1-3. Mbote iahi i tu katula mu ku di longa o Bibidia ni ku kumbidila o milongi iê?

“NGI sakidila Jihova izuua ioso mukonda dia ku ngi kuatekesa ku tendela o Bibidia.” O phang’etu ia muadiakimi ia muhatu, ua tange kiá o Bibidia mu makuinhi a uana a mivu, uambe kuma nuka ua-nda kueha o ukexilu uê ua ku tanga o Bibidia. O phang’etu ia mukuá kilumba hanji, uambe ué kuila o ku tanga o Bibidia, kua mu kuatekesa ku mona kuila Jihova muthu ua kidi. O mbote ia katula, o ku zukama dingi kua Tat’ê ia diulu. Muéne uambe: “Eme nuka nga sangulukile kiki ku muenhu uami!”

² O poxolo Phaulu ua suínisa athu oso ku “sema jinga o lete ia disanze ia nzumbi.” (1 Phe. 2:2) Oso a bhanga kiki mu ku di longa o Bibidia, ni ku i kumbidila ku mienhu iâ a zediua, a kala ni kidielelu ku hádia. Ene a kala ué ni ukamba uambote ni jiphange jâ a zolo ué o Nzambi ia kidi. O ima ioso íii iene i tu bhangesa ku “sangulukila o Kitumu kia Nzambi.” (Lom. 7:22) Saí dingi mabesá a mukuá. Ebhi?

³ Kioso ki uia ni kuijiia Jihova ni Mon’ê, ua-nda ku a zola kiavulu, ua-nda zola ué o athu a mukuá. O kuijiia kiambote o Bibidia, ki ku kuatekesa kuijiia kiebhi kia-nda bhulula Nzambi o athu a belesela ku mundu iú ua iibha. Eie uala ni njimbu iambote phala ku tangela o athu mu ukunji uê. Jihova ua-nda ku besoala kioso ki u kuatekesa akuenu ni milongi i u di longa mu Bibidia.

4. Ihi ilombolola o ‘ku xoxa’ mu ku tanga Bibidia?

⁴ Jihova ka jijidika o jiselevende jê ku tanga o Bibidia ni lusolo. Muéne uambela Josuué m’kulu kuila: “Divulu didi, dia ngonge, ki di bhue mu kanu; kota u kala mu ku di banza jinga mu muanha ni mu usuku.” (Josu. 1:8; Jisá. 1:2) O kuila o kitendelesu kiki kilombolola kuila eie ua tokala u xoxa, o izuelu ioso i u tanga mu divulu dia Dimatekenu katé mu divulu dia Dijingunuinu? Kana.  Kilombolola kuila, eie ua tokala u tanga mu ukexilu u ku kuatekesa o ku xinganeka. Kioso ki u ‘fueta’ mu ku tanga o Bibidia i ku kuatekesa ku tendelela kiambote o ima ia valolo, i ku suínisa mu kithangana kieniókio. Kioso ki u sanga velusu mba musoso, ua tokala u tona mu ku u tanga ni muzumbu uê. O ima i ua-nda tanga mu Bibidia, i tena ku tula ku muxima uê. Mukonda diahi kima kiambote ku bhanga kiki? Mukonda o ku tendela o milongi i tu bhana Nzambi, i tu kuatekesa ku i kumbidila ku muenhu uetu.

5-7. Bhana kifika kilondekesa kuila o ku tanga o Bibidia ni ku xoxa ki ku kuatekesa (a) ku belesela o itumu ia Nzambi; (b) kuzuela kiambote ni akuenu; (c) ku dielela kua Jihova né muene mu jiphaxi.

⁵ O ku fueta mu ku tanga o Bibidia ku ku kuatekesa, kioso ki tu tanga o madivulu ki tua ejiia kiambote. Xinganeka mu ifika itatu. Kia dianga, munzangala Kidistá ua mu tanga o Bibidia u sanga o kikanenu kia Hozeia. Mu kibatulu kia 4, u tanga o velusu 11 ndu mu velusu ia 13, anga u sukama. (Tanga Hozeia 4:11-13.) Mukonda diahi? Muéne u banza mu jivelusu jiji, mukonda muéne ua mu bhita ni kijijidiku kia ku bhanga undumbu bhu xikola. Muéne u xinganeka mu jivelusu jiji anga u banza: ‘Jihova u mona o ima ia iibha i bhanga o athu mu kasuekelu. Ki ngi mesena ku mu luualesa.’ O phange u sola ku belesela o itumu ia Jihova i fidisa o undumbu.

