Nzambi Ua Tu Idikisa O Henda Iê
Nzambi Ua Tu Idikisa O Henda Iê
‘O henda ia Nzambi, iene ia-nda tu bheka ku muenhu ua kalelaku.’—LOM. 5:21.
1, 2. Maujitu ahi a iiadi u tua-nda di longa, ni uebhi ua beta-kota mu valolo?
O DOTOLO David J. Williams ia Xikola ia katunda mu Melbourne, ku ixi ia Austrália, uambe: “Saí akua Loma, . . . akexile ni fuma, akexile mu bhana o undundu uâ phala ku u lundula kua ió akexile mu ku a bhingana, o ukexilu uâ, ua tokalele ku londekesa kuila a mu kumbidila o kitumu.” Kienhiki, a tokalele ku bhana valolo ku ujitu iú ua dikota. O ujitu u tunda ku diulu, ulombolola ku kala ni ukamba ni Nzambi, ni ku bhuluka, ni ku tambula o muenhu ua kalelaku.
2 Kiene kimoxi ué, kua kexile ima ia mukuá ia valolo kua Nzambi, phala ku bhana o ujitu iú. Mu kibatulu 5 kia divulu dia Loma, Phaulu ka londekesa o kitumu kiki, kála kima kia bhonzo. Mu veji dia kiki, muéne uambe: “Tu xikina Nzamb’iki mu kuxikana, tuala ku paze ni muène mukonda dia Ngana ietu, Jezú Kristu.” Ió a tambula o ujitu ua Nzambi, alondekesa kuila a mu zolo, kála Phaulu, ua soneka: “O henda ia Nzambi ia tu nokena mu mixima mu nguzu ia Nzumbi Ikôla a tu bhana-nê.”—Lom. 5:1, 5.
3. Ibhuidisu iahi i tua-nda di longa?
3 Mukonda diahi kua bhingile o ujitu iú? Kiebhi Nzambi kieji ku bhana o ujitu iú ua iuka ua sokela? Ihi ia tokala ku bhanga athu, phala ku tambula o ujitu iú? Tua-nda di longa o maka enhá, ni kuijiia kiebhi kiki kilondekesa o henda ia Nzambi.
O Henda ia Nzambi ki i Sokela ni Kituxi
4, 5. (a) Kiebhi Jihova kia londekesa o henda iê? (b) Kidi kiahi ki tu kuatekesa kuijiia kiambote o divulu dia Loma 5:12?
4 Mu henda iê, Jihova ua tumikisa Mon’ê umoxi-élele, phala ku bhulula o mundu. Phaulu ua londekesa o kidi kiki, kioso kiambe: “Nzambi-phe ua tu [idikisa] o henda ia muène ia tu kuatela; mukonda kioso ki tua kexile hanji tu akua ituxi, kiene kia tu fuila Kristu bhu kididi.” (Lom. 5:8) Xinganeka mu izuelu íii: “Kioso ki tua kexile hanji tu akua ituxi.” Oso a tokala kuijiia kiebhi ki tua kituka tu akua ituxi.
5 Phaulu ua jimbulula kiki o maka enhá: “Mukonda dia muthu umoxi, o kituxi kia bokona mu ngongo, o kufuá kuejila mu ituxi; kiene ué kia bhiti o kufuá ku thandu dia athu oso, kuma ene oso ituxi a i te.” (Lom. 5:12, NW) Etu tu tena kuijiia o maka enhá, mukonda Nzambi, u tu tangela kiebhi kiéza o athu ku muenhu. Jihova ua bhange athu kiiadi, Adá ni Eva. O Mubhangi uetu muthu ua iuka, kiene ué kiexile o athu a dianga, o jitata jetu. Nzambi ua a bhana itumu, iu ua a tendelesa kuila se a bhukumukine o itumu, eji fuá. (Dim. 2:17) Maji ene a solo ku bhukumukina o itumu ia Nzambi, a ditunu kuila muéne Mubhani ua Kitumu, o Ngana ua kalelaku—Mate. 32:4, 5.
