1, 2. (a) Kiebhi o Kijila kia kaiadi kia tumbula Jezú? (b) Ibhuidisu iebhi i tua-nda di longa?

PHALA ku tendala Jezú, saí Falizeu ua mu ibhula: “Mesene, kiebhi o kijila kia dikota mu Kitumu?” Kála kia tange kiá mu milongi ku dima, Jezú ua mu vutuila uixi: O “kijila kia dianga kia dikota,” kienhiki: ‘Zola Jihova Nzambi iê, ni muxima ué uoso, ni muenhu ué uoso, ni kilunji kiê kioso.’ Jezú uambe dingi: ‘Kia kaiadi kia difuê ngó ni kia dianga, kiki: Zola mukuenu kala ki ua di zolo eie-muène.’—Mat. 22:34-39.

² Jezú uambe kuma tua tokala ku zola akuetu kala ki tua di zolo etu-muene. Mu kiki, kima kiambote ku dibhudisa: O mukuetu-phe nanhi? Kiebhi ki tu tena ku londekesa o henda ku akuetu?

3, 4. (a) Kifika kiahi kia bhangele Jezú phala ku tambuijila o kibhuidisu: “O mukuetu-phe nanhi?” (b) Kiebhi o mukua Samádia kia kuatekesa o diiala a mu nhanene, a mu betele, ia mu xile mu kikoka ua kumbama? (Tala o foto ia dianga.)

³ Nange tu banza kuma o mukuetu, muthu ua tungu bhua zukama. (Jisa. 27:10) Maji xinganeka mu izuelu ia Jezú kioso kia mu ibhuidisa: “O mukuetu-phe nanhi?” Mu ku mu vutuila,  Jezú ua bhana kifika kia muthu mukua Samádia. (Tanga Luka 10:29-37.) Nange tu banza kuila, o mukunji mukua Izalaiele, ni mukua Levi, eji kuatekesa o diiala a mu nhana, a mu beta, a mu xi mu kikoka ua kumbama. Maji ene a bhiti sé ku mu kuatekesa. O diiala mukua Samádia, muene ua mu kuatekesa. Mu izuua ienioió, o akua Jijudé, a di zembele ni akua Samádia.—Nzuá 4:9.

⁴ O mukua Samádia, ua tele maji ni vinhu bhu jifidila ja diiala, phala ku mu kuatekesa ku disanza. Muéne ua mu ambata bhu kijima, anga u katula iphaka iiadi u i bhana mukua-kijima. O iphaka iiadi, ia sokele o kitadi kia kexile mu tambula o mukalakadi mu izuua iiadi. (Mat. 20:2) Mu kiki, tu tena ku mona se nanhi ua kexile muene ni henda ia diiala dienhódio. Mu kidi, o kifika kia Jezú, ki tu kuatekesa kulondekesa o henda ku akuetu.

5. Kiebhi o Jimbangi ja Jihova kia londekesa o henda ku akuâ, kioso kia bhiti o kitembu a kixana Sandy?

⁵ Ki bhonza ku sanga athu ni ukexilu ua mukua Samádia. Kiki ki bhonza benge benge mu ‘izuua íii i sukidila-ku,’ mukonda o athu ka moneka henda ia muthu, a kaka, a di zemba ni ima iambote. (2 Tim. 3:1-3) Mu kifika, o mavuua a bheka ibhidi iavulu. Xinganeka ia bhiti kioso o kitembu a kixana Sandy, kia tula ku mbanza ia Nova Iorque, ku mbeji ia Kamusasadi ka muvu ua 2012. O miii, a nhana dingi o athu a kexile kiá mu di bhana ni ibhidi mukonda dia mbambi, dia ku kamba mukengeji ni ima ia mukuá ia bhindamene. O Jimbangi ja Jihova, a di iudikisa phala ku kuatekesa o jiphange ni athu a mukuá. O Jikidistá a bhanga o ima íii, mukonda a zolo akuâ. Kiebhi dingi ki tu tena kulondekesa o henda ku akuetu?

