SAÍ kafunga a mu ixana François, ua tungu mu ixi muala o ima iambote uambe: “O kavuanza ka bhitile mu kithangana kia ku sola o nguvulu ia tokalele ku tumina, ka bhangesa Jimbangi javulu ja Jihova ku xisa o mabhata mâ. Ki ku kexile kudia, mba milongo, o ia subhukile-ku, ia tele kalu iavulu. O jibango a ji jikile, ki mu kexile kitadi.”

O jiphange a kalakala mu filiiale, ni lusolo luoso, a bhongolola ima iavulu phala ku kuatekesa o jiphange a diongekele mu Ididi ia Ubhezelu. O ibuka ia kexile mu bhanga o kavuanza, a xitile o jinjila, maji o ibuka iiadi íii, iejidile kuila o Jimbangi ja Jihova ka di ta mu maka a jinguvulu, mukonda dia kiki, ene akexile mu kuehela o dikalu dia filiiale ku bhita izuua ioso.

François uambe: “Kioso ki tua kexile múia mu Kididi kia Ubhezelu, kua kexile disoladi ua kexile mu loza, muéne ua lozo ué ku dikalu dietu. O ji bala ja kexile mu bhita bhu kaxi k’etu. Kioso ki tua mono o disoladi dia kexile mu kuíza ko kuetu ni uta bhu maku, tua bhilula o dikalu ni lusolo, anga tu vutuka ku filiiale. Tua sakidila Jihova mukonda tua bhuluka. Mu kizuua kia mukuá, o 130 a jiphange a kexile mu Kididi kia Ubhezelu, akexile kiambote. Saí jiphange ejile ku filiiale ku tua kexile mu dikila o ibhindamu iâ mu nzumbi, ni ima ia mukuá, katé kia bhiti o kavuanza.”

François uambe ué: “O jiphange mu filiiale, a tambuile mikanda iavulu ia jiphange mu jixi ja mukuá, akexile mu sakidila. O ku mona kuila o jiphange jâ, a tundile mu jixi jengi, ejile mu ku a kuatekesa, kia suínisa o kidielelu kiâ kua Jihova.”

Kioso ki ku bhita dibhebhu, etu ki tuambela ngó o jiphange jetu kuila, ndenu “mu di fute, mu ikute.” (Tiia. 2:15, 16) Mu veji dia kiki, tu bhanga ioso phala ku a kuatekesa mu ibhindamu iâ. Kála kia bhitile ku hama ia dianga, kioso kiévuile kuila kua kexile nzala, o ‘jixibulu joso, kala muthu kioso kia soko na-kiu, a solo ku sangela kudia ni ima ia mukuá phala ku kuatekesa o jiphange ja tungu mu Judeia.’—Ika. 11:28-30.

O Jimbangi ja Jihova a mesena ku kuatekesa mu ibhindamu ia akuâ. Maji ene ejiia kuila, o athu a bhindamena ué kima kia mukuá. (Mat. 5:3) Phala ku a kuatekesa kuijiia o kibhindamu kiki, ni ku bhanga kima phala ku zubha o kibhindamu kiâ, Jezú ua tumina o akaiedi’ê ku bhanga maxibulu. (Mat. 28:19, 20) Muthu ni muthu mudietu, u bhana o kithangana kiê, ni nguzu iê, ni jimbongo jê, phala ku bhanga o kikalakalu kiki. O kilunga kiene mu kuatekesa ni jimbongo, maji o jimbongo jene mu beta ku kuatekesa o kikalakalu kia kuboka o Utuminu. Etu tu londekesa o henda ietu kua Nzambi ni ku ji vizinhu jetu.—Mat. 22:37-39.

Oso a kuatekesa o kikalakalu kia Jimbangi ja Jihova, kia bhanga ku mundu uoso, a tena ku dielela kuila o jimbongo jâ ja bhana, ja mu kuatekesa kiavulu. O kuila eie u tena ku kuatekesa o jiphange ja bhindama? O kuila eie ua mesena ku kuatekesa o kikalakalu kia ku bhanga maxibulu? “Muthu uoso ua tokala ku mu bhanga mbote, eie kufule ku mu bhanga-iu se o lukuaku lué luala ni kutena kua ku ki bhanga.”—Jisa. 3:27.