1, 2. Jimbulula ihi ia bhangele Jezú ku maxibulu mê, kioso kia bhangele o Fesa ia Phasu ku muvu ua 33 K.K.

MU USUKU ku 14 ka Nisã ku muvu ua 33 K.K. Jezú ni maxibulu mê a sangulukile mu ku bhanga o Fesa ia Phasu, ia ku lembalala kiebhi Nzambi kia bhulula o jikuku jâ ku ubhika mu ixi ia Ijitu. Maji o maxibulu mê eji ku a bhulula katé ku ‘hádia ni hádia.’ Mu izuua ieji kaiela, o Mesene iâ eji mu jibha ku jinguma jê. Maji o kalunga kaka, keji bheka mabesá avulu. Maji o manhinga mê, eji bhulula o athu oso ku ituxi, ni kufuá.—Jihe. 9:12-14.

² Ki tu tokala ku jimba kuila Nzambi ua tu bhana o ujitu iú, mukonda dia kiki, Jezú ua mateka ku bhanga o fesa ia ubhe phala o mivu ioso ia bhingana bhu kididi kia fesa ia Phasu. Muéne ua katula o mbolo sé felemendu anga u i bukula, u i uanena o 11 a jipoxolo jê ja fiiele, muéne uambe: ‘Iú ua difuangana o mukutu uami, uó bhane mukonda dienu. Bhangenu jinga kienhiki mu ku ngi banza eme. Muéne ua bhange ué kiki ni kopho ia vinhu iu ua ambela, uixi: “Dikáu didi, kiene o Kikutu kióbhe bhu kaxi ka Nzambi ni athu, kiókolese ni manhinga mami, manda ku bhubha mukonda dienu.’—Luka 22:19, 20.

3. (a) Kima kiahi kio bhilule kioso kiafú Jezú? (b) Ibhuidisu iahi ia lungu ni musambu ua Jezú, u tu sanga mu divulu dia Nzuá kibatulu kia 17?

³ O kijila bhu kaxi ka Nzambi ni muiji ua Izalaiele, kia kexile mu bhixila bhu disukilu diê. Eji ki bhinganesa ni kikutu kia ubhe, bhu kaxi ka Jihova ni akaiedi a undu a Jezú. Jezú ka mesenene kuila, o akaiedi’ê, a kala kála o akua Izalaiele. O akua Izalaiele, ka di bundile kumoxi mu ku bheza Nzambi, ene a xingixile  o dijina dia Nzambi. (Nzuá 7:45-49; Ika. 23:6-9) Muéne ua mesenene kuila, o akaiedi’ê a di bunda kumoxi mu ikalakalu, phala ku jingisa o dijina dia Nzambi. Ihi ia bhangele Jezú? Muéne ua bhangele musambu uambote, o ku tanga o musambu iú, ujitu ua dikota. (Nzuá 17:1-26; Tala o foto) Kioso ki tu tanga o musambu iú, tu tena ku xinganeka: “O kuila Nzambi ua tambuijila o musambu ua Jezú?” Etu ué tua tokala tu di xinganeka mu dietu: “O kuila nga mu bhanga kála kia bhingi Jezú mu musambu?”

4, 5. (a) Ihi i tua di longo ku mbandu ia dianga ia musambu ua bhangele Jezú? (b) Kiebhi kia tambuijila Jihova ku musambu ua bhangele Jezú ku kima kia bhingi phala muéne?

⁴ Jezú ua kexile mu kala ni maxibulu mê katé, muene mu usuku. Muéne ua tale ku diulu u ua sambe: “Tata, kumbi dieza-bhu kiá. Jingisa Mon’é o Mon’é n’a ku jingise eie. Mbata o Mona ua mu bhana ungana ua kutumina athu oso, phala oso ua mu bhana-nâ muène a a bhane o muenhu ki uábhua. O muenhu ki uábhua uenhú: Kuila oso a ku ijiie eie u Nzambi ia kidi imoxi-èlele, ni kuijiia ue Jezú Kristu, ió ua mu tumu eie. Eme nga ku jingisa Eie mu ngongo, eme nga zubha o kikalakalu ki ua ngi bhana kubhanga. Tata iami! Kiki-phe ngi jingise eie-muène ni kijingu, ki nga kexile na-kiu m’okulu ni eie, kuila mu ngongo kiluua mu di bhanga.”—Nzuá 17:1-5.