6. Kiebhi ki tu tena o ku kuatekesa akuetu ni Bibidia?

⁶ Kuatekesa o athu ni Bibidia. Mu ukunji uetu, tu kuatekesa akuetu, “kutula o muxima mu ku tanga o Mikanda.” (Loma 15:4) Sé phata, tu londekesa o henda ku akuetu, kioso ki tu a tangela o kidi kia Bibidia. (Mat. 24:14) Ujitu ua dikota ku boka o njimbu iambote ia Utuminu ua ‘Nzambi mukua ku tu bhana o kidielelu!’—Loma 15:13.

7. Ihi i lombolola o ku Bhanga ku Akuetu o Ima i Tua Mesena ia tu Bhanga, ni kiebhi kia tu besoala se tu kaiela o kitumu kiki?

⁷ Kaiela o ukexilu ua ku Bhanga ku Akuenu o Ima i ua Mesena ia ku Bhanga. O kitumu kiki, a ki tange kua Jezú mu Diskursu dia bhangele ku Mulundu: “Ima ioso-phe i mua mesena kuila athu a mi bhanga-iu enu, iene ue muene i mua bhanga ene; mbata kiene kia jimbulula o Kitumu kia Mozé ni milongi ioso ia jipolofeta.” (Mat. 7:12) “O Kitumu” kia lungu ni madivulu a Dimatekenu ni Matendelelu, o “Jipolofeta,” ja lungu ni madivulu a kikutu kiobhe kia Mikanda Ikôla. Mu kiki, Jihova ua bhana “o Kitumu” ni “Jipolofeta” ku mundu uê, mukonda muéne ua mesenene kuila ene a di zola mudiâ. Lelu, Jihova ua mesena ué kuila tu zola akuetu. Bhu kaxi ka Izaia, Jihova ua zuela: “Kuatenu kilunji, mu bhange ima ia iuka . . . Ua zediua o muthu uoso u bhanga kiki.” (Iza. 56:1, 2) Mu kidi, a tu besoala mukonda, tua zolo akuetu ni kua a bhangela ima ia iuka.

8. Mukonda diahi tua tokala ku zola o jinguma jetu, ni ihi i tena ku bhita se tu bhanga kiki?

⁸ Zola o jinguma jê. Jezú uambe: “Enu muevu kuma a ki zuela, exi: Mukuenu u mu zola, o nguma ié u mu zemba. Eme-phe ngi mi ambela: Zolenu nguma jenu; sambedienu kua Nzambi, oso a mi  tatesa; benzelenu a mi bhubhidila, bhangenu mbote oso a mi zembe. Nda mu kale mu an’a Tata ienu uene mu diulu.” (Mat. 5:43-45) O poxolo Phaulu, ua zuela ué ia, lungu ni maka iá kioso kia soneka: “O nguma ié ua mu mono ni nzala, mu bhane kudia. Se ua mu mono ni dinhota, mu bhane menha.” (Loma 12:20; Jisa. 25:21) O kitumu kia Mozé, kia kexile mu tendelesa o athu ku kuatekesa o jinguma jâ, ni iama ia jinguma jâ. (Mak. 23:5) Mu ku bhanga kiki, o athu akexile o jinguma, a tena ku kituka makamba. Mukonda dia henda ilondekesa o Jikidistá, jinguma javulu a lungulula o ukexilu uâ. Se tu londekesa o henda ku jinguma jetu, katé muene kua ió a tu zukutisa kiavulu, nange ene a-nda kituka Jikidistá, kiki kia-nda tu bhekela kisangusangu kia dikota!

