1, 2. (a) Ihi i tena o ku bhita kioso ki tu xinganeka mba tu zuela kiavulu ia lungu ni muthu tua mu zolo? (Tala o foto ia dianga.) (b) Ibhuidisu iebhi i tua-nda di longa?

O KU BANZA ni kuzuela ia lungu ni muthu tua mu zolo, ku tena ku suínisa o ukamba uetu ni muthu iú. Kiene kimoxi ué ni ukamba uetu ni Jihova Nzambi. Kioso kiexile kafunga ka jimbudi, Davidi ua kexile mu bhita ithangana iavulu mu usuku mu ku tala o jithéthembua ku diulu ni ku xinganeka ku Mubhangi uê. Muéne ua soneka: “Kioso ki ngila ngi talesa ku diulu, ku ufunu ua milembu ié, ku mbeji ni jithethembua ji ua iudika, ng’amba, ngixi: Muthu muene ua soko kiebhi, phala eie ku mu suua? Mba mon’a muthu, kuila eie u mu ta muxima?” (Jisá. 8:3, 4) Kioso kia mono kiebhi kia kexile mu di kumbidila o vondadi ia Jihova ia lungu ni Izalaiele mu nzumbi, o poxolo Phaulu uambe: “O jimbongo ja Nzambi kuvula kuahi! Ku zonga kuahi o unjimu ua Nzambi, ni kuijiia kuê!”—Loma 11:17-26, 33.

² Kioso ki tu boka mu ukunji uetu, tu xinganeka mba tu zuela ia lungu ni Jihova. Kiki ki suínisa o ukamba uetu ni muéne. Aboki avulu a thembu ioso, ene mu mona kuila, o henda iâ kua Jihova iene mu di bandekesa dingi, mukonda dia ku di bhakula mu ithangana iavulu mu sidivisu ia Utuminu. O Jiphange ala mu sidivisu ia thembu ioso, mba ió a mesena ku kala aboki a thembu ioso, a tokala ku dibhuidisa: “Kiebhi o sidivisu ia thembu ioso, i suínisa o ukamba uami ni Jihova?” Se u muboki kiá ua thembu ioso, ua tokala u dibhudisa: ‘Ihi ia-nda ngi kuatekesa ku kolokota mu sidivisu íii?’ Se eie kuala luua mu sidivisu ia thembu ioso dibhuidise: ‘Ihi i nga tokala o ku bhanga phala ku bokona mu sidivisu íii?’ Tua-nda di longa kiebhi o sidivisu ia thembu ioso, i tena ku tu kuatekesa ku suínisa o ukamba uetu ni Nzambi.

3. Kiebhi o kuzuela ni akuetu ia lungu ni mabesá a Utuminu ku hádia, ku tu kuatekesa?

³ O ku tangela akuetu ia lungu ni mabesá a Utuminu, ku tu zukamesa dingi kua Jihova. Kibatulu kiebhi kia Bibidia ki ua uabhela o ku tanga kioso ki uia mu boka inzo ni inzo? Nange ua uabhela o ku tanga o Jisálamu 37:10, 11; Daniiele 2:44; Nzuá 5:28, 29; anga Dijingunuinu 21:3, 4? Kioso ki tu tangela akuetu o ibatulu íii, tu lembalala kuila, “o ujitu uambote u tu tambula, ni uhete ua uabha, u tunda ku [diulu]” kua Nzambi ietu ua uabhela o ku bhana, Jihova Nzambi.—Tiia. 1:17.

