Kikuatekesu Phala ku Batula o Maka a Moneka mu Ukaza

O Bibidia ki izuela kuila o ukaza kima kioso-kioso ngó. O poxolo Phaulu a mu tumina kua Nzambi ku soneka kuma o makaza eji dibhana ni “ibhidi izuua ioso.” (1 Kolindo 7:28, Today’s English Version) O makaza a tena ku bhanga ioso phala ku dibhana ni ibhidi i moneka mu ukaza uâ, ni ku bandekesa dingi o kisangusangu kiâ. Di longe o maukexilu a samanu alungu ni ku longolola, ki kale kua anumi, ni kua ahatu, ni kiebhi o ku belesela o itumu ia Bibidia, i tena ku kuatekesa.

1

KU LONGOLOLA:

“Eme ni kaza diami, ki tuala ni ukamba uambote.”

KITUMU KIA BIBIDIA:

“Phala mu tene ku sola o ima ioso ia beta-kota.”—FILIPE 1:10, NW.

O ukaza uê, kima kia beta-kota ku muenhu uê. Uene ua tokala ku kala ku pholo. Kienhiki, tonginina kiambote phala kuijiia se kuebhi kua mu tundila o maka enhá. Kana kuehela kuila o ima ku muenhu uê, i bhangesa kuila eie ni kaza diê, mu zubha o ukamba uenu. Mu kidi, o ikalakalu ni ima ia mukuá dingi, i tena ku bhangesa kuila eie u kuata ukamba ni athu engi. Maji eie u tena ku sosolola o ima ioso i uala na-iu—kála o itonokenu, ni makamba mê.

 Maji saí makaza, a sola ku bhanga ikalakalu ia mukuá, mba itonokenu iavulu phala ka kala ni kithangana kia ku kala ni makaz’â. O athu enhá kala ni “ukamba uambote” ni makaz’â. Ene a bhanga kiki, phala ku lenga o maka ala-nau. Se eie ni kaza diê muala ni maka enhá, enu mua tokala muijiia ihi i mua tokala o ku bhanga phala ku tena ku a batula. Se u kala ni kithangana kia ku kala ni kaza diê, enu mu kiiadi kienu mu tena ku kala mu makamba a kidi, ni ku “di bhanga xitu imoxi ngó” mu ukexilu uoso.—Dimatekenu 2:24.

Saí makaza ene mu kumbidila o kitumu kiki: Mandele * ni Tanji, dikaza a tungu mu ixi ia Australia, ala kiá mu dikuinhi dia mivu tundé kia kazala. Mandele uambe: “Ngejiia kuma o ku kalakala kiavulu, ni ku bhanga ima iavulu, i tena ku ta o ukaza mu iluezu. Kienhiki eme ni muhatu uami, tua bhange ioso phala tu kale ni kithangana kia ku kala kumoxi, phala ku di zuelesa mudietu.”

Dave, ni Jane, dikaza a tungu mu ixi ia Estados Unidos, ala kiá mu 22 a mivu tundé kia kazala, ene mu kala ni kithangana usuku uoso phala ku dikunda o mahezu ni ibanzelu iâ mudiâ. Jane uixi: “Kiki kithangana kia beta-kota, ki tuene mu kuehela kima kioso-kioso ki tu fidisa mu ola íii.”

2

KU LONGOLOLA:

“Eme ki ngi tena ku kala ni ima i nga mesena mu ukaza uami.”

KITUMU KIA BIBIDIA:

“Muthu ka sote ku bhanga ngó o vondadi iê muene, maji a sote ué ku bhanga o vondadi ia akuâ.”—1 KOLINDO 10:24, NW.

O muthu u thandanganha kiavulu ni ima ia mesena mu ukaza, ka tena ku zediua mu ukaza, né muene se o muthu iú ua kazala kiá mu mivu iavulu. O ukaza u kala kiambote se o kiiadi a kala ni ukexilu ua ku bhana, o ua ku tambula ndenge. Jezú uambe o kidi kiki: ‘O ku bhana kota mu ku zediuisa, o ku tambula ndenge.’—Ikalakalu 20:35.