⁶ O kifika kia kaiadi, phang’etu ia muhatu ua mu tanga o divulu dia Jouele mu kibatulu kia 2, mu velusu ia 13. (Tanga Jouele 2:13.) O velusu íii i mu kuatekesa ku kaiela o phangu ia Jihova o “mukua henda, ua lenduka, ka thathamana lusolo, ukôla mu kubhanga o mbote.” Muéne u sola ku lungulula o ukexilu uê ua kuzuela, mukonda u zuela ni athu ni njinda iavulu, né muene kioso kia zuela ni muadi’uê.

⁷ O kifika kia katatu, phang’etu tata ka mu kalakala dingi, mukonda dia kiki u thandanganha kiavulu kejiia kiebhi kia-nda dikila o muiji uê. Mu divulu dia Nahumu. 1:7, muéne u tanga ni ku fueta kuila, Jihova “uejiia oso a mu dielela muene,” ni kuila muéne u a langa mukonda “muene dilengelu dietu mu thembu ia jiphaxi.” O milongi íii i mu tululukisa. Muéne u mona kuila Jihova ua mu zolo ni muiji uê, ka thandanganha dingi kiavulu. Muéne u tanga dingi o velusu ia 15 ni ku fueta. (Tanga Nahumu 1:15.) Muéne u mona kuila u tena kulondekesa o kidielelu kua Jihova, mu ku boka o njimbu iambote sumbala mu ithangana ia bhonzo. Kioso kia mu sota kikalakalu kiéngi, muéne u kala ni kithangana kiavulu kia ku boka mu semana.

8. Jimbulula kima ki ua di longo mu ku tanga o Bibidia.

⁸ O ifika i tua di longo, ia tundu mu madivulu a Bibidia iene mu banza o athu kuila, ia bhonzo ku i tendela. Maji se u kala ni vondadi ia ku di longa o divulu dia Hozeia ni Jouele, ua-nda mesena ku tanga o jivelusu ja mukua mu divulu didi ni dizui dia kufueta. Xinganeka o unjimu u ua-nda kala nau mu ku di longa o madivulu a ji polofeta jiji! O kuila o madivulu a mukuá a Bibidia a tena ué ku tu kuatekesa? O Mak’â Nzambi a difu kála o mavu mu tu sanga o madiiamande. Kanda kiambote o mavu enhá! Tanga kiambote o Bibidia phala ku sanga o itendelesu ia Nzambi i ku suínisa.

9. Ihi i tua tokala ku bhanga phala ku tendela kiambote o Bibidia?

⁹ Kima kiambote ku tanga o Bibidia izuua ioso, maji ua tokala u i tendela kiambote o milongi i ua mu di longa. Kiki-phe ua tokala u di longa kiambote o madivulu metu, phala kuijiia dingi o athu ni ididi ia lungu ni musoso u ua mu tanga. Sé kuijiia kiebhi  ki u tena ku kumbidila o milongi i ua tange mu Bibidia, u tena ku bhinga kikuatekesu ku tufunga mba phange ua kulu mu nzumbi phala a ku kuatekese. Phala ku londekesa o valolo ia ku tendela o Bibidia, tu di longe o phangu ia Kidistá m’ukulu ua suínine phala ku tendela o milongi ia Bibidia. Phange iií dijina diê Apolo.

10, 11. (a) Kikuatekesu kiahi kia tambula Apolo phala ku longa kiambote mu ukunji uê? (b) Ihi i tu longa o phangu ia Apolo? (Tanga o kaxa iamba “O Kuila Eie ua mu Longa Hanji Milongi Iokulu?”)

¹⁰ Apolo uexile Kidistá mukua Judé, muéne uejidile “kiambote o Madivulu ma Nzambi,” muéne “mu kuzuela u fulujuka mu nzumbi.” O divulu dia Ikalakalu di zuela kuila muéne: “Anga u tanga, u longa ni uhete o imbamba ia Jezú, maji uejiia ngó o batizu ia Nzuá.” Muéne kejidile kuila o milongi ia batizu ia kexile mu longa, a i fidisile kiá kua Jezú. Kioso kia kexile mu longa mu Efezo o dikaza Pidisila ni Akuila evu o milongi iê, anga a “mu lomboluela kiambote o Njila ia Nzambi.” (Ika. 18:24-26) Mbote iahi ia katula Apolo, kioso kia mu kuatekesa ku dikaza didi?

