Kibhuidisu 1: Mukonda Diahi Ngala ku Muenhu?

ROSALIND, ua kudila mu ixi ia Inglaterra, ua mesenene kiavulu ku di longa. Muéne ua mesenene ué ku kuatekesa o athu. Kioso kia zubha ku di longa bhu xikola, muéne ua sange salu iambote ia ku kuatekesa o athu kalá ni jinzo, muéne ua kuatekesa ué o inema ni ió ka tena ku di longa kima bhu xikola. Sumbala ua kexile ni salu iambote ni jimbongo javulu, muéne uambe: “Ku mivu iavulu eme nga dibhula, ‘Mukonda diahi tuala bhabha?’ ni ‘Mukonda diahi tuala ku muenhu’?”

Mukonda diahi ki kima kia iibha kuibhula? O athu ka difuangana ni iama ka tena ku o banza. Etu tu tena ku katula mbote mu ima ia bhiti mu ukulu, tu tena ku sola o ima i tua-nda bhanga ku hádia ni ku katula mbote ku muenhu.

Ihi i zuela o athu? Athu avulu a banza kuila o kima kia beta-kota ku muenhu, o ku kala ni jimbongo mba fuma phala n’a zediue ku muenhu.

Ihi ilombolola o kibanzelu kiki? Etu tu tena ku sola o ima i tu mona kala ia beta-kota ku muenhu. O ima i tua mesena ia beta-kota, o ia mesena Nzambi, ndenge.

Ihi i longa o Bibidia? O sobha Solomá ua kexile ni jimbongo javulu anga u sanguluka, maji muéne ua mono kuila o ku zediua ki kuijila mu jimbongo. Muéne ua mono se ihi i beta-kota mu bheka o kisangusangu kia kidi, kioso kiambe: ‘Ku ioso i uene mu kuívua, o dizubhilu diê dienhidi: Xila Nzambi, u aluke o ijila iê, mukonda kiene kia fuama athu oso ku ki bhanga.’ (Ndongixi 12:13) Ihi ilombolola phala etu, kualuka o itumu ia Nzambi?

 Nzambi ua mesena kuila tu sanguluka ku muenhu. Solomá ua soneka: ‘Manhi ki kima kiambote muene, o muthu u dia, u nua, o muenhu uê ni u kembe mu mbote ia kikalakalu kiê? O kienhiki ué nga ki mono kuila ki tunda ku lukuaku lua Nzambi.’—Ndongixi 2:24.

Nzambi ua mesena ué kuila tu zola o muiji uetu ni ku u dikila. Tala o itendelesu ia bhana kala muthu ku muiji.

‘Uoso u zola muhatu’ê, muéne ua di zolo mudiê.’—Efezo 5:28.

‘O muhatu ua tokala ku xila munumi’ê.’—Efezo 5:33.

‘Enu ana, muala mua Ngana, belesele-nu o jitata jenu.’—Efezo 6:1.

Se tu belesela o itendelesu ia Bibidia tu tena ku sanguluka ni ku kala ni ku zediua kua kidi. Mu kiki, o kima kia beta-kota ki tua tokala ku bhanga, o ku di longa ioso ia lungu ni Mubhangi uetu ni ku zukama kua muéne kála Kamba dietu. Mu kidi o Bibidia i tu suínisa, “Zukamenu kua Nzambi.” O Bibidia i bhana ué o kikanenu kiki: “Muène u mi zukama enu.” (Tiiaku 4:8) Se u kaiela o kitendelesu kiki, ua-nda zediua dingi ku muenhu.

[Foto ku mbandu 5]

Phala kuijiia dingi kiebhi ki u tena ku bhanga o vondadi ia Nzambi, tanga o divulu Mu Kidi Ihi i Longa o Bibidia?, mu kibatulu 12. Tu di sanga ué mu kijimbuete kia www.dan124.com

[Kaxa ku mbandu 5]

Ihi Iambe Jezú ia Lungu ni ku Kala ku Muenhu?

Jezú kexile ni phata se mukonda diahi uexile ku muenhu. Muéne uambe: “Kiene kia ngi vualela, kiene ue ki ng’ejila mu ngongo.” (Nzuá 18:37) Jezú ua bhiti o kithangana kiê kioso, mu ku longa o athu o mak’â Nzambi ni vondadi Iê.

O muenhu uetu ua-nda kala ni valolo se tu kaiela o phangu ia Jezú. Jezú u tu suínisa ku kaiela o phangu iê. (Matesu 11:29) Xinganeka mu maukexilu aiadi mu tu tena ku kaiela o phangu iê.

Jezú ua longo kuila se tua mesena ku zediua, tua tokala ‘kuívua o mak’â Nzambi.’ (Matesu 5:3) O uadiama ua-nda ku bhua ngó se tuijiia o “Nzambi ia kidi imoxi-èlele, ni kuijiia ue Jezú Kristu, ió ua mu tumu eie [Nzambi].”​—Nzuá 17:3.

Jezú ua tumina o maxibulu mê ku longa akuâ ioso ia a longo muéne. Muéne uambe: “Enu-phe ndenu, mua ka longe jixibulu ku akua jixi joso, ni ku a batizala mu dijina dia Tata ni dia Mona, ni dia Nzumbi Ikôla; Ni ku a longa kualuka o ima ioso kiá i nga mi tumu eme.”​—Matesu 28:19, 20.

Oso a zubha o ibhindamu iâ mu ku di longa o kidi kia Nzambi, ni ku i belesela a mona kuila a beta ku kala ni ukexilu uambote ku mienhu iâ. Ene a xikina ué kuila o mienhu iâ iala ni valolo, kioso kia kuatekesa akuâ ku di longa o mak’â Nzambi.