‘Suína ku Kale ni Uôma’
‘Suína ku Kale ni Uôma’
“Kala ngó u kindanda, u kole muxima kiavulu . . . kuma Jihova, Nzambi ié, uala-nê kumoxi.”—JOSU. 1:7-9.
KIEBHI KI UEJI TAMBUIJILA?
Kiebhi Noué ni Enoko, kia londekesa o ku suína?
Kiebhi ki tuejiia kuila o ahatu m’ukulu, a bhana phangu ia kixikanu ni ku suína?
Phangu ia munzangala uebhi ia ku uabhela kiavulu?
1, 2. (a) Ihi ia bhingi phala ku di tunda kiambote ku muenhu? (b) Ihi i tua-nda di longa?
O KU SUÍNA, ki kiene kimoxi ni ku kala ni uôma. Nange tu fika kuila o muthu ua suína, kindanda, ua kambe uôma. Maji saí ithangana ku bhinga ku suína phala ku di tunda kiambote ku muenhu uetu.
2 Saí athu a a tange mu Bibidia, a suínine né muene mu ithangana ia bhonzo. A mukuá alondekesa o ku suína kuâ mu ku kuatekesa o jiselevende ja Jihova. Ihi i tu longa o phangu ia ku suína ia jiselevende ja Jihova m’ukulu? Kiebhi ki tu tena ku suína?
A BHANA UMBANGI NI KU SUÍNA KUOSO KU MUNDU UA IBHILE KINENE
3. Ihi ia kanene Enoko, ieji bhita ni athu aiibha?
3 Kua bhingile ku suína phala ku bokela athu aiibha ia lungu ni Jihova, ande dia Dilúvio dia bhiti mu izuua ia Noué. Né kiki, “Enoko, muène sambuadi mu ku di vuala tundé ku Adá,” ua a tange en’iâ ni ku suína kuoso mu upolofeta tundé m’ukulu munhá, uixi: “Talesenu! [Jihova] hádia uiza ni makuinhi a jimidi ja akunji’ê a ngene, mu kufundisa athu oso. Uà keza mu [ku fundisa] athu oso abhumu, a kambe kuxikana, mukonda dia imbamba iâ ioso ia kubhukumuka ia bhumina kubhanga, ni malebhu moso akua ituxi abhumu enhâ a xonguena jinga na-u Nzambi!” (Jud. 14, 15) Enoko ua kexile mu zuela m’ukulu mukonda uejidile kuila o kikanenu kiki kieji di kumbidila ku hádia. O athu aiibha a a buika oso ku dilúvio dia bhiti ku mundu uoso.
4. Mu ithangana iebhi ‘iende Noué ni Nzambi?’
4 O Dilúvio dia bhiti ku muvu ua 2370 A.K.K, kua bhitile kiá 650 a mivu tundé kia ki kanene Enoko mu ukunji uê. Mu kusuka-ku, kioso kia vuala Noué, muéne ni muiji uê, a tungu o álaka. O ji-anju ja iibha ja kitukile mu mikutu ia athu, eza mu sakana ni ahatu mu ixi, ia vuala-nâ an’a Mazonda. O athu a kituka isuéia o kuiibha kua dimendala mu ngongo. (Dim. 6:1-5, 9, 11) Sumbala ni ukexilu iú, ‘Noué uende ni Nzambi,’ ni ku suína kuoso, ua bhana umbangi kala “mujimbuidi ua maka maiuka.” (Tanga 2 Phetele 2:4, 5.) Tua bhingi tu suína ué mu izuua íii ia sukidila-ku.
ENE ALONDEKESELE KIXIKANU NI KU SUÍNA
5. Kiebhi kia londekesa Mozé o kixikanu kiê ni ku suína?
5 Mozé phangu ia dikota ia kixikanu, ni ku suína. (Jihe. 11:24-27) Tundé ku muvu ua 1513-1473 A.K.K., Nzambi ua mu tele ku pholo mu ku katula akua Izalaiele mu Ijitu, phala ku a ambata mu kikangalakata. Mozé ua fikile kuila keji tena ku bhanga o kikalakalu kiki, maji ua ki xikana. (Mak. 6:12) Muéne ni phang’ê Alá, ai veji javulu kua Falaó, sobha ia iibha ia Ijitu, ni ku suína kuoso a mu tangela o Dikuinhi dia Mabhebhu dieji bheka Jihova ku jinzambi ja Ijitu, phala ku bhulula o mundu Uê. (Mak., ibatulu 7-12) Mozé ua londekesele kixikanu, ni ku suína, mukonda akexile ku mu kuatekesa kua Nzambi u kumbidila o ikanenu iê, kála kiene mu tu kuatekesa ué lelu.—Mate. 33:27.
