1. Kiebhi ki tu tena ku kuatekesa o athu bhu kaxi ka musambu ua Jezú, u tu sanga mu divulu dia Matesu 6:9-13, kioso ki tu boka o njimbu?

ATHU avulu ejiia kiambote o izuelu ia musambu i tu sanga mu divulu dia Matesu 6:9-13. Kioso ki tu boka o njimbu, tu tumbula o izuelu ia musambu iú phala ku longa o athu kuila, o Utuminu, unguvulu ua kidi ua Nzambi, ua-nda bhangesa o ixi ioso ku kituka palaízu. Tu tumbula ué o izuelu, “dijina dié a dixile,” phala ku londekesa kuila, Nzambi uala ni dijina, ni kuila, tua tokala ku mona o dijina didi kala dijina di kôla.—Matesu 6:9.

2. Kiebhi ki tuejiia kuma, Jezú ka mesenene kuila, tu bhitulula o izuelu iê kioso ki tu samba?

² O kuila Jezú ua mesenene kuma, tu bhitulula o izuelu iê mu misambu ietu, kala kiene mu bhanga athu avulu? Kana. Jezú uambe: “Mu kusamba ue kana kubuabuala ngó.” (Matesu 6:7) Mu kithangana kia mukuá, kioso kia kexile mu longa o maxibulu mê kusamba, muéne ua vutuila o musambu, maji ua tumbula izuelu iéngi. (Luka 11:1-4) Mu kiki, Jezú ua kexile mu longa o ukexilu uambote ua kusamba, ni ku longa o ima i tu tena ku bhinga mu musambu.

3. Ibhuidisu iebhi i u tena ku bhanga mu ku di longa o musambu ua tu longo Jezú?

 ³ Mu milongi íii, ni ia-nda kaiela, tua-nda di longa kiambote o musambu ua tu longo Jezú. Tu tena ku dibhuidisa: ‘Kiebhi o musambu iú u tena ku ngi kuatekesa kusamba kiambote? Kiebhi ki ngi tena ku kumbidila o musambu iú ku muenhu uami?’

4. O izuelu “Tata ietu,” i tu lembalesa ihi, ni mu ukexilu uebhi Jihova Tata ietu?

⁴ Jezú ua mateka o musambu uê mu ku zuela: “Tata ietu.” Kiki, ki tu lembalesa kuila, Jihova, muene o Tata ia jiphange jetu ku mundu uoso. (1 Phetele 2:17) O athu a a solo kua Jihova phala kuia ku diulu a kala an’ê, mu kiki, muéne Tata iâ mu ukexilu ua katunda. (Loma 8:15-17) O athu a-nda tambula o muenhu ua kalelaku mu ixi, a tena ku mu ixana ué, “Tata.” Jihova u a bhana o muenhu ni ku dikila o ibhindamu iâ ni henda ioso. Ene a-nda ku a exana “an’ a Nzambi,” kioso kia-nda kala athu a iuka ni ku londekesa o ufiiele uâ kua Jihova mu polova ia sukina.—Loma 8:21; Dijingunuinu 20:7, 8.

5, 6. Ujitu uebhi ua beta kota, u tena kubhana o jitata ku tuana tuâ, ni ihi ia tokala ku bhanga o tuana ni ujitu iú? (Tala o foto ia dianga.)

⁵ O jitata a bhana ujitu ua dikota ku an’ê, kioso kia kuatekesa o ana kuijiia kuila, Jihova muene o Tata iâ ia diulu, ni kioso kia a longa o kusamba. Saí kafunga ka ilunga mu ixi ia África do Sul uambe: “Tundé ki tua vuala an’etu, nga kexile mu samba kumoxi ni ene mu mausuku oso u nga kexile ku bhata. O an’etu a zuela kuila, ka di lembalala o izuelu ia misambu i nga kexile mu bhanga mu usuku. Maji ene a di lembalala o ukexilu uetu uambote ni mbote ijila mu ku zuela ni Tata ietu, Jihova, ni kutululuka ni kukondama ku tua kexile na-ku. Kioso kia mateka ku kula, nga a suínisa kusamba ni dízui dia suína, ni ngi tene ku a evua kuzuela kua Jihova o ima ia kexile mu banza ni kiebhi kia kexile mu divua. Kiexile kithangana kia tokala phala kuijiia o ima ia kexile ku mixima iâ. Mu ku suluka, ni henda ioso, nga kexile mu a kuatekesa ku kaiela o jindunge ja musambu ua tu longo Jezú, n’a tene ku bhanga misambu iambote.”

