Jihova ‘Izuua Ioso Uambata o Kimbamba ki Ngi Xina’
Sumbala ki ngi kexile ni sauidi iambote, nga mono o kikuatekesu kia Tata ietu ia diulu ku muenhu uami. Ku 20 a mivu a bhiti ndenge, nga sange o ku sanguluka kua kidi mu ku sidivila Jihova kala muboki ua thembu ioso.
A ngi vuala ku muvu ua 1956, ni uhaxi mu miongo. Mukonda dia kiki, ki ngi kexile mu kuenda kiambote, kua moneka ué mauhaxi a mukuá a makota.
Ande dia ku ngi vuala, o jitata jami a mateka ku di longa o Bibidia ni dikaza Jimbangi ja Jihova, exile akunji a jixi jengi. Kioso ki ng’exile ngi mona ndenge, kuexile ngó aboki ofele mu mbanza ia Usakos, mu ixi ia Namibia, mua ngi vualela. Mu kiki, tua kexile mu di longa ku muiji o milongi ioso ia iônge. Kioso ki nga kexile ni sambuadi dia mivu, a ngi bhange pelasá phala ngi tene ku susa kiambote. Kioso ki nga kexile ni 14 a mivu, kua moneka o uhaxi ua kuthuba mba kikonha. Mukonda dia bhata dietu ku kala dikanga dia xikola, ni kuila nga bhingile o ku ngi langa ku jitata jami, ki ngi zubha ku di longa.
Maji né kiki nga solo ku suínisa o ukamba uami ni Jihova. Ki tu kexile luua ni madivulu avulu mu dimi dia Afrikaans, o dimi dia mam’etu. Mu kiki nga di longo o dimi dia Kingileji phala ku di longa o madivulu metu. Nga kituka muboki ua Utuminu, nga di batizala kioso ki nga kexile ni 19 dia mivu. O mivu i uana ia kaiela, ki ngi kexile ni sauidi, nga kexile mu divua kia iibha. O athu mu mbanza iami a di zolele kiavulu, o uôma ua athu ua ngi fidisa ku di bhakula mu sidivisu ia ku boka.
Kioso ngi nga kexile ni 20 a mivu, tua xi o ixi ia Namíbia, tuai mu tunga mu ixi ia Africa do Sul, iexile o veji ia dianga i nga diongeka ni jiphange mu kilunga. Kiki kiexile kisangusangu kia dikota! Maji a ngi bhange dingi pelasá.
Mu ku bhita kithangana, ngevu o diskursu dia kafunga ka ilunga dia lungu ni sidivisu ia thembu ioso. O izuelu iê ia tula ku muxima uami. Eme ngejidile kuila ki ngi kexile ni sauidi iambote phala ku bhanga o kikalakalu kiki, maji nga monene kiebhi Jihova kia kiexile mu ngi kuatekesa ni uhaxi uami. Mu kiki, nga bhingi phala ku kala muboki ua thembu ioso. Maji mukonda dia sauidi iami, o tufunga ka xikina.
Maji né kiki, eme nga solo ku di bhakula mu sidivisu ia ku boka o Utuminu. Ni kikuatekesu kia mam’etu ni jiphange ja mukuá, nga tenesa o ji ola ja muboki ua thembu ioso mu mbeji jisamanu. Kiki kia londekesa o hanji iami ia ku kituka muboki ua thembu ioso, kia londekesa ué kuila né muene ni ku kamba o sauidi, eme nga tenene ku bhanga o kikalakalu kiki. Mu kiki, nga bhingi dingi phala ku kala muboki ua thembu ioso, o veji íii o tufunga a xikina kiá. Mu kizuua kia 1 ku mbeji ia Katutu, ku muvu ua 1988, eme nga kituka muboki ua thembu ioso.
Tundé ki nga mateka o sidivisu ia thembu ioso, ngene mu mona o kikuatekesu kia Jihova. O ku longa o kidi ku athu mu veji dia ku thandanganha ni uhaxi uami, kua ngi lange, kua ngi suínisa, kua ngi kuatekesa ku kula mu nzumbi. Nga sanguluka kiavulu mu kuatekesa athu avulu ku di bhakula kua Nzambi ni ku di batizala.
O sauidi iami ki iala luua kiambote. Maji Jihova ‘izuua ioso uambata o kimbamba ki ngi xina.’ (Jisá. 68:19) Muéne ka ngi kuatekesa ngó ku di bhana ni uhaxi uami; u ngi bhangesa ué ku uabhela ku kala ku muenhu!
