1. Mukonda diahi o kixikanu kiala ni valolo ia dikota? (Tala o foto ia dianga.)

O KUILA ua dibhuidisa kiá se Jihova ua-nda kubhulula mu kithangana kia hadi ia dikota? Poxolo Phaulu ua zuela kuila, phala ku tu bhuluka, o kídifua kia dikota ki tua bhingi kulondekesa, o kixikanu. Muéne uambe: “Muthu-phe ua kambe o kuxikana ka tena kuuabhela Nzambi.” (Jihebeleu 11:6) Nange tu mona kuila, ki ki bhonzo kubhanga kiki, maji mu kidi “ene oso ka sokela-ku mu kuxikana.” (2 Tesalonika 3:2) O ibatulu iiadi íii ia Bibidia, i tu kuatekesa kumona kuila, kima kiambote kukolesa o kixikanu kietu.

2, 3. (a) Mukonda diahi tua tokala kukala ni kixikanu? (b) Ihi i tua-nda di longa kindala?

² Poxolo Phetele ua zuela ia lungu ni kixikanu kio ‘lole.’ (Tanga 1 Phetele 1:7.) O hadi ia dikota ia zukama kiá, mukonda dia kiki, tua mesena kukala ni “kuxikana kua kidi, ku tu bhekela o kubhuluka.” (Jihebeleu 10:39) Mu kiki, tua tokala kubhanga ioso phala kukolesa o kixikanu kietu. Etu tua mesena kukala bhu kaxi ka ió a-nda tambula o mabesá, kioso o Sobha ietu Jezú Kristu kia-nda kuíza. Mu kiki, kála o diiala dia bhingi kua Jezú phala ku mu vudisa o kixikanu kiê, tua tokala ué kuzuela: “Ngi kuatekese mu kukamba kuxikana kuami!” (Marku 9:24) Kala kia bhangele ué o jipoxolo, etu ué tua tokala kuzuela: ‘Tu vudise dingi o kixikanu kietu.’—Luka 17:5.

 ³ Mu milongi íii, tua-nda di longa o jipondo jiji: Kiebhi ki tu tena kukolesa o kixikanu kietu, kiebhi ki tu tena kulondekesa kuila tuala ni kixikanu kia kolo, ni mukonda diahi tu tena ku dielela kuila, se tu bhinga kixikanu kia kolo, Nzambi ua-nda tu tambuijila.

4. Phangu iebhi i tena ku tu kuatekesa kukolesa o kixikanu kietu?

⁴ Kuma o kixikanu kiala ni valolo ia dikota, Jihova ua tu bhana phangu ia athu avulu mu Bibidia, a londekesa o kixikanu. O milongi ioso ia lungu ni athu enhá, “a i sonekena phala etu ku di longa.” (Loma 15:4) O phangu ia Mbalahamu, Sala, Izake, Jakobo, Mozé, Lahaba, Ngidiione, Balake ni athu mukuá dingi, i tena ku tu kuatekesa kukolesa o kixikanu kietu. (Jihebeleu 11:32-35) Lelu, kuene ué jiphange javulu ja mala ni ja ahatu, ene mu bhana phangu iambote mu kulondekesa o kixikanu. * (Tala ku luiji.)

5. Kiebhi Elija kia londekesa kuila, ua kexile ni kixikanu kia kolo kua Jihova, ni kibhuidisu kiebhi ki tua tokala o ku bhanga?

⁵ Mu Bibidia tu tena ku di longa ia lungu ni phangu ia Elija. Kioso ki u xinganeka mu phangu iê, tonginina kiambote, kiebhi muéne kia londekesa o kixikanu kua Jihova mu ithangana itanu. (1) Kioso Elija kia zuela kua Sobha Akabe kuila, Jihova ueji batula o mvula mu ixi, muéne uambe ni kidi kioso: “Ngana kuene kuala, Nzambi ia Izalaiele, uavu o pholo iê bhu ngala, kuma mivu iii ki kua-ndu suka mbundu mba kunoka mvula.” (1 Jisobha 17:1) (2) Elija ua dielele kuila, Jihova ueji suua o ibhindamu iê ni ia akuâ, mu ku a bhana ioso ieji bhindamena mu kithangana kieniókio kia nzala. (1 Jisobha 17:4, 5, 13, 14) (3) Elija ua dielele ué kuila, Jihova ueji fukununa o mon’a mutudi. (1 Jisobha 17:21) (4) Muéne uejidile ni kidi kioso kuila, o túbhia tua Jihova tueji jikatesa o sata ia kexile mu bhana ku Mulundu ua Karmelo. (1 Jisobha 18:24, 37) (5) Né muene ande dia kumateka o ku noka, Elija uambela ni kidielelu kioso kua Sobha Akabe: “Banda, u die, u nue, mukonda nga mu kuívua kiá kinuminu kia mvula iadikota.” (1 Jisobha 18:41) Mu ku di longa o musoso iú, tua tokala kudibhuidisa: ‘O kuila o kixikanu kiami kia kolo, kála o kixikanu kia Elija?’

