1, 2. Ihi ia-nda kolokotesa o kidielelu kietu kuila bhu kaxi ka Utuminu, o vondadi ia Nzambi phala o athu ia-nda dikumbidila, ni mukonda diahi? (Tala o foto ia dianga.)

ETU tu Jimbangi ja Jihova, tu boka o Utuminu ua Nzambi, mukonda uene u bhana o kidielelu phala o ku batula o maka oso u tu bhita nau. O kuila tua xikina kuma o Utuminu kidi, ni kuila bhu kaxi ka Utuminu, Nzambi ua-nda kumbidila o kikanenu kiê? Mukonda diahi tu tena ku kala ni kixikanu kia kolo kia lungu ni Utuminu?—Jihebeleu 11:1.

² Bhu kaxi ka Utuminu ua Mexiia, o kikanenu kia Jihova kia lungu ni athu, kia-nda di kumbidila. Kuma Jihova muéne ngó ua tokala o ku tumina, o Utuminu iú ua-nda nangenena katé ku hádia ni hádia. Nanhi o Sobha ia Utuminu iú? Nanhi dingi ua-nda tumina ni Sobha íii? Ene a-nda tumina nanhi ni ihi ia-nda langa? Jihova ua solo o athu iâ a-nda Tumina, bhu kaxi ka ikutu. Jihova muene ua bhange o ikutu íii, mba Mon’ê, Jezú Kristu. Mu ku di longa o Ikutu íii, tua-nda kuijiia kiambote kiebhi Jihova kia-nda kumbidila o ikanenu iê, ni mukonda diahi tu tena ku dielela kuila o  Utuminu kima kia kidi.—Tanga Efezo 2:12.

3. Ihi i tua-nda di longa ku milongi íii, ni ia-nda kaiela?

³ Mu Bibidia muala ikutu isamanu ia beta kota ia lungu ni Utuminu ua Mexiia, ia mu tumina Jezú Kristu. O ikutu ienii, (1) kikutu kia Mbalahamu, (2) kikutu kia Kitumu, (3) kikutu kia Davidi, (4) kikutu kia lungu ni mukunji kála Melekizedeke (5) kikutu kia ubhe, ni (6) kikutu kia Utuminu. Tua-nda di longa kiebhi kala kikutu kia lungu ni Utuminu, ki kalakala phala o vondadi ia Nzambi ia lungu ni ixi ni athu i di kumbidile.—Tala o mbandu, “ Kiebhi Nzambi Kia-nda Kumbidila o Vondadi Iê.”

4. Kala kiala mu divulu dia Dimatekenu, itumu iahi ia bhana Jihova phala o athu?

⁴ Jihova ua Bhange o ixi íii phala o athu ku tunga-mu. Mu ku suluka, Jihova ua bhana o itumu íii: (1) Nzambi ueji bhanga o athu mu kidifuanganu kiê. (2) O athu eji bhanga o ixi palaízu ni ku izalesa ni tuana tuâ tua iuka. (3) O athu keji diâ ku muxi ua kuijiia kia mbote ni kia íibha. (Dimatekenu 1:26, 28; 2:16, 17) O itumu itatu íii, ia kexile mu londekesa o vondadi ia Nzambi ia lungu ni athu ni ixi. Mukonda diahi Nzambi ua tokalele ku bhanga ikutu?

5, 6. (a) Kiebhi Satanaji kiene mu fidisa phala o ikanenu ia Nzambi ki i di kumbidile? (b) Kiebhi Jihova kia di bhana ni ku bhukumuka mu Edene?

⁵ Satanaji ua mateka o ku bhukumukina Nzambi ni ikanenu iê. Muéne ua kuata o ku tatela o athu kuila, ka tena ku belesela Nzambi, kioso kia bhangesa Eva kudia o kibundu kia muxi ua kuijiia kiambote ni kia iibha. (Dimatekenu 3:1-5; Dijingunuinu 12:9) Mu ku bhanga kiki, muéne ua tatela Nzambi kuila kejiia ku tumina o ibhangelu Iê. Mu ku suluka, Satanaji ua tatela ué o athu kuila,  ene a mu bheza Nzambi mukonda dia ima ia mua bhana.—Jobe 1:9-11; 2:4, 5.

