1. Kiebhi Jihova kia divua ia lungu ni ku kalakala, ni ihi i bhanga muéne?

JIHOVA u sanguluka ni kikalakalu kiê. (Jisálamu 135:6; Nzuá 5:17) Muéne ua mesena kuila, o ji anju ni athu a katula mbote ku ikalakalu iâ, mukonda dia kiki, u a bhana kikalakalu ki a bhangesa ku sanguluka. Jihova ua kalakala kumoxi ni Mon’ê phande kumbi, mu ibhangelu Iê ioso. (Tanga Kolose 1:15, 16.) O Bibidia iamba kuila, ande dia Jezú kuíza mu ixi, muéne ua kexile kumoxi ni Nzambi ku diulu kala “dixibulu diê.”—Jisabhu 8:30.

2. Kiebhi ki tuejiia kuila o ji anju ene mu bhanga ikalakalu iambote i sangulukisa?

² Tundé ku divulu dia Dimatekenu katé ku divulu dia Dijingunuinu, o Bibidia ilondekesa kuila, Jihova uene mu bhana ikalakalu ku ji anju. Kioso Adá ni Eva kia bhukumukina Nzambi, a a kaie mu Palaízu, mu kiki, Nzambi ua bhana kikalakalu ku ji anju. O divulu dia Dimatekenu di zuela kuila, Nzambi “u ta jixelube ku mutundila-kumbi ua kadíbhia ka Edene, ni xibhata ia mulengu u lunga kuku, u lunga koko, mu kuxita o njila iia ku muxi ua muenhu.” (Dimatekenu 3:24) O divulu dia Dijingunuinu diamba kuila, Jihova “ua tumu anju  iê kuidikiza selevende jê o ima i bhinga i bhita kindala.”—Dijingunuinu 22:6.

3. Kiebhi Jezú kia kaiela o phangu ia Tat’ê, kioso kia kexile mu ixi?

³ Kioso Jezú kia kexile mu ixi, muéne ua kumbidila o kikalakalu kia mu bhanene Jihova ni ku sanguluka kuoso. Muéne ua kaiela o phangu ia Tat’ê, mu ku bhana kikalakalu kiala ni valolo iavulu ku maxibulu mê. Jezú ua suínisa o maxibulu mê mu ku a tangela: ‘Kidi kiene, ngi mi ambela: Uoso ua ngi xikana eme, ikalakalu i nga mu bhanga eme, muéne ué u i bhanga, katé u bhanga ue hanji ia tundu, mukonda eme nga muia kua Tata.’ (Nzuá 14:12) Jezú ua kuatekesa o maxibulu mê kuijiia kuila, o kikalakalu kia bhingile ku ki bhanga ni lusolo, kioso kiambe: “Kioso ki kuala hanji muanha, kia ngi bhingi kubhanga o ikalakalu ia ió ua ngi tumu. Mukonda usuku iú uiza, mua bhingi kana muthu utena kukalakala-mu.”—Nzuá 9:4.

4-6. (a) Mukonda diahi tu sakidila Noué ni Mozé mu ku belesela o ima ia a tumine Jihova? (b) Mbote jahi jiiadi, ji bheka o kikalakalu kia bhana Nzambi ku athu?

⁴ Mu ku bhita kithangana, ande dia Jezú kuíza mu ixi, Jihova ua bhanene kikalakalu kiambote ku athu. Né muene Adá ni Eva ka zubhile ku kumbidila o kikalakalu kia bhanene Nzambi, maji saí athu avulu mu ixi, a kumbidila o kikalakalu kia a bhanene kua Nzambi. (Dimatekenu 1:28) Jihova ua bhanene itendelesu ia tokala kua Noué, phala ku tunga o álaka, phala muéne ni muiji uê ku bhuluka ku Dilúvio. Noué ua kumbidila ioso ia tumine Jihova. Etu lelu, tuala ku muenhu mukonda, muéne ua kaiela o itendelesu ioso ia Jihova.—Dimatekenu 6:14-16, 22; 2 Phetele 2:5.

⁵ Jihova ua bhanene itendelesu kua Mozé, ia lungu ni kiebhi kia tokalele ku tunga o balaka, ni kiebhi kieji pelepalala o akunji. Mozé ua bhangele o ima ioso, kala kia mesenene Jihova. (Makatukilu 39:32; 40:12-16) Ihi i tu tena o ku di longa, ia lungu ni kikalakalu ni ku belesela kua Mozé? Kala kiambe poxolo Phaulu, o balaka ni ukunji, ua kexile mu lombolola o ‘ima iambote ieji bhita ku hádia.’—Jihebeleu 9:1-5, 9; 10:1.