⁵ Ku musambu ua bhangele Jezú, muene ua mateka o kuzuela o ima ia bêtele-o-kota ku muenhu uê. Kia dianga ua sambe phala o dijina dia tat’ê a di jingese. O musambu iú, ua difú kála ua diangele o ku bhanga kioso kia longo o maxibulu mê o kusamba: “Tata ietu, uala ku maùlu, ene’oso dijina diê a di kôlose.” (Luka 11:2) Kaiiadi ua sambe ia lungu ni ibhindamu ia maxibulu mê, kuma muene “ua-nda kua bhana muenhu ua kalelaku.” Mu ku suka-ko, Jezú ua bhingi kima kua Tat’ê, muéne uambe: ‘Tata iami! Kiki-phe ngi jingise eie-muène ni kijingu, ki nga kexile na-kiu m’okulu ni eie, ande dia ku bhanga o mundu.’ Jihova ua sakidila Mon’ê Jezú mu ufiiele ué, mu ku mu bhana dingi ima ka i bhingi, “o dijina dia beta kota ku ujitu,” o ji-anju joso ndenge.—Jihe. 1:4.

6. Phala o jipoxolo ku kala ni muenhu ua kalelaku, a tokelele ku bhanga ihi, ni kiebhi ki tuejiia kuma ene a belesela muene o itendelesu?

⁶ Jezú ua sambe ué ia lungu n’etu tu akua ituxi se ihi i tua tokala o ku bhanga phala ku tambula o muenhu ua kalelaku. (Tanga Nzuá 17:3.) Muéne uambe kuila, tua tokala ku kolokota mu kuijiia Nzambi ni Kristu. Phala ku bhanga kiki, tua tokala ku bhangesa o mesu ku tala, ni mátui metu kuívua o ima ia lungu ni Jihova ni Mon’ê. O ukexilu ua mukuá ua kuijiia Nzambi ni Mon’ê, o kuenda ni ku bhanga i tua mu di longa. O jipoxolo, akexile mu kaiela o ima iiadi íii, ia bhingile Jezú mu musambu. “Eme nga a bhana o maka moso [u] ua ngi bhele, o ene a ma tambulula.” (Nzuá 17:8) Maji phala ku kala ni muenhu ua kalelaku, ene a tokelele ku xinganeka mu Mak’â Nzambi, ni ku kumbidila ia di longo ku mienhu iâ kioso kia kexile mu Ixi. O kuila o jipoxolo a belesela muene o itendelesu íii ku muenhu uá? A kumbidila muene. Etu tua kijiia, kuma o majina má a soneka ku 12 dia matadi a ma disesa a mbanza ia Ubhe ia Jeluzaleme.—Dij. 21:14.

7. O “kuijiia” Nzambi ku lombolola ihi, ni mukonda diahi kua beta-kota?

⁷ O kizuelu “a ku ijiie eie” mu dimi dia Ngeleku, a ki jimbulula “ku kolokota mu  kuijiia” mba “ku suluka mu kuijiia,” kulombolola kuenda ni kuijiia dingi ia lungu ni Nzambi. O kuijiia o Nzambi ia Bhange o ngongo, ki ku bhingi ngó ku muijiia o ídifua ni kikanenu kiê, maji ku bhinga dingi ima ia mukuá. O kuijiia Jihova, ku bhinga ku kala ni ukamba ni muene ni jiphange jetu mu nzumbi. O Bibidia i jimbulula,“uoso [ua] kambe kuzola, kejiia Nzambi, kuma Nzambi henda.” (1 Nzu. 4:8) O kuijiia Nzambi kua bhingi ku mu belesela. (Tanga 1 Nzuá 2:3-5.) Ki ujitu ua dikota o kuijiia Jihova? Maji, kála kia bhitile ni Juda dia Kadiota, o ukamba iú, sumbala u tena ku texika. Tua tokala tu di langa phala ki tu texi o ukamba iú ni muéne. Se tu bhanga kiki, tua-nda kala polondo phala ku tambula o muenhu ua kalelaku.—Mat. 24:13.

8, 9. Ihi ia diangele ku muenhu ua Jezú, kioso kia kexile mu ixi ni ijila iebhi ia ditunu?

⁸ Kioso ki u tanga o musambu uala mu divulu dia Nzuá mu kibatulu kia 17, nanhi u tena o ku kala ni phata ia henda ia Jezú, ia londekesa ku ji poxolo jê ni maxibulu mê eji kuíza ku hádia? (Nzuá 17:20) Tua tokala ué kuijiia kuila o ku bhuluka kuetu, ki kiene o kima kia betele-kota phala Jezú. Mu ukunji ué mu ixi, o kima kia betele-kota phala muéne, o ku jingisa o dijina dia Tat’ê. Mu kifika, kioso kia zuela mu dilombe dia Jijudé mu Nazalé, mukonda diahi uejile mu Ixi, Jezú ua tange o divulu dia polofeta Izaia kuila: ‘Nzumbi ia Jihova ia ngi tula, mukonda muéne ua ng’ undu ku tudila o jingadiama, Njimbu Iambote.’ Tua kijiia kuila, Jezú kioso kia tange o izuelu íii, ua tumbula o dijina dia Nzambi.—Luka 4:16-21.

