Даниела йәкә сәрԝахт бу, у дәрберʹа гӧһе мьнда һедика гот: «Щәфе нәкʹьшинә полисрʹа тʹелехи, әԝана ида ԝьра нә!». Һәма пешбәри мә һеди-һеди авто бәр меванхане сәкьни. Чәнд дәԛә шунда, әм һәрдӧ жи һатьнә гьртьне. Бь аликʹарийа Даниелайе мьн перʹа гиһанд кӧ һьнә документа бьдьмә бьраки дьн.

Һʹәта кӧ әм дьчунә полисе, әз дьфькьрим кӧ чьԛас бәхтәԝар ьм, ԝәки кʹӧлфәтәкә мьнә ӧса мерхас у рʹӧһʹани һәйә. Әԝ тʹәне щарәке нибу кӧ әз у Даниелайе тʹәвайи ча кʹом бун, демәк пьштгьрийа һәв дькьр. Әз дьхԝазьм ԝәрʹа гьли кьм кӧ чьрʹа әм дьчунә ԝан ԝәлата, кʹидәре шьхӧле мә ԛәдәхәкьри бу.

Әз сала 1930-да һатьмә буйине, шәһәрәки бьчʹук Крукседа, кӧ Франсайа бакʹуреда йә. Нәфәред малбәта мә Католикед хирәт бун. Малбәта мә һәр һʹәфти дьчу дере, у баве мьн һьнә шьхӧлед дереда жи дькьр. Ле чахе әз ԝәкә 14 сали бум, ԛәԝьмандьнәке чʹәʹве мьн вәкьр, мьн дӧрʹутийа дере дит.

Ԝәʹде шәрʹе һʹәмдьнйайейә дӧда, ордийа Алманйайе дора Франсайе гьртьбун. Чахе әм дьчунә дере, кʹәшише мә тʹьме әм һелан дькьрьн, ԝәки пьштгьрийа сәрԝертийа Натсиста бькьн, шәһәре Вичида. Әм сәр готьна ԝи мәтʹал ман. Һьнге мә ӧса жи мина гәләк бажарванед Франсайе дьзикава жь радио BBC нучә дьбьһист, кʹижан кӧ пьштгьред Франсайе әʹлам дькьрьн. Паши ве йәке, кʹәшиш дәрберʹа алийе ԝан гьрт, йед кӧ пьштгьрийа Франсайе дькьрьн, у һьн жи дереда әʹдәтәкә рʹазибуне дәрбаз кьр, бона пешдачуйина ԝан мәһа Илоне сала 1944. Әз сәр дӧрʹутийа ԝи әʹщебмайи мам. Паши ве йәке, мьн ида итʹбарийа хԝә дера у кʹәшиша нә дьани.

Һьнә ԝәʹдә шунда паши шәрʹ, баве мьн чу рʹәʹме. Хушка мьнә мәзьн һьнге меркьри бу у Белжикеда дьжит, ләма мьн ида гәрәке дийа хԝә хԝәй кьра. Мьн дәстпекьр кʹархана пʹәрчʹада бьхәбьтьм. Мәзьне хәбата мьн у кӧрʹед ԝи, Католикед хирәт бун. Кʹархана ԝанда әз пешда дьчум, ле зутьрәке әз ида рʹасти щерʹьбандьне һатьм.

Хушка мьн Симона, йа кӧ бьбу Шәʹде Йаһоԝа, сала 1953 һат тʹәсәлийа мә бькә. Әԝе пе Кʹьтеба Пироз бь һостәти һинкьрьнед ԛәлп йед  Дера Католики дәрәԝ дәрхьст, мәсәлә һинкьрьна дәрһәԛа щәʹньме, Сейәканә, у кӧ паши мьрьне жийин бәрдәԝам дьбә. Пешийе, әз тʹәви ԝе кʹәтьмә дәʹԝе, чьмки Кʹьтеба Пироз кʹижан кӧ әԝ дьда хәбате, йа Католики нибу. Ле зутьрәке мьн баԝәр кьр, ԝәки әԝ мьнрʹа рʹастийе дьбежә. Ԝәʹдә шунда әԝе «Бьрща Ԛәрәԝьлийе», йед дәрхьстьна кәвьн да мьн. Мьн әван журнала шәв навщийада дьхԝәнд у мьн зу фәʹм кьр, ԝәки әԝ йәк рʹасти йә. Ле әз ӧса жи дьтьрсийам, ԝәки һәрге әз алийе Йаһоԝа бьгьрьм, әзе хәбата хԝә ӧнда кьм.

