DIAMBU DIA KAPA | EIE U TENA KU KALA U DIKAMBA DIA NZAMBI
O Kuila Uene mu Divua Kuma ua Zukama Kua Nzambi?
“O ku kala ni ukamba uambote ni Nzambi, u bhangesa o muthu ku divua kiambote ni ku tenena. Ki bhita kála Nzambi ua mu ku tala tunde ku diulu phala ku ku langa.”—CHRISTOPHER, MUNZANGALA MUKUA GHANA.
“Nzambi u mona kioso ki ua mu bhita mu ibhidi, muéne u ku kuatekesa, u ku zola ni ku ku suua.”—HANNAH, UALA NI 13 KIA MIVU, MUKUA ALASKA, ESTADOS UNIDOS.
“O kibanzelu kia beta-o-kota ki kala na-kiu o muthu, o kuijiia kuila muéne uala ni ukamba uambote ni Nzambi!”—GINA, MUHATU MUKUA JAMAICA, UALA MU KITALA KIA 40 A MIVU.
Christopher, Hannah ni Gina kene ngó ene mu divua kiki, kuene dingi athu avulu. Athu avulu mu ngongo a xikina ni kidi kioso kuila Nzambi u a mona kala makamba mâ. Abha eie? Uene mu divua kála u dikamba dia Nzambi? Inga ua mesena ku kala u dikamba diê? Nange u dibhuidisa, ‘O kuila o muthu mukua ituxi u tena ku kala dikamba dia Nzambi, Muteni-a-Ioso? Kiki ki bhita kiebhi?’
MUTHU UOSO-UOSO U TENA KU KALA DIKAMBA DIA NZAMBI
O Bibidia ilondekesa kuila, tu tena ku zukama kua Nzambi ni ku kala tu makamba mê a kazola. O Bibidia i tu tangela kuila Nzambi uexana Mbalahamu, “kamba diami.” (Izaia 41:8) Tala ué o kixanu kiala mu divulu dia Tiiaku 4:8, diambe: “Zukamenu kua Nzambi, muène u mi zukama enu.” O izuelu íii i tu londekesa kuila, muthu uoso-uoso u tena ku kala ni ukamba uambote ni Nzambi. Maji kiebhi o muthu kia tena ‘ku zukama kua Nzambi’ ni ku kala dikamba diê se muéne muthu mu nzumbi?
Phala ku tambuijila o kibhuidisu kiki, tala ihi i bhinga phala athu kiiadi ku kala makamba. Phala athu kiiadi ku kala makamba, kia dianga a tokala ku di jidisa o majina. Kaiadi, a tokala ku di kunda izuua ioso phala ku dijiia kiambote. Kioso kia kala mu di kuatekesa mudiâ ni ku di bhanga mbote, o ukamba uâ ukola dingi. Kiene ué ki bhita mu ku sota ku kala ni ukamba ni Nzambi. Tu mone se kiki ki bhita kiebhi.
Eye Nange Wandawabhela we o Maka Yá
O MULANGIDI
O Kuila Uejiia o Dijina Dia Nzambi ni ku di Tumbula?
Mu kaxi ka Bibidia, Nzambi uíza ko kuê phala u muijiie, muéne u zuela: “Eme ngi Jihova, didi diene o dijina diami.”
