O Bibidia i tu tangela kuila ku dizubhilu kua-nda kala kibuika kia ima. O Bibidia iamba kiki: “Thembu ioio o phaxi iê, kiluua ngó i kala-ku, tunde ku dimatekenu dia’xi katé ni kiki . . . Maji o Ngana Nzambi, mbata o izuua ienhoio, se a kamba ku i tolesa, kana xitu i bhuluka.” (Matesu 24:21, 22) Maji Nzambi u tu kanena kuila athu avulu a-nda bhuluka: “O mundu-phe u buila . . . Maji uoso-phe u bhanga o vondadi ia Nzambi, ió muène o muthu u nangenena.”—1 Nzuá 2:17.

Se ua mesena ku bhuluka ku dizubhilu dia mundu ni ku “nangenena,” ihi i ua tokala o ku bhanga? O kuila ua tokala ku mateka ku bhaka kudia, mba ku bhanga ima ia mukua? Kana. O Bibidia i tu tendelesa ku bhanga kima kiengi. O Bibidia izuela: “O ki tua monu’iki, kuma ima ioso iii ia kà buila, tua fuama etu tu kala tu athu a kidifua kiahi? Mu kuuabha uendelu, mienhu ienu ia fuama mu i bhakula mu kuzela, ni uôma ua Nzambi. Mu kale mù tala, mu kale mu kinga o Kizuua kia Nzambi.” (2 Phetele 3:10-12) O jivelusu ja mukuá ji londekesa kuila o “ima ioso iii” ia ka buila, o jinguvulu ja mundu jene mu tumina o mundu ni athu oso a sola ku a tumina ku jinguvulu jiji mu veji dia ku sola ku a tumina kua Nzambi. Se tua mu bhaka ima, tua tokala kuijiia kuila o ima íii ki ia-nda tu bhulula ku kibuika kiki.

Mu kidi o ku bhuluka kuetu ku bhinga ku di bhakula kua Jihova Nzambi ni ku di longa o ukexilu ua mu uabhela. (Sofoniia 2:3) Mu veji dia ku kaiela o ima i bhanga o athu ni ku bhanga poko ku ijimbuete ilondekesa kuila tuala mu izuua isukidila-ku, tua tokala ku “kinga o Kizuua kia Nzambi.” O Jimbangi ja Jihova a tena ku kulondekesa mu Bibidia kiebhi ki u tena ku bhuluka ku kizuua kiki kia dikota kia mu kuiza.