6. Ihi i tua tokala kubhinga kua Jihova phala kukolesa o kixikanu kietu?

⁶ Kuma ki tu tena kukolesa o kixikanu kietu mu nguzu ietu, tua tokala kubhinga o kikuatekesu kua Nzambi n’a tu bhane o nzumbi ikola. Mukonda diahi? Mukonda o  kixikanu kibhanga mbandu ku kibundu kia nzumbi ikola. (Ngalásia 5:22) Tu londekesa o unjimu, kioso ki tu kaiela o kitendelesu kia Jezú kia kusamba, phala kubhinga o nzumbi ikola. Jezú ua kanena kuila, Jihova ueji bhana ‘nzumbi ikôla kua ió oso a mu bhinga.’—Luka 11:13.

7. Zuela kiebhi ki tu tena kukolesa o kixikanu kietu.

⁷ Se tuala kiá ni kixikanu kia kolo kua Nzambi, tua tokala ku ki langa, phala ki ki zoze. Tu tena kusokesa o kixikanu ni túbhia. Kioso ki tu uika o túbhia, o mulengu u vula. Maji se ki tu bandekesa-ku jihuinhi, o túbhia tu jima. Maji se tuia ni kubandekesa o jihuinhi, o túbhia ki tua-nda jima. Kiene kimoxi ué ni kixikanu kietu. Se tu kolokota mu kutanga ni ku di longa o Mak’â Nzambi izuua ioso, tua-nda zola dingi o Bibidia, o henda ietu kua Jihova ia-nda di bandekesa dingi. O kubhanga kiki, kua-nda tu kuatekesa kukolesa o kixikanu kietu.

8. Ihi ia-nda ku kuatekesa kukolesa o kixikanu kiê?

⁸ Eie ku tokala kudielela ngó mu ima i ua di longo ande dia ku kubatizala. (Jihebeleu 6:1, 2) Mu kifika, o ku di longa ia lungu ni ikanenu ia Bibidia ia dikumbidila kiá, kua-nda ku kuatekesa kukolesa ni kulanga o kixikanu kiê. Eie u tena ué ku di tonginina kiambote bhu kaxi ka Mak’â Nzambi, phala kumona se o kixikanu kiê kia kolo muene, mba kana.—Tanga Tiiaku 1:25; 2:24, 26.

9, 10. Kiebhi ki tu tena kukolesa o kixikanu kietu (a) mu kukala ni makamba ambote? (b) bhu kaxi ka iônge? (c) mu kuboka?

⁹ Poxolo Phaulu uambe kuila, o Jikidistá a tena ku ‘di konda malamba mu ku d’ijiia o kuxikana kuâ.’ (Loma 1:12) Kiki kilombolola ihi? Kioso ki tu kala kumoxi ni jiphange jetu ja mala ni ja ahatu, tu tena kukolesa o kixikanu kietu. Kiki ki bhita dingi. kioso ki tu bhita kithangana ni athu ala ni kixikanu kio ‘lole.’ (Tiiaku 1:3) O makamba a iibha a zozesa o kixikanu kietu, maji o makamba ambote a kolesa o kixikanu kietu. (1 Kolindo 15:33) Mukonda dia kiki, ene mu tu suínisa kuia mu iônge semana joso. Mu iônge ietu, tu tena ku di ‘suínisa mudietu.’ (Tanga Jihebeleu 10:24, 25.) O milongi i tuene mu tambula mu iônge, i suínisa o kixikanu kietu. O Bibidia izuela kuila, “o kuxikana kuijila mù kuivua o hundu.” (Loma 10:17) Mu kiki, dibhuidise: ‘O kuila o iônge i bhanga mbandu ku muenhu uami?’

¹⁰ Tu tena ué kukolesa o kixikanu kietu, kioso ki tu boka ni kulonga o athu ia lungu ni njimbu iambote ia Bibidia. Kála o Jikidistá ja dianga, etu tuene mu dielela ué kua Jihova, ni kuboka ni kusuína kuoso mu ithangana ioso.—Ikalakalu 4:17-20; 13:46.

