DIAMBU DIA KAPA | O KUILA O KALUNGA O DISUKILU DIA IMA IOSO?
O Kalunga ko Disukilu Dia Ima Ioso!
Betanha iexile sanzala iofele, phala ku bhixila-mu tundé mu Jeluzaleme, kua bhingile kuenda kilometulu 3. (Nzuá 11:18) Kua fuile muthu semana ku dima ande dia ufuilu ua Jezú. Lázalu, kamba dia kazola dia Jezú, ua kexile mu kata kiavulu, iu uafú.
Kioso Jezú kia dianga kuívua o njimbu, muéne uambela o maxibulu mê kuila Lázalu ua kexile mu zeka, ni kuila muéne ua tokalele kuia-ku ku mu balumuna. (Nzuá 11:11) Maji o maxibulu a Jezú ka tendela ihi ia kexile mu zuela Jezú, mu kiki Jezú ua a tangela mu kidi: ‘Lázalu uafú.’—Nzuá 11:14.
Mu ku bhita izuua iuana kioso kia mu fundu, Jezú ua bhixila ku Betanha, iu ua kondona Marta, phange ia difundu. Marta uambe: “Eie se ua kexile-bhu, phang’ami hinu kafu.” (Nzuá 11:17, 21) Jezú ua mu tambuijila: “Eme ngi difukunukinu ni muenhu,” ‘uoso u ngi xikana eme, né uafú, u kala dingi ni muenhu.’—Nzuá 11:25.
“Lázalu, tunda ku kanga!”
Phala kulondekesa kuila o izuelu íii iexile ia kidi, Jezú u zukama ku mbila, u dikola ni dízui dia suína: “Lázalu, tunda ku kanga!” (Nzuá 11:43) O diiala dia fuile anga u tunda bhu pholo ia athu oso akexile kuenhoko.
Jezú ua fukunuine kiá athu a iiadi andé dia ku fukununa Lázalu. Saí kizuua muéne ua fukununa kilumba—o mon’a Jailu. Ande dia Jezú ku mu fukununa, muéne ua mu tumbula ué kala ua kexile mu zeka.—Luka 8:52.
Kia lungu ni kufuá kua Lázalu ni ua mon’a Jailu, Jezú ua sokesa o kufuá ni kilu. Kiki kifika kiambote. Mukonda diahi? O muthu uala ku kilu ka tena kuívua ndolo, né hadi. (Ndongixi 9:5; tala o kaxa: “O kalunga, kedi kala kilu kia zongo.”) Kienhiki, o maxibulu a dianga a Jezú, a tendela kiebhi ki kala o athu kioso kia fuá. A Enciclopédia de Religião e Ética, di zuela: “Phala o akaiedi a Jezú, o kufuá, kala o ku zeka, o mbila kala kididi kia ku nhoha . . . phala ió afuá ni kixikanu.” *
Kima kiambote kuijiia kuila, athu afú a mu zeka mu mbila ka mu tala hadi. Kienhiki, tuejiia kiá ihi i bhita kioso kifuá o muthu, ni kuila ki tu tokala ku kala ni uôma ua kalunga.
‘MUTHU N’AFÚ, UA KA KALA DINGI NI MUENHU?’
Sumbula tua uabhela o ku zeka, nanhi ua mesena kuia ku kilu sé ku balumuka dingi? Kidielelu kiahi ki tuala na-kiu kia kuila, o athu a zeka mu mbila, a ka vutuka ku muenhu—kala kia bhiti ni Lázalu ni mon’a Jailu?
Jobe, ua bhange kibhuidisu kioso kia mono kuila ueji kufuá. Muéne uebhula: ‘Muthu n’afú, ua ka kala dingi ni muenhu?’—Jobe 14:14.
Mu ku bhanga o kibhuidisu kiki kua Nzambi o Muteni-a-Ioso, Jobe ua tambuijila o kibhuidisu kia bhange, mu kuzuela: ‘Eie-phe ueji ku ngi i xana, eme he ngi ku tambuijila; ua ka kala ni henda ku kikalakalu kia maku mê.’ (Jobe 14:15) Jobe ua dielele kuila Jihova, ua kexile mu kingila o kizuua kioso Jihova kieji fukununa selevende Iê ia fiiele. O kuila Jobe ua kexile mu kingila kima kuila Nzambi keji tena o ku ki bhanga? Kana.
O difukunukinu dia bhange Jezú dia londekesa kuila Nzambi ua bhanene kutena kua Jezú phala ku tulola o kalunga. Mu kidi, o Bibidia i zuela kuila Jezú uala ni “jisabhi ji jikula mu mbila ni mu’alunga.” (Dijingunuinu 1:18) Kienhiki, Jezú ua ka jikula o mabhitu a jimbila kala kia tumine ku katula o ditadi dia jikile o mbila ia Lázalu.
O Bibidia i zuela veji javulu o kikanenu kia difukunukinu. Saí anju ia kanene o polofeta Daniiele: ‘Ua ka nhoha, maji o mu kizuua kia ka suka-ku ua ka fundumuka.’ (Daniiele 12:13) Jezú ua tangela o Jisaduseu, ni atuameni a Jijudé ka xikinine mu kikanenu kia difukunukinu: ‘Enu mua tondala, mukonda o Mikanda Ikola ki mua i ijiia, ni kutena kua Nzambi ki mua kuijiia.’ (Matesu 22:23, 29) O poxolo Phaulu, uambe: ‘Ngala ni kidielelu kua Nzambi, kuma hádia kua ka kala difukunukinu dia athu ambote ni athu a iibha.’—Ikalakalu 24:15.
O ATHU AFÚ A KA VUTUKA THEMBU KUXI?
Thembu kuxi kia-nda mateka o difukunukinu dia athu ambote ni athu a iibha? O anju iambela Daniiele kuila, muéne ua ka vutuka ku muenhu ‘mu kizuua kia ka suka-ku.’ Marta ua xikinine ué kuila o phang’ê, Lázalu, ueji vutuka ku muenhu ‘mu kizuua kia ka suka-ku.’—Nzuá 11:24.
O Bibidia i zuela kuila o ‘kizuua kia suku-ku’ kia lungu ni Utuminu ua Kristu. Phaulu ua soneka: “Kristu muene ua bhingi u kala-ku ku ungana, katé Nzambi kia tolola o jinguma jê joso, hé ua kà ji ta bhoxi dia inama ia Kristu muene. O nguma i sukidila ku i bhuisa-ku, o kalunga.” (1 Kolindu 15:25, 26) Kiki kiene ki bhangesa o athu ku samba phala o Utuminu ua Nzambi kuíza ni kuila o vondadi ia Nzambi a i bhanga mu ixi. *
Jobe uejidile kiambote kuila, Nzambi ua mesena ku fukununa o athu afú. Kioso kia-nda bhixila o kizuua kiki, o kalunga a-nda ku ka tolola. Athu ka-nda bhanga dingi o kibhuidisu kiki: ‘O kuila o kalunga o disukilu dia ima ioso?’
^ kax. 8 O kizuelu “mbalale” mu kingileji, kia tundu mu kizuelu kia Ngeleku, kilombolola “kididi kia ku zeka.”
^ kax. 18 Phala kuijiia dingi ia lungu ni Utuminu ua Nzambi, tanga o kibatulu 8 kia divulu, Mu Kidi Ihi i Longa o Bibidia? a di bhange ku Jimbangi ja Jihova. Diala ué mu www.dan124.com.