9. Ihi ia zuela Jezú ia lungu ni ku kala ku paze ni phang’etu?

⁹ “Sotenu kukala ku paze ni athu oso.” (Jihe. 12:14) Se tua tokala ku kala ku paze ni athu oso, kiki ki lombolola kuila, tua tokala ué ku kala ku paze ni jiphange jetu. Jezú uambe: ‘Se u kala mu bhana ujitu ué bhu kalatódio kua Nzambi, anga u tukumuka bhenhobho kuma mukuenu ua ku luualela, Ujitu ué xe-u bhu kalatódio, uie hanji u di tetulukise ni mukuenu, uize kiua u bhane o ujitu ué kua Nzambi.’ (Mat. 5:23, 24) Nzambi ua-nda tu besoala, se tu londekesa o henda kua phang’etu, ni ku bhanga ioso phala ku kala nê ku paze.

10. Mukonda diahi ki tu tokala ku fundisa akuetu?

¹⁰ Ki mu fundise akuenu. Jezú uambe: ‘Ki mu fundise akuenu, enu uenu phala ka mi fundise. Mbata, o ku batula kuoso ku mu batuila na-ku akuenu, enu uenu kiene Nzambi kia kà mi batuila; ni nzôngo ioso i mu zongela na-iu akuenu, enu uenu a ka mi zongela-iu dingi. Mukonda dia-hi u tala o kakisoko kala mu diesu dia mukuenu, maji ku xinganeke o kimuxi kia ku kala mu diesu dié e’muéne? Mba mukuenu u mu ila kiebhi: Izá ngi ku katule o kakisoso ka ku kala mu diesu, manhi mu diesu dié e’muène mua ku kala kimuxi? Mukua mangonha! Dianga hanji ku katula o kimuxi mu diesu dié e’muéne nda u mone kiua ku katula o kakisoso mu diesu dia mukuenu.’ (Mat. 7:1-5) Mu kidi, ki tu tokala ku fundisa akuetu kioso kia ta o kituxi, mukonda etu ué tuene mu ta ituxi iavulu.

11, 12. Kiebhi ki tu londekesa o henda ietu ku akuetu, mu ukexilu ua beta-o-kota?

¹¹ Kuene maukexilu avulu mu tu tena kulondekesa o henda ku akuetu. Maji Jezú ua tu longo kuila, o ukexilu ua beta-o-kota ua kulondekesa o henda ku akuetu, o ku a bokela o njimbu iambote ia Utuminu. (Luke 8:1) Jezú ua tumina o akaiedi’ê: “Ndenu, mua ka longe jixibulu ku akua jixi joso.” (Mat. 28:19, 20) Kioso ki tu belesela Jezú, tu kuatekesa akuetu ku xisa o njila ia zanze iia ku’alunga phala n’a kuate o kanjila kófele kaia ku muenhu. (Mat. 7:13, 14) Sé phata, Jihova u besoala o nguzu i tu bhanga.

¹² Kála kia bhangele Jezú, etu ué tuene mu kuatekesa o athu kuijiia kuila, a bhindamena o kikuatekesu kia Jihova. (Mat. 5:3) O ió a xikina kuijiia o kidi, tu a kuatekesa mu kua a bokela “o Njimbu Iambote.” (Loma 1:1) O athu a xikina o njimbu iambote ia Utuminu, a kala mu ukamba ni Nzambi, bhu kaxi ka Jezú Kristu. (2 Kol. 5:18, 19) Kioso ki tu boka o njimbu iambote, tu londekesa o henda ietu ku akuetu mu ukexilu ua beta-o-kota.

