Saí tata ku ixi ia Brazil uambe: “Etu tuene mu ku di zuelesa mu usuku mu Ubhezelu ni Muiji, mu veji javulu, tuene mu u bhanga tádidi iavulu mu usuku, se eme ki ngi bhuila ni muiji uami.” O mutuameni ua muiji ku ixi ia Japão, uambe kuila, o mon’é uala ni dikuinhi dia mivu, ka mono kuila tua bhiti kiá ithangana iavulu, muéne u mesena tu suluka ni ubhezelu. Mukonda diahi? O tata uambe: “Muéne u divua kiambote, kiki kiene mu ku mu bhekela ku sanguluka.”

Mu kidi, saí tuana kene mu divua kiambote mu ubhezelu ku muiji, maji phala kuzuela o kidi, sumbala a mukuá ka uabhela o ubhezelu ku muiji. Maji mukonda diahi? O tat’a ia mukuá ku Ixi ia Togo uixi: “O ubhezelu ua Jihova ku muiji, ki u tokala ku tu kuma.” Se kuila kima ki kuma, o kuila o ukexilu ua ku longa mu ubhezelu? Miji iavulu a mono kuila o ubhezelu ku muiji, u ‘sangulukisa’ kala ki zuela o divulu dia Izaia.—Iza. 58:13, 14.

Jitata javulu Jikidistá, ene mu mona kuila, phala o muiji ku sanguluka ku ubhezelu uâ ku muiji, a tokala mu kithangana kieniókio, a u bhanga mu ukexilu kála a mu tonoka. Ralf uala ni kitatu kia an’a ahatu ni mon’a umoxi ua diiala, uambe kuila o ubhezelu uâ ku muiji, ulondekesa kála a mu zuela ngó, ki ulondekesa kála a mu di longa, mukonda dia kiki, ene oso a bhanga mbandu. Maji phala kua bhangesa kuila ene oso a bhanga mbandu ku milongi, kiene mu bhonza. Mama ia mukuá uambe: “Saí ithangana ki ngala ni nguzu ia soko phala kuendesa o ubhezelu ku muiji mu ukexilu u sangulukisa, kala ki nga mesenene.” O kuila u tena kuendesa o ubhezelu uê ku muiji ni ku sanguluka kuoso?

Saí tata ku ixi ia Alemanha uala ni kiiadi kia an’a, o mon’a ua muhatu uala ni 9, o mon’a ua diiala uala ni 6 dia mivu, uambe: “Tua tokala tu  bhebhuluka.” O mama ia mukuá a mu ixana Natalia uala ni an’a kiiadi uambe: “O kima kia beta-o-kota phala u muiji uetu, o ku bhanga o ubhezelu mu maukexilu avulu, a ku lungulula o milongi.” Miji iavulu a uana o milongi mu mbandu javulu. Cleiton, tata ia an’á kiiadi, ala mu kitala kia kikumbi ku ixi ia Brazil uambe: “Kiki ki bhangesa kuila o milongi i tunda kiambote ni ku bhangesa kuila o muiji uoso a bhanga mbandu ku ubhezelu.” Mukonda dia ku uana o ithangana ia milongi, ki bhangesa o jitata ku suua o ibhindamu ia an’a, se kala mon’a uala ni kitala kiê. O jitata a tena ku suua o ibhindamu ia muiji ni ku bhebhuluka mu ku sola o milongi ni kiebhi kia tokala o ku iendesa.

Ihi iene mu bhanga o miji phala ku longa mu maukexilu avulu? Saí miji a mateka ni ubhezelu ku muiji ni kuimbila Jihova. Nzuá, ua tungu ku ixi ia México uambe: “Kiki ki bhangesa o ku kala ni ku tululuka, phala ku di pelepalala kiambote ku milongi i tua-nda di longa.” O muiji uê, u sola mimbu ia lungu ni milongi ia-nda di longa mu usuku uenhó.

O miji ia mukuá a tanga ji mbandu ja Bibidia kumoxi. Phala ku lungulula o milongi, a mukuá ku muiji, a tanga ji mbandu ja Bibidia ki ji difu ja lungu ni misoso ia athu a a tange mu Bibidia. Saí tata ku ixi ia Japão, uambe kuila phala muéne, kia mu “bhonzele o ku tanga mu ukexilu uenhó.” Maji o kiiadi kia an’ê, a sangulukile mu ku bhanga o ubhezelu ni jitata jâ. O miji ia mukuá, kate muene a bhanga kala filme, ia lungu ni misoso ia Bibidia. Roger tata iala ni kiiadi kia an’a a mala ku África do Sul, uambe: O an’a ndenge “a mona ima mu misoso ia Bibidia, etu tu jitata ki tu i mono.”