⁹ Ande dia Jezú kuiza mu Ixi, o atuameni a Jijudé, a kexile mu fidisa o athu ku tumbula o dijina dia Nzambi. Tuejiia kuma, Jezú ka ki uebhele. Muéne uambela o jinguma jê: “Mbata eme ngeza mu dijina dia Tata iami, enu-phe ki mu ngi tambulula. Se muthu uengi uoso-uoso uiza mu dijina diê-muène, muenhó enu muene mu mu  tambulula.” (Nzuá 5:43) Mu ku bhita izuua ande dia ufuilu ué, muéne ua sambe mu ku londekesa o kima kia betele-kota ku muenhu uê: “Tata, fumanesa o dijina dié.” (Nzuá 12:28) Mu kiki, ki tu tokala ku sasumuka, mukonda dia Jezú kulondekesa o ki bhindamu kiê, kia lungu ni dijina dia Tat’é ku musambu u tua mu di longa.

10, 11. (a) Ihi ia bhingile phala Jezú ku ijidisa o dijina dia Tat’ê? (b) O maxibulu a Jezú eji kalakala phala ku bhanga ihi?

¹⁰ Jezú ua sambe: ‘Eme nga tukulula o dijina diê ku athu u ua ngi bhana-nau mu’xaxi ka mundu. Ene a kexile é, eie ua ngi bhana-nâ. Ene a bhake o maka mê; Eme ki ngala dingi mu ngongo, iá-phe ala hanji mu ngongo. Eme kindala ngiza ko kuê. Tata Ukôla! A bhake mu dijina diê, oso ua ngi bhana-nâ phala ene a kale umoxi, kala etu ki tuala mu umoxi, n’eie, n’eme.’—Nzuá 17:6, 11.

¹¹ O ku longa o dijina dia Tat’ê ku maxibulu mê, kua bhingile dingi kima, o ku di tumbula ngó, ndenge. Jezú ua kuatekesa kuijiia se Jihova nanhi. Muéne ua a longo ué o idifua iê iambote, ni henda iê kokuetu. (Mak. 34:5-7) Lelu Jezú sobha ku diulu, maji uene mu kuatekesa hanji o maxibulu mê ku longa o dijina dia Nzambi mu ixi ioso. Mukonda diahi ua mu bhanga kiki? Phala ku kuatekesa athu avulu kuijiia Jihova, ande dia ku bhixila o dizubhilu dia mundu iú. Kioso kia-nda mateka o dizubhilu, muéne ua-nda bhulula o jimbangi jê ja fiiele, kienhiki o athu enioso an-da kuijiia o dijina dionene dia Jihova!—Ize. 36:23.

12. Ima iahi itatu ia bhingile phala ku zubha o kikalakalu kia mateka Jezú?

¹² Kioso kia kexile mu Ixi muéne ua kalakala kiavulu phala ku kuatekesa o maxibulu mê ku di bhana ni iluezu iâ. Kiki kia bhingile o ku a kuatekesa phala ene ku zubha o kikalakalu kia mateka muéne. “Kala ki ua ngi tumu eme mu ngongo, kiene ue ki nga a tumu ene mu ngongo.” Phala o maxibulu ku bhanga kiambote o kikalakalu kia ku bhulula o mienhu, a bhingile ki kuatekesu. Kia dianga, muéne ua sambe phala ene ka bhange mbandu ia mundu ua Satanaji. Kaiadi, muéne ua sambe phala ene n’a zele, mu ku belesela o Mak’â Nzambi. Katatu, Jezú ua sambe mu veji javulu phala o maxibulu mê a di bunde bhu kaxi ka henda, kála muéne ni Tat’ê kia dibundu. Kala muthu mu dietu ua tokala ku dibhudisa: O kuila nga mu bhanga o ima itatu ia zuela Jezú mu musambu? Jezú ua londekesa kuila dielele kuma o maxibulu mê ku hádia kiene ué kieji bhanga muéne uambe: “O mundu phala u xikane kuma eie ua ngi tumu.”—Tanga Nzuá 17:15-21.