⁶ Kioso an’ê kia kulu, ene a kolokota ku zukama kua Jihova. Ene a kazala kiá, maji a mu sidivila Jihova mu sidivisu ia thembu ioso kumoxi ni anumi’â. O ujitu ua beta kota u tena kubhana o jitata ku tuana tuâ, o ku a longa kuila, Jihova Muthu ua kidi, ni ku a londekesa kuila, ene a tena ku mu zukama ni ku kituka makamba mê. Maji o tuana, a tokala ku suínisa o ukamba uâ ni Jihova.—Jisálamu 5:11, 12; 91:14.

7. Ujitu uebhi u tuala nau, maji ihi i tua tokala o kubhanga?

⁷ Etu tuala ni ujitu ua kuijiia o dijina dia Nzambi, ni ku kala “mundu uê uangene mu dijina diê.”(Ikalakalu 15:14; Izaia 43:10) Etu tuene mu samba mu ku zuela kuila, “dijina dié a dixile,” phala o athu a xile o dijina didi, ni di kale dijina dikôla. Tuene mu bhinga ué o kikuatekesu kia Jihova, phala ki tu bhange kima mba ku kuzuela kima ki tena ku xidisa o dijina diê. Ki tu tokala ku kaiela o ukexilu ua athu a mukuá a tungile ku hama ia dianga, ka kexile mu kumbidila o ima ia kexile mu longa akuâ. Phaulu ua a sonekena:  “Mukonda dienu, enu mu Jijudé, o dijina dia Nzambi a di xingi mu’axaxe ka matumbu.”—Loma 2:21-24.

8, 9. Bhana phangu ilondekesa kiebhi Jihova kia kuatekesa o athu a mesena ku zelesa o dijina diê.

⁸ Etu tu bhanga ioso, phala ku jingisa o dijina dia Jihova. Saí phange ia muhatu mu ixi ia Noruega, muadi uê uafu kioso mon’ê ua kexile ni mivu iiadi. Muéne uambe: “Kiki kiexile kithangana kia bhonzo ku muenhu uami. Nga kexile mu samba izuua ioso, mu ola joso, mu ku bhinga nguzu phala ngi tene ku batama muxima, ni kukolokota mu ku batula kiambote o maka, mukonda ki nga mesenene kuehela Satanaji ku ngi diangula, n’a xonguena Jihova. Nga mesenene ku zelesa o dijina dia Jihova, nga mesene ué kuila, mon’ami u mona tat’ê mu Palaízu.”—Jisabhu 27:11.

⁹ O kuila Jihova ua tambuijila o misambu iê? Ua tambuijila. Mukonda dia ku bhita thembu iavulu ni jiphange, muéne ua tambula o kikuatekesu kia tokala. Mu ku bhita mivu itanu, muéne ua kazala ni kafunga. Mu kindala kiki, mon’ê uala ni 20 a mivu, a mu batizala kiá. Muéne u zuela: “Nga sanguluka kiavulu, mukonda muadi uami ua ngi kuatekesa ku mu sasa.”

10. Kiebhi Nzambi kia-nda zelesa o dijina diê?

¹⁰ Jihova ua-nda zelesa kiambote o dijina diê, kioso kia-nda buika o athu oso a xidisa o dijina diê, ni ió a dituna o Unguvulu uê. (Tanga Izekiiele 38:22, 23.) Mu thembu ienioió, oso mu ixi a-nda kituka athu a iuka, mu kiki, athu oso ku diulu ni mu ixi, a-nda bheza ngó Jihova, ni kuximana o dijina diê dikôla. Mu ku suka-ku, o Tata ietu ia henda ua-nda “tumina sé mbambe ku thandu dia ima ioso.”—1 Kolindo 15:28.

