Eie u tena ku di lembalala o kizuua ki ua vuala mon’ê? Sé phata eie ua sangulukile kiavulu mu ku kuata mon’ê bhu maku. Maji phala o jitata kála Carlos ni Mia, o ku zediua ku bhua kioso kia mi tangela kuila o mona, muéne haxi mba kinema.

Eie ua mu sasa mona, haxi? Kienhiki-phe nange u dibhudisa se ua-nda tena ku mu kuatekesa muene. Se kiene, kana ku thandanganha. Jitata kala eie, ene mu di tunda kiambote mu maka enhá. Tua-nda di longa ibhidi itatu iene mu bhita ni athu i u tena ku dibhana nau ué, ni kiebhi o milongi ia Bibidia i tena ku ku kuatekesa.

Jitata javulu a divua kia iibha kioso kia a tangela kuila o mon’ê haxi. Juliana mama mu ixi ia México, uambe: “Kioso o jidotolo kia ngi tangela kuila o mon’etu, Santiago, ua kexile ni uhaxi mu uongo, kia ngi bhekela ku xinganeka kiavulu ku muxima. Kiexile kala o mundu ua buile ku thandu diami.” Athu a mukuá a divua ué kala kia divu o mama a mu ixana Villana. Muéne uambe: “Nga mesenene ku vuala mona né muene se kiki kieji ngi bhekela ibhidi iavulu. Maji kioso mon’ami kia tala hadi  mukonda dia uhaxi ua uongo, eme ngi divua kala, eme ngala ni kikuma.”

Se ua mu bhânga ni ukexilu ua ku di tatela, ejiia na-kiu kuma ki kituxi kana. O uhaxi ki uexile vondadi ia Nzambi ku dimatekenu. (Dimatekenu 1:27, 28) Nzambi ka bhange o jitata ni uhete ua ku xikina o ima ia iibha. Kienhiki, eie nange u “ditenda”—mukonda o mon’ê haxi. Ua-nda bhinga kithangana kiavulu phala ku xikina o ukexilu ua mon’ê.

Ihi i ua tokala o ku bhanga se u banza kuila eie uala ni kikuma ku uhaxi ua mon’ê? Lembalala kuma, se-ku muthu uejiia kiambote o ukexilu uetu ni ima ia mukuá i bhangesa o mona ku kala ni sauidi iambote. Nange, u tatela o muadi uê. Kana ku bhanga kiki. O kima ki ua tokala o ku bhanga, o ku kala ku mbandu ia muadi uê mu ku kuatekesa o monenu.—Ndongixi 4:9, 10.

NDUNGE: Di longe o uhaxi ua mon’ê. O Bibidia i zuela: “O ku tunga dibhata unjimu u u kala na-u, ki u tabhu masunga-phe, dibhata ua di fikidila.”—Jisabhu 24:3.

Eie u tena kuijiia kiambote o maka a mon’ê se u zuela ni ji dotolo, ni ku tanga madivulu a zuela o maka alungu ni uhaxi ua mon’ê. Kia soko ni ku di longa dimi diéngi. Ku dimatekenu ku bhonza kiavulu, maji eie u tena o ku di longa.

Carlos ni Mia, u tua a tange ku dimatekenu dia milongi íii, a soto kikuatekesu kia dotolo iâ ni bhu kaxi ka kisangela ki batula maka alungu ni uhaxi ua mon’â. Ene ambe: “Kiki ki ki tu kuatekesa ngó ku tendela o maka u tueji dibhana nau ku pholo, maji o ‘ukexilu uambote’ ua uhaxi. Tua mono ué kuila o mon’etu ueji tena ku kala ni ukexilu uambote ku muenhu. Kiki kia tu bhana nguzu phala ku mu kuatekesa kiambote.”

Nange u divua kuila o ku kuatekesa mon’ê haxi, ku ku katula o nguzu ioso. Jenney, mama mu ixi ia Nova Zelandia uambe: “Kioso kia ngi tangela kuila mon’ami uala ni uhaxi, u tu ixana mu phutu, espinha bífida, nga bhuila ni ku dila kiavulu kioso ki nga kexile mu bhanga o ikalakalu kubhata.”

Nange o kibhidi kia mukuá, o ku divua ubheka. Ben uala ni mon’ê ni uhaxi u tu ixana mu phutu, distrofia muscular e síndrome de Asperger. Muéne uambe: “Saí athu ka-nda tena ku tendela kiebhi ki tua mu divua.” Nange u mesena kuzuela ni muthu o maka mê. Maji eie uejiia kuila o makamba mê ala ni tuana tuala ni sauidi iambote. Mu kiki, eie kuzuela nau o maka u ua mu bhita nau.