⁶ Kiebhi Jihova kieji bhanga ni ku bhukumuka kuku? Muéne ueji buika o athu iá abhukumuka. Maji kiki, kieji londekesa kuila o kikanenu kia Nzambi kia ku izalesa o ixi ni an’a Adá ni Eva, ki kieji di kumbidila. Jihova ka buika o athu a abhukumuka mu kithangana kieniókio. Mu veji dia kiki, muéne ua bhangele kikanenu kia dikota, o kikanenu kia Edene. Kiki kia bhangesa ku kala ni kidielelu kia kuila, ioso ia kanena Nzambi ia lungu ni ixi ni athu, ia-nda dikumbidila.—Tanga Dimatekenu 3:15.

7. Ihi i londekesa o kikanenu mu Edene kia lungu ni nhoka ni mbutu iê?

⁷ Bhu kaxi ka kikanenu kiê mu Edene, Nzambi ua balakala o nhoka ni mbutu iê, Satanaji o Diabhu, ni ió oso eji kala ku mbandu iê, mu ku bhukumukina o kutena kua Nzambi kua ku tumina. Nzambi ua bhana ku mbutu ia muhatu, o kutena kua ku buika ió abhukumuka. O kikanenu mu Edene, kia londekesa kuila Satanaji ni ibhangelu iê ia ku bhukumuka, eji kua buika. O kikanenu kia londekesa ué kiebhi kieji bhanga kiki.

8. Ihi i tua di longo ia lungu ni muhatu ni mbutu iê?

⁸ Nanhi ueji kala o mbutu ia muhatu? O mbutu ieji kala muthu mu nzumbi. Mukonda diahi? Mukonda o mbutu íii, ieji “kutolola” Satanaji, o muthu mu nzumbi ka moneka ku mesu. (Jihebeleu 2:14) Mu kiki, o muhatu ueji vuala o mbutu íii, ueji kala ué muthu mu nzumbi. Kioso o mbutu ia nhoka kiai ni ku di sokolola, o kuijiia kua lungu ni muhatu ni mbutu iê, kiexile kikutu sé ku ki jingununa mu 4.000 ia mivu, tundé kia ki kanena mu Edene. Ku mivu ioso íii, Jihova ua bhange ikutu iavulu i londekesa o mbutu ia-nda tungununa kiebhi Nzambi kia-nda bhanga, phala ku bhandulula o ibhangelu ia ku bhukumuka kua Satanaji.

9. O kikutu kia Mbalahamu ihi, ni thembu kuxi kia mateka?

⁹ Kioso kia bhangele o kikanenu mu Edene, kua bhitile 2.000 ja mivu, Jihova uambela Mbalamu phala ku xisa o dibhata diê ni mbanza ia Ule phala kuia ku ixi ia Kanana. (Ikalakalu 7:2, 3) Nzambi ua mu ambela: “Katuka m’oxi ienu, ni mu jindandu jenu ni mu bhata dia tat’enu, ua k’àie ixi iengi; eme-phe nga-nda ku ku sokolola, n’ukala u muiji ua dikota; ngi ku zediuisa, ngi jingisa o dijina dié; eie ua kala u dibesá. Nga kà a benzela oso a ku benzela eie, nga kà bhubhidila oso a ku bhubhidila eie; momué muene mua kà zediuila o miiji ioso mu ngongo.” (Dimatekenu 12:1-3) O kikanenu kia Nzambi kia bhanene kua Mbalahamu, a ki ixana kikutu kia  Mbalahamu. Ki tuejiia kiambote, kiebhi kiexile o kizuua kia dianga kia bhangele Nzambi o kikutu ni Mbalahamu. Maji tuijiia kuila, o kikutu kia mateka muene ku muvu ua 1943 ande dia kithangana kia Kristu, kioso Mbalahamu, kia kexile ni 75 a mivu, kioso kia xisa o ixi ia Hala, iu ua zaúka o Ngiji ia Ufalate.

10. (a) Kiebhi Mbalahamu kia londekesa kuila ua kexile ni kixikanu kia kolo ku ikanenu ia Nzambi? (b) Ima iahi ia kuata Jihova ku jingununa bhofele bhofele, ia lungu ni mbutu ia muhatu?