6. Se a tu tokuesa ku jinguvulu, kiebhi ki tua-nda tena ku bhana umbangi ni ku suína kuoso?
6 Kua bhingi tu suína kála Mozé, mukonda Jezú uambe: “Katé muene ni bhu pholo ia jinguvulu ni enexi a kà mi bheka-bhu mukonda diami, mu ku a bhana o umbangi ua Njimbu Iambote, ni ene ni akua jixi jengi. Enu-phe, kuila a mi kutu, ki mu kale ni hele kioso ki mu zuela, mba hundu ioso i mu kuata, mukonda bhu kumbi dienhódio, Nzambi kiene kia kà mi bhana kioso ki mu zuela. Mbata ki enu dingi mu zuela, maji o Nzumbi ia Tat’enu, muène u zuelela moxi dienu.” (Mat. 10:18-20) Se a tu tokuesa ku jinguvulu, o nzumbi ia Jihova, i tena ku tu kuatekesa ku bhana umbangi ni ujitu uoso, ni ku suína, ni kixikanu.—Tanga Luka 12:11, 12.
7. Ihi ia kuatekesa Josuué, ku suína ni ku di tunda kiambote?
7 O ku di longa izuua ioso o Itumu ia Nzambi, ia kuatekesa ku kolesa o kixikanu, ni ku suínisa Josuué, ua bhinganene bhu kididi kia Mozé. Ku muvu ua 1473 A.K.K, akua Izalaiele a zukamene mu Ixi ia a Kanene. Nzambi uambe: “Kala ngó u kindanda, u kole muxima kiavulu,” se ua belesele o Kitumu kia Nzambi, Josuué ueji di tunda kiambote. Ua mu tendelesa dingi: “Kana ku kala ni uôma, kana ku kala ni kikènha; Kuma Jihova, Nzambi ié, uala-nê kumoxi kuoso-kuoso ku [uia].” (Josu. 1:7-9) O izuelu íii ia kuatekesele kiavulu Josuué! Nzambi ua kexile ni Josuué, ua mu kuatekesa ku tambula o Ixi ia a Kanene, mu mivu isamanu—ku muvu ua 1467 A.K.K.
AHATU SÉ UÔMA ALONDEKESELE KU SUÍNA
8. Phangu iahi ia kixikanu, ni ku suína ia xisa Lahaba?
8 Mu mivu iavulu, ahatu avulu alondekesa kuila abhezi a suína a Jihova. Mu kifika o kidia-nzunga Lahaba mukua Jedikó ua xikina Nzambi, ni ku suína, ua sueka alondi aiadi a tumikisa Josuué, phala ka a bhange kia iibha ku sobha ia mbanza ienioió. Lahaba ni muiji uê, a a lange kioso kiejile akua Izalaiele mu buika o mbanza ia Jedikó. Lahaba ua xisa o ufunu uê ua kidia-nzunga, iu ua kituka mubhezi ua Jihova, muéne ua kituka kuku a Mexiia. (Josu. 2:1-6; 6:22, 23; Mat. 1:1, 5) Muéne a mu besoala mukonda dia kixikanu kiê, ni ku suína!