NDUNGE: Bhinga kikuatekesu. Xikina o ndunge ia ku bhana. Juliana, tua mu tange kiá ku dima, uambe: “Saí ithangana eme ni muadi uami tu kala ni jisonhi ja ku bhinga kikuatekesu.” Maji muéne uambe: “Tua di longo kuila tua tokelele muene o kikuatekesu kia akuetu. Tu divua kiambote kioso akuetu kia tu kuatekesa.” Se kamba diê dia kazola, mba muthu ku muiji u bhinga phala ku kala ni mon’ê mu kithangana kia ku tonoka mba mu kiônge, xikina ni kisangusangu kioso. O Bibidia i zuela: ‘O dikamba dia kidi, u zola mu thembu joso; ndandu i moneka mu ithangana ia jiphaxi.’—Jisabhu 17:17.

Langa o sauidi iê. Kala ki bhanga o dikalu diambata o jihaxi, ku bhinga ku di ta kazolina mba kazoliu phala diene di tene kuambata o jihaxi mu inzo ia ku saka. Eie ua bhingi ué ku kala ni nguzu mu mukutu, mu kudia kiambote, ni ku nhoha kiambote phala ni u kale ni nguzu ia ku kuatekesa kiambote o mon’ê. Javier, uala ni mona kinema, uambe kiki: “Kuma mon’ami ka tena kuenda, ngi sota kudia kiambote. Mukonda eme ngi mu ambata. O inama iami, iene o inama iê!”

Kiebhi ki u tena ku kala ni kithangana kia ku langa o sauidi iê? Saí jitata a di kuatekesa mu ku langa o mona. O jitata ala ni ukexilu iú, a tokala a kala ni kithangana kia ku nhoha ni ku bhanga ima ia kamúkua. Kiki ki bhinga kueha ku bhanga ima ia mukuá kubhata ki iala ni valolo ia dikota, phala ku tena ku langa kiambote o mona ua kate. Maji kala Mayuri, mama mu ixi ia Índia, uambe: “Eie ua-nda kuijidila o ku bhanga o kikalakalu kiki.”

 Zuela ni muthu ua mu dielela. Né muene ni makamba kala ni ana a kate, a tena ku kuívua ni henda ioso. Eie ué u tena ku samba kua Jihova Nzambi. O kuila o misambu i kuatekesa muene? Yazmin uala ni tuana tuiadi ni uhaxi u tu ixana mu phutu, fibrose cística, muéne ua zuela: “Saí ithangana nga kexile mu divua kala nga mu fuá.” Maji muéne uambe: “Ngi samba kua Jihova mu ku bhinga kikuatekesu ni nguzu. Anga ngi kala dingi ni nguzu phala ku suluka.”—Jisálamu 145:18.

O uhaxi ua mona-ndenge u fidisa o kudia kua muiji, kuebhi kuia o muiji, ni ithangana ikuxi i bhita o jitata ni tuana tua disanze. Mukonda dia kiki, o tuana tua mukuá, nange a mona kuila ka mu a suua ku jitata. O jitata a tena ku kala ni kikalakalu kiavulu mu ku langa o mon’ê ua mu kata, ni ku bhangesa o ukaza ku kala ni ibhidi. Lionel, tata mu ixi ia Libéria, uambe: “Saí ithangana muhatu uami uamba kuila, muéne ua beta ku langa o mon’etu, eme ndenge, ni kuila ki ngi suu mon’etu. Ngi divua kuila muéne ka ngi xila, anga ngi dizangala kiavulu ni muéne.”

NDUNGE: Phala kulondekesa ku tuana tuenu kuila, enu mua a suu, bhanga itonokenu ia a uabhela. Jenney, u tua mu tange kiá, uambe: “Saí ithangana tu bhanga ima ia katunda phala o mon’etu ua dikota, né muene se ku bhinga kuia né ku dimosala bhu ididi ia mu uabhela kiavulu.”

Phala ku langa o ukaza uê, zuela ni kaza diê ni mu sambe kumoxi. Aseem, tata mu ixi ia Índia uala ni mona uala ni uhaxi, ua ku disu-suina, uambe: “Sumbala eme ni muhatu uami, tua kexile mu divua kia iibha, ni ku bhuila, tua kexile mu kala kumoxi, ku samba ku moxi ni ku di zuelesa. Imene-mene ioso, ande dia mon’etu ku balumuka, tu tanga velusu ia Bibidia.” Makaza a mukuá a zuela ande dia ku zeka. O ku di zuelesa ni ku samba ni muxima, kua-nda mi suínisa mu ithangana íii. (Jisabhu 15:22) Saí dikaza, diambe: “O ithangana iambote mu ukaza uetu, o ithangana ia bhonzo phala etu.”

O Bibidia i zuela kuila, kua kambe ngó bhofele, Nzambi ua-nda zubha o mauhaxi moso ene mu talesa hadi ku minzangala ni ku adiakimi. (Dijingunuinu 21:3, 4) “Ki bhua kà kala mukua-bhata . . . uila: ‘Nga kata.’” *—Izaia 33:24.

Mu kithangana kiki, eie u tena ku di tunda kiambote se uala ni mona, haxi. Carlos ni Mia, u tua tange kiá, ambe: “Kana ku zoza se u mona kuila o ima ki iala kiambote, xinganeka mu ima iambote i tena ku bhanga o mon’ê ua kate, mukonda u tena ku bhanga ima ia mukuá iambote.”