ngi bhana muhatu ua zolo Nzambi?’ Se Jakobo ua kexile ni hele, sé phata ka luuale dingi kioso kia bhixila mu mbanza ia Luze, ia kexile 100 ia ji kilometu, tundé ku mbanza ia Bele-seba. Ihi ia bhiti mu mbanza ia Luze?

7. Kiebhi Nzambi kia tululukisa Jakobo bhu kaxi ka nzoji?

 ⁷ Mu mbanza ia Luze Jihova ua monekena Jakobo ku nzoji, anga u mu ambela: “Eme muene ngala ni eie, ngi kulanga [mu] ididi ioso ku uia, hinu ngi ku bhangesa kuvutuka dingi m’oxi muenhumu; kuma ki nga-nda ku ku ehela katé ki nga kà kumbidila ima ioso i nga kuambela.” (Dim. 28:15) O izuelu íii ia tululukisa kiavulu Jakobo! O kuila u tena ku xinganeka Jakobo ku kingila ni kidielelu kioso, Nzambi ku kumbidila o kikanenu Kiê? Se ua xisa inzo iê phala ku sidivila mu ixi iéngi, nange u tena ku tendela kiambote kiebhi kia divu Jakobo. Sé phata, eie ua mono kuila Jihova ua ku lange mu maukexilu avulu.

8, 9. Kiebhi Jihova kiexile ‘mbonge ia kidi’ phala Jakobo ni ihi i tu tena ku di longa mu phangu íii?

⁸ Kioso kia bhixila mu ixi ia Halane, sekulu’ê Labano ua mu tambulula kiambote, mu ku bhita kithangana ua mu bhana Liia ni Lakele kala ahatu’ê. Mu ku bhita kithangana Labano ua mesenene ku mu nganala kioso kia lungulula o futu iê dikuinhi dia veji! (Dim. 31:41, 42) Jakobo ua kolokota mu ku dibhana ni ibhidi íii mukonda ua dielele kuila, Jihova ueji ku mu langidila—Nzambi ua mu langidila muene! Kioso Nzambi kia tumina Jakobo ku vutuka mu ixi ia Kanana, mu kithangana kieniókio, muéne ua kexile kiá ni “ilunga ia makota ia ibhaku, ni abhika a mala ni a ahatu, ni jikamelo ni jijumento.” (Dim. 30:43) Jakobo ua sakidila kiavulu Jihova iu ua sambe: “Ngi muthu ki nga fuama, né kòfele, ku ngi bhanga jihenda joso’iji, ni kidi kioso ki ua ngi bhanga, ngi mubhik’é; kuma ki nga zaukile Njolodá mueniú, ng’ambatele ngó mbangala; kiki phe nga di bhange ngi ilombo iiadi.”—Dim. 32:10.

⁹ Mu kidi, o musambu ua Mozé ua kexile ua kidi: ‘Jihova], eie ua di bhange kála inzo ietu ia kusuamena ku tunda muiji kuíza muiji!’ (Jisá. 90:1) O izuelu íii iala ué ni valolo lelu, mukonda kua Jihova “ki muene mù kala nè ngó kizenji kia kualuluka,” disuamenu dia kidi phala o mundu uê ua fiiele. (Tiia. 1:17) Tua-nda di longa kiebhi kia bhanga kiki.

10. Kiebhi ki tu tena ku dielela kuila Jihova inzo ia kusuamena phala o jiselevende jê?

¹⁰ Xinganeka o kidi kiki: Eie ua mu bhana umbangi mu inzo ia kufundisa ia lungu ni ditenda dia iibha. O mutuameni ua ditenda didi, hete, mukua kutena, mukua makutu, kijibhangânga. Kiebhi ki ueji divua kioso ki ueji xisa o inzo ia kufundisa? O kuila eie ueji divua kála o muthu uala bhu kidi kia kondama? Kana! Mu kidi, ueji bhinga phala n’a ku langidile. O maka enhá alondekesa kiebhi o jiselevende ja Jihova kia bhana o umbangi ua lungu ni Jihova ni ku suína kuoso, ni kiebhi ene kia zuela sé uôma o ima ioso ia iibha i bhanga Satanaji! (Tanga Dijingunuinu 12:17.) O kuila Satanaji ua tena ku fidisa o mundu ua Nzambi ku bhana o umbangi? Kana! Mu kidi, tua kolokota mu nzumbi—tu bhanga kiki mu kuijiia kuila: Jihova ‘disuamenu dia kidi,’ bhenge-bhenge mu izuua íii isukidila-ku. (Tanga Izaia 54:14, 17.) Maji Jihova ka tena ku kala inzo ietu ia kusuamena, se tuehela Satanaji ku tu katula bhu kididi kietu.

