1. Ihi ia bhindamena o athu? Nanhi u tena ku langa o kima ki tua bhindamena?

O ATHU oso a bhindamena ku bhanga o ukamba ni akuâ. Tu sanguluka mu kuijiia kuila tuala ni jindandu ni makamba a tu zolo, a tu bhana valolo, a tuijiia kiambote. Maji o ukamba ua beta-o kota u tua tokala o ku bhanga, o ukamba ni mubhangi uetu, Jihova.—Ndo. 12:1.

2. Ihi i tu kanena Jihova, maji mukonda diahi athu avulu ka xikina mu kikanenu kiki?

² Jihova u tu bhana o ujitu ua ku kala tu makamba mê. Muéne u kanena kuila, se tu ‘mu zukama,’ ‘muéne ua-nda tu zukama ué.’ (Tiia. 4:8) Tu sanguluka mu kuijiia o kidi kiki! Maji saí athu ka xikina kuila Nzambi ua mesena kuila tu mu zukama. Ene a banza kuila, ka tokala ku bhanga ukamba ni Nzambi kuma, muéne uala dikanga. O kuila tu tena muene ku zukama kua Jihova?

3. Ihi i tua tokala ku xikina ia lungu ni Jihova?

³ Tu tena kuijiia Jihova mukonda ‘kala dikanga dia muthu’ ua mesena ku mu sanga. (Tanga Ikalakalu 17:26, 27; Jisálamu 145:18.) Jihova uala polondo, ua mesena ku tuijiia sumbala tu akua ituxi. (Iza. 41:8; 55:6) Mukonda dia ima iambote ia  monene o mukua jisalamu kua Jihova, muéne ua soneka: “Eie u mukua kuívua o kusamba, kokué kuene ku bhongolokela o xitu ioso. U zediua muthu uoso eie ua mu solo, anga u mu bhixidisa kokué.” (Jisá. 65:2, 4) Tu mone mu Bibidia kiebhi o Sobha Aza mukua Judá, kia zukama kua Nzambi ni Kiebhi Nzambi kia mu zukama. *

4. Phangu iebhi ia bhana Sobha Aza ku athu akua Judá?

⁴ O Sobha Aza ua di bhakuile mu ubhezelu ua kidi. Kioso kia kituka Sobha, o athu a kexile mu bhanga undumbu ni ku bheza iteka mu tembulu. Muéne ua belesele Jihova mu ku katula o ima íii ia iibha mu tembulu. (1 Jis. 15:9-13) Mukonda Aza ua zukamene kua Jihova ni ku belesela o itumu Iê, muéne ua tendelesele o athu phala n’a “sote Jihova, dia Nzambi ia jitata jâ; o kitumu ni kijila a ki aluke.” Mu ku suluka Jihova ua besoala o utuminu ua Aza mu kuinhi dia mivu ia dianga, ni kutululuka. Aza uejidile kuila Jihova muéne ua kexile mu kua a bhana o kutululuka, mukonda dia kiki muéne ua zuelela o athu: “Tua mu sota, muene iú ua tu bhana o kutululuka mu jimbandu joso.” (2 Mal. 14:1-7) Di longe ihi ia bhitile ku pholo.

5. Ihi ia bhiti i londekesa kuila Aza ua dielele kua Nzambi, ni ihi ia bhangele Nzambi?

⁵ Di te bhu kididi kia Sobha Aza. Zela, mukuá Itiiópia, ua tundu ni kifuxi kia 1.000.000 a masoladi ni 300 ja makalu phala ku bhânga ni Aza. (2 Mal. 14:8-10) Muéne uala ni masoladi avulu, eie uala ngó ni 580.000 a masoladi! Disoladi dimoxi phala ku bhânga ni masoladi aiadi, o kuila ueji kuibhula, se mukonda diahi Nzambi ka a fidisa? O kuila ueji dielela mu unjimu uê? Inga ueji dielela kua Jihova phala ku ku langa? Aza ua londekesa kuila, ua kexile ni ukamba uambote ni Jihova ni kuila muéne ua mu dielele ni muxima uoso. Aza ua dikola: “Jihova, tata! Eie, eie u Nzambi ietu! Ka ku tolole kuala o muthu.” Kiebhi kia tambuijila Nzambi? “Jihova anga u nemeka akua Itiiópia.” Se-ku nguma ua bhuluka.—2 Mal. 14:11-13.