6. (a) Mukonda diahi o an’â Adá ene mu fuá, né muéne ande dia Nzambi ku a bhana o Kitumu kia Mozé, mba lelu? (b) Ihi ia tena ku sokesa ni uhaxi kála ua hemofilia?
6 Adá ua vuala ngó ana kioso kia te o kituxi, kienhiki o an’ê a lundula o kituxi kiê. O an’ê ka bhukumukina o kitumu kia Nzambi, kála kia bhange Adá, mu kiki ene ka te o kituxi kia te Adá; Nzambi ka bhanene kitumu ku ana Adá. (Dim. 2:17) Né kiki, o muiji ua Adá, ua lundula o kituxi. Kienhiki, o kituxi ni kufuá kua kexile mu tumina mu izuua ia Izalaiele, kioso kia a bhana o kitumu kuala Nzambi, phala kulondekesa kuila exile akua ituxi. (Tanga Loma 5:13, 14.) O ibhidi ijila mu ku lundula o kituxi a tena ku ki sokesa ni uhaxi, mba kifua kia lundula, kála o anemia Mediterrânea, mba hemofilia. Nange eie ua tange kiá kuila Alexis, mona Czar Nicolau II a mu vuala ni Alexandra, akua Rússia ua lundula o uhaxi ua hemofilia. Maji ku muiji iú, saí ana ka kexile mu kata o uhaxi iú, maji a u lundula ué. Kiene kimoxi ué ni kituxi. O ibhidi ia bheka o kituxi kia Adá, ka tena ku ki lenga. Oso ene mu tala o hadi ia bheka o kituxi. O kituxi ki bheka kufuá. A ki lundula kua an’ê oso. O kuila o maka enhá, eji tena ku a zubha?
Ihi ia Bhange Nzambi mu Kaxi ka Jezú Kristu?
7, 8. Kiebhi o ukexilu ua athu kiiadi a iuka ua bheka maukexilu ka difu?
7 Mu henda iê, Jihova ua bhange kima phala ku bhulula o muiji ua Adá ku kituxi. Phaulu uambe kuila kieji bhita, mukonda muthu ua mukuá, muthu sé kituxi—o Adá ia kaiiadi. (1 Kol. 15:45) O ukexilu ua athu kiadi enhá, ua bheka maukexilu ka difu. Kiebhi ki kia tena o ku bhita? —Tanga Loma 5:15, 16.
8 Phaulu ua soneka: “Maji bhu kaxi ka kiiad’iki bha di tungula.” Adá ua kexile ni kikuma kia kituxi kiê, ua tambula o kaxtiku ka mu tokalele—o kufuá. Kienhiki, ki muéne ngó uafú. Tu tanga: “Athu avulu afu mukonda dia kituxi kia muthu umoxi.” O kaxtiku ka tambula Adá, kene ka tambula ué o an’ê oso, katé ni etu. Maji kima kiambote kuijiia kuila, o muthu ua iuka, Jezú, ueji bhanga kima phala ku tu bhulula. Kiebhi-phe? Tua-nda mona mu izuelu ia Phaulu iamba kuila, “athu oso mu ku a lungisa n’a tambule muenhu.”—Lom. 5:18.
9. Ihi ia kexile mu bhanga Nzambi, mu ku lungisa athu, kála kia ki tange mu divulu dia Loma 5:16, 18?
9 Ihi ilombolola mu Ngeleku, o izuelu “mu ku a lungisa,” ni ‘Nzambi u xikina mu ngó?’ Saí mulombolodi ua Bibidia, uambe: “Kiki, kifika ngó, kilombolola kima kimoxi. A zuela ia lungu ni ukexilu ua muthu u lungulula o ukexilu ué ua lungu ni Nzambi, ki kiene kimoxi o ku lungulula o muxima ua muthu . . . O kifika ki tanga kuila, Nzambi mufundixi u batula o maka, u lungisa ió uala ni kikuma, a mu bheka mu inzo ia kufundisa ia Nzambi, kienhiki muéne ka londekesa kathombo mu kuzuela. Maji Nzambi u loloka o mukua kikuma.”