9. Kiebhi Debola, Balake ni Jaiele, kia londekesa o ku suína?
9 Kioso kiafu Josuué ku muvu ua 1450 A.K.K., o afundixi ene akexile mu batula o maka mu Izalaiele. O Sobha Jabine ia Kanana, ua bhangesa akua Izalaiele ku kala abhika mu 20 a mivu, Nzambi ua tumina Debola ku tangela o mufundixi Balake ku kala ku pholo ia ita. Balake uongeka 10.000 a masoladi ku Mulundu ua Tabola, iu ua kexile polondo phala ku bhânga ni kabhitangu ka Jabine, muéne ua bokona mu honga ia Kixone ni masoladi mê, ni 900 a makalu a ita. Kioso kiai akua Izalaiele mu honga, Nzambi uezalesa o honga mu kithangana kieniókio, o makalu a masoladi akua Kanana ka tena ku tunda. O masoladi a Balake a bhuluka, “kifuxi kioso kia Xixela anga a ki leleka ku mazu a xibhata.” O Xixela ua lengela mu balaka ia Jaiele, maji muéne a mu jibha kioso kia kexile ku kilu. Phala ku kumbidila o kizuelu kia kanena Debola kua Balake, kioso kiambe, “kua-ndu katula-ku kijingu,” ene a nganhala o ita mukonda dia ku suína kua Jaiele. Mukonda dia ku suína kua Debola, Balake, ni Jaiele, o ixi ia Izalaiele, “anga i tululuka mu makuinhi auana a mivu.” (Afun. 4:1-9, 14-22; 5:20, 21, 31) Mala avulu ni ahatu, ene mu londekesa ué o kixikanu kiâ ni ku suína.
O IZUELU IETU I TENA KU SUÍNISA
10. Mukonda diahi o izuelu ietu i tena ku suínisa?
10 O ima i tu zuela i tena ku suínisa o mubhezi ua Jihova. Ku hama ia 11 A.K.K., o Sobha Davidi uambela mon’ê Solomá: “Suína, u kale u kindanda, u kalakale. Ku kale ni hèle, mba u kala ni uôma. Mukonda o Jihova Nzambi, Nzambi iami, uanda ku kala ni eie. Muène kanda ku ku xisa ubheka, mba ku ehelela, katé ki u zubha o kikalakalu kioso kia inzo ia Jihova.” (1 Mal. 28:20) Solomá ua suínine, iu ua tungu tembulu ia iuka phala Jihova mu Jeluzaleme.
11. Ihi ia bhiti kioso kia zuela o kilumba mukua Izalaiele ni ngana iê?
11 Ku hama ia dikuinhi A.K.K., o izuelu ia kilumba mukua Izalaiele, ia suínisa o mukua dibhute. O kilumba kiki a mu ambatele ku masoladi, iu ua kituka mubhika ua sobha ia Asídia Naamane, uexile mukua dibhute. Mu kuijiia o madiuanu a bhangele Jihova bhu kaxi ka Elija, muéne uambela muhatu ua Naamane, kuila se o muadi uê uia mu Izalaiele, ku polofeta ia Nzambi, ueji mu saka. Naamane ua xikina iu uai mu Izalaiele, ia a mu sake, iu ua kituka mubhezi ua Jihova. (2 Jis. 5:1-3, 10-17) Se eie u munzangala, ua zolo Nzambi, kala kia bhangele o kilumba, o phangu iê i tena ku ku suínisa ku bhana umbangi ku jimesene jê mu xikola, ku jikoleka jê ni ku athu a mukuá.
12. Kiebhi o izuelu ia Sobha Ezekiia ia suínisa o mundu uê?
12 O izuelu iambote mu ithangana ia jiphaxi, i tena ku suínisa muthu. Kioso akua Asídia kiendele mu bhânga ni akua Jeluzaleme ku hama ia dinake A.K.K., o Sobha Zedekiia uambela o mundu uê: “Kuatenu nguzu, mu bhume, kana ku kala ni uoma mba mu teketa mukonda dia sobha ia Asídia mba mukonda dia kifuxi kioso kiala na-kiu muene, mukonda sai umoxi uala ni etu ua beta kota, o uala ni muene ndenge. Muene uala ni lukuaku lua xitu, etu-phe tuala-nê, muene Jihova, Nzambi ietu, phala o ku tu kuatekesa ni ku tu luila o ita ietu.” Kiebhi o izuelu íii ia suínisa o mundu? “O mundu anga a tululuka kievu maka ma Ezekiia, sobha ia Juda.” (2 Mal. 32:7, 8) Kiene kimoxi ué, o izuelu i tena ku tu suínisa, ni ku suínisa ué Jikidistá ja mukua kioso kia tu zukutisa