11. Disá diebhi di tu tena ku katula ku phangu ia Mbalahamu, Izake ni Jakobo?

¹¹ Tu di longe dingi disá dia mukua dia lungu ni Mbalahamu, Izake ni Jakobo. Sumbala ene a tungile mu ixi ia Kanana, ene ka di lungile ni athu enhó, mukonda ka uabhele o ima ia iibha ia kexile mu bhanga. (Dim. 27:46) Ene ejidile o kitumu, mu kiki ka bhingile muthu phala kua zuelela o ima ia tokalele o kubhanga ni ima ka tokalele ku i bhanga. Ene ejidile kiambote o ima ia mesenene Jihova ni ima ia mu ibhile.  Mukonda Jihova uexile disuamenu diâ, ene ka mesenene ku bhanga mbandu ku mundu. Mu kiki, ene akexile dikanga dia mundu. Ene a tu xisa phangu iambote! O kuila eie u bhanga nguzu phala ku kaiela o phangu ia athu enhá, kioso ki u sola o makamba ni itonokenu? Saí jiphange mu kilunga alondekesa kuila a mu divua hanji kiambote ku mundu ua Satanaji. Se u divua kiki né muene bhofele, ua tokala kusamba. Lembalala kuila o mundu iú, ua Satanaji. Mu kiki, muéne u di banza ngó mudiê.—2 Kol. 4:4; Efe. 2:1, 2.

12. (a) Kiebhi Jihova kia langidila o jiselevende jê? (b) Kiebhi ki u divua ni ima i bhanga Jihova phala ku tu langidila?

¹² Phala ku di tunda kiambote mu jindunge ja Satanaji, tua tokala tu katula mbote mu ima ioso i bhanga Jihova phala ku langidila o jiselevende jê ja fiiele, a mu bhanga Jihova kála disuamenu diâ. O ima íii, o iônge, o ubhezelu ku muiji ni tufunga—iene i tu bhana Nzambi phala ku tu kuatekesa mu ibhidi i tu dibhana na-iu ku muenhu. (Efe. 4:8-12) O phange George Gangas, ua tokalele ku Kibuka kia Utuminu ua soneka: “Kioso ki ngi kala bhu kaxi ka jiphange jami, ngi divua kala ngala bhu bhata ni muiji uami.” O kuila u divua ué kiki?

13. Disá diebhi di tu tena ku katula mu divulu dia Jihebeleu 11:13?

¹³ O disá dia mukua di tu katula mu phangu ia Mbalahamu, Izake ni Jakobo, o ku kamba o uôma ua ku di tungula ku mundu iú ua iibha. Kála ki tua di longo bhu  kaxi ka 1, ene “a di fisala kuila asonhi, jingenji mu ngong’umu.” (Jihe. 11:13) O kuila ua-nda bhanga ioso phala ku di tungula ku mundu iú ua iibha? Ki bhonza ku bhanga kiki. Maji u tena ku di tunda kiambote ni kikuatekesu kia Nzambi ni kia jiphange. Lembalala kuila eie kuala ubheka uê. Oso a mesena ku sidivila Jihova, a bhânga ni Satanaji ni mundu uê! (Efe. 6:12) Maji né kiki, tu tena ku di tunda kiambote se tu dielela kua Jihova ni ku mu bhanga kála inzo ietu ia kusuamana.

14. “Dibhata” diebhi dia kexile mu kingila Mbalahamu?

¹⁴ O kima kia mukua kienhiki: Tua tokala ku kaiela o phangu ia Mbalahamu mu ku xinganeka mu kikoué. (2 Kol. 4:18) O poxolo Phaulu ua soneka kuila, Mbalahamu “ua kingile dibhata di kala ni madisesa ma nangenena, o mesene iê ni mutungi muène Nzambi.” (Jihe. 11:10) O “dibhata” didi, o Utuminu ua Nzambi. Mbalahamu ua tokalele ku kingila o “dibhata” didi.  Maji etu ki tu bhingi ku di kingila. Mukonda, kindala ku diulu o Utuminu ua mateka kiá. O Bibidia iamba kuila, mu ku bhita kithangana o Utuminu ua-nda tumina ué o ixi ioso. O kuila o ukexilu uê ulondekesa kuila eie ua dielela ku Utuminu iú? O kuila eie u ta o Utuminu iú ku pholo ni ku di tungula ku mundu iú?—Tanga 2 Phetele 3:11, 12.

