Nzambi ua mesena kuila eie u muijiia kiambote, u kala u kamba diê dia kazola, u mu zola ni ku mu belesela ni muxima oso. (Matesu 22:37, 38; Tiiaku 4:8) Eie u tena kuijiia ihi ia mesena Nzambi ko kuê mu ku di longa o muenhu ni ilongesu ia Jezú. (Nzua 7:16, 17) Jezú ka zuela ngó ia lungu ni ku bhanga o vondadi ia Nzambi; maji uexile ué mu bhanga o vondadi ia Nzambi. Jezú uambele kuila uejile mu ngongo ‘kana mu kubhanga o vondadi iê, maji kubhanga vondadi ia ió uoso ua mu tumu.’— Nzuá 6:38.

O kuila nga bhingi kijimbuete mba nzoji phala kuijiia ihi ia mesena Nzambi ko kuami?

 Kana, mukonda o Bibidia iala ni njimbu ia Nzambi phala athu oso. Iene i tena ku kuatekesa ku “tenena . . . mu kubhanga madimu moso mambote.” (2 Timote 3:16, 17) Nzambi ua mesena kuila eie u tanga o Bibidia ni ‘kilunji kia fuama’ phala kuijiia ihi ia mesena Nzambi ko kuê.—Loma 12:1, 2; Efezo 5:17.

O kuila ngi tena ku bhanga o vondadi ia Nzambi?

 Kiene, u tena, mukonda o Bibidia i zuela: “O ijila iê-phe ki ia bhonzo ku i aluka.” (1 Nzuá 5:3) Maji kiki ki kilombolola kuila ki ku bhingi nguzu ku belesela o ijila ia Nzambi kana. Maji o mabesá u ua-nda tambula a-nda beta-kota o nguzu i u bhanga ndenge. Jezú uixi: ‘A zediua oso évua o maka a Nzambi anga a ma lunda!’—Luka 11:28.