O jiphaxi ji tena ku tu tolola. Jene ji tena ku tu bhangesa ku divua kia iibha, ku kala sé nguzu mba ku lungulula o ukexilu uetu ua ku mona o ima ku muenhu. O Sobha Davidi mu Izalaiele iokulu, ua bhitile ni ibhidi iavulu. Kiebhi kia di bhanene na-iu? Davidi u tambuijila mu divulu dia Jisálamu: “Nga suína dízui ni kudikola kua Jihova; ngi dionda, ngi diondolola kua Jihova ki ngi dixibha. Nga lundulula muene o ku di tenda kuami bhu pholo iê; nga mu tangela muene o dilamba diami dioso. Kioso o muxima uami moxi ki ua ngi kala ni kubhondalala, eie-phe uejiia kiá njila ioso i nga tokala kuila.” Mu kidi, ni ku lenduka kuoso, Davidi ua sambe kua Nzambi mu ku bhinga kikuatekesu.—Jisá. 142:1-3.

Davidi uambe ué mu mukumbi: “Kima kimoxi ki nga bhingi kua Ngana, kiene ki ngi bhindamena jinga: o kutunga m’onzo ia Jihova izuua ioso ia muenhu uami, mbé kutala o kuuabha kua Ngana, ni kudilonga jinga maka mu tembulu iê.” (Jisá. 27:4) Davidi kexile Levita, maji xinganeka kuila uemana mu kithadi kia zukama bhu kididi kia ubhezelu ua kidi. O muxima ua Davidi uizala ni kisakidilu, mu kiki muéne u mesena ku kala bhenhobho izuua ioso ia muenhu uê, phala ku ‘tala o mbote ia Jihova.’

O kizuelu ‘mbote’ kia lungu ni “mbote, ni kulenduka, ni ku tululuka.” Davidi ua kexile mu ximana o ima ia kexile mu bhanga Nzambi mu ubhezelu. Nange tu dibhuidisa: ‘O kuila ngi divua ué kála kia divuile Davidi?’

Mu izuua ietu, o ima i bhanga Jihova phala ku mu zukama, ki i lungu ni inzo i tu mona ku mesu. Maji ia lungu ni tembulu ionene ia Nzambi mu nzumbi—o ima ikôla ia lungu ni ubhezelu ua kidi. * Se tu ‘ximana’ o ima i bhanga Nzambi, tu tena ué ku ‘tala o mbote ia Jihova.’

Xinganeka mu kalatódio ka jisata ja kuoha, ka folale ni ngôndo, ia kexile bhu muelu ua balaka. (Mak. 38:1, 2; 40:6) O kalatódio kenióko, ka lomboluele o vondadi ia Nzambi ia ku xikana o sata ia Jezú. (Jihe. 10:5-10) Xinganeka ihi i lombolola o kima kiki phala etu! O poxolo Phaulu ua soneka: “Tua kexile tu jinguma ja Nzambi, maji Muène ua tena ku tu luulula, iú ua tu bhange tu makamba mu kufua kua Mon’ê.” (Loma 5:10) Se tu dielela mu manhinga a Jezú, a bhubhila phala ku tu kula, tu tena ku sanguluka ni ku kala ni kidielelu, mukonda tu makamba a Nzambi. Mukonda dia kiki, tu kala ni “ukamba ua Jihova.”—Jisá. 25:14.

Mukonda dia ku tu ‘jimuna o ituxi ietu,’ tu tena ku ‘vutuka kua Jihova.’ (Ika. 3:19) Etu tua difu ni muthu a mu te mu kaleia, u diela o ituxi iê, anga u lungulula o ukexilu uê, kioso kia mu kingila o kithangana kia ku mu jibha. Mu ku mona kuila o muthu iú ua kituka muthu uambote, o mufundixi u jima o ituxi ioso ia tele​—ka mu jibha dingi. Sé phata, o muthu iú uexile mu kaleia, ua divuile kiambote! Kála o mufundixi iú, Jihova u loloka o athu a diela o ituxi iâ, ka a jibha dingi.

O ima ia monene Davidi mu inzo ia Jihova, ia lungu ni ubhezelu ua kidi, iexile o iônge ia akua Izalaiele, o Kitumu kia tangele mba kia jimbuluile phala o athu, o kuoha o uasu ua dizumba dia uabha, ni sidivisu ikôla ia kexile mu bhanga o akunji ni Jilevita. (Mak. 30:34-38; Dia. 3:5-8; Mate. 31:9-12) O ima íii ia lungile ni ubhezelu ua  kidi mu Izalaiele iokulu, ia tokala ué ku ubhezelu ua kidi mu izuua ietu.

Kála kiexile mu ukulu, mu izuua ietu ué, “Kima kia fuama, kia di uabhela kiambote, ki u sanga jiphange a takana mu muxima umoxi!” (Jisá. 133:1) O ‘jiphange jetu,’ ku mundu uoso, a mu dibandekesa. (1 Phe. 2:17) O Mak’â Nzambi, ene mu a tanga ni ku a jimbulula mu iônge ietu. Jihova uene mu tu longa bhu kaxi ka kilunga kiê. Tuala ué ni kudia kuavulu mu nzumbi mu madivulu metu a Bibidia, u tu tena ku di longa ubheka uetu mba ku ubhezelu ku muiji. Saí phange ua tokala ku Kibuka kia Utuminu uambe: “O ku xinganeka mu Mak’â Nzambi, ku xinganeka mu iônge iê, ni ku sota kuijiia kiambote o ima, kua ngi kuatekesa ku zediua mu kikalakalu kiami.” Sé phata ‘o unjimu u tena ku uabhesa o muenhu uetu.’—Jisa. 2:10.

Lelu, o misambu iambote i bhanga o jiselevende ja Nzambi, i banda kua Jibhova izuua ioso. Jihova u mona o misambu íii kála uasu ua dizumba diambote. (Jisá. 141:2) Tu divua kiambote mu kuijiia kuila Jihova Nzambi, u divua kiambote kioso ki tu mu zukama ni ku lenduka kuoso mu musambu!

Mozé ua sambe: “O uabhelu ua Jihova, Nzambi ietu, u kale ku thandu dietu; u kôlese ikalakalu ia maku metu.” (Jisá. 90:17) Kioso ki tu boka ni ku suína kuoso, Jihova u besoala o kikalakalu kietu. (Jisa. 10:22) Nange tua kuatekesa athu mu kua longa o kidi. Nange tuene mu kolokota mu sidivisu ia ku boka mu mivu iavulu, sumbala saí athu ka mesena kuívua kioso ki tu a bokela, sumbala saí iá mudietu, kala ni sauidi iambote, ala ni malamba ku muxima, mba a mu kua zukutisa. (1 Tes. 2:2) Maji né kiki, o kuila ki tuene mu ‘mona o mbote ia Jihova,’ mba ki tu mona kuila o Tata ietu ia diulu u sanguluka ni nguzu i tu bhanga?

Davidi uembi: “Jihova muene u kala undundu uami, muene kimanga kiami; kubhanduluka kuami ku tunda bhu maku ma muene.” (Jisá. 16:5, 6) Davidi ua sakidile o “undundu” uê, kilombolola o ukamba uê ni Jihova ni ujitu ua ku mu sidivila. Kála kia bhitile ni Davidi, nange tu bhita ni ibhidi iavulu, maji tuala ni mabesá avulu mu nzumbi! Tu kolokote ku sanguluka ni ubhezelu ua kidi, ni ku ‘ximana’ o tembulu ia Jihova mu nzumbi.