11. Mukonda diahi Josuué ni Kalebe akexile ni kixikanu kia kolo, ni kiebhi ki tu tena kukaiela o phangu iâ?

¹¹ O kixikanu kietu kua Jihova ki kula dingi, kioso ki tu mona kiebhi muéne kia tu kuatekesa, ni kiebhi kia tambuijila o misambu ietu. Kiki kiene kia bhitile ni Kalebe, ni Josuué. Ene a londekesa o kixikanu kua  Jihova kioso kiai mu londa o Ixi ia a Kanene Nzambi. Mu kubhita thembu, o kixikanu kiâ kia kolele dingi, mukonda akexile mu mona kiebhi Jihova kia kexile mu a kuatekesa. Ni kidi kioso, Josuué uambela akua Izalaiele: “Ima ioso ia mi dielelesele Jihova Nzambi ienu, ki kua sonoka kima.” Mu kusuluka, muéne uambe: “Kiki-phe Jihova mu kuatedienu uoma, muende ni ku mu bhikila ni muxima ua tenena ni kidi.” Muéne uambe dingi: “Maji eme-phe ni dibhata diami, tu bhikila Jihova.” (Josuué 23:14; 24:14, 15) Se tu dielela kua Jihova ni kumona kiebhi kiene mu tu kuatekesa, o kixikanu kietu kia-nda kola dingi.—Jisálamu 34:8.

12. Kiebhi ki tu tena kulondekesa se tuala ni kixikanu kia kolo?

¹² Kiebhi ki tu londekesa kuila, tuala ni kixikanu kia kolo? O dixibulu Tiiaku uambe: “Eme-phe mu ima i ngi bhanga, muene mu ngi ku idikiza o kuxikana kuami.” (Tiiaku 2:18) O ima i tu bhanga iene ilondekesa se tuala ni kixikanu kia kolo, mba kana. Tu di longe se kiki, ki bhita kiebhi.

13. Kiebhi ki tu tena kulondekesa o kixikanu kietu mu kuboka?

¹³ O ukexilu uambote ua kulondekesa o kixikanu kietu, o kuboka o njimbu iambote. Mukonda diahi? Mukonda kioso ki tu boka, tu londekesa o kixikanu kietu kia kuila, o dizubhilu dia zukama, ni kuila, ki dia-nda “ku kokoloka.” (Habakuke 2:3) Phala kuijiia se o kixikanu kietu kia kolo muene mba kana, tua tokala ku dibhuidisa: ‘O kuila ngene mu bhana valolo mu kikalakalu kia kuboka? O kuila nga mu bhanga ioso phala kuboka ku akuetu ia lungu ni Nzambi? O kuila ngene mu sota ndunge jengi phala kukalakala dingi mu sidivisu ia Jihova?’ (2 Kolindo 13:5) Tu londekese o kixikanu kia kolo, mu ku ‘fisala  ni dikanu,’ mba kuboka o njimbu iambote ia kubhuluka.—Tanga Loma 10:10.

14, 15. (a) Kiebhi ki tu tena kulondekesa o kixikanu mu kizuua ni kizuua? (b) Tanga musoso ulondekesa o kixikanu kia kidi.

¹⁴ Tu londekesa ué o kixikanu kietu kua Jihova, mu kukolokota kioso ki tu dibhana ni jitendasá ja mundu iú ua iibha. Mu ku dibhana ni mauhaxi, kuluuala, uadiama, mba ibhidi ia mukuá, tua tokala kudielela kuila, Jihova ni Jezú a-nda tu “bhandulula mu kumbi dia kubondalala.” (Jihebeleu 4:16) Etu tu londekesa o kixikanu kua Jihova, kioso ki tu bhinga o kikuatekesu kiê. Jezú uambe kuila, tu tena kubhinga kua Jihova, phala ku tu bhana “o kúdia kuetu kua kizuua ni kizuua ku tua bhindamena.” (Luka 11:3) O misoso ia Bibidia ilondekesa kuila, Jihova u tena ku tu bhana kima kioso-kioso ki tua bhindamena. Mu kifika, mu kithangana kia nzala ku ixi ia Izalaiele, Jihova ua bhanene kudia ni menha kua Elija. O Bibidia izuela kuila, ‘o ilombelombe hé i kala mu ku mu bhekela o mbolo ni xitu mu kimene, i mu bhekela ué o mbolo ni xitu mu ngoloxi. Anga u kala mu nua mu kangiji, kala kia mu ambela.’ (1 Jisobha 17:3-6) Etu tua dielela kuila, Jihova u tena ué ku tu bhana ima ioso i tua bhindamena.