11, 12. Ku muvu ua 1876, Jihova ua kuatekesa o mundu uê kuijiia ihi?

¹¹ Ande dia Jezú ku vutuka ku diulu, o maxibulu mê a mu ibhuidisa: “Ngana, thembu iíi iene eie i uanda kubheka-ku dingi o usobha ua Izalaiele?” Jezú ua a tangele kuila, ki kiexile hanji o kithangana kia tokala phala ene kuijiia o thembu ieji mateka o Utuminu ua Nzambi. Muéne ua tendelesa o maxibulu mê ku suína mu ku bhanga o kikalakalu kia ku boka. (Tanga Ikalakalu 1:6-8.) Maji muéne ua a longo ué o kusamba, phala o Utuminu ua Nzambi uíze, ni ku kingila o kithangana kieji kuíza. Mukonda dia kiki, etu ué tuene mu samba phala o Utuminu, uíze.

¹² Kioso kia zukamene o kithangana kia Jezú ku mateka ku tuimina ku diulu, Jihova ua kuatekesa o mundu uê kuijiia o muvu ueji bhita o ima íii. Ku muvu ua 1876, o phange Charles Taze Russell ua soneka milongi mu dimi dia kingileji, ni diambu: “O Thembu ia Ifuxi: Ia-nda Bhua Thembu Kuxi?” muéne ua jimbulula kuila o “sambuadi dia jithembu,” mu divulu dia Daniiele iene imoxi ni “thembu ia akua jixi jengi,” ia kanena Jezú. O milongi ia jimbulula kuila, o thembu íii ieji bhua ku muvu ua 1914. * (Tala ku luiji.)—Daniiele 4:16; Luka 21:24.

13. Izulukutu iebhi ia bhiti ku muvu ua 1914, ni ihi ilondekesa o izulukutu iene mu bhita tundé ku muvu ua 1914?

¹³ Ku muvu ua 1914, o ita ia dikota ia mateka ku jixi ja Europa, ia di muange ku mundu uoso. Mukonda dia ita, o nzala ia di bandekesa. Kioso kiabhu o ita ku muvu ua  1918, o uhaxi ua kixinda, ua beta ku jibha athu avulu, o ita ia bhitile ndenge. O izulukutu ioso íii, ia bhangele mbandu ku “Kijimbuete” kia tangele Jezú. O ijimbuete íii, ia londekesa kuila, Jezú a mu tumbika ku Usobha ku diulu ku muvu ua 1914. (Matesu 24:3-8; Luka 21:10, 11) Ku muvu uenhó, muéne ua tundu “ni uzonda ua kuia ni kùluua ni kutolola.” (Dijingunuinu 6:2) Jezú ua kaie Satanaji ni madimonho ku diulu, ni ku a lundumuna mu ngongo. Kioso kia bhiti o izulukutu ioso íii, o kikanenu kia mateka ku di kumbidila: “Lamba dienu mu ngongo ni ku musanza! Mukonda Diabhu ua mi tulukila ni njinda iavulu, kuma muène uejiia kuila o thembu iê ia butu kia.”—Dijingunuinu 12:7-12.

14. (a) Mukonda diahi tua tokala ku samba phala o Utuminu ua Nzambi uíze? (b) Kikalakalu kiahi kia dikota ki tua tokala kubhanga?

¹⁴ O kikanenu mu divulu dia Dijingunuinu mu kibatulu kia 12, ki tu kuatekesa kuijiia se mukonda diahi o izulukutu íii, ia mateka kioso Jezú kia mu tumbika kala Sobha ia Utuminu ua Nzambi. Sumbala Jezú ua mu tumina kiá ku diulu, maji Satanaji muene ua mu tumina hanji o ixi. Maji kua kambe ngó bhofele, Jezú ua-nda “kutolola” o jinguma jê, ni ku zubha o kuiibha kuoso kuene mu ixi. Maji, kioso ki tuia ni ku kingila o kithangana kiki, tua tokala ku kolokota ku samba phala o Utuminu ua Nzambi uíze ni ku suína mu ku boka o njimbu ia lungu ni Utuminu. O kikalakalu kiki, ki kumbidila o kikanenu kia bhangele Jezú, kioso kiambe: “O Njimbu iíi Iambote ia Utuminu ua Nzambi, ia bhingi ku i tula mu ngongo ioso, mu kubhana umbangi ku akua jixi joso; kiene kiua kia kèza dizubhilu.”—Matesu 24:14.