4. Mukonda diahi o kisakidilu kietu kua Nzambi ua uabhela o ku bhana, ki di bandekesa dingi kioso ki tu bokela akuetu?

⁴ Kioso ki tu mona o hadi iene mu tala o athu, tu sakidila Jihova mukonda dia ku tuijidisa o kidi. O athu ku mundu kala ni itendelesu ia a kuatekesa kuenda kiambote, phala ku zediua ku muenhu. Avulu a thandanganha ni ihi ia-nda bhita ku hádia, ene kala ni kidielelu. Ene a sota kuijiia se mukonda diahi tuala ku muenhu. Nê muene ió amba kuila abhezi a Nzambi, kejiia kiavulu i longa o Bibidia. Ene a sokela ni akua Ninive. (Tanga Jona 4:11.) Kioso ki tu bhita dingi ithangana iavulu mu sidivisu ia kuboka, tu tena ku mona kiambote kuma, o athu u tuene mu boka ala ni nzala mu nzumbi, o mundu ua Jihova kana. (Iza. 65:13) Tu mona kuila Jihova ka tu dikila ngó mu nzumbi; Muéne u tu ixana phala ku tu tululukisa o mixima, u tu bhana kidielelu.—Dij. 22:17.

5. Kiebhi ki tu divuua ia lungu ni maka metu, kioso ki tu kuatekesa akuetu mu nzumbi?

⁵ Kioso ki tu longa akuetu o Bibidia, ki tu thandanganha kiavulu ni maka u tu bhita nau. O phang’etu Trisha, muboki ua thembu ioso, ua mono kuila kiki kima kia kidi, kioso o jitata jê kia di xisa. Muéne uambe: “Ki ngi kexile mu divuua kiambote, ki ngi mesenene kuia mu boka.”Saí kizuua muéne ua luualele kiavulu ka mesenene ku tunda ku bhata, maji muéne uai mu longa o Bibidia, ku tuana tu tatu akexile mu bhita ué ni maka a bhonzo. O tat’â ua a xisa, o dikota diâ ka kexile mu ku a langa kiambote. Trisha uambe: “O maka akexile mu bhita nau o tuana tutu, a betele-kota, o maka ami ndenge. Kioso ki tua kexile mu di longa, ene a sangulukile kiavulu, kála ka kexile mu bhita mu ibhidi ienii. O tuana exile ujitu ua ngi bhele Jihova phala eme ku suína, bhenge-bhenge mu kizuua kieniókio.”

6, 7. (a) Kiebhi ki tu suínisa o kixikanu kietu mu ku longa o kidi kia Mikanda Ikôla ku akuetu? (b) Kiebhi ki tu divua kioso ki tu mona o athu u tua mu longa o Bibidia, a mu lungulula o mienhu iâ?

⁶ Kioso ki tu longa o kidi kia Bibidia ku akuetu, o kixikinu kietu mu kidi kiki, ki suína dingi. O poxolo Phaulu uambe kuila saí Jijudé mu izuua iê ka kexile mu kumbidila o kidi kia kexile mu bokela akuâ, muéne uambe: “Eie u longesa akuenu, ku di longela-hi eie-muene?” (Loma 2:21) Kiki ki kiene ki bhanga o aboki a thembu ioso lelu! Ene ala ni ithangana iavulu phala ku longa o kidi kua akuâ. Maji phala ku tena o ku bhanga kiki, ene a tokala ku di longa uâ, phala ku tena ku tambuijila o ibhuidisu. Saí muboki a mu ixana Janeen, uambe: “Kioso ki ku moneka kithangana phala ku longa o kidi kia Bibidia, kidi kiki, ki suína dingi ku muxima uami. Mukonda dia kiki, o kixikanu kiami ki di bandekesa dingi.”

⁷ Kioso ki tu mona o maxibulu metu a mu belesela o itumu ia Bibidia ni ku lungulula o mienhu iâ, o kisakidilu kietu ku unjimu ua Nzambi ki di bandekesa dingi. (Iza. 48:17, 18) Kiki ki tu kuatekesa ku di suínisa ué mu kumbidila o itumu íii ku muenhu uetu. O muboki ua mukuá a mu ixana Adrianna, uambe: “O athu a zanga o mienhu iâ kioso kia dielela mu unjimu uâ. Maji kioso kia mateka ku dielela ku unjimu ua Jihova, ene a tambula mabesá  avulu.” Phil kiene ué kia zuela: “Eie u tena ku mona kiebhi Jihova kia lungulula o mienhu ia athu, akexile mu di ta mu iluezu kioso kia kexile mu dielela o unjimu uâ.”