⁶ Kioso kiia ni ku di kumbidila o vondadi ia Nzambi, o jiselevende jê a tambula ikalakalu ki i difu. Maji né muene se o ikalakalu i lunguluka, iene i sidivila phala ku bhana kijingu kua Jihova ni ku sangulukisa o athu. Kiki, kiene kia bhitile ni kikalakalu kia bhangele Jezú, ande dia kuíza mu ixi ni kioso kiexile mu ixi. (Nzuá 4:34; 17:4) Kioso ki tu bhanga o kikalakalu ki tu bhana Jihova lelu, o kikalakalu kiki, ki mu bhana kijingu kia dikota. (Matesu 5:16; tanga 1 Kolindo 15:58.) Mukonda diahi tu zuela kiki?

7, 8. (a) Jimbulula o ikalakalu i bhanga o Jikidistá lelu. (b) Ihi i tua tokala o ku bhanga kioso Jihova kia tu bhana itendelesu?

⁷ Ujitu ua dikota phala o athu akua ituxi ku kalakala kumoxi ni Jihova, kala akuatekexi. (1 Kolindo 3:9) Saí Jikidistá  ala ni ujitu ua ku kalakala mu ku tunga, kála kia bhangele Noué ni Mozé. Saí jiphange a kuatekesa ku tunga Ididi phala o Iônge ia Makota, Ididi ia Ubhezelu, ni jifiliiale. Ki kale se ua mu kalakala mu ku kuatekesa ku iudika Kididi kia Ubhezelu mu ixi iê, mba ku kuatekesa ku tunga o Mbonge mu sanzala ia Warwick, mu mbanza ia Nova York, bhana valolo ku kikalakalu kiê! (Tala o foto ia dianga ilondekesa o mbonge ia ubhe.) O kikalakalu kiki, kia tokala kua Nzambi. Né muene o Jikidistá joso ka tena ku bhanga o kikalakalu kia ku tunga, maji enoso a bhanga o kikalakalu kia Nzambi. O kikalakalu kiki, o ku boka o njimbu iambote, ki bhana kijingu kua Jihova ni ku bheka mabesá avulu ku athu. (Ikalakalu 13:47-49) O kilunga kia Nzambi, kiendesa o kikalakalu kia ku boka. Nange a tu bhana kikalakalu kiéngi.

⁸ O ji selevende ja fiiele ja Jihova, ene mu belesela o itendelesu ia Jihova ni muxima uoso. (Tanga Jihebeleu 13:7, 17.) Nange ki tu tendela kiambote se mukonda diahi a tu bhana kikalakalu kiéngi, mba itendelesu ia ubhe. Maji tu xikina o ku ki bhanga mukonda tuejiia kuila, Jihova muene u bhana o kikalakalu, ni kuila muéne u tena o ku tu kuatekesa phala o kikalakalu kiki, ki tunde kiambote.

9. Phangu iebhi iambote i bhana o tufunga mu kilunga?

⁹ O tufunga a londekesa o henda iâ kua Jihova, mu ku endesa kiambote o kilunga. (2 Kolindo 1:24; 1 Tesalonika 5:12, 13) O tufunga tuala polondo phala ku kalakala kala kia tokala ni ku belesela o itendelesu, ene a di longa ni lusolo o maukexilu a ubhe a ku boka. Ene a di tunda kiambote kioso kia bhana umbangi bhu kaxi ka mitelembe, mu ididi mu kala o ji baluku, mba mu ikoka, né muene saí iâ, kejiia kiambote se mu ku kaiela o ukexilu iú, o athu a-nda xikina mba kana. Mu kifika, kiuana kia aboki mu ixi ia Alemanha, ai mu boka mu ididi ia ku bhanga o uenji, mua bhangele thembu iavulu se ku bhita-mu muthu phala ku boka. Phange imoxi a mu ixana Michael, ua thandanganhele kiavulu mukonda ua bhangele mivu iavulu, nuka dingi ua bokele mu ukexilu iú. Muéne uambe: “Nange Jihova ua monene o ku thandanganha kuami, mu kiki muéne ua tu kuatekesa ku bhanga kiambote o sidivisu ietu ia ku boka. Tua sangulukile kiavulu mu ku kaiela o itendelesu i tua tambula bhu kaxi ka Kikalakalu Kietu Kia Utuminu, ni ku dielela ku kikuatekesu kia Jihova!” O kuila eie ua mesena ku boka mu ukexilu ua ubhe mu mbambe iê?

