O ku lenduka kulombolola ku kamba ku dizangeleka, ku kamba ukumbu. O muthu ua lenduka, ka mono kuila muéne ua beta-kota akuâ ndenge. Uejiia ué kuila muéne mukua ituxi, uene mu lueza ni kuila ka tena ku bhanga ioso.

Mozé ka kexile mu dizangeleka mukonda dia ku kala ku pholo dia mundu. Kioso muthu kia tambula kikalakalu kia dikota, athu a tena ku mu mona se ua lenduka mba kana. O ngana Robert G. Ingersoll, ua zuela kiki: “Athu avulu a tena ku kolokota mu ibhidi. Maji se ua mesena kuijiia o ukexilu ua muthu, mu tule ngó ku pholo ia kikalakalu.” Mu ukexilu iú, Mozé ua xisa phangu iambote ia ku lenduka. Kiebhi kia bhange kiki?

Mozé a mu bhanene kikalakalu kia dikota kua Jihova kia ku kala mutuameni ua mundu ua Izalaiele. Maji muéne ka dizangelekele kana. Mu kifika, xinganeka kiebhi muéne kia batuile o maka alungu ni ku tambula undundu. (Dialuilu 27:1-11) Kia bhonzele kiavulu ku batula o maka enhá, mukonda o maka eji kala phangu phala o miji ku pholo.

Kiebhi-phe Mozé kieji batula o maka? O kuila ua banzele kuma, mukonda dia ku kala o mutuameni ua Izalaiele, ueji tena ku batula o maka mu nguzu iê? Ueji dielela mu uhete ni mu unjimu uê mba ueji dielela mu kuijiia kua kexile n’a-ku kua Jihova?

Kiki, kiene kieji bhanga o muthu u dizangeleka. Maji ki kiene kia bhangele Mozé. O Bibidia i zuela: “Mozé anga u bheka o maka mâ bhu pholo dia Jihova.” (Dialuilu 27:5) Xinganeka bhofele! Sumbala Mozé uexile mutuameni ua kifuxi kia Izalaiele mu 40 a mivu, muéne ka dielele mu kilunji kiê, maji ua dielele kua Jihova. Kienhiki, tu tena ku mona o kulenduka kua Mozé.

Mozé ka banzele kuila muéne ngó ua tokalele ku kala ku pholo mu ku tumina. Muéne ua sangulukile kiavulu, kioso Jihova kia solo athu kala jipolofeta phala ku mu kuatekesa. (Dialuilu 11:24-29) Kioso o ukouê, Jetulu, kia mu bhanene o ndunge ia ku sola maiala phala ku mu kuatekesa, ni kulenduka kuoso, ua xikina o ndunge íii. (Makatukilu 18:13-24) Mu ukukilu uê, sumbala ua kexile hanji ni nguzu, Mozé ua bhingi kua Jihova, muthu phala ku mu bhingana. Kioso Jihova kia solele Josuué phala ku mu bhingana, ni kulenduka kuoso, ua kuatekesa o munzangala, iu ua tendelesa o mundu ku belesela o itendelesu ia Josuué ia kua endesa katé mu Ixi ia a Kanene Nzambi. (Dialuilu 27:15-18; Matendelelu 31:3-6; 34:7) Phala Mozé, kiexile ujitu ua dikota ku kala ku pholo ia mundu ua Izalaiele mu ubhezelu ua kidi. Maji muéne, ka betele ku bhana valolo ku kikalakalu kiê, o athu ndenge.

Ki tu tokala kuehela kuila o kutena mba uhete, u tu bhangesa ku dizangeleka ku pholo dia akuetu. Ijiia kuila: Phala ku kala ni valolo bhu pholo ia Jihova, ki tu tokala ku dizangeleka mukonda dia uhete uetu. (1 Samuuele 15:17) Se tu kala tu athu a lenduka, tua-nda tena ku kumbidila o milongi ia Bibidia iambe: “Dielela kua Jihova ni muxima uê uoso, kana ku dielela ngó ku kilunji kiê.”—Jisabhu 3:5, 6, NW.

O phangu ia Mozé, i tu longa kuila ki tu tokala ku dizangeleka ni ujitu u tua tambula.

O kuila tu katula mbote mu ku kaiela o phangu ia kulenduka kua Mozé? Tu katula! Se tu kala tu athu a lenduka, tua-nda sangulukisa o athu a tu kondoloka ni ku tu zola dingi. A-nda beta ku tu zola dingi kua Jihova Nzambi, o mukua kídifua kiki. (Jisálamu 18:35) O Bibidia i zuela: ‘Nzambi u dituna akua izala, u bhana-phe o ujitu uê kua ió a lenduka.’ (1 Phetele 5:5) Kiki kiene ki tu bhangesa ku kaiela o phangu ia kulenduka kua Mozé!