13. Kiebhi ki u divua kioso ki u longa o athu ia lungu ni Jihova?

¹³ Kioso ki tu di iudika kiambote phala ku kunda o athu ni ku a longa o Bibidia, tu tena ku a kuatekesa ku belesela o itumu ia Nzambi. Saí maxibulu a Bibidia, nange a bhinga ku lungulula ima iavulu ku mienhu iâ. (1 Kol. 6:9-11) Kisangusangu kia dikota ku mona kiebhi Nzambi kia kuatekesa ió “a fuamena o muenhu ki uabhua,” ku lungulula o ukexilu uâ, phala n’a kale ni ukamba ni muéne. (Ika. 13:48) Kioso o athu ka kexile ni kidielelu a di longa o Bibidia, a sanguluka, o hele iâ i bhua, mukonda ene a dielela kua Tata ietu ia diulu. Kima kiambote ku mona o athu ku kula mu nzumbi! Ki ujitu ua dikota, o kulondekesa o henda ku akuetu, mu ku a bokela o njimbu ia Utuminu?

14. Kiebhi Phaulu kia jimbulula o henda mu divulu dia 1 Kolindu 13:4-8?

¹⁴ Se tu londekesa o henda ku akuetu mu ukexilu ua jimbulula Phaulu, tua-nda sangulukisa Jihova, ki tua-nda kala ni ibhidi iavulu, tua-nda tambula mabesá. (Tanga 1 Kolindu 13:4-8.) Tua-nda di longa ihi ia zuela Phaulu ia lungu ni henda, tua-nda di longa ué kiebhi ki tu tena ku kaiela o izuelu íii mu ku di bhana ni akuetu.

15. (a) Mukonda diahi tua tokala kulondekesa o henda i kolokota mu jihadi, i lenduka? (b) Mukonda diahi ki tu tokala ku kala ni dixinga mba ku di zangeleka?

¹⁵ “O henda i kolokota mu jihadi, i lenduka.” Jihova u londekesa o henda i kolokota mu jihadi, i lenduka, ku athu oso, sumbala akua ituxi. Mu kiki, tua tokala kulondekesa o henda i kolokota mu jihadi, i lenduka, kioso akuetu kia tu ta ituxi, né muene se ka londekesa henda mba a tu bhanga ima i tua zembe. “O henda ki i moneka dixinga.” Phange jetu nange a kala ni maujitu mu kilunga, mba ima ia mukuá dingi ki tuala na-iu. Maji se tu zola muene o jiphange jetu, ki tua-nda kala ni dixinga diâ. Ki tu tokala ué ku di zangeleka. O Bibidia i zuela: “Mesu a di tudika ni muxima ua di zangeleka, kituxi.”—Jisa. 21:4.

16, 17. Kiebhi ki tu tena ku kaiela o milongi mu divulu dia 1 Kolindu 13:5, 6?

¹⁶ O henda ia-nda tu kuatekesa ku bhanga ima iambote ku akuetu. Ki tua-nda ku a tela makutu, ku a nhana, mba ku bhanga kima kioso-kioso kieji luualesa Jihova. O henda ia-nda tu fidisa ué ku thandanganha ngó ni mbote ietu, mu veji dia ku thandanganha ni akuetu.—Fil. 2:4.

¹⁷  O henda ia kidi, i fidisa o muthu ku kala ni njinda ni lusolo, ki i ‘vutula phulu mu phulu.’ Se muthu u tu bhanga kia iibha, ki tu tokala ku soneka o ima ioso ia iibha ia tu bhange. (1 Tes. 5:15) Se tu kala ni njinda iavulu, o njinda íii, i tena ku bambuka kála túbhia, i tena ku tuoha, ni kuoha akuetu. (Iji. 19:18) O henda i bhangesa ku sanguluka ni kidi, ki i tuehela ku ‘sanguluka ni ima i kamba o ku iuka,’ né muene se nguma ietu ua mu bhita ni ibhidi.—Tanga Jisabhu 24:17, 18.