13. Kiebhi Jihova kia tambuijia o musambu ua Jezú ku hama ia dianga?

¹³ Kioso ki tu tanga o Bibidia mu madivulu a dianga a ji Poxolo, ni divulu dia Ikalakalu, tu tena ku mona kuila o musambu ua Jezú a u tambuijila. Banza ngó kiebhi ki kieji bhita bhu kaxi ka Jikidistã, a mukuá jinvuama, iá jingadiama ni jijudé, ni iá a tokelele ku jixi jengi. Ne muene kiki, enioso a di bundile, kála o idiandu ia mukutu, o Jezú muéne o mutué. (Efe. 4:15, 16) Ku mundu iú ua Satanaji ua diuane, kiki, ki kiene mu bhita. Kiki ki bhita ngó mu kutena kua nzumbi ikôla ia Jihova.—1 Kol. 3:5-7.

14. Kiebhi o musambu ua Jezú kiene mu u tambuijila lelu?

¹⁴ Maji o ku di bunda kuku, ki ku nangenena kioso kiafú o jipoxolo joso. Mu veji dia kiki, kua moneka ubhezelu ua makutu. O ilongesu ia makutu ia bokona mu kilunga, mukonda dia kiki, kia bhekela o kilunga ku di uanuna. (Ika. 20:29, 30) Maji ku  muvu ua 1919, Jezú ua bhulula o akaiedi’ê ku ilongesu ia makutu, iu ua a bundu ku ‘dijikita dia ku di bunda dia tenena.’ (Kol. 3:14) Ihi ia tena o ku bhanga, mukonda dia ku di bunda kumoxi mu kikalakalu? O hama a sambuadi dia mazunda a “jimbudi jamukuá” ndenge, a “tundu mu ifuxi ioso, ni mu miji ioso, ni mu madiembu moso, ni mu madimi moso,” a ongeka kumoxi ni jimbudi ja undu Nzambi. (Nzuá 10:16; Dij. 7:9) Kiki kiene o kitambuijilu kia madiuanu kia musambu ua Jezú uambe, ‘o mundu ni u xikane kuma eie ua ngi tumu, kuma ué ua a zolo, kála ki ua ngi zolo eme.’—Nzuá 17:23.

15. Ihi ia bhingi Jezú phala o akaied’ê a a undu?

¹⁵ Ande dia kithangana kia usuku ua 14 ka Nisã, Jezú ua ximana o jipoxolo jê mu ku bhanga na-u kikutu kia ku tumina na-u kumoxi ku Utuminu uê. (Luka 22:28-30; Nzuá 17:22) Jezú ua sambe phala oso eji kala akaiedi’ê: “Tata iami! Nga mesena enhó oso ua ngi bhana-nâ, a kale ni eme koko kuoso ku ngà kala. Nga mesena kuila a mone kijingu kiami ki ua ngi bhana, kuma eie ua ngi zola tunde bhuoso bhaná, mu ngongo kiluua mu kala dimatekenu diê.” (Nzuá 17:24) O jimbudi ja mukuá a sanguluka kiavulu ni ujitu ua tambula o Jikidistá a a undu, ene kala ni luímbi. Kiki kilondekesa kuila o Jikidistá joso ja kidi a dibundu kumoxi.

16, 17. (a) Ihi iambe Jezú ku di sukilu dia musambu uê? (b) Ihi i tua tokala o ku bhanga?

¹⁶ Lelu athu avulu ku mundu ka xikina kuila Jihova uala ni mundu ua di bundu kumoxi, a muijiia kiambote. Kiki kia bhitile ué kia kexile Jezú mu ixi. Muéne ua suku ni izuelu íii: “Tata ua iuka! O mundu ki u kuijiia, eme-phe nga kuijiia; enhá ue a k’ijiia kuma eie ua ngi tumu. Eme nga ejidisa o dijina dié, hanji ngi d’ijidisa o dijina dié, hanji ngi d’ijidisa dingi, phala o henda i ua ngi zola na-iu eme, ni i kale mua ene, ni eme-muène mua ene.”—Nzuá 17:25, 26.

¹⁷ Nanhi u tena ku dituna kuila Jezú ua bhangele kála kia bhingile mu musambu? Mukonda muéne o mutuameni ua kilunga, muéne ua suluka mu ku tu kuatekesa kuijidisa o dijina dia Tata, ni ikanenu iê. Tu tena ku mu tumaka, se tu bhanga o kikalakalu kia tu tumina kia ku bhanga maxibulu. (Mat. 28:19, 20; Ika. 10:42) Etu ué tu di suínisa kiavulu phala tu kale ni ku tululuka mudietu. Se tu bhanga o kienhiki, tua-nda bhanga kála kia bhingile Jezú mu musambu uê, tua-nda jingisa o dijina dia Jihova, mu ku suka-ku, tua-nda kala ni kisangusangu sé dizubhilu.