Saí makaza ene mu kumbidila o kitumu kiki: Madiia ni Martin, dikaza a tungu mu ixi ia  Mexico, ala kiá mu 39 a mivu tundé kia kazala. Maji kua bhingi ku bhanga nguzu iavulu. Ene a di lembalala o maka akexile nau kiá. Madiia ua lembalala: “Kioso ki tua kexile mu zoka,” “eme nga zuela kima kia luualesa kiavulu Martin. Muéne ua kexile ni njinda iavulu. Eme nga mu ambela kuila, ki nga mesenene ku mu luualesa, eme ki nga kexile kiambote mu kithangana kieniókio. Maji muéne ka mesenene ku ngi ivuidila.” Martin uixi: “Tundé ki tua zoko, eme nga kexile mu banza kuila, ki tu tokala dingi ku kala kumoxi, ki nga tokalele dingi ku bhanga kima phala ku zediuisa o ukaza uami.”

Martin ua mesenene a mu xila. Madiia ua mesenene a mu tendela kiambote. Maji kiiadi kiá, ka tenene ku kala ni ima ia mesenene mu ukaza uâ.

Kiebhi ene kia tena ku batula o maka akexile nau? Martin uixi: “Eme nga bhange ioso phala ku tululuka,” “etu tua solo ku belesela o kitumu kia Bibidia, kia lungu ni ku di xila ni ku tululuka. Mu mivu iavulu, tua di longo kuma, kabasa maka u tu kala nau, tu tena ku a batula ngó se tu bhinga o kikuatekesu kia Nzambi mu musambu, ni ku belesela o milongi i tu sanga mu Bibidia.”—Izaia 48:17, 18; Efezo 4:31, 32.

3

KU LONGOLOLA:

“O kaza diami kene mu bhanga o ima ia tokala o ku bhanga.”

KITUMU KIA BIBIDIA:

“Kala muthu mudietu, ua kà di bhela konda iê kua Nzambi.”—LOMA 14:12.

Sé phata, o ukaza ki unangenena se muthu umoxi ngó u suína phala o ku zediuisa o ukaza. Maji o maka avula dingi, se kiiadi kiá a bhanga poko ia maka, ni ku di tatela mudiâ.

Sé u banza eie ngó mu ima ia tokala ku bhanga kaza diê, eie nuka ua-nda kala ni kisangusangu mu ukaza. Bhenge-bhenge se eie u kamba o ku kumbidila o ima i ua tokala o ku bhanga, mukonda dia iluezu ia kaza diê. Lua kamúkua, se eie u bhanga ioso phala ku kala munumi uambote, mba muhatu uambote, o ukaza uê nange ua-nda zediua. (1 Phetele 3:1-3) O kima kia beta-kota, eie ua-nda londekesa kuma ua xila o ukaza ua bhange Nzambi, o ima i u bhanga mu ukaza ia-nda mu sangulukisa kiavulu.—1 Phetele 2:19.

Saí makaza ene mu kumbidila o kitumu kiki: Kim, ni munumi’ê, dikaza a tungu mu ixi ia Korea, ala kiá mu 38 a mivu tundé kia kazala. Kim uambe: “Saí ithangana, muadi uami u dizangala ni eme, ka zuela dingi ni eme, maji eme ki ngejiia se mukonda diahi. Kiki ki ngi bhangesa ku banza kuila, o henda iê ko kuami, ia mu zoza. Saí ithangana ngi banza: ‘Mukonda diahi muéne ua mesena kuma eme ngi tendela o ukexilu uê, se muéne ka mu ngi tendela ué?’”

Kim u xinganeka mu maka ala nau, mu kima kia kambe o ku bhanga o kaza diê. Mu veji dia muéne ku sola o ukexilu uéngi. “Muéne u kolokota o ku luuala,” Kim uixi: “Eme nga di longo kuma, o kima kiambote ki nga tokala o ku bhanga, o ku dianga ku sota o ku tululuka. Mu ku suka-ku, etu tu tena ku tululuka, ni ku batula o maka mu ukexilu uambote.”—Tiiaku 3:18.

 4

KU LONGOLOLA:

“O muhatu uami kene mu belesela.”