10. Ima iahi ia lunguluka mu kilunga kia Jihova ku mivu ia sukina?

¹⁰ Saí ithangana, o ima i lunguluka ku  Betele. Mu kifika, ku mivu ia sukina, o ikalakalu ia kexile mu bhanga mu jifiliiale jofele, a mateka ku i bhanga mu ji jifiliiale ja mukuá ja makota. Kiki, kia bhangesa ku lungulula ué o ikalakalu ia jiphange akexile mu kalakala mu ji filiiale jiji. Ene a tokalele ku lungulula o ima, maji mu ku bhita kithangana, ene a mona o mbote ia ku lungulula. (Ndongixi 7:8) O akalakadi iâ, a sanguluka mu ku bhanga mbandu ku musoso ua mundu ua Jihova lelu!

11-13. Ibhidi iahi ia di bhana na-iu o jiphange, mukonda dia ku lungulula o ima mu kilunga kia Jihova?

¹¹ Tu tena ku di longa ima iavulu ia lungu ni jiphange a sidivila mu jifiliiale jofele, a ji bundu ni ja makota. Jiphange javulu ja mala ni ja ahatu, a sidivila mu jifiliiale jiji, mivu iavulu. Saí dikaza a sidivile mu Betele io fele, a a tumikisa ku ixi ia México, mua kexile ji Betelita javulu, o mu Betele ia ixi iâ ndenge. O diiala a mu ixana Rogelio, uambe: “Kia bhonzele kiavulu ku xisa o jindandu ni makamba.” Juan ua kalakala ku Betele, a mu tumikisa ué ku ixi ia México, muéne ua divu kala ua kexile mu mateka kindala o ku kalakala mu sidivisu íii. Muéne uambe: “Ki bhinga ku sota makamba engi, kuijiia ijila ia ubhe ni ku kala ni ukexilu uéngi ua ku banza.”

¹² Kioso kia bundu ji filiiale javulu ku Europa, jiphange javulu a kalakalele ku Betele a a tumikisa ku Betele ia Alemanha. Ene a di bhana ué ni ibhidi iavulu, mukonda ki bhonza kiavulu ku xisa o ixi mua tu vualela. Saí jiphange a tundu mu ixi ia Suíça, a kala ni vondadi ia ku mona o Milundu ia uabha, o a tundu mu ixi ia Áustria, a kala ni ngunzu ia ku bhanga mbandu ku muiji uófele ua Betele.

¹³ Jiphange ja mala ni ja ahatu, a a tumikisa ku jifiliiale mu ixi iéngi, a bhinga ku lungulula ima iavulu. Ene a sanga inzo ia ubhe, ji koleka ja ubhe, nange ni kikalakalu kia ubhe. Ene a kala ué mu kilunga kia ubhe, mbambe ia ubhe nange ni dimi dia ubhe. O ku bhanga o ima ioso íii, ku bhonza kiavulu, maji jiphange javulu akua Betele, a bhange kiki ni ku sanguluka kuoso. Mukonda diahi ene a bhange o ima íii? Tua-nda kuívua ihi ia tu tangela ene.

14, 15. (a) Kiebhi o athu kia londekesa kuila a bhana valolo ku ujitu ua ku kalakala kumoxi ni Jihova? (b) Mu ukexilu uebhi ene phangu iambote phala etu?

¹⁴ Grethel Uambe: “Eme nga xikina kuia mu ixi iéngi, mukonda, kiexile kithangana kia kulondekesa kua Jihova, kuila o henda iami kua muéne ia betele kota, o ixi mba kididi kioso-kioso ndenge.” Dayska uambe: “Kioso ki nga mono kuila, Jihova muéne ua kexile mu ngi tumikisa, nga xikina ni ku sanguluka kuoso.” André ni Gabriela ambe: “Tua mono o kikalakalu kiki, kala kithangana kia ku sidivila Jihova, mu veji dia ku bhanga o vondadi ietu.” Ene a mona kuila, kioso o kilunga kia Jihova ki lungulula o ima, kima kiambote o ku belesela, mu veji dia ku dituna ku bhanga o kikalakalu.