¹¹ Kioso kia zubha ku boka mu Efezo Apolo uai mu mbanza ia Akaia. “Muene kia bhixila koko, ua a kuatekesa kiavulu oso a xikana mu [kidi] kia Nzambi. Kuma Jijudé ua ji belesa jinga kiavulu ku maka bhu nangu dia mundu, mukonda u idikiza mu Madivulu ma Nzambi kuma Jezú muène Kristu.” (Ika. 18:27, 28) Mu kithangana kieniókio, Apolo uejidile kiá kulombolola kiambote o batizu ia Kristu. Mukonda dia kuijiia o milongi ia Kristu, muéne ua “kuatekesa kiavulu” o maxibulu a ubhe ku kula mu nzumbi. Ihi i tu di longa mu musoso iú? Kála kia bhange Apolo, etu ué tu suína phala ku kumbidila o milongi i tu di longa mu Bibidia. Kienhiki-phe, se phange  u tu bhana ndunge phala tu tene ku longa kiambote mu ukunji uetu, tua tokala tu xikina, anga tu sakidila ni kulenduka kuoso. Se tu bhanga kiki tua-nda longa kiambote mu ukunji uetu.

12, 13. Londekesa kiebhi ki tu tena ku kuatekesa o dixibulu dietu ku kula mu nzumbi ni kikuatekesu kia milongi ia Bibidia.

¹² Etu tu tena ku kuatekesa akuetu kála kia bhange Pidisila ni Akuila ni Apolo. Kioso ki u kuatekesa muthu ua mesena o ku lungulula o ukexilu ua muenhu uê phala ku kula mu nzumbi, kiebhi ki u divua? Se u kafunga, kiebhi ki u divua se phange u ku sakidila o milongi ia Bibidia i ua mu bhana ia mu kuatekesa ku dibhana ni ibhidi ia kexile mu bhita na-iu? Sé phata, tu sanguluka ué kioso ki tu kuatekesa athu ku lungulula o ukexilu ua mienhu iâ. * Kiebhi ki tu tena ku bhanga kiki?

¹³ Mu izuua ia Elija saí akua Izalaiele ka solele luua se a kaiela o ubhezelu ua kidi mba ua makutu. O izuelu ia Elija ku akua Izalaiele, i tena ku kuatekesa o maxibulu a mu di longa o Bibidia lelu ka solo luua ku sidivila Jihova. (Tanga 1 Jisobha 18:21.) Xinganeka mu kifika kia mukuá: Se muthu ua mu di longa o Bibidia uala ni uôma ua ima ia-nda zuela o jindandu jê mba makamba mê, eie u tena ku mu kuatekesa ku sola ku sidivila Jihova mu ku tanga nê, o divulu dia Izaia 51:12, 13.—Tanga.

14. Ihi ia-nda ku kuatekesa ku xinganeka mu ibatulu ia Bibidia, kioso ki ua-nda bhindamena ku kuatekesa akuenu?

¹⁴ Mu Bibidia muala milongi iavulu i tena ku tu suínisa mba ku tu bazela. Nange uibhula: ‘Kiebhi ki ngi tena kuijiia o ibatulu ia Bibidia i nga tokala ku di longa kioso ki ngi bhindamena?’ Tanga o Bibidia Izuua ioso ni u xinganeke mu ibatulu i ua tange. Se u bhanga kiki ua-nda kuijiia kiambote o Bibidia, bhu kaxi ka nzumbi ikôla-phe Jihova ua-nda ku kuatekesa ku lembalala o milongi i ua di longo, kioso ki ua-nda i bhindamena.—Mar. 13:11; tanga Nzuá 14:26. *

15. Ihi ia-nda ku kuatekesa kuijiia kiambote o mak’â Nzambi?

¹⁵ Bhanga kála kia bhangele Sobha Solomá, samba kua Jihova mu ku bhinga unjimu, phala u tene kuendesa kiambote o ikalakalu mu kilunga. (2 Mal. 1:7-10) Bhanga kála kia bhangele o jipolofeta m’ukulu, di longe ni ku suína o Bibidia ‘sota jinga o kuijiia mu ku tokuesa ni muanhu,’ o Mak’â Nzambi phala kuijiia Jihova ni vondadi iê. (1 Phe. 1:10-12) O poxolo Phetele ua suínisa Timote ku di sanza ‘mu maka ma ku xikana, ni mu ulongelu uambote.’ (1 Tim. 4:6) Se u bhanga kiki ua-nda tendela kiambote o Bibidia, ua-nda kuijiia ué kiebhi ki u tena ku kuatekesa kiambote akuenu ku kula mu nzumbi. Ua-nda suínisa ué o kixikanu kiê.

