KU MUVU ua 1929, ku mbeji ia Kakuinhi ni Katutu, kua bhitile kikalakalu kia dikota kia ku boka kia bhangele divua dia izuua. 10.000 dia midi ndenge, a di muangene mu ixi ioso ia Estados Unidos ia América, mu ku boka. Ene a bhanene nzungule ia madivulu, ni tumadivulu ku athu. Bhu kaxi ka aboki enhó, bhua kexile ué aboki a thembu ioso. O kibuka kiki, kia kudile kiavulu! O kamukanda Boletim * kambe kiki: “Ki bhonza ku xikina” kuila, o kibuka kia aboki a thembu ioso kia kituka kia dikota, tundé ku muvu ua 1927, katé ku muvu ua 1929.

Mu ku bhita kithangana, ku muvu ua 1929, kua moneka maka a ku kamba kitadi. Kia Tersa, ku kizuua kia 29 kia Kamusasadi ka 1929, kua moneka maka avulu, a lungu ni kitadi mu mbanza ia Nova York. Mukonda dia kiki, o mundu uoso ua kexile ué ni maka a kitadi. Mu jibango ki mu kexile kitadi. O idimakaji a lémbua ku kalakala. O matenda a makota a a jika. Mazunda ni mazunda a athu ka kexile ni salu. Ku muvu ua 1933, akua América akexile mu lukalesa 1.000 ia jinzo jâ, ku kizuua.

Kiebhi o aboki a thembu ioso kieji dikila o ibhindamu iâ mu kithangana kieniókio kia kambele o kitadi? O kitambuijilu tu ki sanga mu dikalu diexile kála inzo. Inzo ka i futu, dikalu ka di futu, o inzo íii iexile dikalu, dia kuatekesele kiavulu o aboki ku bhanga o sidivisu iâ, sé ku bhinga kitadi kiavulu. * Mu ithangana ia iônge ia makota, o dikalu didi diexile kála dixilu dia Hotele, ki ku bhingile ku futa kitadi. Ku muvu ua 1934, o kamukanda Boletim, ka bhana ndunge phala ku bhanga inzo iambote, mu kala menha, foga phala ku lambela, ni kima kieji ku a langa ku mbambi.

Aboki avulu a xisa o jinzo jâ, phala ku tunga mu makalu. O phange Victor Blackwell, uambe: “Noué kejidile ku tunga baluku. Eme uami ki ngejidile ku iudika o dikalu phala ku kala inzo.” Maji ua i bhange.

Avery ni Lovenia Bristow, akexile ué ni dikalu kála inzo. O phange Avery uambe: “Nga kexile kála o mbaxi mu kitetu kiê​—mu kuenda ni inzo iami mu ithangana ioso.” O phange Bristow ni muhatu uê Lovenia, exile aboki a thembu ioso kumoxi ni phange Harve ni muhatu uê Anne Conrow, akexile ni inzo ia iukisa ni ji papela. O ji papela ja kexile mu lauka ithangana ioso, kioso kia kexile múia mu ididi iéngi. Avery uambe: “Se-ku muthu ua monene kiá dikalu kála o dikalu dietu, tundé o kithangana kieniókio, se-ku muthu ué ua mono dikalu kála didi!” Maji Avery uambe kuma, o phange Conrow ni muhatu Anne, ni kiiadi kia an’ê, “exile o muiji ua betele-kota mu ku sanguluka.” Harvey Conrow ua soneka: “Nuka tua bhindamene kima, tua divuile kiambote mu sidivisu ia Jihova, tua mono ué kiebhi kia tu lange mu henda iê.” Mu ku bhita kithangana, o phange Harvey ni muhatu uê Anne, ni kiiadi kia an’ê, oso endele mu Xikola ia Ngiliiade, mu ku suka-ku, ai mu sidivila kala akunji mu ixi ia Peru.

O muiji ua phange Battaino ua bokonene ué mu sidivisu ia thembu ioso. Mu ku bhita kithangana,  Giusto ni Vincenza, eji vuala mona, ene a lungulula ué o dikalu diâ diexile dikalu dia katunda, a diexanene Ford truck, Modelo 1929, a di bhange inzo ienda, “ diexile kála hotele iambote,” ki ia sokele ni inzo mua diangele o ku tunga. Ni kamona kâ ka kilumba ka vualele, ene a suluka mu sidivisu ia zolele kiavulu, mu ku bokela o akua ixi ia Itália a tungile mu Ixi ia Estados Unidos.

Akexile mu sanga athu avulu a mesenene kuívua o njimbu iambote, maji exile jingadiama, ka kexile mu kalakala, ka tenene ku sangela kitadi phala o madivulu a Bibidia. Mu veji dia ku bhana kitadi ene akexile mu tolokala ni ima ia kexile na-iu. Aboki a iiadi a soneka mu mukanda o 64 a ima ia a bhanene o athu a mesenene o madivulu metu. O “mukanda ua kexile kála mukanda mua soneka o ima ia diloja mu sanzala.”

Fred Anderson, uexile kidimakaji, ua mesenene ku tambula madivulu metu, ua mesenene ku bhana o mauana mê, a tokalele kua manh’â. O kidimakaji kia mukuá, uexile diiala ua mesenene ué ku tambula o madivulu metu, maji uambe: “Ki ngala ni mauana phala ku tanga.” Kioso kia te o mauana a vizinhu iê, muéne ua tena ku tanga o madivulu ni ku sangela kitadi phala o madivulu ni mauana.

Herber Abbott, ua kexile mu kuambata ji sanji mu dikalu diê. Muéne ua sumbisa ji sanji jitatu, mba jiuana phala ku sumba kazolina phala ku ta mu dikalu. Muéne ua soneka: “Saí ithangana tua kexile mu luuala, kioso ki tua kexile mu subhuka ni kitadi kiofele, maji ki tu kexile mu bhuila. Se tua kexile ni kazolina mu dikalu, tueji suluka ni ku dielela kua Jihova.”

Tua dielela kua Jihova mu ku langa o mundu uê mu ithangana ia bhonzo. Kioso kia nokene o nvula ia dikota, Maxwell ni Emmy, a tundu ni lusolo mu dikalu diâ, kioso kia tale o muxi ua dikota ua lauka ku thandu dia dikalu, anga di batuka bhu kaxi. Maxwell ua soneka: “O ima íii ki ieji tu fidisa, né ngó ku banza kueha o sidivisu ietu. Kua kexile kikalakalu kiavulu, etu tua mesenene ku ki bhanga.” Ni ku suína kuoso, ni kikuatekesu kia jiphange ja kazola, Maxwell ni Emmy, a iudika dingi o dikalu diâ.

Mu izuua íii ia bhonzo, o ukexilu iú ua ku di bhakula mu sidivisu, tuene mu u mona ué ku nzungule ja Jimbangi ja Jihova ene mu boka. Kála kia bhangele o aboki a thembu ioso a diangele, etu ué tua mesena ku suluka mu sidivisu ia kuboka, katé Jihova kiamba kuabhu.