KITUMU KIA BIBIDIA:

“O diiala dioso, ua mu kala ku pholo Kristu.”—1 KOLINDO 11:3.

O diiala u banza kuila o muhatu uê kene mu belesela muéne, ua tokala ku di tonginina kiambote se muéne ué ua mu belesela o Mutuameni uê, Jezú Kristu. O diiala u tena kulondekesa o ku belesela kuê, mu ku kaiela o phangu ia Jezú.

O poxolo Phaulu ua soneka: “Enu ué mu mala, zolenu ahatu enu kála Kristu kia zola o kilunga, iu ua di bhakula bhu kididi kiê.” (Efezo 5:25, NW) Jezú ka kexile mu “bhikisa” o maxibulu mê. (Marku 10:42-44) Muéne ua bhana ku akaiedi’ê o itendelesu ia tokalele, iu a a bazele kioso kia luezele. Maji muéne ka bhangele kiki ni undanda. Muéne uexile muthu uambote, ua kexile mu tendela o ukexilu ua akaiedi’ê. (Matesu 11:29, 30; Marku 6:30, 31; 14:37, 38) Muéne ua diangela ku bhanga o vondadi ia maxibulu mê, o iá muéne kana.—Matesu 20:25-28.

O munumi ua tokala u dibhudisa: ‘O kuila o ukexilu uami ua ku tumina, ulondekesa kuila nga mu kaiela o ijila ia athu mu kididi mu nga tungu, anga ia mu tunda mu milongi, ni mu phangu ia athu, a a tange mu Bibidia?’ Mu kifika, ihi i u banza se o muhatu ka xikina o ibanzelu ia muadi uê, mu ukexilu uambote n’a zuela ia lungu ni ibanzelu iê? Mu Bibidia, o muhatu ua Mbalahamu, Sala, ua bhana phangu iambote ia lungu ni muhatu u belesela. (1 Phetele 3:1, 6) Kienhiki muéne ua zuela o ibanzelu iê mu kithangana kia tokala, kioso Mbalahamu kia kambele ku mona o maka eji bhekela ku muiji uê.—Dimatekenu 16:5; 21:9-12.

Mu kidi, Mbalahamu ka bhangesa Sala ku kala ni uôma ua kuzuela. Muéne ka kexile mu tumina ni undanda. Kiene kimoxi ué, o munumi u belesela o milongi ia Bibidia, ka-nda bhangesa kuila o muhatu uê u kala ni uôma ua kuzuela, ni ku mu jijidika phala muéne ku mu belesela ngó. O diiala a mu xila kiambote kua muhatu’ê se muéne u tumina mu ukexilu uambote.

Saí makaza ene mu kumbidila o kitumu kiki: James, dikaza ua tungu mu ixi ia Inglaterra, uala kiá mu dinake dia mivu tundé kia kazala, uixi: “Nga mu bhanga ioso phala ki ngi bhange kima se ku dianga kuzuela ni muhatu uami. Eme ngi bhanga ioso phala ki ngi di banze ngó mu diami.” Mu veji dia kiki, eme ngene mu dianga ku ta ku pholo o ibhindamu ia muhatu uami.”

George, dikaza ua tungu mu ixi ia Estados Unido, uala kiá mu 59 dia mivu tundé kia kazala. Muéne uixi: “Eme ngene mu bhanga ioso phala kulondekesa kuila o muhatu uami ua sokela ni eme, kuma muéne kamba diami, muhatu ua unjimu.”—Jisabhu 31:10.

5

 KU LONGOLOLA:

“O muadi uami kene mu kala ku pholo dia kikalakalu kiê kia mu tokala.”

KITUMU KIA BIBIDIA:

“Muhatu ua njimu, u tunga o inzo iê; maji o kioua-phe kia muhatu, mueni’ê u i bula ni maku mê.”—JISABHU 14:1.