10. Ihi ia bhange Jezú, phala Nzambi ku xikina o mundu?
10 Kiebhi kieji lungisa o “Mufundixi u fundisa ioso mu ngongo,” o muthu mukua ituxi? (Dim. 18:25) Nzambi mu henda iê, ua tumikisa o Mon’ê ua phande-kumbi mu ixi. Jezú ua bhange kiambote o vondadi ia Tat’ê, sumbala ni jitendasá, kasekelu, ni izukutisu. Muéne ua kolokota, katé ni kufuá ku taka. (Jihe. 2:10) Mu ku bhana o muenhu ué ua iuka mu sata, Jezú ua bhulula ni ku kula o an’a a Adá ku ituxi, ni mu kufuá.—Mat. 20:28; Lom. 5:6-8.
11. Ihi ia bhingi phala ku tu kula?
11 Phaulu ka tumbula o kizuelu “ua di bhele kíximbi kia ku tu kula etu ene oso.” (1 Tim. 2:6) O kuila kiene muene kia bhingile? Adá ua bheka o kituxi, ni kufuá ku muiji uê. Kienhiki, kua bhingile kuila Jezú o muthu ua iuka, u kala o mubhuludi ua nzungule dia athu a ituxi. * Kiki kia londekesa kuila o Jezú, ueji bhulula o ana oso a iuka, mu ku bhana o sata, ia bhingile phala ku bhulula o muiji ua Adá mu ituxi. Mu kiki, o Bibidia ki i zuela kuila o mbutu ia Jezú ieji bhanga mbandu mu kukula. O divulu dia Loma 5:15-19, dilondekesa kuila o kufuá kua “muthu umoxi ngó,” kua bhulula ni ku kula o mundu. Kienhiki o muenhu ua iuka ua Jezú, ua futu o muenhu ua iuka ua Adá. Tua tokala ku dielela ngó kua Jezú Kristu. Ua bhangesa kuila athu oso a tena ku sola o muenhu bhu kaxi ka Jezú, “kiene kimoxi, mu kima kia kulunga,” ua belesela ni ku kolokota katé mu kufuá kuê. (2 Kol. 5:14, 15; 1 Phe. 3:18) Kiebhi kiki kia tena ku bhita?
Ku Bhuluka Bhu Kaxi ka Kukula
12, 13. Mukonda diahi ió a xikina kua Nzambi a bhingi o henda iê?
12 Jihova Nzambi, ua xikana o sata ia kukula kua bhana Mon’ê. (Jihe. 9:24; 10:10, 12) Né kiki, o maxibulu a Jezú mu ixi, ni jipoxolo jê ja fiiele exile hanji akua ituxi. Sumbala ene akexile mu bhanga ioso phala ka te ituxi, maji ne kiki ene akexile mu ta muene ituxi. Mukonda diahi? Mukonda a lundula o kituxi. (Lom. 7:18-20) Maji mu kutena kuê, Nzambi ua bhange kima phala ku lungulula o ukexilu iú. Muéne ‘ua xikina o kíximbi kia ku tu kula,’ ni ku bhulula o athu.
13 Nzambi ka bhana ngó o kukula, ku jipoxolo, ni athu a mukuá mukonda ene a bhangele ima iambote. Maji mu veji dia kiki, Nzambi ua bhulula mu kukula o athu, mukonda dia henda iê. Muéne ua solo ku loloka o jipoxolo ni a mukuá, mu ku a fundisa, mu ku a bhulula ku kituxi kia lundula. Phaulu ua jimbulula kioso kiambe: “Ku kiadi kia Nzambi ngó ku mua bhulukila mu kuxikana. Mukonda o kubhuluka, kima ki enu mua ki mono mu nguzu ienu, maji a mi bhana-kiu kuala Nzambi.”—Efe. 2:8.
14, 15. Mabesá ahi a-nda tambula ió a a lungisa kua Nzambi, maji ihi ia tokala o ku bhanga?
