O kuila o kalunga ka beta o kutena, Nzambi ndenge? Kana! Kiebhi o kufuá mba nguma iéngi, i tena ku kala dingi ni kutena, “Nzambi Muteni-a-Ioso” ndenge? (1 Kolindu 15:26; Makatukilu 6:3) Nzambi uala ni kutena kua ku zubha o kalunga bhu kaxi ka difukunukinu iu ua kanena ku bhanga kiki ku mundu uobhe. * O kuila o kikanenu kiki kia-nda dikumbidila? O mon’a Nzambi, Jezú, u tu zuelela ni izuelu i tu bhana kidielelu.—Tanga Matesu 22:31, 32.

Mu kuzuela ni jisaduseu, ka xikinine ku difukunukinu, Jezú uambe: “O phata ia madifundu kufukunuka, kífua kiluua mu tanga kia mi ambela Nzambi, uixi: Eme ngi Nzambi ia Mbalahamu, Nzambi ia Izake, Nzambi ia Jakobo? Nzambi, ki Nzambi ia madifundu, maji ia athu ala ni muenhu.” Mu kithangana kiki, Jezú ua kexile mu tumbula o izuelu ia Jihova kua Mozé mu kisasa kia uamene túbhia mu 1514 A.K.K. (Makatukilu 3:1-6) Kala kia zuela Jezú, o izuelu ia Jihova kua Mozé—“Eme ngi Nzambi ia Mbalahamu, Nzambi ia Izake, Nzambi ia Jakobo”— kilombolola kuma o kikanenu kia difukunukinu kia-nda di kumbidila. Kia-nda bhita kiebhi?

Xinganeka o maka. Kioso Jihova kia zuelele ni Mozé, o Mbalahamu, ni Izake, ni Jakobo, ká kexile dingi ku muenhu—tundé kia fuile Mbalahamu, kua bhitile kiá 329 a mivu, Izake, ua bhitile kiá 224, Jakobo, 197 a mivu mu mbila. Maji Jihova uambe “Eme ngi—kambe kuila, “Eme nga kexile” Nzambi iâ. Jihova ua tumbula o jiselevende jê jiji kala akexile hanji ku muenhu. Mukonda diahi?

Jezú ua tambuijila: ‘[Jihova] ki Nzambi ia madifundu, maji ia athu ala ni muenhu’. Xinganeka ihi i lombolola o izuelu íii. Se ki kueji kala difukunukinu, Mbalahamu, Izake, ni Jakobo ka-nda vutuka-phe ku muenhu. Se kiki kiene, Jihova ueji kala Nzambi ia madifundu. Kiki kieji londekesa kuila o kalunga ka beta o kutena, Jihova ndenge— kieji londekesa ué kuila muéne kale ni kutena kua ku bhulula o jiselevende jê ku kalunga.

Ihi-phe i tu banza ia lungu ni Mbalahamu, Izake, ni Jakobo ni jiselevende ja Jihova afú kiá? Jezú ua zuela: “Ene oso muene, ku mesu a Nzambi, iá-uâ ni muenhu.” (Luka 20:38) Mu kidi o kikanenu kia Jihova kia ku fukununa o jiselevende jê, kia kidi muene, katé muene u a tumbula kala ala hanji ku muenhu. (Loma 4:16, 17) Jihova ua ka bhaka o jiselevende jê jiji ja fiiele katé o kithangana kia ku a fukununa.

O kuila o kidielelu kia ku kala dingi ni ndandu iê uafú kiá, ki ku uabhela? Ijiia-kiu-phe kuma Jihova kotelele, o kalunga ndenge. Se-ku kima ki tena ku mu fidisa ku fukununa o athu. Ku tokala ku di longa dingi ia lungu ni difukunukinu ni Nzambi, ua-nda kumbidila o kikanenu kiki? Se u bhanga kiki, ua-nda zukama dingi kua Jihova o ‘Nzambi ia . . . athu ala ni muenhu.’