Чәнд мәһа, мьн бәрдәԝам дькьр Кʹьтеба Пироз леколин бькьм, у мьн хԝәрʹа журналед «Бьрща Ԛәрәԝьлийе» жи дьхԝәнд. Ахьрийеда мьн сафи кьр, ԝәки һәрʹьм щьвате. Әԝ һʹьзкьрьн кӧ мьн щьватеда дит, гәләк дьле мьн гьрт. Паши ве йәке, шәш мәһа бьраки щерʹьбанди тʹәви мьн һинбуна Кʹьтеба Пироз дәрбаз дькьр, у мәһа Илоне, сала 1954 әз һатьмә ньхӧмандьне. Зутьрәке мьн ӧса жи шабунәкә мәзьн станд, чьмки дийа мьн у хушка мьнә бьчʹук жи бунә Шәʹдед Йаһоԝа.

Сала 1958-да, бона мьн ԛәдьр бу, кӧ әз чумә Нийу Йорке сәр щьвата мәзьнә һʹәмдьнйайе. Ле йазьх, чәнд мәһ пешийа ве йәке, дийа мьн мьрьбу. Чахе әз жь щьвата мәзьн вәгәрʹийам, ида аза бум, чьмки борщдарийа мьн малбәтеда тʹӧнә бу. Әз жь хәбате дәркʹәтьм у бумә пешәнг. Һьнге әз дәргисти бум тʹәви хушкәкә пешәнг Даниела Делие, кʹижан кӧ мәһа Гӧлане, сала 1959 бу жьна мьн.

Даниелайе хьзмәтийа хԝәйә һәртʹьм жь мала хԝә дур дәстпекьр, шәһәре Брәтанйайеда, кʹидәре мәрьвед Католик дьжитьн. Жерʹа мерхаси лазьм бу сәва ԝи мьһалида хьзмәт кә у пе бисиклете һәрʹә гӧнда. Әԝе жи мина мьн һʹәсаб дькьр кӧ гәләк фәрз ә мьзгинийе бәла кьн, чьмки мә ньзаньбу кӧ ахьрийа дьнйайе чьԛас незик ә (Мәт. 25:13). Әԝ тʹьме һазьр бу жь хԝә тьштәки кем кә сәва хьзмәтийе, у әв ньһерʹандьна ԝе али мә кьр хьзмәтийа хԝәйә һәртʹьм нәһельн.

Чәнд рʹож паши зәԝаща мә, әм шьхӧле бәрпьрсийартийеда һатьнә кʹьфшкьрьне. Әм һини жийина сьвьк бун. Щьвата пешьн кʹижан кӧ мә гәрәке тʹәсәли кьра жь 14 мьзгинвана бу. Әԝана дәсттәнг бун у ԝана нькарьбу әм мала хԝәда ԛәбул кьрана. Ләма жи әм сәр сена Ода Щьвате сәр матраса рʹадьзан. Бәле, щики нәкомфорт бу, ле бона пьшта мә әԝ гәләк баш бу!

Гәләк шьхӧле мә һәбу, ле Даниела рʹьнд һини хьзмәтийа бәрпьрсийартийе бьбу. Гәләк щар ӧса дьбу кӧ Даниела авта мәйә бьчʹукда һивийа мьн дьсәкьни, чьмки рʹуспи дьхԝәстьн бьщьвьн, ле әԝ йәк пешда сафи нәкьрибу. Ле әԝе тʹӧ щар нәдькьрә котә-кот. Мә тʹәне дӧ сала ве кʹьфшкьрьнеда хьзмәт кьр, у ԝи ԝәʹдәйида мә фәʹм кьр кӧ чьԛас фәрз ә жьн-мер һьндава һәвда һʹәлал бьн у тʹьфаԛ бьн (Ԝаиз 4:9).

Сала 1962-да, әм Мәкʹтәба Гиләдда һатьнә тʹәглифкьрьне Бруклинеда (Нийу Йорк), кӧ һьнге 10 мәһа дәрбаз дьбу. Жь 100 хушк-бьра, 26 зәԝащеда бун. Бона мә ԛәдьрәки мәзьн бу, кӧ мә тʹәвайи әԝ мәкʹтәб дәрбаз кьр. Һе те бира мьн хәбәрдана мә тʹәви ԝан бьра, йед кӧ баԝәрийеда ча стун бун, мәсәлә Фредерик Франс, Йулисес Глас, у Александр Һ. Макмилан.

