O Kwila Jihova Wala mu Ididi Yoso mu Kithangana Kimoxi?
O Bibidya i tambwijila
Nzambi wala ni kutena kwa kumona o ima yoso. Mwene we utena kubhanga kima kyoso kyoso kya mesena kabasa kididi. (Jisabhu 15:3; Jihebelewu 4:13) Maji o Bibidya ki ilongo kwila Nzambi wala mu ididi yoso, mu ima yoso mu kithangana kimoxi. Yene ilonga kwila mwene muthu, sayi kididi kwa tungu.
Nzambi wadifu kyebhi: Nzambi nzumbi. (Nzwá 4:24) O athu mu xitu katena kumumona. (Nzwá 1:18) O isumwa yala mu Bibidya ya lungu ni Nzambi ilondekesa kwila sayiku kididi kwatungu mwene. O Bibidya ki ilongo kwila mwene wala mu ididi yoso.—Izaya 6:1, 2; Dijingunwinu 4:2, 3, 8.
Kididi Kwatungu Nzambi: O kididi kwatungu Nzambi kididi kya nzumbi, ki kidifu ni kididi kutwatungu etu. O “kididi” kiki mu nzumbi ku dyulu kwene kwatungu Nzambi. (1 Jisobha 8:30) O Bibidya izwela ya lungu ni kithangana kyoso o jianju ‘kyayi mudilondekesa bhu pholo ya Jihova,’ a kiki kilondekesa kwila sayi kididi kwatungu Nzambi.—Jobe 1:6.
Se Nzambi kala mu ididi yoso, o kwila mwene utena kungilanga?
Kyene, utena. Nzambi wazolo o athu oso. Sumbala mwene wala ku dyulu, Nzambi usuwa athu oso amesena kubhanga o vondadi yê. (1 Jisobha 8:39; 2 Malunda 16:9) Tala kyebhi Jihova kyalondekesa kwila ubhanga valolo ku jiselevende jê ja fiyele:
Kyoso ki usamba: Jihova utena kwivwa o musambu wé mu kithangana ki wamusamba.—2 Malunda 18:31.
Kyoso ki utoloka o muxima: ‘Jihova wa zukama kwa yá a toloka mixima, u bhulula oso a bhwila mu nzumbi.’—Jisálamu 34:18.
Kyoso ki ubhindamena kikwatekesu: Jihova u ‘ku longesa, ukwidikisa njila yoso i wa fwama kuyila,’ bhukaxi ka Maka mê o Bibidya.—Jisálamu 32:8.
O makutu amba kwila Nzambi wala mu ididi yoso
Makutu: Nzambi wala mu ima yoso ya bhange.
Kidi: Nzambi katungu mu ixi, katungu we kididi mu ngongo. (1 Jisobha 8:27) Mu kidi, o jithethémbwa ni ibhangelu yengi “itumbula o fuma ya Nzambi.” (Jisálamu 19:1) Maji kala o mukwa kupindala o jikwadru katungu mu kwadru ya pindala, Jihova katungu mu ima ya bhange. Maji o kwadru itena kulondekesa ima yavulu yalungu ni muthu wa ibhange. Kyene kimoxi we, o ibhangelu ya Mubhangi wetu yatukondoloka ilondekesa “o idifwa yê yakambe kumoneka ku mesu,” kala o kutena, o unjimu ni henda.—Loma 1:20.
Makutu: Nzambi utena ngó kukala Muteni wa Yoso ni kwijiya yoso se ukala mu ididi yoso.
Kidi: O nzumbi ikôla mba o nguzu ya Nzambi, kwene o kutena kwa Nzambi kwa kubhanga o ima. Bhukaxi ka nzumbi ikôla, Nzambi utena kumona ni kubhanga yoso, kabasa ola ni kididi, ne mwene sé kulabhu.—Jisálamu 139:7.
Makutu: O divulu dya Jisálamu 139:8 dilonga kwila, Nzambi wala mu ididi yoso, mukonda dyene dyamba: ‘Se ngedi ngi banda ku dyulu, eye kwene ku wala; ngi kutuke ku mbila, eye ku kambemu.’
Kidi: O velusu yiyi ki ilombolola kwila Nzambi wala mu ididi yoso. Ilonga kwila, Nzambi utena kutukwatekesa kabasa kididi kutukala.
a O Bibidya ilondekesa kwila, Jihova dyene o dijina dya Nzambi.
Eye Nange Wandawabhela we o Maka Yá
IBHWIDISU YA BIBIDYA YO TAMBWIJILE
O Nzumbi Ikola Kima Kyahi?
Mukonda dya ima yambote, o Bibidya itumbula o nzumbi ikola mu kizwelu kala “lukwaku” lwa Nzambi
IBHWIDISU YA BIBIDYA YO TAMBWIJILE
O Kwila Nzambi Wa-nda Ngi Kwatekesa se Ngi mu Bhinga mu Musambu?
O kwila Nzambi u suwa o ibhindamu yetu?
IA LUNGU N’ETU
Bhinga Phala Kukukunda
Kuzwela yalungu ni kibhwidisu kya Bibidya mba kudilonga yalungu ni Jimbangi ja Jihova.