O Kuila Tua Tokala Kuibhuidisa Nzambi?

SAÍ iá, amba kuila kima kia iibha kuibhuidisa Nzambi. Ene a banza kuila se muthu uibhula kua Nzambi se mukonda diahi muéne uehela o ima ia iibha ku bhita, kulondekesa ku kamba ku xila Nzambi. O kuila u banza ué kiki?

Se u banza kiki, ua-nda mona kuila athu avulu ambote, a bhangele ué kibhuidisu kua Nzambi. Tanga o ibhuidisu ia bhange kua Nzambi:

O Jobe, mukua kixikanu uebhula: “Ngana, phala’hi u sueka o pholo ié, anga u ngi kita ngi nguma ié?”​—Jobe 13:24.

O polofeta Habakuke, diiala dia fiiele uebhula: “Abha-phe, Ngana, u lendukila kiebhi athu a bhanga kiaiibha, anga u dixibha muene kioso mukua ituxi kia minha ió ua beta kuiuka kiambote, o muene ndenge?”​—Habakuke 1:13.

Jezú Kristu uebhula: “Nzambi iami, Nzambi iami, ua ng’ehelela-hi’á?”​—Matesu 27:46.

Se u tanga o ibatulu ia lungu ni ibhuidisu íii, ua-nda mona kuila se-ku kima kilondekesa kuma Jihova * Nzambi ua divu kia iibha. Mu kidi, kuehela o athu ku mu ibhuidisa ki kima kia kidiuanu. Mu kifika, Nzambi ka divu kia iibha kioso ki tu mu bhinga o ima i tua bhindamena mu xitu. Muéne u langa o ibhindamu ietu ni kisangusangu. (Matesu 6:11, 33) Muéne u tu bhana ué itendelesu, i tu kuatekesa ku divua kiambote. (Filipe 4:6, 7) Mu kidi, Jezú uambela o maxibulu mê: “Bhinga, nda a ku bhane.” (Matesu 7:7) O kikanenu kiki kia Jezú, ki kilombolola ngó ku tambula o ima mu xitu, maji ni itambuijilu ia ibhuidisu ietu.

Se kia bhanene, kibhuidisu kiebhi ki ueji bhanga kua Nzambi?

● Mukonda diahi ngala ku muenhu?

● Ihi ia-nda bhita n’eme kioso ki nga-nda fuá?

● Mukonda diahi Nzambi u ng’ehelela ku tala hadi?

Kuma ‘Mikanda ioso a i bhusu kua Nzambi,’ eie u tena ku sanga o itambuijilu ia ibhuidisu iê mu Mak’â Nzambi. (2 Timote 3:16) Tua-nda di longa se ihi ia bhangesa o athu ku bhanga o ibhuidisu i tua mono ku dima, ni itambuijilu i bhana o Bibidia.

[Tanga mu luji]