1, 2. (a) Ujitu uahi ua bhanene Nzambi kua Adá? (b) Mukonda diahi Nzambi ua bhange muhatu phala Adá? (Tala o foto ia dianga.)

JIHOVA ua bhange o ixi ni disukilu diambote. Muéne ‘ua i bhange phala o athu ku tunga-mu.’ (Iza. 45:18) O muthu ua dianga o ku mu bhanga, Adá, muéne uexile muthu ua iuka, Nzambi ua mu bhana dibhata dia fuama, o jaludim ia Edene. Adá ua katula mbote ku mixi ia ibundu ni ku tonoka ni iama! Maji kua kexile kima kia betele kota muene ka kexile na-kiu. Jihova ua londekesa o kima kiki, kioso muéne kiambe: “ Ki kia uabha o muthu ku kala ubheka ué; ngi mu bhangela mukuá a di fuangana né uia ni ku mu kuatekesa.” Mu kiki, Nzambi u bhangesa Adá kuia ku kilu kia zongo anga, a mu katula lumbânji lumoxi, ku “lumbânji luua katula . . . anga u bhanga o muhatu.” Kioso Adá kia balumuka ua sanguluka kiavulu! Muéne uambe: “Kiki kifuba kia tundu mu ifuba iami, xitu ia tundu mu xitu iami; dijina diê a ka mu ixana muhatu mukonda ua tundu ku diiala.”—Dim. 2:18-23.

² O muhatu uexile ujitu ua dikota ua Nzambi, mukonda muéne ueji kala o múkuatekexi ua bhindamene Adá. Muéne ueji kala ué ni ujitu ua ku vuala an’a. Mu kidi, “Adá anga u luka  muhatu uê o dijina dia Eva; kuma muéne mama ia athu oso a muenhu.” (Dim. 3:20) Ujitu ua dikota ua bhanene Nzambi ku dikaza dia dianga! Ene eji vuala tuana tua iuka. Mu kiki, o ixi ieji kala Palaízu, ieji kuizala ni athu a iuka, eji tumina o ima ioso ia muenhu mu ixi.—Dim. 1:27, 28.

3. (a) Phala ku tambula o mabesá a Nzambi, ihi ia tokalele ku bhanga Adá ni Eva, maji ihi ia bhiti? (b) Ibhuidisu iahi i tua-nda di longa?

³ Phala ku tambula o mabesá oso, Adá ni Eva a tokalele ku belesela Jihova ni ku xikina o ungana uê. (Dim. 2:15-17) Se a beleselele ni ku kala jifiiele kua Nzambi, ene eji kumbidila o vondadi ia Nzambi phala ene. Maji ene a a nganalele ku “Kinhoka kiokulu,” Satanaji, anga a bhukumukina Nzambi. (Dij. 12:9; Dim. 3:1-6) Kiebhi o ku bhukumuka kuku, kua bhekela ibhidi phala o ahatu? Ima iahi ia bhange o ahatu a fiiele m’ukulu? Mukonda diahi o ahatu a Jikidistá lelu a a tumbula kala “kifuxi kia dikota?”—Jisá. 68:11.

4. Nanhi ua kexile ni kikuma ku kituxi kia dikaza dia dianga?

⁴ Jihova ua mesenene kuila Adá ueji ku zuela se mukonda diahi muéne ua bhukumukine. Ihi ia zuela muéne? “O muhatu ua ngi bhana kukala-nê, muéne ua ngi bhana ku muxi, eme nga di.” (Dim. 3:12) Adá ka diela o kituxi kiê, maji mu veji dia kiki, muéne ua tatela Eva ni ku tatela Jihova, ió ua Bhangele o muhatu’ê. Ki kale Adá ni Eva, a tele kituxi, maji Jihova ua londekesa kuila Adá, muéne ua kexile ni kikuma. Mukonda dia kiki, o Poxolo Phaulu uambe: “Mukuá ni kia bokona o ituxi mu ngongo ku muthu umoxi, [Adá] o kufua kù kuejila mu ituxi.”—Loma 5:12.