8. Kiebhi ki tu kuatekesa ku kalakala kumoxi ni jiphange mu ukunji?

⁸ Tu di suínisa kiavulu mu ku kalakala kumoxi ni phange jetu mu ukunji. (Jisa. 13:20) Aboki avulu a thembu ioso a kalakala kiavulu ni jiphange jâ. Kiki ki a kuatekesa dingi o ku “di konda malamba.” (Loma 1:12; tanga Jisabhu 27:17.) Saí muboki a mu ixana Lisa uambe: “Ku salu o athu a-ndala ku di tunda ku thandu dia akuâ, ene a kala ni luímbi lua akuâ. Ene akua jimbuémbue, a zuela ima ia bolo. A-ndala ku kala ku pholo dia akuâ. Saí ithangana a ku zukutisa mukonda dia ukexilu ué ua Kidistá. Maji o ku kalakala mu ukunji ni jiphange Jikidistá, ku tu suínisa. Kioso ki ngi zumbuka ku disukilu dia kizuua, ngi vutuka ku bhata nga sanguluka, né muene se nga bhuila.

9. Kiebhi o ukaza u suína dingi, kioso o makaza kia kalakala kumoxi mu sidivisu ia thembu ioso?

⁹ Kioso o makaza kia kalakala kumoxi mu sidivisu ia thembu ioso, o ukaza uâ u suína dingi. (Ndo. 4:12) Madeline uexile muboki ua thembu ioso ni muadi’ê, uambe: “Eme ni muadi uami, tu zuela o ima iavulu ia bhiti mu ukunji ni kiebhi ki tu tena ku longa akuetu o milongi i tua di longo mu Bibidia. Mivu ni mivu i tu bhanga mu ukunji, o ukamba mu dietu u suína dingi.” O phange Trisha, muboki ua thembu ioso uambe ué: “Eme ni muadi uami, phala ki tu te makongo, ki tu bhindamena ku sumba ima ki tu i bhindamena. Mu kiki, ki tuala ni maka ni kitadi. Etu tu kalakala kumoxi, mu ku kunda dingi o athu, kiki ki tu kuatekesa ku di bhana kiambote ni ku kala kiambote mu nzumbi.”

10. Kioso ki tu ta o Utuminu ua Nzambi ku pholo dia ima ietu, kiebhi ki kala o kixikanu kietu kua Jihova?

 ¹⁰ O kidielelu kietu kua Jihova ki di bandekesa dingi kioso ki tu ta o Utuminu uê ku pholo, Jihova u tu kuatekesa, u tambuijila ué o misambu ietu. Kidi muene, o Jikidistá joso ja fiiele a dielela kua Jihova. Maji o aboki a thembu ioso, a tena ngó ku kolokota mu sidivisu, se ene a dielela kua Jihova. (Tanga Matesu 6:30-34.) O phange Curt uexile múkuatekexi ua kafunga ka ilunga, ua xikina kuia mu kunda kilunga, kia kexile dikanga dia bhata diâ, mu kuenda a bhanga ola jiiadi ni makuinhi atatu a ithangana. Muéne ni muhatu’ê exile aboki, ene ka kexile ni kazolina ka soko phala kuia ni ku vutuka. Mukonda kua kambele hanji semana phala ku tambula ka kitadi. O phange Curt, uambe: “Eme nga di bhuidisa se nga banze muéne kiambote mba kana.” Kia zubha o ku samba, a mono kuila, a tena ku kumbidila o kikalakalu kiki, mu ku dielela kuila Nzambi ueji langa o ibhindamu iâ. Kioso kia kexile kiá phala kuenda, sai phange ua exana iu ua ambela kuila ua kexile ni ujitu phala ene. Kiexile o kitadi ki tua bhindamene phala kuenda o njila. O phange Curt, uambe: “Se kiki ki bhita n’eie veji javulu, ejiia nakiu kuma Jihova muene ua mu ku kuatekesa.”

