Ji midi ni ji midi ja athu mu ngongo ioso, ene mu bhanga o fesa ia Natale mukonda dia ima iavulu. Saí iá a uabhela kudia ni kunua kumoxi ni makamba ni muiji ku bhata. A mukuá, mu kizuua kia Natale a xikama phala ku xinganeka Nzambi mba ku bhanga mbote ku jingadiama. O ima íii ki ima ia iibha kana. Sumbala o ima íii iambote, maji iene ia tundu mu ukexilu ua iibha ua ji pagá.

Kia dianga, athu avulu ene mu bhanga o fesa ia Natale a xikina kuila a mu bhanga o fesa ia uvualukilu ua Jezú. Maji o jingijiie akua misoso, amba kuila kana-ku muthu uejiia o kizuua kia vuala Jezú. O Livro Cristão dos Porquês, iambe kuila “o Jikidistá ja dianga a ditunine ku bhaka kizuua kia uvualukilu ua Jezú” mukonda ene a mesenene “kueha o ima ioso ia iibha ia ji pagá.” O Bibidia ki ilondekesa kuila Jezú ua bhange o fesa ia uvualukilu uê-muéne mba ua bhange fesa ia uvualukilu ua muthu uoso-uoso. Maji muéne ua tendelesa o akaiedi’ê ku lembalala o ufuilu uê.—Luka 22:19.

Kaiadi, jingijiie javulu amba kuila o ukexilu ua ku bhanga o fesa ia Natale ua tundu mu jingeleja ja makutu, ja ji pagá. Kála o ukexilu ua Santa Claus, o muxi ua visco ni muxi ua Natale, ku di bhana maujitu, kumuika ji mvela ni ithulu phala ku uabhesa o inzo ni mimbu ia Natale. Ia lungu ni ima íii, o divulu, As Aparencias da Igreja Católica (O Ifua ia Katolika) diambe: “Kioso ki tu bhana mba tu tambula maujitu ni ku ta ithulu mu jinzo jetu ni mu jingeleja phala ku ji fuamesa, ki tuejiia kuila tua mu bhanga kála ki bhanga o ji pagá.”

Maji nange ua mesena kuijiia se o ku bhanga o ima íii kituxi. Tala o kima kia katatu phala kuijiia se kituxi mba kana. Nzambi ka uabhela ku fungisa o ubhezelu ua ji pagá ni ubhezelu ua kidi, ua zele. Bhu kaxi ka polofeta Amoji, Jihova Nzambi uambela o abhezi iê akua Izalaiele, m’ukulu: “O izokola ienu eme ia ng’ibhila’mi, . . . Mitendu ia kuimba kuenu ndénu na-iu dikanga.”—Amoji 5:21, 23.

Mukonda diahi Nzambi uambe kiki? Tala o ima ia kexile mu bhanga o mundu ua Izalaiele m’ukulu. O sobha iâ ia dianga, Jelobouamu, ua iudikile ngombe jiiadi ja ulu, ua tula imoxi mu mbanza ia Betele o ia mukuá ua i tula mu Dane iu ua suínisa o mundu ku bheza o iteka íii mu veji dia ku bheza Jihova mu tembulu ia kexile mu Jeluzaleme. O sobha ua bhange ué ji fesa iu ua solo akunji phala ku kuatekesa o mundu ku bhanga o ji fesa jiji.—1 Jisobha 12:26-33.

O ima ia bhangele akua Izalaiele ki iexile ia iibha kana. Mukonda ene akexile mu bhanga o ima ienioio mu dijina dia Nzambi, a mesenene ku bhanga o vondadi iê. O ia tange Nzambi bhu kaxi ka Amoji ni ji polofeta ja mukuá ilondekesa kiebhi kia divu muéne mu ku mona o ima íii. Bhu kaxi ka polofeta Malakiia, Nzambi uambe: “Eme Jihova, ki ngi lunguluka.” (Malakiia 3:6) O kuila kiki ki ki tu kuatekesa kuijiia kiebhi Nzambi kiene mu divua mu ku mona o maukexilu alungu ni fesa ia Natale?

Mukonda dia kuijiia o ima íii, ji midi ni ji midi ja athu a dituna ku bhanga o fesa ia Natale. Ene a sanguluka kiavulu mu ku kala ni makamba mâ ni muiji ni ku kuatekesa ió a bhindama mu kizuua kioso-kioso ku muvu.