6. Kiebhi ki tu tena ku kaiela o phangu ia Aza?

⁶ Ihi ia bhangesa Aza ku dielela ni muxima uoso kuila Nzambi ueji mu langa ni ku mu kuatekesa? O Bibidia i zuela kuila, ‘Aza ua bhange ima ia iuka ku mesu ma Jihova,’ ni kuila o “muxima uê ua iukile mu ku kaiela jinga Jihova.” (1 Jis. 15:11, 14) Etu ué tua tokala ku sidivila Jihova ni muxima uoso phala tu mu zukame lelu ni ku hádia. Tu sakidila mu kuijiia kuila Jihova ua bhange kima phala etu ku mu zukama, ni kuila muéne u tu kuatekesa ku kala ni ukamba uambote ni muéne. Tu di longe o ima iiadi ia bhange Jihova phala ku mu zukama.

7. (a) Ihi ia bhange Jihova phala ku tu kuatekesa ku mu zukama? (b) Kiebhi o kima kia beta-o kota kia bhange Nzambi phala ku tu kuatekesa ku mu zukama?

⁷ Jihova ua londekesa o henda iê ku athu kioso kia bhange o ixi ia uabha phala etu ku tunga-mu. Muéne u kolokota mu ku tu londekesa o henda, mu ku tu bhaka ku muenhu izuua ioso. (Ika. 17:28; Dij. 4:11) Jihova u tu londekesa dingi o henda iê mu ku tu dikila mu nzumbi. (Luka 12:42) Muéne u tu kanena ué kuila, u tuívua kioso ki tu samba. (1 Nzu. 5:14) Maji o kima kia beta-o kota kia bhana Jihova phala tu mu zukame,  muéne n’a tu zukama ué, o ku tu londekesa o henda iê bhu kaxi ka sata ia kukula. (Tanga 1 Nzuá 4:9, 10, 19.) Jihova ua tumikisa o “Mon’ê umoxi-èlele,” phala ku bhana o muenhu uê phala ku tu bhulula. Bhu kaxi ka sata iê ia kukula, tu tena ku dielela ku kala ku muenhu ku hádia ni hádia.—Nzuá 3:16.

8, 9. Ihi ia bhange Jezú phala ku kuatekesa ku kumbidila o kikanenu kia Jihova?

⁸ Jihova ua bhana o ujitu ua sata phala o athu oso, katé muene ni ió afu ande dia sata ia kukula. Kiebhi ki ki tena ku bhita? Kioso kia kanena Jihova o Mubhuludi, muéne ua mono o sata ia kukula kála kima kio fute kiá, mukonda uijidile kuila o vondadi iê phala o athu ieji di kumbidila. (Dim. 3:15) Mu ku bhita hama javulu ja mivu, o poxolo Phaulu ua sakidila Jihova, “mukonda dia Jezú Kristu u tena ku a bhulula.” Phaulu ua zuela dingi: “Kuma Nzambi mukua muanu, o ituxi ia ta jinga athu m’ukulu ua i somboka mu kulenduka kuê.” (Loma 3:21-26) Mu kiki, ki tu tena ku zukama kua Nzambi sé Jezú.

⁹ Jihova u kuatekesa o athu a lenduka ku kala ni ukamba uambote ni muéne bhu kaxi ka Jezú. O Bibidia i zuela: “Nzambi-phe ua tu idikiza o henda ia muène ia tu kuatela; mukonda kioso ki tua kexile hanji tu akua ituxi, kiene kia tu fuila Kristu bhu kididi.” (Loma 5:6-8) Jezú uambe: “Kana muthu u tena kuiza ko-kuami, se Tata ua ngi tumu u kamba ku mu sunga.” Muéne uambe ué: “Kana muthu u bhixila kua Tata, ua kambe kuijila ko kuami.” (Nzuá 6:44; 14:6) Bhu kaxi ka nzumbi iê ikola, Jihova u sunga o athu kua muéne bhu kaxi ka Jezú ni ku a kuatekesa ku kala ni ukamba uambote ni Muéne, phala a kale ku muenhu katé ku hádia ni hádia. (Tanga Juda 20, 21.) Tu mone o kima kia kaiiadi kia bhange Jihova phala ku tu sunga kua muéne.