Se o muadi uê u kamba o ku kumbidila o kikalakalu kiê kia mu tokala ku muiji, eie uala ni ima itatu iu ua tokala o ku sola. (1) Eie ua tokala kuzuela izuua ioso o iluezu iê, mba (2) Ua tokala u kala bhu kididi kiê kia ku tumina o muiji, mba (3) Eie ua tokala ku mu ximana mu nguzu ioso ia bhanga phala ku tumina kiambote. Se u sola o pondo ia dianga, ni ia kaiiadi, eie ua-nda bula o inzo iê ni maku mê. Se u sola o pondo ia katatu, eie ua-nda tunga o dibhata diê, ni ku suínisa o ukaza uê.

Saí maiala a mesena dingi ku a xila, o ku a zola ndenge. Se ua mesena kuila o muadi uê u divua kuila a mu xila—ua tokala ku mu tangela kuila eie ua zolo o ukexilu uê ua ku tumina o muiji—se u bhanga kiki, nange muéne u suína dingi mu kikalakalu kiê, kia ku tumina kiambote o muiji. Mu kidi, saí ithangana ki ua-nda xikina o izuelu ia muadi uê. Kiiadi kienu mua tokala mu zuela ia lungu ni maka enhá. (Jisabhu 18:13) Maji o ukexilu uê ua kuzuela, ua-nda ku kuatekesa ku suínisa o ukaza uê, mba ku u zanga. (Jisabhu 21:9; 27:15) O ukexilu uê ua kuzuela kiambote, nange ua-nda kuatekesa kiavulu—o diiala ku kumbidila o kikalakalu kiê, kia ku tumina o muiji.

Saí makaza ene mu kumbidila o kitumu kiki: Michele, dikaza ua tungu mu ixi ia Estados Unidos, uala kiá mu 30 a mivu tundé kia kazala, uambe: “Mukonda dia mam’etu ku tu sasa, eme ni jiphange jami sé o kikuatekesu kia tat’etu, muéne ua kexile muhatu ua suína kiavulu. Eme nga kexile mu kaiela o phangu iê. Kienhiki, izuua ioso nga kexile mu kalakala, phala kulondekesa kuila nga mu suína uê u bheka uami. Mu kifika, eme nga di longo o ukexilu ua ku dianga kuzuela ni muadi uami, ande dia ku bhanga o ima i nga mesena.”

Rachel, ua tungu mu ixi ia Australia, muadi uê, Mark, ala kiá mu 21 a mivu tundé kia kazala, ua kaiela ué o ijila ia mbanza mua tungu. Muéne uambe: “Manhi’tu ka kexile mu belesela phai’tu. “Ene akexile ni kifua kia ku di longolola ni ku kamba ku di xila. Kioso ki nga kazala, eme nga kexile mu kaiela o phangu ia manhi’tu, mu ukaza uami. Maji mu ku bhita mivu, eme nga mateka o ku di longa o valolo ia ku belesela o milongi ia Bibidia ia lungu ni ku xila muadi uami. Mu kiki, Mark, ni eme, tua sanguluka mu ku kala ni ukaza ua zediua.”

6

KU LONGOLOLA:

“Eme ki nga uabhela o kifua kia iibha kia kaza diami.”

KITUMU KIA BIBIDIA:

“Kolokotenu ku di kuatekesa mudienu, mu di loloka, se bhuala muthu ua di kuata ni mukuá. Kala muthu a loloke mukuá kála kioso Nzambi kia mi loloka uenu, kiene ué ki mu bhanga jinga.”—KOLOSE 3:13, NW.

 Kioso ki mua kexile mu di tangesa, nange eie ua mono ngó o ídifua iambote ia muthu ueji kazala nê, ki ua kexile mu mona o ídifua iê ia iibha. U tena ku ki bhanga dingi kindala? Sé phata, o kaza diê u ku bhanga ima iavulu i ku bhangesa ku mu longolola. Kienhiki-phe dibhudise “ídifua iahi ia kaza diami i nga tokala ku banza—mu ídifua iambote, anga mu ídifua ia iibha?’