15. Ihi ia-nda bhita ni ió a dielela ku mundu iú?

¹⁵ O ibhidi ia-nda di bandekesa dingi ku mundu iú ande dia kuíza o dizubhilu. (Mat. 24:7, 8) Kioso kia-nda mateka o hadi ia dikota, o ibhidi ia-nda vula dingi. Nange o jisabhalalu ja-nda budika, o athu a-nda kala ni uôma ua ima i tena ku bhita ku mienhu iâ. (Haba. 3:16, 17) O Bibidia iamba kuila ene a-nda thandanganha kiavulu, mukonda dia kiki, a-nda “suama mu jiphudi ni mu jindanji ku milundu.” (Dij. 6:15-17) Maji né muene jiphudi, ni mauenji mba jinguvulu ki ja-nda tena ku a langidila.

16. Kiebhi ki tua tokala ku mona o kilunga, ni mukonda diahi?

¹⁶ O mundu ua Jihova ua-nda kala ‘disuamenu dia kidi’ dia-nda ku a bhana Nzambi iâ, Jihova. Kála o polofeta Habakuke, ene a “kà sangulukila mua Jihova.” Ene a “kà tumbujuka ni ngalasa mua Nzambi ia ubhulukilu [uâ].” (Haba. 3:18) Kiebhi Jihova kia-nda kala ‘disuamenu dia kidi’ mu ithangana ia bhonzo? Tua-nda kingila phala ku mona kiebhi kia-nda bhanga kiki. Maji tu tena ku dielela mu kima kiki: Kála o Izalaiele iokulu, o “mundu uavulu” ua-nda diongeka ni ku tambula itendelesu kua Jihova. (Dij. 7:9; tanga Makatukilu 13:18.) Nange o itendelesu íii tua-nda i tambula mu kilunga. Sé phata, o ilunga ioso ku mundu ilondekesa o “jinzu” ja ku langidila ja tange mu divulu dia Izaia 26:20. (Tanga.) O kuila eie u bhana valolo ku iônge ietu? O kuila eie u belesela ni lusolo o itendelesu i bhana Jihova bhu kaxi ka kilunga?—Jihe. 13:17.

17. Kiebhi Jihova ‘disuamenu dia kidi,’ katé muene phala o jiselevende jê ja fiiele afú kiá?

¹⁷ Katé muene ni ió a-nda fuá ande dia ku mateka o kizuua kia hadi ia dikota, a tena ku dielela kuila Jihova ua-nda kala ‘disuamenu dia kidi.’ Kiebhi kia-nda kala disuamenu diâ? Mu ku bhita mivu kioso kiafu Mbalahamu, Izake ni Jakobo, Jihova uambela Mozé: “Eme ngi Nzambi ia . . . Mbalahamu, ngi Nzambi ia Izake, ngi Nzambi ia Jakobo.” (Mak. 3:6) Jezú ua tange ia lungu ni maka enhá kioso kiambe: “O Nzambi-phe ki Nzambi ia [athu afú], maji Nzambi ia athu [ala ni] muenhu. Mukonda ene oso muene, ku mesu ma Nzambi, iá-uâ ni muenhu.” (Luk. 20:38) Phala Jihova o jiselevende jê ja fiiele kafú kana, mukonda muéne ua-nda ku a fukununa.—Ndo. 7:1.

18. Kiebhi Jihova kia-nda kala ‘disuamenu dia kidi,’ phala o mundu uê ku mundu uobhe?

¹⁸ Ku mundu uobhe, Jihova ua-nda kala ‘disuamenu dia kidi’ phala o mundu uê mu ukexilu uéngi. O divulu dia Dijingunuinu 21:3 dizuela: “Talesa, kindala o balaka ia Nzambi iala mu’axaxi ka athu!” Jihova ua-nda tumina mu ixi bhu kaxi ka Jezú Kristu. Mu ku bhita midi ia mivu ku Utuminu, Jezú ua-nda zubha ku bhanga o vondadi ia Nzambi mu ixi, iu ua-nda vutuila o Utuminu kua Tat’ê. (1 Kol. 15:28) Tundé o kithangana kieniókio, o athu a iuka ka-nda bhinga dingi o sata ia Jezú, mukonda Nzambi muéne ua-nda kua tumina. Tua-nda tambula o muenhu ua kalelaku ku hádia! Tu bhange nguzu phala ku kaiela o jiselevende jo’kulu, mu ku bhanga Jihova ‘disuamenu diâ.’