O ukexilu ua mukuá ua ku lungulula, o ku kalakala kumoxi mu ku bhanga kima, kala ku bhanga o álaka ia Noué mba o tembulu ia Salomá. O ku bhanga o ima íii ku bhinga ku tokuesa, maji kiki ki bhekela kisangusangu. Mu kifika, ku muelu ua inzo ia muiji, ku ixi ia Ásia, mua kexile mon’a muhatu ua kexile ni kitanu kia mivu ni jitata jê ni kuku’ê. Ene a xikamene bhu muelu, mu ku iudika joko ja lungu ni jinjila ja ukunji ja bhangele poxolo Phaulu. O miji ia mukuá, a kexile mu bhanga ji joko ja lungu ni isoneku iala mu divulu dia Makatukilu. Donald uala ni 19 dia mivu ku ixi ia Togo uixi: “O ku lungulula o milongi kua bhekesa ukexilu uéngi mu ubhezelu uetu ku muiji.” O kuila u tena ku xinganeka kima ki tena o ku bhangesa o ubhezelu ku muiji uê ku sanguluka?

Né muene o ku lungulula ni ku bhebhuluka kima kia tokala phala o ubhezelu ku muiji, maji phala ene oso ku katula mbote, a tokala ku di pelepalala kiambote. Mu veji javulu o minzangala ni an’a ndenge a bhuila, mu kiki o jitata a tokala ku sola kiambote o milongi ni ku di pelepalala kiambote. Saí tata uambe: “Kioso ki ngi di pelepalala kiambote, ene oso a katula mbote ku milongi.” Saí tata ku ixi ia Alemanha, uambe kuila uene mu tangela o muiji ué, o milongi ia-nda di longa ku jisemana ku pholo. Mu ku sola DVD ia lungu ni Bibidia, phala o ubhezelu ku muiji, saí tata uala ni kisamanu kia an’a, ku ixi ia Benin, u bhana o milongi ku tuana tuê, mu thembu ia soko ande dia ku di longa. Sé phata, o ku di pelepalala kiambote kua tokala muene, phala ku longa kiambote mu ubhezelu ku muiji.

Se o muiji uijiia kiá ihi ia-nda di longa, ene a tena kuzuela o milongi íii izuua ioso katé o kizuua kia ubhezelu, kiki kia a bhangesa ku sanguluka. Se muthu ni muthu ku muiji u tambula kikalakalu, ua-nda mona kuila o ubhezelu ua muiji ua mu tokala.

Miji iavulu kiene mu a bhonza ku bhanga ubhezelu ku muiji semana joso.

Jitata javulu a kalakala kiavulu phala ku dikila ngó o miji. Mu kifika, saí tata ku ixi ia México, u tunda mu kamene ka selu mu ola ia kasamanu, phala ku vutuka ngó mu makuinhi a iiadi a ola io suku. Saí ithangana nange ku bhinga ku di sokejeka phala ku bhanga o Ubhezelu ku Muiji, mukonda ku tena ku moneka iônge ia mukuá, kála iônge ia makota, ku tambula o kafunga ka ilunga mu kilunga.

Né kiki, tua tokala ku di suínisa phala ku bhanga o ubhezelu ku muiji semana joso. Loïs mukuá Togo, uala ni dikuinhi ni umoxi dia mivu uambe: “Sumbala saí ithangana tu mateka tádidi o ubhezelu ua muiji, se ku moneka maka mu kizuua, maji né kiki tu bhanga muene o ubhezelu ku muiji.” U tena ku mona se mukonda diahi saí miji, ene mu bhanga o ubhezelu ku muiji mu izuua ia dianga ia semana. Se ku moneka maka se ku a kingila, ene a tena ku sola kizuua kia mukua ku semana, phala ku bhanga o ubhezelu ku muiji.

Mukonda diahi tu uixana “ubhezelu ku muiji?” Mukonda ua lungu ni ku bheza Jihova. Etu enioso ku muiji tu tena ku bhana kua Jihova, “o sata ia ujitu i tunda ku mizumbu ietu” semana joso. (Hoz. 14:2) Muthu ni muthu ku muiji, ua tokala ku sanguluka ni ubhezelu ku muiji, “mukonda o kusanguluka kua Ngana, iene o nguzu ienu.”—Neh. 8:9, 10.