¹⁰ Jihova ua bhitulula o kikanenu kiê kua Mbalahamu mu veji javulu, mu ji veji ja kexile mu ki bhitulula, ua kexile mu bandekesa-ku ima ia mukuá. (Dimatekenu 13:15-17; 17:1-8, 16) O kixikanu kia Mbalahamu mu ikanenu ia Nzambi, kia kexile kia kolo, kia mu bhangesa ku xikina o ku satela mon’é ua kazola. Mukonda dia kiki, Jihova ua kolesa dingi o kikutu kiê, phala kulondekesa kuila ioso ia kanena ia-nda di kumbidila. (Tanga Dimatekenu 22:15-18; Jihebeleu 11:17, 18.) Kioso kia kumbidila o kikutu kia Mbalahamu, Nzambi ua tungununa bhofele bhofele, ima ia lungu ni mbutu ia muhatu. O mbutu ieji kuijila ku muiji ua Mbalahamu, athu avulu eji bhanga mbandu ku mbutu, ene eji sidivila kala jisobha, eji buika o jinguma ja Nzambi, eji sidivila ué kala dibesá phala o athu oso.

11, 12. Kiebhi kilondekesa o Mikanda Ikola kuila o ikanenu ia kikutu kia Mbalahamu a-nda i kumbidila ku luiadi mu ixi ioso ni ihi i londekesa phala etu?

¹¹ O ikanenu ia kikutu kia Mbalahamu kia dikumbidila, kia dianga kioso o muiji ua Mbalahamu kia bokona mu Ixi ia Kanene. Né muene kiki, o Bibidia i lombolola kuila, o kikutu kiki kieji bhekela mbote javulu. (Ngalásia 4:22-25) O poxolo Phaulu ua lombolola kuila o mbutu ia dianga ku muiji ua Mbalahamu, Jezú Kristu. O mbandu ia kaiiadi, o 144.000 a Jikidistá a a undu. (Ngalásia 3:16, 29; Dijingunuinu 5:9, 10; 14:1, 4) O muhatu mu kikanenu kia Edene, o mbandu ia kilunga kia Nzambi ku diulu. O  muhatu iú a mu ixana “Jeluzaleme ia diulu,” o a bhanga mbandu ku muhatu iú, o ji anju joso ku diulu. (Ngalásia 4:26, 31) Kala o kikutu kia bhangele kua Mbalahamu, o mbutu ia muhatu, ia-nda bheka mbote inangenena ku athu oso.

¹² O kikutu kia Mbalahamu, ki bhana kidielelu kia iuka, phala o Utuminu ua diulu, ni ku bhangesa o Sobha ni athu a mukuá a-nda tumina né, ku lundula o Utuminu. (Jihebeleu 6:13-18) O kikutu kiki, kia-nda bhua thembu kuxi? O divulu dia Dimatekenu 17:7 diamba kuila, “kikutu kinangenena.” Kia-nda nangenena katé o Utuminu kia-nda buika o jinguma ja Nzambi, ni kioso o miji ioso mu ixi kia-nda i besoala. (1 Kolindu 15:23-26) Maji o jimbote ja kikutu kiki, ji nangenena. O kikutu kia bhangele Nzambi ni Mbalahamu, kilondekesa kuila, o kikanenu kia Jihova kia ku ‘izalesa o ixi’ ni athu a iuka, kia-nda di kumbidila.—Dimatekenu 1:28.

13, 14. Ihi ia kanena o kikutu kia Davidi?

¹³ O kitumu kia Edene ni kia Mbalahamu ki tu longa kuila, o Utuminu ua Jihova u kaiela o itumu iê ia iuka. Mu kiki, o Utuminu ua Mexiia ua tumbika Nzambi u kaiela ué o itumu íii ia iuka. (Jisálamu 89:14) O kuila saí kizuua, o Utuminu ua Mexiia ua-nda bhukumukina o itumu íii? O kuila kua-nda bhinga o ku lungulula o jinguvulu ja Utuminu iú? O kikutu kia mukuá, ki tu kanena kuila o jinguvulu jiji ka-nda ji lungulula.

¹⁴ Jihova ua kanena kima ku Sobha Davidi ia Izalaiele iokulu. O kikanenu kiki, a ki ixana Kikutu kia Davidi. (Tanga 2 Samuuele 7:12, 16.) Jihova ua kanena kuila, o Mexiia ueji tunda ku mbutu ia Davidi. (Luka 1:30-33) Mu kiki, Jihova ua jimbulula dingi kiambote o muiji kueji tunda Mexiia. Jihova ua zuela kuila, o mbutu ia Davidi ieji tambula o ujitu ua ku ‘kala’ o Sobha ia Utuminu ua Mexiia. (Izekiiele 21:25-27) O utuminu ua Davidi ueji nangenena, mukonda Jezú, o mbutu ia Davidi, ua-nda ‘nangenena muene, o kiandu kiê kia-nda kuata muene, kala o dikumbi.’ (Jisálamu 89:34-37) Tu tena ku dielela kuila o Utuminu ua Mexiia, ki ua-nda bhukumukina o itumu ia iuka ia Nzambi, ni kuila o mabesá a-nda bheka o utuminu iú, a-nda nangenena!