¹⁵ Kioso o jifiliiale kia ji bundu,  jiphange ja mukuá a sidivila ku Betele, a a tumikisa phala ku sidivila kala aboki a thembu ioso. Kiki kiene kia bhiti ni jiphange javulu akua Betele, kioso kia bundu o jifiliiale ja ixi ia Dinamarca, Noruega, ni Suécia, ia a bhange filiiale imoxi ia Escandinávia. Saí dikaza a exana mu dijina dia Florian ni Katherine ambe: “Etu tua mono o kikalakalu kietu kia ubhe, mu ukexilu uambote, né muene ni ibhidi. Kisangusangu kia di kota phala etu, ku sidivila Jihova, kabasa kididi. Tu tena ku zuela ni muxima uoso kuila, Jihova uene mu tu besoala kiavulu!” Né muene avulu mudietu ka tena ku bhanga o ima iene mu bhanga o jiphange jiji, maji tu tena ku kaiela o phangu ia jiphange jiji, a bhanga ioso phala ku ta ku pholo o ima ia lungu ni Utuminu. (Izaia 6:8) Tu tena ku dielela ni muxima uoso kuila, Jihova ua-nda besoala oso a bhana valolo ku ujitu ua ku kalakala kumoxi ni muéne, kabasa kikalakalu kia tambula.

16. (a) O divulu dia Ngalásia 6:4 di tu jimbulula ihi? (b) Ujitu uebhi ua beta kota u tuala nau?

¹⁶ Mukonda tu akua ituxi, saí ithangana tu di sokesa ni akuetu. Maji o Mak’â Nzambi a londekesa kuila, tua tokala ku bhana valolo ku íii i tu tena o ku bhanga. (Tanga Ngalásia 6:4.) Ko athu oso a tena ku kala tufunga, aboki a thembu ioso, akunji mu jixi jengi mba ku kalakala ku Betele. Sumbala iá maujitu a dikota, maji o ujitu ua beta kota, etu enoso tuala nau. O ujitu iú, o ku kala muboki ua njimbu iambote, mba ku kalakala kumoxi ni Jihova. Tua tokala ku bhana valolo iavulu ku ujitu iú!

17. Ibhidi iebhi iene mu bhita ku mundu iú ua iibha? Mukonda diahi ki tu tokala ku luuala kiavulu?

¹⁷ Ku mundu iú ua iibha, nange ki tu tena ku sidivila Jihova mu ukexilu u tua mesena. Nange tu bhita ni ibhidi ia dikota kala o kikalakalu ku muiji mba uhaxi. Maji né kiki, ki tu tokala ku luuala. Ibhidi  ioso-ioso i tu di bhana na-iu, ki i tena ku tu fidisa ku boka ia lungu ni dijina dia Jihova ni ia lungu ni Utuminu uê. O kima kia beta kota, o ku bhanga ioso i tu tena phala Jihova, ni ku samba phala muéne ku kuatekesa ió a tena ku bhanga dingi mu kikalakalu kiê. Lembalala kuila, Jihova u bhana valolo iavulu ku muthu u ximana o dijina diê!

18. Ihi i tu tena ku kingila ku tambula ku hádia, maji ujitu uahi u tuala nau kiá lelu?

¹⁸ Né muene tu akua ituxi, maji Jihova u tu ehela ku kalakala kumoxi ni muéne. Ujitu ua dikota, o ku kalakala kumoxi ni Nzambi mu izuua íii i sukidila-ku! Tua tokala ku tala ku pholo ni ku kingila o kithangana ki tua-nda tambula “o muenhu ua kidi,” ni ku sanguluka mu ukexilu ki tu tena ku kala nau lelu. Kua kambe ngó bhofele, Jihova ua-nda ku tu besoala ku mundu ua ubhe ni ku tu bhana o ku sanguluka ni kutululuka mu ixi.—1 Timote 6:18, 19.

19. Ima iahi iambote ia tu kanena Jihova ku hádia?

¹⁹ Kua kambe ngó bhofele, o mundu ua ubhe ua kanena Nzambi ua-nda kuíza. Tu xinganeke mu ima ia zuela Mozé, ande dia mundu ua Izalaiele ku bokona mu Ixi ia a Kanene: “Jihova Nzambi ié ua-nda ku ku izalesa ni jimbote mu ikalakalu ioso ia maku mé.” (Matendelelu 30:9) Kioso kia-nda bhita o ita ia Alumajedone, Jihova ua-nda bhana o ixi ku athu oso ene mu kalakala kumoxi ni muéne, kala kia ki kanena. Mu kiki, tua-nda kala ni kikalakalu kia ku bhanga o ixi ku kala palaízu!