14 Xinganeka o ujitu ua dikota ua Suke-ku, ku loloka o ituxi ia muthu, ia lundula ni ima ia iibha ia bhange! Ki tu tena ku tanga o ituxi ia te athu ande dia ku kituka Jikidistá, maji né kiki, mu kaxi ka kukula, Nzambi u tena ku loloka o ituxi íii. Phaulu ua soneka: “Maji bhu kaxi ni ubhulukilu, Nzambi u xikina mu ngó, athu oso a ta jinga o nzungule ia ituxi.” (Lom. 5:16) O jipoxolo, ni a mukuá, a tambula o ujitu mu ku a lungisa ni ku kolokota mu ku sidivila o Nzambi ia kidi, ni kixikanu. Mabesá ahi a-nda tambula ku hádia? “Ene oso a tambula o kiadi kiavulu kia bhana Nzambi ni kubhuluka kua bhana mu [ki ngó], à kala mù tumina ku muenhu ua ubhe mua muène [Jezú] Kristu.” Kienhiki phala ku tambula o ujitu iú, ki kua bhingile ngó ku bhanga ikalakalu iambote. O ujitu iú, o muenhu u tua-nda tambula.—Lom. 5:17; tanga Luka 22:28-30.
15 O athu a tambula o ujitu iú, a mu ku a lungisa, a kituka an’a Nzambi mu ukexilu ua nzumbi. Mukonda dia ene ku dilunga ni Kristu, ene ala ni kidielelu kia ku a fukununa phala kuia ku diulu, ni ku ‘tumina kála jisobha’ kumoxi ni Jezú Kristu.—Tanga Loma 8:15-17, 23.
O Henda ia Nzambi ia Londekesa ku Athu a Mukuá
16. O muthu ua kingila ku tambula o muenhu mu ixi, kiebhi kia tena ku tambula o ujitu?
16 Ki athu oso a kala ni kixikanu, a belesela Nzambi, kála Jikidistá ja kidi, a kingila ‘ku tumina kála jisobha’ ni Kristu ku diulu. Athu avulu a dielela mu Bibidia, kála kia bhangele o Jikidistá mu hama ia dianga. Ene a kingila ku kala ku muenhu ua kalelaku mu palaízu mu ixi. O kuila lelu, ene a tena ku tambula o ujitu ua Nzambi, mu ku a lungisa, ni ku kingila ku tambula o muenhu mu ixi? Mu izuelu ia soneka Phaulu, ku akua Loma, tu tena ku mona kuila kiki kidi!
17, 18. (a) Mukonda dia kixikanu kia Mbalahamu, kiebhi Nzambi kia mu mono? (b) Kiebhi Jihova kia tenene ku tumbula Mbalahamu kuila muthu ua iuka?
17 Phaulu ua tange o phangu ia dianga, ia lungu ni Mbalahamu ua kexile mu ixi ande dia Jihova ku bhana o kitumu kua Izalaiele, ni ande dia Kristu ku jikula o njila phala kuia ku diulu. (Jihe. 10:19, 20) Tu tanga: “Kuma Nzambi o kikutu kia bhele kua Mbalahamu ni luvalu luê, kuma hinu ene a lundula oxi, ki kiejila mukonda ualuka o Kitumu, maji kiejila mu kulunga kua kuxikana, o Nzambi iú ua mu xikina kuma ua lungu.” (Lom. 4:13; Tiia. 2:23, 24) Kienhiki, Nzambi ua tumbula Mbalahamu o selevende iê ia fiiele, kuila muthu ua iuka.—Tanga Loma 4:20-22.
18 Kiki, ki kilombolola kuila mu mivu ioso ia sidivila Jihova, Mbalahamu katele kituxi. Muéne kexile muthu ua iuka mu ukexilu iú. (Lom. 3:10, 23) Mu kiki, mu unjimu uê, Jihova ua bhana valolo ku kixikanu kia Mbalahamu, ni ima iambote ia kexile mu bhanga mukonda dia kixikanu kiê. Mbalahamu ua kexile ni kixikanu ku “mbutu” ieji tunda ku muiji uê. O Mbutu íii, o Mexiia, mba Kristu. (Dim. 15:6; 22:15-18) Mu kaxi ka ‘Jezú Kristu u tena ku bhulula,’ o kufundisa kua Nzambi, ku bheka o muloloki ua ituxi kála kia bhiti m’ukulu. Mukonda dia kiki, Mbalahamu ni athu a mukuá a kingila o difukunukinu.—Tanga Loma 3:24, 25; Jisá. 32:1, 2.