11. Mabesá ahi a tambula o aboki a thembu ioso?

¹¹ O aboki a thembu ioso a mono kuila kioso kia di bhakula kua Jihova ni mu sidivisu iê o ukamba uâ ni Jihova u suína dingi, ene a tambula mabesá avulu. (Mate. 28:2) Maji o sidivisu ia thembu ioso ki izala ngó ni mabesá. Kuene ué ibhidi, mukonda se-ku selevende ia Nzambi, kene mu bhita mu ibhidi ia bheka o ku bhukumuka kua Adá. Saí ibhidi nange i tena ku bhangesa o aboki ku xa hanji o sidivisu iâ mu kithangana. Maji ene a tena ku di bhana ni ibhidi íii. Ihi i tena ku kuatekesa o aboki a thembu ioso ku kolokota mu ku sanguluka mu sidivisu iâ?

12, 13. (a) Ihi ia tokala o ku bhanga o muboki ua thembu ioso, se ua mesena ku tenesa o ji ola? (b) Mukonda diahi kima kiambote ku tanga o Bibidia izuua ioso, ni ku di longa o Bibidia ubheka, ni ku xinganeka ia mu di longa?

¹² O aboki a thembu ioso a kalakala kiavulu. Nange kia a bhonza ku iudika kiambote o ima iâ, maji kima kia tokala. (1 Kol. 14:33, 40) Se kia mu bhonza o muboki ku tenesa o ji ola, ua tokala ku tonginina kiambote ihi ia mu bhanga mu kithangana kia tokala kuia mu boka. (Efe. 5:15, 16) Muéne ua tokala ku di ebhuidisa: “Thembu kuxi i nga mu zanga mu itonokenu? O kuila nga tokala ku lungulula o ola iami ia sidivisu? O kuila ngene mu zanga kithangana mu ima ki i tokala? O Kidistá ua tokala ué ku mona se ua mu bhanga ima i mu fidisa ku bhanga o sidivisu iê ia ku boka. O aboki a thembu ioso, a tokala ku di bhanga o ibhuidisu íii, ni ku lungulula o ukexilu uâ se kua bhingi.

¹³ O muboki ua thembu ioso ua tokala ku kala ni kithangana kia ku tanga o Bibidia izuua ioso, ku di longa ubheka, ni ku xinganeka mu milongi ia mu di longa. O muboki ka tokala kuehela kuila o ima ki iala ni valolo iavulu, i mu katula o kithangana kia tokala ku phala ku bhanga o ima ia beta-o-kota. (Fil. 1:10) Mu kifika, o muboki u vutuka ku bhata kioso kia zumbuka mu ukunji. Muéne u mesena ku pelepalala o milongi ia kiônge. Maji u dianga ku tanga o njimbu iala mu internete. O kiala hanji mu tanga o njimbu mu komputadolo, u jikula hanji difué diéngi phala ku tala o ima ia mesena o ku sumba. Kia tale ku thembu, ola jiiadi ja bhiti kiá, ka mateka luua o ku di longa mu usuku uenhó. Mukonda diahi enhá maka a dikota? O athu ene mu lenga kiá thembu phala ku tambula kikoué, ene mu langa kiambote o mikutu iâ phala ku lenga mivu ioso. Kiene kimoxi ué o aboki a thembu ioso a tokala ku kala ni kithangana kia ku di longa, phala ku suína mu nzumbi ni ku kolokota mu sidivisu ia thembu ioso.—1 Tim. 4:16.

14, 15. (a) Mukonda diahi o aboki ka tokala ku kala ni ima iavulu ku mienhu iâ? (b) Se o muboki ua thembu ioso u kala ni ibhidi, ihi ia tokala o ku bhanga?

 ¹⁴ O muboki ua thembu ioso u di tunda kiambote, ió u di suínisa u sanguluka ni ima iofele, ka bhindamena ima iavulu ku muenhu uê. Kiki kiene kia suínisa Jezú o maxibulu mê ku bhanga. (Mat. 6:22) Muéne ka kexile ni ima iavulu ku muenhu uê, mu kiki ua kexile ni kithangana kiavulu phala ku bhanga o ukunji uê, se ku landuka. Muéne ua zuela sé hele: “O makombe mene ni jingenda jâ, o jinjila ue ji bhita bhulu, sai ikalanga iâ; maji o Mon’a Muthu-phe kala ni kididi bhua zekesa o mútue uê.” (Mat. 8:20) O aboki a kaiela o phangu ia Jezú, ejiia kuila o ku kala ni ima iavulu, kua-nda bhinga kithangana phala ku langa o ima íii, mba, ku sumba ima ia mukuá kioso ki i sekala mba ijila.