16. (a) Mbote iahi ia katula akua Beleia mu ku ‘tekula mu Madivulu a Nzambi izuua ioso?’ (b) Mukonda diahi kima kiambote ku tanga o Bibidia izuua ioso?

¹⁶ O Jijudé a tungile mu Beleia mu mbanza ia Macedonha, akexile ni kifua kia ku ‘tekula mu Madivulu a Nzambi izuua ioso.’ Kioso kia boko Phaulu o njimbu iambote ku athu enhá, ene a sokesa o milongi ia kexile mu ku a longa ni milongi iejidile kiá. Avulu a mono kuila muéne ua kexile mu longa  o kidi, ene anga “a xikana.” (Ika. 17:10-12) Kiki ki londekesa kuila o ku tanga o Bibidia izuua ioso, ki suínisa o kixikinu kietu kua Jihova. O kixikanu kiki, kilombolola “ku ijidisa ima i tua dielela, ku idikiza ima kiluua i moneka.” O kixikanu kiki, kima kia bhingi phala tu bhuluke ni ku tunga ku mundu uobhe ua Nzambi.—Jihe. 11:1.

17, 18. (a) Kiebhi o henda ni kixikinu kia suína ki tena ku langa o muxima ua kifika ua Kidistá? (b) Kiebhi ki tu langa o kidielelu ku ibhidi?

¹⁷ Phaulu ua soneka: “Etu-phe tua tokala ku muanha, tu kadienu ku mesu azele. O kivunga-thulu kia ita ki tu zuata, o kuxikana ni henda; o kudielela o kubhuluka, kene o kapasete.” (1 Tes. 5:8) O muxima ua disoladi u bhinga ku u langa ku jinguma. Kiene kimoxi ué, o muxima ua kifika ua Kidistá ua bhingi ku u langa ku kituxi. Ihi i bhita se o selevende ia Jihova u kala ni kixikinu mu ikanenu Iê ni ku mu zola ni kuzola o jiphange jê? Muéne ua-nda di fikidila ni kivunga thulu. Ka-nda kuehela kima ki mu katula o ukamba ni Nzambi.

¹⁸ Phaulu ua tange kapasete, kilombolola “o kudielela o kubhuluka.” M’ukulu o masoladi akexile mu fikidila o mitué iâ ni kapasete. Mukonda dia kapasete, o disoladi dieji bhuluka. O kixikanu kietu se ki kola, ki tua-nda mesena kuívua o akua ku lungulula o kidi ni madiskursu mâ a “kubuabuala.” (2 Tim. 2:16-19) O kidielelu kietu kia-nda tu kuatekesa ué ku dituna o milongi ia athu, i tu suínisa ku bhanga o ima ia iibhila Jihova.

19, 20. Mukonda diahi tu sakidila kiavulu o mak’â Nzambi, ni kiebhi ki tu londekesa kuila tua sakidila? (Tanga o kaxa “Jihova u Ngi Bhana Muene o Kima ki Nga Bhindamena.”)

¹⁹ Mu ku zukama ku dizubhilu, tua tokala ku kolokota ku dielela mu Mak’â Jihova. Ene a tena ku tu kuatekesa kueha o ifua ia iibha ni ji hanji ja ku ta ituxi. A-nda tu tulukisa ni ku tu kuatekesa ku dibhana ni jiphaxi ji tu bhekela Satanaji ni mundu uê. O itendelesu mu Mak’â Jihova, a-nda tu kuatekesa ku kala mu njila iambata ku muenhu.

²⁰ Uejiia kuila o vondadi ia Nzambi “athu oso a bhuluke, eze mu kuijiia o kidi.” O jiselevende ja Jihova ala ué bhu kaxi ka “athu oso.” Ni athu u tuene mu longa. Maji oso a mesena ku bhuluka, a tokala “kuijiia o kidi.” (1 Tim. 2:4) Se tua mesena ku bhuluka ku mundu iú, tua tokala ku tanga o Bibidia ni ku kumbidila o milongi iê. Kioso ki tu tanga o Bibidia izuua ioso tu londekesa kuila tua uabhela o Mak’â Jihova.—Nzu. 17:17.