10. Ihi i tu longa o Bibidia i tu kuatekesa ku zukama kua Nzambi?

¹⁰ Tua tumbula kiá ibatulu ia tokala mu 14 a madivulu a Bibidia mu milongi íii. Se ki tu kexile ni Bibidia kiebhi ki tueji kuijiia kuila tu tena ku zukama ku mubhangi uetu? Kiebhi ki tueji kuijiia ué ia lungu ni sata ia kukula, ni kiebhi Jezú kia tu kuatekesa ku zukama kua Jihova? Bhu kaxi ka nzumbi iê ikola, Jihova ua bhangesa ku soneka o Bibidia phala ku tu kuatekesa ku mu zukama. O Bibidia i tu longa ia lungu ni ídifua iambote ia Jihova ni vondadi iê phala o athu. Mu kifika, mu divulu dia Makatukilu 34:6, 7, Jihova ua di jimbulula kala “Nzambi ia jihenda ni kiadi, ua lenduka, u kokoloka mu kuthathamana, u kôla mu kukuatela henda, ufiiele u vula. Jihenda jê ji nangenena ku jimidi ja miji, he u loloka o kubhukumuka, ni kuxibhaka ni ituxi.” Nanhi keji mesena ku zukama ku muthu kala iú? Jihova uejiia kuila kioso ki tu di longa dingi ia lungu ni muéne, muéne u kituka muthu ua kidi phala etu ni kuila tu mu zukama dingi.

11. Mukonda diahi kima kiambote ku di longa ia lungu ni Jihova? (Tala o foto ia dianga.)

¹¹ O divulu Achegue-se a Jeová, di zuela kuila kioso ki tu bhanga o ukamba ni muthu, tuijiia o ídifua iê iambote. Mu kiki, phala ku kala ni ukamba uambote ni Nzambi, tua tokala ku muijiia kiambote. Phala ku bhanga kiki, tua tokala ku di longa o ídifua iê mu Bibidia. Tu sakidila kiavulu Jihova, mukonda ua tumina ku soneka o Bibidia mu ukexilu ua bhebhuluka.

12. Mukonda diahi Jihova ua solo o athu phala ku soneka o Bibidia?

¹²  Jihova hinu ua tumina o ji anju phala ku soneka o Bibidia. Ene a mesena o mbote ietu, a bhana valolo ku kikalakalu ki tu bhanga. (1 Phe. 1:12) Nange ene eji soneka o njimbu ia Jihova mu ukexilu ua jianju. Maji Nzambi ka bhange o ji anju kala kia bhange o athu. Ene nuka a divuile kala etu, kala ni ibhindamu ietu, ka zoza kala etu. Jihova uejiia kuila, o ji anju ki ji difu ni etu, mu kiki, ni unjimu uoso muéne ua solo athu phala ku soneka o Bibidia. Kioso ki tu tanga o ima ia bhitile ni athu a soneka o Bibidia, kala o ku luuala, o jiphata, o uôma, ni ituxi, tuívua ué o ndolo ia bhitile na-iu. Kioso ki tu tanga ia lungu ni ima iambote ia bhitile ni ene, tu sanguluka ué. Kala kia bhitile ni polofeta Elija, o athu oso a soneka o Bibidia a kexile ué ni ‘jihânji kála etu.’—Tiia. 5:17.

13. Kiebhi ki u divua ia lungu ni musambu ua Jona?

¹³ Mu kifika Jihova ua bhana kikalakalu kia dikota kua Jona, maji Jona ua lenge. Se Nzambi ua solele anju phala ku soneka o musoso ua Jona, o anju ki ieji jimbulula kiambote kiebhi kia divuile o polofeta íii, kioso kia lenga ku kikalakalu kia mu bhanene Nzambi. Jihova ua bhange kiambote ua solo Jona phala ku jimbulula kiambote o musoso uê ua lungu ué ni musambu ua bhangele kioso kia kexile koxi dia menha a kalunga. Jona uambe: “Kioso muenhu uami moxi ki ua botomoka, eme nga lembalala dingi Jihova.”—Jona 1:3, 10; 2:1-9.

14. Mukonda diahi u tena kuijiia kiebhi kia divuile Izaia, kioso kia soneka o ima ia lungu ni muéne?

¹⁴ Tu tena ku katula ué phangu mu ima ia zuela Izaia kioso o kisuma kia fuma ia Jihova, kia mu bhangesa ku mona kuila muene uexile mukua ituxi.  Muéne uambe: “Kokolo diami! Eme ngafu-ó! Mukonda ngi muthu nga xidi mu kanu, eme nga tunga mu’axaxi ka mundu ua kasana o dikanu, o mesu mami ia a mono muenexi, Jihova dia Ilômbo Ieta!” (Iza. 6:5) O anju ki ieji tena ku zuela o ima íii ia lungu ni muéne, maji Izaia ua zuela. Mukonda tu akua ituxi kála Izaia, tu tena kuijiia kiebhi kia divuile muéne.