15-17. Kala kilondekesa o kikutu kia lungu ni ukunji ua Melekizedeke, kikalakalu kiahi kieji kala na-kiu o mbutu ni mukonda diahi?

¹⁵ O kikutu kia Mbalahamu ni kia Davidi, kia bhana kidielelu kia kuila, o mbutu ia muhatu ia-nda tumina kala sobha. Maji phala o athu oso a katule mbote, o mbutu ki i tokala ngó ku kala sobha. O mbutu íii, ia tokala i kala ué mukunji. Mukonda o mukunji, muene  ngó u tena o ku bhana sata, phala o athu a tene kua bhulula ku kituxi, phala ku kituka muiji ua fiiele ua Jihova ku diulu ni mu ixi. Phala o mbutu íii ku kala mukunji, Jihova ua bhange kima kia mukua kia iuka, o kikutu kia lungu ni mukunji kála Melekizedeke.

¹⁶ Nzambi ua jingununa bhu kaxi ka Sobha Davidi, kuma muéne ueji bhanga kikutu ni Jezú. O kikutu kiki, kia lungu ni ima iiadi: Kia dianga, Jezú ueji ‘xikama ku mbandu ia kadilu ka Nzambi,’ ni kutena kua ku buika o jinguma jê joso; kaiiadi, Jezú ueji kala ‘mukunji u nangenena, mukua ni ukunji ua Melekizedeke.’ (Tanga Jisálamu 110:1, 2, 4.) Mukonda diahi Jezú ueji kala ‘mukua ni ukunji ua Melekizedeke?’ Ande dia muiji ua Mbalahamu ku tambula o Ixi ia a Kanene, Melekizedeke uexile Sobha ia mbanza ia Saleme ni ‘mukunji ua Nzambi ua suka ku ukota.’ (Jihebeleu 7:1-3) Jihova ua solo Melekizedeke kala sobha ni mukunji, muéne ngó ande dia Jezú, uexile mukunji ni sobha mu kithangana kimoxi. Kuma ki bhu kexile dingi muthu ua kexile ni maujitu iá, ande dia Melekizedeke ni ku pholo diê, kiki kilondekesa kuila muéne uexile kala ‘mukunji u nangenena.’

¹⁷ Bhu kaxi ka kikutu kiki, Jezú a mu solo kuala Nzambi phala ku kala mukunji. Jezú ua-nda nangenena mu ku kala ‘mukunji mukua ni ukunji ua Melekizedeke.’ (Jihebeleu 5:4-6) O kikutu kiki, kilondekesa kuila bhu kaxi ka Utuminu ua Mexiia, Jihova ua-nda kumbidila o vondadi iê ia lungu ni ixi ni athu.

18, 19. (a) Kiebhi o ikutu i tua di longo, ia lungu ni Utuminu? (b) Ihi tua-nda di longa mu milongi ia-nda kaiela?

¹⁸ Tundé ku dimatekenu, tua di longo kiebhi kala kikutu kia lungu ni Utuminu ua Mexiia, ni kiebhi o Utuminu ua lungu ni ikutu ia iuka. O kikanenu mu Edene, ki bhana kidielelu kia kuila, Jihova ua-nda bhangesa o mbutu ia muhatu phala ku bhangesa kuila o vondadi iê ia lungu ni ixi ni athu, i di kumbidila. O kikutu kia Mbalahamu kilondekesa se nanhi ueji kala o mbutu ni kikalakalu kiahi kieji bhanga o mbutu.

¹⁹ O kikutu kia Davidi, kilondekesa kiambote o muiji ua Mexiia. O kikutu kiki, ki bhana ué kua Jezú o kutena kua ku tumina o ixi ku hádia ni hádia. O kikutu phala ku kala mukunji kála Melekizedeke, ki bhana kidielelu kia kuila o mbutu íii ia-nda sidivila kala mukunji. Maji Jezú ki muéne ngó ubheka ué, ua-nda bhanga o kikalakalu kia ku kuatekesa o athu ku kala a iuka. Kuala dingi akuâ, a a solo phala ku sidivila kala jisobha ni akunji. Eji tunda kuebhi? Tua-nda di longa o maka enhá mu milongi ia-nda kaiela.