13. Phangu iebhi ia ku suína ia tu longo o selevende ia Sobha Akabe, Obadiia?
13 Saí ithangana o ku suína, tu kulondekesa mu izuelu ietu. Ku hama ia dinake A.K.K., o selevende ia Sobha Akabe, Obadiia, ni ku suína kuoso ua sueka ham’a jipolofeta ja Jihova, “u a bhaka mu dibànda” phala ka a jibhe ku Sobha ia iibha Jezabele. (1 Jis. 18:4) Kála Obadiia ua belesele Nzambi, jiselevende ja fiiele ja Jihova lelu, ene mu sueka ué o jiphange jâ phala ka a kuate ku akua ku zukutisa.
ESTERE—SOBHA IA SUÍNA
14, 15. Kiebhi kia londekesa Sobha Estere o kixikanu, ni ku suína, ni ihi ia bhiti?
14 O Sobha Estere, ua londekesa kixikanu ni ku suína, kioso o diiala dia iibha Hamane ua mesenene ku jibha o Jijudé mu Pélesa, o mienhu iâ ia kexile mu iluezu ku kuinhi dia hama A.K.K. O Jijudé a te jingololo, a jejuuala, ia sambe ni muxima uoso! (Este. 4:1-3) O Sobha Estere ua thandanganhele kiavulu. O mon’a sekulu’ê, Moledekai ua mu tumikisa mukanda mua kexile o kitumu kia ku jibha o Jijudé, iu ua mu bhingi kuila, muéne ua tokalele kuia kua sobha ku bhingila o jiphange jê. Maji muthu uoso-uoso ueji zukama kua sobha sé ku mu ixana a tokalele ku mu jibha.—Este. 4:4-11.
15 Kienhiki Moledekai uambela Estere: ‘Se eie u di xibh’é o Jijudé a-nda ku a bhulula ku muthu uéngi. Maji nanhi ua k’ijiia se kene kia ku tela ku ungana, phala u kudile o mundu bhu thembu íii?’ Estere ua tumina mon’a sekulu’ê, Moledekai ku bhongolola o mundu ku mbonge ia Susana, ni ku jejuuala mukonda dia muéne. Estere uambe: “Eme uami ni ilumba iami tu jejuuala kiene kimoxi, o ki ki bhua ku ki bhanga kiene kiua ki ngi bhixila kua muenexi, sumbala kima a ki kidika ku ki bhanga; ‘se ki bhinga ngi fuá, kuabhu ngi fuá-phe kiá.’” (Este. 4:12-17) Estere ua suínine, o divulu diambata o dijina diê, di londekesa kuila Nzambi ua bhulula o mundu uê. Mu izuua ietu o Jikidistá a a undu, ni jiphange jâ, alondekesa uá o ku suína mu jiphaxi, o ‘mukua kuívua o misambu,’ u a kuatekesa.—Tanga Jisálamu 65:2; 118:6.
‘SUÍNENU’
16. Phangu iahi i tena ku katula o minzangala kua Jezú?
16 Saí kizuua ku hama ia dianga, K.K., kioso Jezú kia kexile ni 12 dia mivu a mu sange mu Tembulu, “ua xikama mu’axaxe ka jimesene ja Jijudé, uala ku évua ni ku a ebhudisa. Oso bhenhobo, ala ku muívua, a mù diuana kiavulu o kuijiia kuê, ni ki ala mu kumbulula adiakimi.” (Luk. 2:41-50) Sumbala uexile hanji munzangala, muéne ka kexile ni uôma ua ku ebhudisa o jimesene mu Tembulu. O ku kaiela o phangu ia Jezú, ia-nda kuatekesa o minzangala mu kilunga ku ‘kala polondo, phala ku vutuila muthu uoso ua ebhula o kidielelu kiâ.’—1 Phe. 3:15.