5. Ihi iene mu bhita mukonda dia athu ku di tumina mudiâ?

⁵ Satanaji ua bhangesa o dikaza dia dianga ku banza kuila ka bhindamene o Ungana ua Jihova. Mu kiki, kua moneka kibhuidisu: Nanhi ua tokala ku tumina o athu? Phala ku bhana o kitambuijilu kia tokala katé ku hádia ni hádia, Nzambi uehela o athu ku di tumina mudiâ mu kithangana. Muéne uejidile kuila, o athu keji di tunda kiambote mu ku di tumina mudiâ. Mu ku bhita hama ni hama ia mivu, o utuminu ua athu ua bheka mavuua ku athu. Mu hama ia mivu ia bhiti, 100.000,000 ia athu afu mu ita—maiala, ahatu ni an’a ndenge. O Bibidia iamba: ‘O njila ienda o muthu ki ene bhu lukuaku lua muthu mba, muthu kienda, ki muéne u tongesa o makanda mê-muene.’ (Jel. 10:23) Mu kuijiia o kidi kiki, etu tua xikina Jihova kala Ngana ietu. Tanga—Jisabhu 3:5, 6.

6. Kiebhi kia talatala o ahatu mu jixi javulu?

⁶ Ki kale o maiala ni ahatu ene mu di bhana ni ibhidi iavulu ku mundu iú ua Satanaji. (Ndo. 8:9; 1 Nzu. 5:19) O ahatu ene mu di bhana dingi ni hadi iavulu. Mu kifika, ku mundu uoso mu 3 kia ahatu, 1 a mu betele kiá kua muadi uê mba ku saí iê. Mu ijila ia jixi ja mukuá, a bhana dingi valolo ku maiala mukonda, kioso ene kia kula a tena ku kuatekesa o jitata ni ku suluka ni dijina dia muiji. Mu jixi ja mukuá ka bhana valolo ku’ahatu, mu kiki o jitata a selula se o mona mu divumu mon’a ua muhatu.

7. Ihi ia bhana Nzambi ku diiala ni muhatu?

⁷ Jihova ka sanguluka mu ku mona o izukutisu i bhita na-iu o ahatu. Muéne u bhana valolo iavulu ku ahatu ni kua xila. Tu tena ku zuela kuila Jihova ua zolo kiavulu o ahatu, mukonda muéne ka bhangele Eva kala mubhika ua Adá, maji ua mu bhange ni ukexilu ua ku kala múkuatekexi uambote phala Adá. Mukonda dia kiki, o Bibidia iamba kuila, kioso Nzambi kia zubha ku bhanga o ima ioso, “u mona ima ioso ia iudika, kuma ia uabha muéne kiavulu.” (Dim. 1:31) Mu kidi, “ima ioso” ia bhange Jihova, “ia uabha  muéne kiavulu.” Muéne ua bhana ku diiala ni muhatu, o ima ioso ia bhingi phala ku mateka kiambote!

8. (a) Ukexilu uahi uala na-u o athu? (b) Mu misoso ia athu, Nzambi ua xikina nanhi?

⁸ O ukexilu ua iibha ua maiala ni ua ahatu ua lunguluka, kioso kia bhiti o ku bhukumuka mu Edene, ku hama ia mivu ia sukina, o ku iibha kua múia dingi ni ku dimendala m’ukulu ndenge. O Bibidia iambe kuila, o ukexilu iú ua iibha, eji ku u londekesa “mu izuua isukidila-ku.” O ima ia iibha iene mu bhanga o athu i londekesa muene kuila tuala mu “jithembu jabhonzo.” (2 Tim. 3:1-5) Ku misoso ioso ia athu, o ‘Ngana Jihova’ ua xikinine athu, maiala ni ahatu a dielele kua muene, akexile mu belesela o itumu iê.—Tanga Jisálamu 71:5.

9. Athu akuxi a bhuluka ku dilúvio ni mukonda diahi?

⁹ Kioso Nzambi kia buika o mundu ua iibha mu izuua ia Noué ni Dilúvio, athu ofele ngó a bhuluka. Se o jiphange ja Noué ja ahatu ni maiala akexile hanji ku muenhu mu kithangana kieniókio, afu uâ ku dilúvio. (Dim. 5:30) Maji o ahatu a bhuluka a sokele ngó ni maiala a bhuluka, mu dilúvio. A bhuluka, Noué ni muhatu uê, an’ê kitatu ni ahatu’â. Ene a bhuluka mukonda a belesele Nzambi ni ku bhanga o vondadi iê. Athu oso ala ku muenhu lelu, a tundu ku athu enhá a a kuatekesele ni kua bhulula kua Nzambi.—Dim. 7:7; 1 Phe. 3:20.