18. Ihi i tu longa o divulu dia 1 Kolindu 13:7, 8 ia lungu ni henda?

¹⁸ Phaulu uambe kuila o henda ki i “zondo mu phaxi. “Se muthu u tu bhanga kia iibha maji u tu bhinga muloloki, o henda i tu suínisa ku mu loloka. O henda “i xididika mu ima ioso ni kuxikana” ioso iala mu Mak’â Nzambi, o henda i tu bhangesa ué ku sakidila o kudia kuoso ku tuene mu tambula mu nzumbi. O henda “i dielela mu ima ioso” iala mu Bibidia, i tu bhangesa ué ku tangela akuetu o kidielelu kietu. (1 Phe. 3:15) Kioso ki tu di bhana ni ibhidi, tu samba kua Nzambi, anga tu kingila kuila muéne u tu kuatekesa. O henda “i bhalakata mu ima ioso,” ki kale se a tu te kituxi, mba a tu zukutisa, mba kioso ki tu di bhana ni ibhidi ia mukuá. O henda “ki ia kà bhua.” Ió a belesela Jihova, an-nda londekesa o henda ku hádia ni hádia.

19, 20. Kitumu kiebhi kia Mikanda Ikôla, ki tu kuatekesa o ku kolokota kulondekesa o henda?

¹⁹ Se tu kaiela o itendelesu ia Bibidia, tua-nda londekesa o henda ku akuetu mu ithangana ioso. O henda íii, tua tokala ku i londekesa ku athu oso, katé muene ni ió a tokala ku jixi jengi.Tua tokala ué ku lembalala kuila, Jezú uambe: ‘Zola mukuenu kala ki ua di zolo eie-muène.’ (Matesu 22:39) Nzambi ni Kristu a mesena kuila tu zola akuetu. Se saí kizuua ki tu bhonza kulondekesa o henda ku akuetu, tua tokala ku samba kua Nzambi mu ku bhinga o nzumbi iê ikola, phala ku tu kuatekesa. Se tu bhanga kiki, Jihova ua-nda tu besoala, ua-nda tu kuatekesa kulondekesa o ukexilu uambote.—Loma 8:26, 27.

²⁰ O kitumu kia ku zola akuetu kala ki tua di zolo etu, a kixana “Kitumu kia Utuminu.” (Tiia. 2:8) Mu ku jimbulula o Kitumu kia Mozé, Phaulu uambe: “Ioso dingi ijila ia dite-ku, ia dibundu mu kizuelu kimox’iki: mukuenu u mu zola kala ki ua di zolo eie-muéne. O uoso uala ni henda, ka tena kubhanga mukuá phulu. Uila kiki, uoso ua zolo, ua kumbidila o Kitumu kioso.” (Loma 13:8-10) Mu kiki, tua tokala ku kolokota kulondekesa o henda ku akuetu.

21, 22. Mukonda diahi tua tokala ku zola Nzambi ni akuetu?

²¹ Jezú ua tu kuatekesa kuijiia kiambote se o mukuetu nanhi, kioso kia zuela kuila, Tat’ê “mukua kubhangesa dikumbi diê di bandela athu abhukumuka ni athu ambote, u tumikisa mvula ni kua ia aiuka ni ku ísueia.” (Mat. 5:43-45) Mu kiki, tua tokala ku londekesa o henda ku akuetu, ki kale ene athu a iuka mba kana. Kála ki tua tange kiá ku dima, o ukexilu ua beta-o-kota ua kulondekesa o henda, o ku bokela o njimbu iambote ia Utuminu ku athu. Se o mukuetu u kaiela o milongi ia Bibidia, muéne u tena ku sanguluka kiavulu mu ku kala kamba dia Nzambi.

²² Tuala ni ima iavulu i tu bhangesa ku zola Jihova ni muxima uetu uoso, ni muenhu uetu uoso, ni kilunji kietu kioso. Kuene ué maukexilu avulu a ku londekesa o henda ku akuetu. Kioso ki tu zola Nzambi ni akuetu, tu londekesa kuila tua mu kaiela o kitumu kia dikota kia zuela Jezú. Mu ku suka-ku, tua mu sangulukisa Tata ietu ia diulu, Jihova.