Jezú ua bhange kifika kiambote ki tu londekesa kueha ku banza mu iluezu i tu mona ku akuetu. Muéne uebhula: “Mukonda dia-hi u tala o kakisoko kala mu diesu dia mukuenu, maji ku xinganeké o kimuxi kia ku kala mu diesu dié e’muène?” (Matesu 7:3) O kakisoko ka tena ku kala kama kófele. Maji o kimuxi, dibaia dia dikota phala ku fikidila o ditala dia inzo. Ihi ia mesenene o kuzuela? “Dianga hanji kukatula o kimuxi mu diesu dié e’muène nda u mone kiua kukatula o kakisoso mu diesu dia mukuenu.”—Matesu 7:5.

Jezú ua bhange o kifika kiki, phala ku tendelesa kima. Muéne uambe: “Ki mu [fundise], enu uenu phala ka mi [fundise]. Mbata, o kubatula kuoso ku mu batuila na-ku akuenu, enu uenu kiene Nzambi kia kà mi batuila.” (Matesu 7:1, 2) Se ua mesene kuila Nzambi u loloka o ituxi iê—o kimuxi kia diesu diê—ua tokala ué ku loloka o iluezu ia kaza diê.—Matesu 6:14, 15.

Saí makaza ene mu kumbidila o kitumu kiki: Jenny, ua tungu mu ixi ia Inglaterra, muadi uê, Simon, ala kiá mu divua dia mivu tundé kia kazala, uixi: “Ithangana ioso ngi kala ni njinda ia muadi uami, mukonda muéne ka uabhela ku bhanga o ima mu kithangana kia tokala, u i bhanga mu kithangana kia mukuá. Kiki kia iibha, mukonda kioso ki tua kexile mu di tangesa, eme nga mu uabhele kiavulu mukonda muéne uexile muthu ua lengulukile kiavulu. Kindala eme ngejiia ué kuila ngene mu lueza kiavulu, kála o ukexilu ua ku mu langa kiavulu. Kienhiki, Simon, ni eme, tua mu bhanga ioso phala tu di loloke o iluezu ietu.”

Curt, ua kazala ni Michele, tua mu tange kiá, uambe: “Se u mona ngó ifua ia iibha ia kaza diê, o ifua iê ia-nda moneka kála kima kia dikota. Eme nga solo ku mona ngó o ídifua ia ngi bhangesa ku zola Michele, ni ku kazala nê.”

O ku Zediua Kuijila mu ku Belesela o Itumu Íii

O ifika i tua di longo ilondekesa kuila, mu ukaza muene mu moneka maka avulu, maji ka bhonzo ku a batula. Ihi i kuatekesa ku a batula kiambote? O ku zola Nzambi, ni ku kumbidila o milongi i tu sanga mu Maka mê, o Bibidia.

Alex, ni Itohan, a tungu mu ixi ia Nigeria, ala kiá mu 20 a mivu ndenge, tundé kia kazala, ene mu katula mbote mu ku belesela o itumu íii. Alex uambe: “Eme ngejiia kuila, kabasa maka mu ukaza, a tena ku a batula ngó se o dikaza di belesela o itumu ia Bibidia.” O muhatu uê, uambe: “Etu tuene mu mona o valolo ia kusamba kumoxi izuua ioso, ni ku belesela o itumu ia Bibidia, ni ku dizola mudietu. Kindala o maka metu a sosoloka kiá, kala dingi kala kia kexile mu dimatekenu kioso ki tua kazala.”

Ua mesena kuijiia dingi ia lungu ni kiebhi o milongi i tu sanga mu Bibidia i tena ku kuatekesa o muiji uê? Se ua mesena, bhinga ku Jimbangi ja Jihova, phala ku di longa ni eie o divulu, Mu Kidi Ihi i Longa o Bibidia? mu kibatulu 14. *

[Tanga mu luji]

[Foto ku mbandu 4]

O kuila tuene mu kala ni kithangana kia ku kala kumoxi?

[Foto ku mbandu 5]

O kuila ngene mu bhana dingi, o ku tambula ndenge?

[Foto ku mbandu 6]

O kuila ngene mu dianga ku batula o maka?

[Foto ku mbandu 7]

O kuila ngene mu zuela hanji ni muhatu uami ande dia ku bhanga kima?

[Kilombuelelu ku bandu 9]

O kuila ngene mu mona o ídifua iambote ia kaza diami?