10. Mukonda diahi Jihova ua kuatekesa o ahatu o jiselevende jê ja fiiele?

¹⁰ Mu ku bhita mivu o ahatu a fiiele a Nzambi m’ukulu, a a kuatekese ué ni kua bhulula kua Nzambi. Ene ka divu kia iibha mukonda dia ukexilu uâ ua muenhu, mu kiki, Jihova ua a besoala. (Juda 16) Mu kifika Sala, kioso kia mu bhingi phala ku xisa o inzo iê ia fuama ku ixi ia Ulu, phala ku tunga mu ji balaka, muéne ka ditunu. Mu veji dia kiki, ‘Sala ua belesela Mbalahamu, iú ua mu ixana jinga ngana.’ (1 Phe. 3:6) Xinganeka ué o phangu ia Bebeka kazola ka Izake. Muéne uexile ujitu ua dikota ua bhanene Jihova kua Izake. O Bibidia iamba kuila Izake “anga u mu zola; malamba a mu sosoloka ma kùfua kua manh’iâ.” (Dim. 24:67) Lelu, kisangu-sangu kia dikota kuijiia kuila, ku mundu ua Jihova kuala ahatu avulu ala ni ukexilu ua Sala ni Bebeka!

11. Kiebhi o kiiadi kia ahatu akua Izalaiele kia londekesa o ku suína?

¹¹ Mu kithangana kia kexile ku Ijitu, o mundu ua Izalaiele ua di sokolole kiavulu, Falaó ua tumine ku jibha o an’â oso a maiala a akua Izalaiele exile mu a vuala. Kua kexile kiiadi kia ahatu exile akua Izalaiele, nange akexile ku pholo mu ku kuatekesa o ahatu kioso kia vuala. O majina mâ exile Sifra ni Puua. Ene ka belesela o kitumu kia bhanene Falaó kia ku jibha o an’a oso a maiala a akua Izalaiele. O ahatu iâ, a suínine mukonda a betele ku kala ni uôma ua Jihova o ua Falaó ndenge. Mu kiki, Jihova ua a besoala ene ni miji iâ.—Mak. 1:15-21.

12. Ihi ia bhangele Debola ni Jaiele?

¹² Mu kithangana kia afundixi mu Izalaiele, Nzambi ua solo polofeta ia muhatu, dijina diê Debola. Muéne ua suínisa o mufundixi Balake ni ku kuatekesa o akua Izalaiele ku tolola o jinguma jâ. Maji muéne uambe kuila o kijingu kia ku tolola o akua Kanana ka tokalele ku ki bhana kua Balake. Mu veji dia kiki, Nzambi ueji bhana Xixela, o kabhitangu ka akua Kanana, “bhu lukuaku lua muhatu.” Kiki kia bhitile kioso Jaiele o muhatu kexile mukuá Izalaiele, kia Jibha Xixela o kabhitangu ka akua Kanana.—Afun. 4:4-9, 17-22.

13. Ihi i longa o Bibidia ia lungu ni Abingaíle?

¹³ Xinganeka ué o phangu ia Abingaíle  muhatu ua fiiele ua kexile ku muenhu mu 1. 100 a mivu A.K.K. O Bibidia i longa kuila muéne ua kexile ni kilunji, maji o muadi uê Nabale ka kexile ni kilunji, uexile muthu ua iibha. (1 Sam. 25:2, 3, 25) Davidi ua langele o maiala a Nabale, mu kiki, Davidi ua tumikisine o masoladi mê phala ku mu bhinga kudia ni kúnua, ni ima ia mukuá dingi. Maji Nabale “ua a baúla, kuma ka a tambulula kiambote,” ka a bhana kima. Kioso Abingaíle kiévu o maka enhá, muéne uai mu bheka kúdia ni kúnua kua Davidi ni masoladi mê. Mukonda dia Abingaíle ku bhanga kiki, Davidi ka jibha Nabale. 25:8-18) Mu ku bhita kithangana, Davidi uambe kua Abingaíle: “Nga sakidila Jihova, Nzambi ia Izalaiele, ua ku tumu kizuua kia lelu ku ngi batuila.” (1 Sam. 25:32) Kioso Nabale kiafu, Davidi ua kazala ni Abingaíle.—1 Sam. 25:37-42.