¹⁵ Etu tuejiia ni kidi kioso kuila, se tu kumbidila o milongi ia Bibidia, tua-nda tena ku dikila kiambote o ibhindamu ia muiji uetu. Rebecca, phange dikaza ua tungu ku ixi ia tokala ku Asia, u jimbulula kiebhi  muéne ni muiji uê kia kumbidila o milongi i tu sanga mu divulu dia Matesu 6:33, ni Jisabhu 10:4. Muéne uambe kuila, o muadi uê ua mono kuila, o salu iê ieji zozesa o ukamba uâ ni Jihova. Mukonda dia kiki, muéne ua tundu ku salu ienioió. Maji ene exile ni kiuana kia an’a phala ku a dikila, mu kiki, ene a mateka kulamba kúdia phala kusumbisa. Mukonda dia kikalakalu kia kexile mu bhanga, ene exile ni kitadi kia sokele phala kudikila o ibhindamu ia muiji. Muéne uambe: “Tua mono kuma, Jihova ka tu bhana dikunda. Nuka tua bhiti kizuua sé kudia.” O kuila eie ua di bhanene kiá ni maka enhá, a kolokotesa o kixikanu kiê?

16. Ihi ia-nda bhita se tu dielela kua Nzambi?

¹⁶ Etu tu dielela ni kidi kioso kuila, se tu kaiela o itendelesu ia Jihova, muéne ua-nda tu kuatekesa. Phaulu ua tumbula o izuelu ia Habakuke, kioso kiambe: “Uaiuka u laiela mu kuxikana.” (Ngalásia 3:11; Habakuke 2:4) Mukonda dia kiki, tua tokala kukala ni kixikanu kia kolo kua Ió u tena ku tu bhana o kikuatekesu kia tokala. Phaulu u tu lembalesa kuila, Nzambi ió “ua soko-bhu kubhanga ioso i tua tena o kubhinga, ni ioso i tua tena o kubanza, n’a te-ku dingi kiatundu kiavulu, mu nguzu iê i tu kalakala moxi.” (Efezo 3:20) O jiselevende ja Jihova, a bhanga ioso phala kubhanga o vondadi ia Nzambi, maji ene ejiia ué kuila, ka tena kubhanga ioso mu nguzu iâ. Tu sakidila kiavulu Nzambi, mukonda dia ku tu kuatekesa, ni kubesoala o nguzu ioso i tu bhanga.

17. (a) Kiebhi Jezú kia tambuijila o jipoxolo? (b) Mukonda diahi tu tena ku dielela kuila, Jihova ua-nda tu tambuijila se tu mu bhinga phala ku tu bandekesa o kixikanu?

¹⁷ Mu ku di longa o milongi ioso íii, tu tena ku divua kala kia divuile o jipoxolo a bhingile kua Jezú: ‘Tu vudise dingi o kixikanu kietu.’ (Luka 17:5) Jezú ua tambuijila o jipoxolo jê mu ukexilu ua katunda, mu Pendekoxi ia muvu ua 33, kioso ene kia tambula o nzumbi ikola, anga a mateka kutendela kiambote o vondadi ia Nzambi. Kiki, kia suínisa o kixikanu kiâ. Mukonda dia kiki, ihi ia bhiti? Tundé mu kithangana kieniókio, ene a mateka kubhanga o kikalakalu kia dikota, kia kuboka o njimbu. (Kolose 1:23) O kuila tu tena kukingila kuila, Nzambi u tambuijila o kibhingilu kietu kia lungu ni ku tu bandekesa dingi o kixikanu? Jihova u tu kanena kuila, tu tena ku mu “bhinga, se kia xikina mu vondadi iê.”—1 Nzuá 5:14.

18. Kiebhi Jihova kia besoala o athu a suínisa o kixikanu kiâ?

¹⁸ Se tu dielela kua Jihova ni muxima uetu uoso, muéne ua-nda sanguluka kiavulu. Muéne ua-nda tambuijila o misambu ietu, se tu mu bhinga phala kubandekesa o kixikanu kietu, mu kiki, o kixikanu kietu kia-nda kola dingi. Mukonda dia kiki, tua-nda kala tu athu a “fuama mu Utuminu ua Nzambi.”—2 Tesalonika 1:3, 5.