Kibhuidisu 2: Ihi Ia-nda Bhita N’eme Kioso ki Nga-nda Fuá?

ROMAN uexile hanji muzangala kioso o kamba diê kiafu mu kiluezu kia dikalu. Muéne uambe: “Nga divu kia iibha mu kufuá kua kamba diami. Mu ku bhita mivu iavulu, eme nga dibhudisa ihi i bhita n’etu kioso ki tu fuá.”

Mukonda diahi athu a bhanga o kibhuidisu kiki? Mukonda dia kuila o muthu ka mu bhange phala kufuá, o kufuá ku bhangesa o athu ku diuana kiavulu. Ki kale tu adiakimi mba tu ana ndenge, se-ku muthu ua mesena kufuá. Athu avulu ala ni uôma ua lungu ni ihi ia-nda bhita kioso kia-nda fuá.

Ihi izuela o athu? Athu avulu a xikina kuila, kioso o muthu kia fuá, saí mbandu ia mukutu uê iia bhu kididi kiéngi. Ene a xikina kuila o athu ambote, a-ndaia ku diulu, maji o athu a iibha, a-nda ku a kaxtikala hádia ni hádia mukonda dia ituxi iâ. A mukua a banza kuila kioso kia fuá, se-ku dingi kidielelu phala muéne

Ihi ilombolola o ibanzelu íii? O kibanzelu kia dianga, kilombolola kuila mu kidi o muthu ka fué. O kia kaiadi, kilombolola kuila o muenhu ki uala ni valolo. Oso a xikina ku kibanzelu kia kaiadi, a xinganeka: ‘Tu dienu-tu, tu nuenu-tu, o mungu tua-nda ku fuetu.’—1 Kolindo 15:32.

Ihi i longa o Bibidia? O Bibidia ki i longa kuila kioso o muthu kia fuá, saí mbandu ia mukutu iia bhu kididi kiéngi. Nzambi ua tumina o Sobha Solomá ku soneka: “Ió oso ala ni muenhu ejiia kuila a-nda kúfua, maji o ió afu kiá k’ejiia dingi kima kioso-kioso.” (Ndongixi 9:5.) Oso “k’ejiia dingi kima kioso-kioso,” ka tena kuijiia o ima ia mu bhita ku mundu. Ene kévu dingi kima, mba ku bhanga kima. Mukonda dia kiki, o athu afú kiá, ka tena ku kuatekesa mba ku bhanga kia iibha ku athu ala ku muenhu.

Nzambi ka bhange o athu phala ku kala ku muenhu ka kithangana, mu ku suka-ku anga a fuá, kála ki banza o athu. Muéne ua bhange o diiala dia dianga Adá, phala ku kala ku  muenhu mu ixi. Nzambi ua tumbula o kalunga kioso kia zuela kua Adá o ki fundisu kiê, mukonda dia ku xibhaka kuê. Muéne ua kidika Adá kudia ku kibundu kia muxi ua kexile bhu kaxi ka jaludim, mu ku mu tangela kuila se o dia-ku, “ua kà fua muene.” (Dimatekenu 2:17) Adá ni Eva se a belesele Nzambi, ki kale ene ni athu oso eji kala ku muenhu mu ixi.

Adá ua solo ku xibhaka o kitendelesu kia Nzambi. Muéne ua te kituxi kioso kia xibhaka Nzambi, mu kiki-phe muéne uafú. (Loma 6:23) Kioso Adá kiafu, se-ku mbandu ia mukutu uê iai bhu kididi kiéngi. Adá ua kexile sé muenhu, kála ande dia ku mu bhanga kua Nzambi. Nzambi uambe kua Adá: “Ku suualu ia pholo ié kuene ku ua kà dia o mbolo ié, katé ki ua kà vutuka ku mavu; mukonda kuene kua tundile; kuma eie uala u mavu, ku mavu kuene ku ua kà vutukila.” (Dimatekenu 3:19) Athu oso akua ituxi anga a fuá, mukonda a tundu kua Adá.—Loma 5:12.

Sumbala Adá ua solo kia iibha, maji né kiki, Nzambi ua-nda kumbidila o vondadi iê ia ku ezalesa o ixi ni athu a iuka. (Dimatekenu 1:28; Izaia 55:11) Kua kambe ngó kithangana, Jihova ua-nda bheka dingi ku muenhu nzungule dia athu afú kiá. Mu kuzuela ia lungu ni kithangana kiki, o poxolo Phaulu ua soneka: “Kuma hádia ku kala difukunukinu dia athu aiuka ni athu abhukumuka.”—Ikalakalu 24:15.

[Foto ku mbandu 7]

Phala kuijiia dingi ihi i bhita kioso o muthu kia fuá, tanga o divulu Mu Kidi Ihi i Longa o Bibidia?, mu kibatulu 6. Tu di sanga ué mu kijimbuete kia www.dan124.com

[Kaxa ku mbandu 7]

Ihi Iambe Jezú ia Lungu ni Kufuá?

Jezú ka xikina o izuelu ia atuameni a jingeleja mu izuua iê, akexile mu longa kuila ki kua-nda kala difukunukinu. (Luka 20:27) Muéne ka longo ué kuila saí kima ki tunda ku mukutu ua muthu kioso kiafuá. Maji Jezú ua longo kiki.

O kufuá kua difu ni kuia ku kilu. Kioso kiafu kamba diê Lázalu, Jezú uambe: “Kamba dietu Lázalu uaii ku kilu. Maji eme ngiia-phe ku mu phaphumuna.” O maxibulu k’ejidile ihi ia mesenene kuzuela Jezú. Kuala o jixibulu: “Ngana, se uaii ku kilu-phe, ua-nda [phaphumukê].” O Bibidia izuela: “Jezú-phe ua tange o kùfua kuê, maji ene a fika kuma ua tange o kunhoha ku kilu kiene. Jezú anga u a lomboluela kiambote, uixi: ‘Lázalu, uáfu.’”​—Nzuá 11:11-14.

O afú a-nda vutuka ku muenhu. Kioso kia bhixila Jezú mu mbanza mua tungile Lázalu, muéne ua tululukisa Marta, ni izuelu íii: “Phang’é ua-ndu fukunuka.” kioso kia zubha kuzuela kiki Jezú ua kanena: “Eme ngi difukunukinu ni muenhu. Uoso u ngi xikana eme, né uafu, u kala dingi ni muenhu.” O kikanenu kia Jezú ki kiexile ngó izuelu. Muéne ua fukununa Lázalu sumbala kua bhitile kiá izuua iuana tundé kia fuile.​—Nzuá 11:23, 25, 38-45.

Jezú ua londekesa ué kua Nzuá mu kisuma kuila, o afú a-nda fukunuka. Muéne ua tange ia-nda bhita ku hádia, kioso o kalunga ka-nda jituna oso ala mu kutena kuê.​—Dijingunuinu 20:13.