14. Kikalakalu kiahi kia kexile mu bhanga o an’a Salume, ni kiebhi o ahatu Jikidistá a mu bhanga ué o kikalakalu kiki lelu?

¹⁴ Kioso o akua Babilonha kia buika o mbanza ia Jeluzaleme ni tembulu iê, ku muvu ua 607 A.K.K., maiala avulu, ahatu ni ana ndenge afu. Ku muvu ua 455 A.K.K., Nehemiia ua tumu ku tunga dingi o ilumbu ia Jeluzaleme. O an’â a Salume, akexile ué mu axaxi ka athu avulu akexile mu tunga dingi o ilumbu ia Jeluzaleme. O tat’â uexile “dikota dia kaxaxi kamukuá ka Jeluzaleme.”(Neh. 3:12) Maji né kiki o an’a a Salume a sangulukile mu ku bhanga o kikalakalu kia lenduka. Kiki ki tu bhangesa ku lembalala o ahatu avulu a Jikidistá a mu bhanga o ikalakalu ia ku tunga ku mundu uoso lelu!

15. Ujitu uahi ua bhanene Nzambi kua Madiia?

¹⁵ Ande dia hama ia dianga ni mu ithangana ia hama ia dianga, Jihova ua bhanene maujitu avulu ku Jiselevende jê ja ahatu. Mu kifika, o muzeletete Madiia. Ande dia ku kazala ni Zuze, Madiia uemitine bhu kaxi ka nzumbi ikola ia Jihova. Mukonda diahi Nzambi ua solo Madiia phala ku kala manh’iâ Jezú? Mukonda, Madiia ua kexile ni ídifua iambote ieji kuatekesa ku sasa kiambote o mon’a ua iuka ua Nzambi. Sé phata, uexile ujitu ua dikota ku kala manh’ia diiala dia beta-o kota dia kexile ku muenhu mu ixi!—Mat. 1:18-25.

16. Kiebhi Jezú kia kexile mu talatala o ahatu? Bhana kifika.

¹⁶ Jezú uexile mu talatala kiambote o ahatu. Mu kifika, xinganeka o muhatu ‘ua katele kibhubhe kia manhinga ua bhange na-diu 12 ia mivu.’ Muéne ua babata ku kizuatu kia Jezú phala ku di sanza. Mu veji dia ku kala ni njinda, Jezú ni henda ioso uambe: ‘Mon’a, o kuxikana kué, kua ku bhulula. Ndeie ni kutululuka, u di sanze ku uhaxi ué.’—Mar. 5:25-34.

17. Ihi ia bhiti mu kizuua kia Pendekoxi kia 33 K.K.?

¹⁷ Kioso Jezú ni maxibulu mê kia kexile mu kuenda njila, saí ahatu akexile mu ku mu kuatekesa ku ima ia bhindamene. (Luka 8:1-3) Mu Pendekoxi ku muvu ua 33 K.K., 120 a athu, maiala ni ahatu a tambula o nzumbi ikola mu ukexilu ua katunda. (Tanga Ikalakalu 2:1-4.) Mu ku bhita mivu iavulu ande dia ku bhita o ima íii, Jihova ua kanene: “Nga kà lunduluila o Nzumbi iami ku thandu dia xitu ioso, an’enu a mala ni an’enu a ahatu a kà zambula . . . ngà kà lunduluila ué nzumbi iami ku abhika a mala ni ku abhika a ahatu mu izuua muene’omo.” (Joue. 2:28, 29) O madiuanu a bhiti mu kizuua kia Pendekoxi a londekesa kuila, Jihova ua xikinine o maiala iâ ni ahatu kala o ‘Izalaiele ia Nzambi.’ (Nga. 3:28; 6:15, 16) O an’â auana a ahatu a mukunji Filipe, a bhangele mbandu ku kibuka  kia ahatu akexile mu boka mu hama ia dianga.—Ika. 21:8, 9.