17. Mukonda diahi Jezú ua ‘suínisa’ o maxibulu mê ku suína, ni mukonda diahi etu tua tokala ué ku ‘suína?’
17 Jezú ua suínisa akuâ ku ‘suína.’ (Mat. 9:2, 22) Muéne uambela o maxibulu mê: “Talesenu-phe, kumbi dia bhixila kiá, dia kuila enu oso mu muangana, kala muthu ku mbandu iê, eme hé mu ngi xa ubheka uami. Maji ki ngala-phe ubheka, mukonda Tata uala ni eme. Nga mi ambela im’iíi phala enu ki mu kala kumoxi ni eme, mu kale ni kutululuka ko kuami. Mu ngong’umu mua-ndu kala ni hadi, maji kuatenu-phe muanu, ngongo iíi eme nga i tolola kiá.” (Nzu. 16:32, 33) Kála o akaiedi a Jezú, etu a tu zembe ué ku mundu iú, maji ki tu tokala ku kaiela o ukexilu ua mundu. O ku xinganeka o ku suína kua mon’â Nzambi ku tu suínisa, ni ku kolokota o ku zela ku mundu iú. Muéne ua tolola o mundu, etu tu tena ué ku u tolola.—Nzu. 17:16; Tiia. 1:27.
“KOLOKOTA!”
18, 19. Phangu iahi ia bhana poxolo Phaulu ia kixikanu, ni ku suína?
18 O poxolo Phaulu ua bhiti mu ibhidi iavulu. Saí kizuua o Jijudé mu Jeluzaleme a mu bhana kibetu, ki ku kexile disoladi mukua Loma phala ku mu bhandulula. Usuku uen’ió “ngana anga u tulukila Phaulu, hé a mu imanena bhu mbandu iê, uixi: ‘Kolokota! Kala ki ua bhana o umbangi uami mumu mu Jeluzaleme, kiene ué ki ua ka bhana umbangi mu Loma.’” (Ika. 23:11) Phaulu ua bhange kala kia mu tumina.
19 Phaulu ni ku suína kuoso, ua bazela o ‘jipoxolo ja di zangeleke’ a mesenene ku nganala o kilunga kia Kolindo. (2 Kol. 11:5; 12:11) Maji Phaulu ka sokele ni ene, mukonda muéne ua londekesa o ima ia bhitile na-iu mu ukunji uê, kála, o ku mu ta mu kaleia, o kibetu kia tambula, o iluezu mu njila mua bhitile, nzala, dinhota, ku fula kilu, henda iê ku jiphange, ni ibhidi ia mukuá. (Tanga 2 Kolindo 11:23-28.) O musoso iú ua londekesa o ku suína, u tu longa kuila Nzambi u bhana nguzu ku athu!
20, 21. (a) Bhana phangu ilondekesa kuila tua tokala ku kolokota. (b) Mu ithangana iahi i tua tokala ku kolokota, ni ihi i tua tokala o kuijiia?
20 O Jikidistá joso kanda bhita mu kizukutisu. Maji oso a tokala ku suína phala ku dibhana ni ibhidi ku muenhu uâ. Mu kifika: Munzangala mu ixi ia Brazil, ua tokelele ku kibuka kia jibandi. Kioso kia mateka ku di longa o Bibidia, ua mono kuila ua tokalele kueha o ubandi, maji uoso u tunda mu kibuka, a tokelele ku mu jibha. Muéne ua sambe, iu ua londekesa kibatulu kia Bibidia ku xefe ia kibuka, phala kulondekesa se mukonda diahi muéne ua mesenene ku tunda mu kibuka. O munzangala ka mu bhange kia iibha, ua xisa o kibuka, iu ua kituka muboki ua Utuminu.
21 Ku bhinga ku suína phala ku boka o njimbu iambote. O minzangala Jikidistá iala bhu xikola a tokala a suína, phala ku belesela o itumu ia Nzambi mu xikola. Ku bhinga ku suína phala ku bhinga ku xefe phala kuia izuua itatu mu kiônge kia dikota. Saí dingi ima ia mukuá i bhinga o ku suína. Maji mukonda dia ibhidi i tuene mu bhita na-iu, Jihova ua-nda kuívua o misambu ietu i tu bhanga ni kixikanu.’ (Tiia. 5:15) Muéne u tena ku tu bhana o nzumbi iê ikôla phala tu ‘suíne ni tu kolokote.’
[Ibhuidisu ia ku dilonga]
[Foto ku mbandu 19]
Enoko ua bokela o mundu ua iibha ni ku suína kuoso?
[Foto ku mbandu 20]
Jaiele ua suínine