15, 16. O kuila kua bhingi ngó kusamba, phala o vondadi ia Nzambi a i bhange mu ixi? Jimbulula.

¹⁵ Mu 6.000 ja mivu ku dima, o vondadi ia Nzambi akexile mu i bhanga mu ixi.  Kiki kiene kia bhangesa Jihova ku zuela kuila, ima ioso ‘ia uabha muene kiavulu.’ (Dimatekenu 1:31) Mu ku suluka, Satanaji ua bhukumukina Jihova, mu kiki tundé mu thembu ienioió, kuene athu avulu kene mu bhanga o vondadi ia Nzambi. Maji lelu, kuene mazunda a nake a athu ndenge, ene mu sidivila Jihova. Ene a samba mu ku bhinga kuila, o vondadi ia Nzambi a i bhanga mu ixi, ene a bhanga uá o vondadi ia Nzambi. Ene a di suínisa phala ku kumbidila o milongi ia Nzambi, ni ku boka o njimbu ia Utuminu ku athu oso.

¹⁶ Mu kifika, saí mukunji ua jixi jengi ku África uala ni 80 a mivu, a mu batizala ku muvu ua 1948, uambe: “Ngene mu samba phala tu tene ku sanga o athu oso a difu kála jimbudi, n’a tene kuijiia Jihova ande dia kuíza o dizubhilu. Ngene mu bhinga ué o unjimu, kioso ki nga mesena ku bhana umbangi, phala ngi tene ku tula o kidi kia Nzambi ku muxima ua muthu. Ngi samba ué kua Jihova phala ku tu kuatekesa mu nguzu i tu bhanga phala ku langa kiambote, o athu u tua sange kiá, a difu kála jimbudi.” O phange íii ia muhatu, uene mu kuatekesa athu avulu ku di longa ia lungu ni Jihova. O kuila eie u tena ku xinganeka adiakimi a mukuá, ene mu bhanga o vondadi ia Jihova ni kusuína kuoso?—Tanga Filipe 2:17.

17. Kiebhi ki u divua ia lungu ni ima ia-nda bhanga Jihova ku athu ni ixi?

¹⁷ Tua-nda kolokota ni kusamba phala o vondadi ia Nzambi a i bhange mu ixi, katé Jihova kia-nda buika o jinguma jê mu ixi. Mu ku suka-ku o ixi ia-nda kituka palaízu, athu avulu a-nda ku a fukununa. Jezú uambe kuila, “kumbi dí diza, dia oso ala mu jimbila kuívua o dízui diê, ni kutunda-mu.” (Nzuá 5:28, 29) Xinganeka o kusanguluka ku tua-nda kala na-ku, kioso ki tua-nda tambula o jindandu jetu ni makamba metu a kazola! Nzambi ua-nda “kondona o masoxi moso” ku mesu metu. (Dijingunuinu 21:4) Ku athu a-nda kua fukununa, avulu “athu abhukumuka,” ió afu sé kuijiia o kidi kia lungu ni Jihova ni Jezú. Tua-nda sanguluka kiavulu mu ku longa o kidi kia Nzambi ku athu enhá, n’a tambule o “muenhu ki uábhua.”—Ikalakalu 24:15; Nzuá 17:3.

18. Ihi ia bhindamena o athu?

¹⁸ Kioso kia-nda kuíza o Utuminu ua Nzambi, ua-nda zelesa o dijina diê, mu kiki o athu oso mu ngongo a-nda bheza kumoxi Jihova. Mu kidi, Nzambi ua-nda bhana ku athu mu ixi, o ima ioso ia bhindamena, kioso kia-nda tambuijila o ima itatu i tu sanga mu musambu ua tu longo Jezú. Mu milongi ia-nda kaiela tua-nda di longa o ima ia mukuá ia beta kota ia tu longo Jezú, i tua tokala o ku bhinga mu musambu.