18, 19. (a) Ujitu uahi ua bhana Nzambi ku maiala ni ahatu? (b) Kiebhi o mukua jisalamu kia tumbula o ahatu a boka o njimbu iambote?

¹⁸ Ku disukilu dia muvu ua 1800, maiala avulu ni ahatu a mesenene kuijiia o kidi kia Bibidia. Ene a jikula o njila mu ku mateka o ku boka o njimbu ia Jezú, ni ku bhanga mbandu mu ki kumbidilu kia kikanenu kia Jezú, kiambe: “Njimbu iíi Iambote ia Utuminu ua Nzambi, ia bhingi ku i tula mu ngongo ioso, mu kubhana umbangi ku akua jixi joso; kiene kiua kia kèza dizubhilu.”—Mat. 24:14.

¹⁹ O kibuka kio fele kia Adilongi a Bibidia, kia di bandekesa mu 8.000.000 a Jimbangi ja Jihova ndenge mu izuua ietu. Mu lembalasa ia kufua kua Jezú kua moneka 11.000,000 a athu ndenge. Bhu kaxi ka athu enhá mua kexile dingi ahatu, maiala ndenge. Saí ué 1.000.000 a Jimbangi ja Jihova ndenge, mu sidivisu ia thembu ioso. Mu jixi javulu o ala dingi mu sidivisu íii, ahatu. Jihova ua bhana ku ahatu o ujitu ua ku bhana umbangi ua lungu ni muéne. Mu kiki, o izuelu ia mukuá jisalamu, ia mu di kumbidila mu izuua ietu: “Ngana muene ua bhana o kizuelu kiê; O ahatu a bhana jinga o jingolokela, . . . kifuxi kia dikota.”—Jisá. 68:11.

20. Ihi i tu tena ku di longa ubheka uetu, mba mu ubhezelu uetu ku muiji?

²⁰ Ki tu tena ku zuela ia lungu ni ahatu oso a a tange mu Bibidia. Maji tu tena ku tanga o misoso iâ mu Maka’â Nzambi ni mu madivulu etu a Bibidia. Tu tena ku xinganeka mu phangu ia Lute ni ufiiele uê. (Lute 1:16, 17) Tu tena ku katula ué mbote mu ku tanga o musoso ua Nvuale Estere. Tu tena ku di longa ia lungu ni ahatu iâ, ni a mukuá mu kithangana kia Ubhezelu uetu ku Muiji. Se tua tungu ubheka uetu, tu tena ku di longa o misoso ia ahatu iâ, kioso ki tu di longa ubheka uetu.

21. Kiebhi o ahatu kia londekesa o ufiiele uâ kua Jihova?

²¹ Sé phata Jihova ua besoala o kikalakalu kia ku boka kia kexile mu bhanga o ahatu a fiiele, né muene mu kithangana kia izukutisu. Mu kifika, mu kithangana kia utuminu ua Jinazí, Jihova ua kuatekesa o ahatu ku kolokota mu ufiiele uâ. Saí iâ a di bhana ni ibhidi iavulu, a mukuá a a jibha mukonda dia ku belesela Nzambi. (Ika. 5:29) Kála o ahatu ió a fiiele, o ahatu a Jikidistá ni jiphange ja mukuá, a solo Nzambi kala Ngana iâ. Jihova ua a tangela ué kala kia zuelele ku ahatu a akua Izalaiele: “Kana ku kala ni uôma, kuma eme ngala bhuamoxi n’eie.”—Iza. 41:10-13.

22. Maujitu ahi u tua mu kingila ku tambula ku hádia?

²² Ku hádia, o maiala ni ahatu a bhanga o vondadi ia Nzambi, a ka longa athu avulu a-nda kua fukununa, ia lungu ni Jihova ni vondadi iê phala o athu. Mu kiki, etu enoso tua tokala ku bhana valolo iavulu ku ujitu u tuala nau ua ku sidivila Jihova “ni muxima umoxi.”—Sof. 3:9.