DIAMBU DIA KAPA | EIE U TENA KU KALA U DIKAMBA DIA NZAMBI
O Kuila Uene mu Zuela ni Nzambi?
O makamba a kidi, a di kunda izuua ioso, ki kale pholo ni pholo, bhu kaxi ka mutelembe ua kafuetele, vidiu mba bhu kaxi ka mikanda. Kienhiki, phala tu tene ku kala ni ukamba uambote ni Nzambi, tua tokala kuzuela nê izuua ioso. Maji kiebhi ki tu tena o ku bhanga kiki?
Tu tena kuzuela ni Jihova bhu kaxi ka musambu. Maji o kuzuela ni Nzambi, ki ku difuangana ni kuzuela ni muthu, soko dietu. Tua tokala kuijiia kuila, kioso ki tu samba, tua mu zuela ni Mubhangi uetu, o Suke-ku mu ngongo ioso. Kienhiki, tua tokala ku samba ni ujitu ni ku xila kuoso. Phala Nzambi kuívua o musambu uetu, saí itumu i tua tokala o ku belesela. Tua-nda di longa itumu itatu.
Kia dianga, tua tokala ku samba ngó kua Jihova Nzambi—ki tu tokala ku samba kua Jezú, ku “jisandu,” mba ku kiteka. (Makatukilu 20:4, 5) O Bibidia i zuela: “Ima ioso-phe iiza-ku, mu ila ni kusamba ni kudionda, kumoxi ni kusakidila, mu ende ni kubhinga kua Nzambi ioso i mua mesena.” (Filipe 4:6) Kia kaiadi, tua tokala ku samba mu dijina dia Mon’â Nzambi, Jezú Kristu. Jezú uambe: “Kana muthu u bhixila kua Tata, ua kambe kuijila ko kuami.” (Nzuá 14:6) Katatu, Nzambi ua tokala ku uabhela o ima i tu mu bhinga. O Bibidia i zuela: “Kima kioso ki tu mu bhinga, se kia xikina mu vondadi iê, muène u tu ivua.” *—1 Nzuá 5:14.
O makamba a uabhela kiavulu ku di kunda izuua ioso
Mu kidi, se muthu umoxi ngó ua mu zuela o mukuá kana, o ukamba ki u uabha kana. Kala o muthu ua uabhela kioso kia mu zuela o mukuá u muivua, tua tokala ué kuehela Nzambi kuzuela ni ku muivua kioso muéne kia zuela. Uejiia kiebhi Nzambi kia zuela n’etu?
Lelu, Jihova Nzambi “u zuela” n’etu bhu kaxi ka Maka mê, o Bibidia. (2 Timote 3:16, 17) Mukonda diahi tua mu zuela kiki? Tala o kifika kiki: Xinganeka kuila a ku tumikisa mukanda kuala kamba diê dia kazola. Kioso ki ua-nda zubha o ku u tanga, ni ku sanguluka kuoso ua-nda tangela akuenu, “Ng’evu ia zuela kamba diami!” Maji ki mua di zuelesa ni dikanu kana, mua di zuelesa bhu kaxi ka mukanda. Kiene kimoxi ué, kioso ki u tanga o Bibidia, ua mu bhana kithangana kua Nzambi phala muéne u zuele n’eie. Gina, tua mu tange kiá ku milongi ia dianga, uambe: “Mu diami, se nga mesena kuila Nzambi u kala dikamba diami, nga tokala ku tanga o ‘mukanda’ ua tu sonekena muéne—o Bibidia.” Gina ua zuela dingi: “O ku tanga o Bibidia izuua ioso, i ngi zukamesa dingi kua Nzambi.” O kuila eie ua mu kuehela Jihova kuzuela n’eie mu ku tanga o Bibidia izuua ioso? O ku bhanga kiki, kia-nda ku kuatekesa ku zukama dingi kua Nzambi.
^ kax. 5 Phala kuijiia dingi ia lungu ni kiebhi ki tu tena ku zukama kua Nzambi mu ku samba, tanga o Kibatulu kia 17 kia divulu, Mu Kidi Ihi i Longa o Bibidia?
Eye Nange Wandawabhela we o Maka Yá
O MULANGIDI
O Kuila Uene mu Bhanga i ku Bhinga Nzambi?
Kima kiambote ku belesela Nzambi, maji tua bhingi dingi ku bhanga kima kiéngi phala tu tene ku kala tu makamba mê.
IBHWIDISU YA BIBIDYA YO TAMBWIJILE
O Kwila Nzambi Wa-nda Ngi Kwatekesa se Ngi mu Bhinga mu Musambu?
O kwila Nzambi u suwa o ibhindamu yetu?