15, 16. (a) Mukonda diahi tu tena kuijiia kiebhi ki divua akuetu? Bhana phangu. (b) Ihi ia-nda tu kuatekesa ku zukama kua Jihova?

¹⁵ O ji anju keji zuela kuila ene ka “fuama,” kála kia zuelele Jakobo, mba ku zuela akua “ituxi,” kála kia zuelele Phetele. (Dim. 32:10; Luka 5:8) Ene keji kala ni “uôma “ kála kia kexile o maxibulu a Jezú. Ene keji bhinga ku “bhua uôma” phala ku boka o njimbu iambote mu kithangana kia kizukutisu, kála kia bhangele Phaulu ni a mukuâ. (Nzuá 6:19; 1 Tes. 2:2) Mukonda o ji anju ja iuka mu maukexilu oso, a suína kiavulu, o athu ndenge. Kioso ki tu tanga o Mak’â, Nzambi tu tena ku ‘sanguluka kumoxi ni ió a sanguluka, ni ku dila kumoxi ni ió a dila’.—Loma 12:15.

¹⁶ Se tu xinganeka mu ukexilu ua dibhana Jihova ni jiselevende jê ja fiiele mu’ukulu, tua-nda kuijiia ima iavulu iambote ia lungu ni Nzambi. Tua-nda mona kiebhi muene kia zukama kua ió exile akua ituxi, ni ku lenduka kuoso ni henda ioso. Kioso ki tuia ni ku di longa ia lungu ni Jihova tua-nda ku muijiia kiambote, tua-nda mu zukama dingi ni ku mu zola kiavulu.—Tanga Jisálamu 25:14.

17. (a) Kitendelesu kiebhi kia bhana Azadiia kua Aza? (b) Kiebhi Aza kia kambe ku belesela o kitendelesu kia Azadiia, ni ihi ia bhiti?

¹⁷ Tu tena ku di longa ima iavulu ia lungu ni Sobha Aza. Kioso o Sobha Aza kia tolola o kifuxi kia akua Itiiópia, o polofeta Azadiia ua mu bhana itendelesu. Azadiia uambe: “O Jihova uala ni enu, kiosu’iki enu muala ni muene; se mu mu sota, mua-nda ku mu sanga; o ki mu’ila mu mu xa, muene ue ua-nda ku mi xa.” (2 Mal. 15:1, 2) Mu ku bhita kithangana, Aza ka belesela o kitendelesu kiki. Kioso o utuminu ua thunda ua Izalaiele uéza mu bhanga ni Judá, Aza ua kexile ni uôma. Muéne ka soto o kikuatekesu kia Jihova. Mu veji dia kiki, ua di bundu kumoxi ni akua Sídia, kexile abhezi a Nzambi. Jihova ua mu ambela: “Ua bhange ulaji mukonda tunde lelu ua-ndu kala jinga ni ita iza kokué.” Kiki kiene kia bhiti. (2 Mal. 16:1-9) Disá diahi di tu katula?

18, 19. (a) Ihi i tua tokala ku bhanga se tu mona kuila ki tu zukama dingi kua Jihova kála ki tua mu zukamene m’ukulu? (b) Kiebhi ki tu tena ku kolokota mu ku zukama kua Jihova?

¹⁸ Ki tu tokala ku sondoloka kua Jihova. Se ki tu mu zukama dingi kala ki tuexile m’ukulu, sé ku laleka, tua tokala ku bhanga ia tange o divulu dia Hozeia 12:6: “Vutukila kua Nzambi ié, jijila kubhanga mbote ni kubatula milonga mu kidi, kuata-phe kuxibhidila jinga Nzambi ié ni kukinga kua muene mu thembu joso.” Kioso ki tu xinganeka mu sata ia kukula ni ku di longa kiambote o Bibidia, tu zukama dingi kua Jihova.—Tanga Matendelelu 13:4.

¹⁹ O mukua jisalamu ua soneka: “Eme-phe kia ngi uabhela o kuzukama kua Nzambi.” (Jisá. 73:28) Tu kolokote mu ku di longa ima ia ubhe ia lungu ni Jihova. Kioso ki tua-nda ia ni ku di longa, tua-nda mu zukama dingi. Se tu mu zukama, muéne ua-nda tu zukama ué, katé ku hádia ni hádia!