O Bibidya izwela ngo veji imoxi yalungu ni jitatuwaji, o izwelu yiyi tu isanga mu divulu dya Ijila 19:28, dyene dizwela: “Kana we kudita jifuma ni jimbumba.” Nzambi wafidisa o kifuxi kya Izalayele kubhanga o ima yiyi. O kiki kyexile mwatungula bhukaxi ka ifuxi ya azukamene exile ni kifwa kya kusoneka ku mukutu o majina ni ijimbwete ya jinzambi jâ. (Matendelelu 14:2) Sumbala o kitumu kiki akibhana ku kifuxi kya Izalayele ki kyatokala ku Jikidistá, kima kyambote kuxinganeka mu kima kyabhangesa kubhana o kitumu kiki.

O kwila o Jikidistá atena kuta jitatuwaji?

 O jivelusu ja Bibidya ja kayela jitena ku kukwatekesa kuxinganeka kyambote yalungu ni maka enyá:

•   “O ahatu atokala kuzwata izwatu yafwama” (1 Timote 2:9) O velusu yiyi itena kukwatekesa kikale o ahatu mba o mayala. Twatokala kuxila o ixinganeku ya akwetu, muveji dya kudifumanesa mudyetu.

•   Sayi athu abhanga jitatuwaji phala kulondekesa o idifwa mba o ufôlo wala nawu. Akamukwá abhanga kiki phala kulondekesa kwila ene ejiya se ihi yabhanga ku mukutu wâ. Maji o Bibidya ibhana o kiswinisu kiki ku Jikidistá: “Bhakulenu o mikutu yenu kala sata ikôla, yanda xikina Nzambi. Mu ku mubheza, mu bhezyenu ni kilunji kyoso.” (Loma 12:1) Bhukaxi ka “kilunji” kyê sota kwijiya se mukonda dyahi wamesa kuta o tatuwaji. Se wamuta ngó mukonda dya akwenu, mba wamesena kulondekesa kwila watokala ku kibuka kya makamba, lembalala kwila o jitatuwaji jene mu naminina ku mukutu. Nange ku hádya utena kudyela mukonda dya kujita. O kuxingangeka se mukonda dyahi wamesena kuta o tatuwaji, kwanda ku kwatekesa kusola kyambote.—Jisabhu 4:7.

•   “Mukwa mwanu, o ixinganeku yê i bhangela kuvudisa nzungule ya jimbote; maji o ixinganeku ya mukwa dimwámwa ni lusolo-lusolo, i mu xila ngó wadyama.” (Jisabhu 21:5) Sayi bhabha o muthu usola ni lusolo phala kubhanga o tatuwaji, maji kiki kitena ku mubhekela ibhidi mu thembu yavulu mu maka alungu ni kubhanga makamba ni kusota salu. Ku mbandu ya mukwá, o kukatula jitatuwaji kubhinga kitadi kyavulu, kubhekela we ndolo yavulu. Athu avulu ene mutokwesa o ididi ya kukatula jitatuwaji. O ididi yenyiyi yene mu dibandekesa dingi, kiki kilondekesa kwila athu avulu abhange o jitatuwaji kupholo ene adyela.