Kala ni Ukexilu ua Iuka Lelu
19. Mukonda diahi o henda ia londekesa Nzambi kua Mbalahamu, iene mu sangulukisa kiavulu o Jikidistá lelu?
19 Mu kuijiia kuila Nzambi mu henda iê, ua tumbula Mbalahamu kála muthu ua iuka, kia tokala ku sangulukisa o Jikidistá lelu. Maji Jihova ka mu ixana muthu ua iuka mu ukexilu ua kuia ‘mu tumina ni Kristu’ ku diulu. O muxinda ua kibuka kiki, ‘a exana phala ku kala mundu uê,’ a a xikina kála “an’a Nzambi.” (Lom. 1:7; 8:14, 17, 33) Maji, Mbalahamu ua kitukile ‘kamba dia Jihova,’—ande dia bhana o sata. (Tiia. 2:23; Iza. 41:8) Ihi i tu zuela ia lungu ni Jikidistá ja kidi, a kingila ku kala mu Palaízu mu ixi?
20. Ihi ia kingila Nzambi kua ió, ene mu mona lelu, kuila athu a iuka, kála Mbalahamu?
20 Enhá kene mu tambula, “o kiadi kiavulu kia bhana Nzambi ni kubhuluka kua bhana mu kingoho,” a kingila o muenhu ku diulu “à kala mù tumina ku muenhu ua ubhe mua muène [Jezú] Kristu.” (Lom. 3:24; 5:15, 17) Ene ué ala ni kixikanu kua Nzambi, ni mu ima ia bhanga, alondekesa ué o kixikanu kiâ mu ku bhanga o ima iambote. Kála o ku “boka o Njimbu ia Utuminu ua Nzambi, [ni ku longa] . . . ima ioso ia tokala kua Ngana Jezú Kristu.” (Ika. 28:31) Kienhiki, Jihova u tena ku a mona kála athu a iuka, kála kia bhange ni Mbalahamu. O ujitu ua tambula—o ukamba ni Nzambi—ki kiene kimoxi, “ni kubhuluka kua bhana mu kingoho,” kia tambula ió a-ndaia ku diulu. Kienhiki, o ujitu iú a u tambula ni kisakidilu kioso.
21. Mbote iahi ijila mu henda ia Jihova, ni ku iuka kuê?
21 Se ua kingila ku tambula o muenhu ua kalelaku mu ixi, eie uejiia kuila o ujitu iú, ka ku bhana nau mukonda eie ua u mesena, mba mu kaxi ka jinguvulu ja athu. Mu veji dia kiki, xinganeka mu vondadi ia Muteni-a-Ioso. Jihova kene mu kamba ku bhanga ioso ia mesena phala ku kumbidila o ikanenu iê. O ima ia bhanga, ia lungu ni ku iuka kua kidi. Iene ilondekesa o henda ia dikota ia Nzambi. Kála kiambe Phaulu: “Nzambi-phe ua tu [idikisa] o henda ia muène ia tu kuatela; mukonda kioso ki tua kexile hanji tu akua ituxi, kiene kia tu fuila Kristu bhu kididi.”—Lom. 5:8.
[Tanga mu luji]
^ kax. 11 Mu kifika, o maka alungu ni mbutu, tu a sanga mu divulu, Estudo Perspicaz das Escrituras, Volume 3, mu mbandu ja 424, mu phutu.
Eie ua Lembalala?
• Ihi ia lundula o ana Adá, ni ibhidi iahi ia bheka?
• Kiebhi kia futu o kukula, ni kiebhi kia ki xikina?
• O ujitu ua ku lungisa, ua ku bhana kidielelu kiahi?
[Ibhuidisu ia ku dilonga]
[Kilombuelelu ku bandu 21]
O muthu ua iuka Adá, ua te kituxi. O muthu ua iuka Jezú, ua “tu kula etu ene oso”
[Kilombuelelu ku bandu 23]
Njimbu iambote—iahi ia lungu ni Jezú, i tu bhangesa ku kala tu athu a iuka!