¹⁵ O aboki ejiia kuila o ujitu ua ku bhanga o sidivisu íii, ki uijila mu nguzu iâ. Ene ejiia kuila o sidivisu ia thembu ioso, ujitu u tunda kua Jihova. Kienhiki, phala ku kolokota mu sidivisu, o aboki a tokala ku dielela kua Jihova. (Fil. 4:13) Kua-nda moneka maka ni ibhidi ia mukuá. (Jisá. 34:19) Se ku moneka ibhidi, o aboki a tokala ku bhinga itendelesu kua Jihova, ni ku muehela ku a kuatekesa, mu veji dia ku xa o sidivisu ni lusolo. (Tanga Jisálamu 37:5.) Mu ku mona kiebhi Jihova kiene mu ku a langa ni henda ioso, ene a-nda mu zukama dingi, mukonda muéne Tata iâ ia diulu.—Iza. 41:10.

16. Se ua uabhela o sidivisu ia thembu ioso, ihi i ua tokala o ku bhanga?

¹⁶ Se ua mesena ué ku tambula mabesá, kála o jiphange ala mu sidivisu ia thembu ioso, tangela Jihova o vondadi iê. (1 Nzu. 5:14, 15) Zuela ni jiphange ala mu sidivisu ia thembu ioso. Suua jimbambe ja-nda ku kuatekesa o ku kala muboki ua thembu ioso. Kiki kiene kia bhangele Keith ni Erika. Kála kiene mu bhanga o makaza mu kitala kiâ, uâ akexile ni salu ia ku kalakala kizuua kia muvimba, a sumbu inzo ni dikalu dia ubhe, kioso kia kazala, ene ambe: “Tua banzele kuila o ima íii ieji tu bhana kisangusangu kiavulu—maji ki i tu sangulukisa.” Kioso Keith kia mu katula ku salu kua kexile, muéne ua mateka ku kalakala kala muboki ua ithangana ni ithangana. Muéne uambe: “O ku kala muboki ua ithangana ni ithangana, kua ngi lembalesa kuila, o kisangusangu kia dikota, kijila mu ku bhanga o ukunji.” Ene a bhange ukamba ni dikaza diexile aboki a thembu ioso, dia a kuatekesa o ku mona o kisangusangu kijila mu ku sosola o ima ku muenhu, phala ku kala aboki a thembu ioso. Ihi ia bhange Keith ni Erika? Ene ambe: “Tua soneka mu papela o jimbambe ji tua suu, etu tua kolala ku gelela, etu tua kexile mu tonginina o jimbambe ji tua kumbidila kiá.” Mu ku bhita kithangana a kituka aboki a thembu ioso.

17. O kuila u tena ku sosola o ima ku muenhu uê phala ku kala muboki ua thembu ioso?

¹⁷ O kuila u tena ku kala muboki ua thembu ioso? Se u mona kuila kua-nda tena, bhanga ioso i ua tena phala ku zukama dingi kua Jihova, mu ku kalakala kiavulu mu sidivisu ia ku boka. Samba kua Jihova, eie u tena ku mona kuila se u lungulula ima ku muenhu uê, ua-nda tena ku kala muboki ua thembu ioso. Kioso ki ua-nda mateka o sidivisu ia thembu ioso, ua-nda sanguluka kiavulu ua-nda mona kuila, se-ku kima ki ua xi kia beta-o-kota, o sidivisu íii ndenge. Ua-nda sanguluka kiavulu mu ku ta o Utuminu ua Nzambi ku pholo. (Mat. 6:33) Ua-nda mona o kisangusangu kijila mu ku kuatekesa akuenu. Ua-nda kala ni kithangana kiavulu kia ku banza ni kuzuela ia lungu ni Jihova, kioso ki uia ni ku bandekesa o henda iê kua muéne ni ku mu bhekela kisangusangu.