Kibhuidisu 3: Mukonda Diahi Nzambi u Ng’ehelela ku Tala Hadi?

O TATA ia Ian uexile hôlua. Sumbala ka kulu ni jimbongo javulu, muéne ka kexile mu tambula o kikuatekesu kia tokalele o ku tambula kua tat’ê. Ian uambe: “Ka ngi zolele kala kia tokalele ku ngi zola, bhenge-bhenge mu ioso ia kexile mu bhanga kua mam’etu. Kioso Ian kiai ni ku kula, muéne ua kexile mu dibhudisa se kuene muene Nzambi. ‘Muéne ua xinganeka, se kuene muene Nzambi, Mukonda diahi muéne uehela o athu ku tala hadi?’”

Mukonda diahi athu a bhanga o kibhuidisu kiki? Né muene kua mu dibhana ni maka, maji eie u divua kia iibha kioso ki u mona o athu a mu tala hadi. Mu kiki, o kibhuidisu kia lungu ni hadi, ki kala dingi ni valolo se eie kála Ian, mua mu bhita ni maka mba muthu u ua zolo ua mu kata mba ufuá.

Ihi izuela o athu? Saí athu a zuela kuila, Nzambi uehela o hadi phala ku tu longa o ku lenduka ni ku zola akuetu. A mukua a banza kuila, a mu tala hadi mukonda dia ituxi iâ ia tele m’ukulu.

O itambuijilu íii, ilombolola ihi? Nzambi ka bhana mátui ku hadi i tu bhita na-iu, mukonda dia kiki, ki bhonza ku mu zola. Nzambi muthu ua iibha.

Ihi i longa o Bibidia? O Bibidia i zuela kuila, Nzambi kalé ni kikuma mukonda dia hadi iene mu bhita na-iu o athu. “Mu ithangana ia malamba ienhi’ii, k’ele, uixi: Nzambi muène ua ngi diangula. Mukonda Nzambi kene ku mu diangula ku kima kiaiibha kioso-kioso, o muène ue kene mu diangula muthu.” (Tiiaku 1:13) Mu kidi, o ibanzelu ia kuila Nzambi muéne uala ni kikuma mukonda dia hadi ia mu tala o athu, ki iene i longa o Bibidia ia lungu ni Nzambi. Kiebhi-phe?

O kídifua kia dianga kia Nzambi, o henda. (1 Nzuá 4:8) Phala ku jimbulula kiambote o pondo íii, o Bibidia i sokesa o ibanzelu ia Nzambi ni ia mama. Nzambi uebhuidisa: ‘O kuila mama u tena ku jimba mon’ê ua mu vuala, katé uehelela o mona ua tundu mu  mala diê? Né-mbe bhu kala mama u jimba o mon’ê, eme-phe kana, kuma eie ki nga ka ku jimba, lémbue!’ (Izaia 49:15) O kuila o mama ia henda u tena ku bhanga kia iibha ku mon’ê? O tata ia henda, u bhanga ioso phala ku sosolola o hadi ia mon’ê. Kiene kimoxi ué, Nzambi ki muéne u bhangesa o athu ku tala o hadi.—Dimatekenu 18:25.

Né kiki, athu a mu tala hanji hadi. Nange u di bhuidisa, ‘se Nzambi ua tu zolo, muéne ué muteni-a-ioso, mukonda diahi ka bhange ioso phala ku zubha o hadi?’

Nzambi ua lungu’ê mu kuehela o athu ku tala hadi. Xinganeka ngó: O athu, ene a sota o hadi phala o akuâ. Athu avulu a iibha, a bhekela hadi mu ku zukutisa akuâ, ka mesena ku lungulula o ukexilu ua muenhu uâ. Mu kiki, phala Nzambi ku zubha ni hadi ioso, muéne ua tokala ku buika o athu oso a iibha.

Mu ku jimbulula se mukonda diahi Nzambi ka buika luua ió a bhanga o ima ia iibha, o poxolo Phetele ua soneka: ‘Jihova ki mukua kaxixi ka lungu ni kikanenu kiê, kala amoxi-mu, a fika kuila mukua kaxixi, maji muéne mukua muanhu mukonda muéne ka mesena kuila o athu a texika, ua mesena ene oso eza mu ku diela.’ (2 Phetele 3:9) O muanhu ua Jihova Nzambi, ulondekesa o henda iê ku athu.

Kua kambe ngó, Jihova ua-nda bheka o dizubhilu. Muéne ua-nda ‘vutuila hadi, kua oso a talesa o hadi’ kua ió kalá ni kikuma. Ió a talesa hadi ku akuâ, “o kaxtiku kâ kà kala [kibuikilu] kinangenena.”—2 Tesalonika 1:6-9.

[Foto ku mbandu 9]

Phala kuijiia dingi se mukonda diahi Nzambi uehela o hadi, ni ihi ia-nda bhanga ia lungu ni maka enhá, tanga o divulu Mu Kidi Ihi i Longa o Bibidia?, mu kibatulu 11. Tu di sanga ué mu kijimbuete kia

www.dan124.com

[Kaxa ku mbandu 9]

Ihi Iambe Jezú ia Lungu ni Hadi?

Jezú ka tatela Nzambi o hadi ia kexile mu tala. Maji muéne ua bhange kiki:

Jezú ua londekesa kuila Nzambi ka kaxtikala athu, kalá ni kikuma mu ku a talesa hadi. Jezú ua sake o jihaxi, inema ni ifofo. (Matesu 15:30) O madiuanu a bhange, a tu longa ima iiadi. Kia dianga ni kutena kua mu bhana Nzambi, Jezú ua sosolola o hadi ia athu, ka a talesa hadi. Kaiadi, Jezú ka londekesa kathombo mu ku saka athu. Kioso kia mono o athu a mu tala hadi, “henda ia mu kuata.” (Matesu 20:29-34) Jezú ua londekesa kiebhi ki divua tat’ê ia lungu ni hadi i tala o athu mu ngongo. Kienhiki, mu izuelu ia Jezú tu tena ku mona kuila Nzambi uivua ndolo kioso kia mona o athu a mu tala hadi, ni kuila Muéne ua mesena ku zubha o hadi mu ngongo.​—Nzuá 14:7, 9.

Jezú ua londekesa nanhi ua bheka o hadi ku athu—Satanaji o Diabhu. Jezú uambe: “Muène kijibhanganga tunde ku dimatekenu dia mundu.” (Nzuá 8:44) Jezú uambe ué kuila Satanaji o Diabhu, muene “o sobha ia mundu iú,” ni kuila “mukua kunganala o mundu uoso.”​—Nzuá 12:31; Dijingunuinu 12:9.

Jezú ua tu kanena kuila o kithangana kia-nda zubha o hadi ki kiza. Muéne ua longo o maxibulu mê ku samba: “Tata ietu uene mu diulu . . . utuminu ué uize. Vondadi ié a i bhange bhoxi, kala kiala ku i bhanga ku diulu.” (Matesu 6:9, 10) Kioso kia-nda mateka o Utuminu ua Nzambi mu ixi kála kiene ku diulu, ki kua-nda kala dingi hadi.

Mu kisuma kia londekesa kua poxolo Nzuá, Jezú ua tange kiebhi kia-nda kala o muenhu ua ió a-nda ku a tumina ku Utuminu ua Nzambi. Mu kithangana kieniókio, Nzambi “u a kondona o masoxi moso ku mesu mâ! Ki ku kala dingi kùfua, nè ngó mukôndo, mba kudila, mba kukata. Mukonda ima ia diangèle-ku, ia bhiti.”​—Dijingunuinu 1:1; 21:3, 4.