 Ԝәʹде һинбуне, мәрʹа дьготьн ԝәки һин бьн дина хԝә бьдьнә тьшта. Ләма жи щара нивро рʹоже Шәмийа, гава һинбун хьлаз дьбу, әм дьчунә екскурсийе, сәва Нийу Йоркеда тьштед һʹәԝас бьньһерʹьн. Мә заньбу кӧ Дӧшәме әм гәрәке бьньвисьн дәрһәԛа ԝан тьшта, кʹижан кӧ мә дит. Гәләк щар әм Шәмийе гәләк ԝәстийайи еваре вәдьгәрʹийан, ле хьзмәткʹаре Бәйтʹәле, кʹижан кӧ мәрʹа екскурсийа дәрбаз дькьр, пьрс дьданә мә, сәва ԝәʹде тесте тьштед сәрәкә бира мә нәчьн. Щарәке рʹожа Шәмийе әм тʹәмамийа нивро нав шәһәрда гәрʹийан. Әм чунә обсерваторийе, кʹидәре кӧ әм дәрһәԛа метеора у метеорита пеһʹәсийан. Әм чунә мйузейе (Amеrican Musеum of Natural History), у ԝедәре әм пеһʹәсийан, ԝәки чь фьрԛи һәйә ортʹа алигатор у тимсәһ (крокодил). Ве рʹоже чахе әм вәгәрʹийанә Бәйтʹәле, әԝе кӧ мәрʹа екскурсийа дәрбаз дькьр жь мә пьрси: «Ижа, бежьн һәла чь фьрԛи һәйә ортʹа метеор у метеоритда?». Даниела гәләк ԝәстийайи бу, у ӧса щаба хԝә да: «Дьранед метеорита дьреж ьн!».

Әм әʹщебмайи ман, чахе әм һатьнә кʹьфшкьрьне филиала Франсайеда, кʹидәре мә тʹәвайи 53 сала хьзмәт кьрийә. Сала 1976-да, әз һатьмә кʹьфшкьрьне ча кординаторе Комитейа Филиале у ӧса жи ԝәки тʹәсәлийа ԝәлатед Африкайе у Рʹоһьлата Навин бькьм, кʹидәре кӧ шьхӧле мә ԛәдәхәкьри бу йан жи синоркьри бу. Бона ве йәке әм чунә ԝәлате Габоне, кʹидәре кӧ әԝ тьшт ԛәԝьмин, чь кӧ мә дәстпекеда гьли кьр. Рʹаст бежьм, әз гәләк щар дьфькьрим ԝәки әзе нькарьбьм ԝан щабдарийед тʹәзә биньм сери. Ле Даниела бона мьн аликʹарийа мәзьн бу, сәва әз һʹәму щурʹә щабдарийа ԛәбул кьм.

Мә дәрберʹа хьзмәтийа хԝәйә Бәйтʹәледа һʹьз кьр. Даниела, бу ԝәлгәрʹа баш, йа әʹдәбйәтед мә. Әԝ пешийа кӧ бьчуйа Гиләде, нава пенщ мәһада зьмане Инглизи һин бу. Мә гәләк шабун дьстанд жь хьзмәтийа хԝәйә Бәйтʹәле, ле щьвата мә жи шабуна мә зедә кьр. Те бира мьн чахе щарәке әз у Даниела шәв метройа Париседа бун, гәләк ԝәстийайи бун, ле йәкә әм ша дьбун, чьмки мә һинбунед Кʹьтеба Пироз дәрбаз кьрьбу. Ле йазьх, ԝәʹдә шунда сьһʹәт-ԛәԝата Даниелайе һатә гӧһастьне, у бона ве йәке әԝе ида нькарьбу хьзмәтийеда һаԛас бькьра чьԛас дьхԝәст.

Сала 1993 әм пеһʹәсийан, ԝәки бьстане Даниелайеда рʹәԛ һәйә. Жерʹа операсийа у химиотерапиа кьрьн. Панздәһ сал шунда, рʹәԛа ԝе диса пешда һат у дьһа зу бәла дьбу. Ле әԝе шьхӧле хԝәйи ԝәлгәрʹандьне ӧса һʹьз дькьр у ԛимәт дькьр, ԝәки чахе әԝ һьнәки пʹак дьбу, диса шьхӧле хԝә бәрдәԝам дькьр.

Рʹаст ә нәхԝәшийа Даниелайе гьран бу, ле ԛә һʹьше мәрʹа жи дәрбаз нәдьбу, ԝәки хьзмәтийа хԝәйә Бәйтʹәле бьһельн. Ле нәһеса йә бь нәхԝәшийа гьран Бәйтʹәледа хьзмәт ки, илаһи һәрге йед дьн һаш жь һʹале тәйи гьран тʹӧнәнә (Мәтʹлк. 14:13). Даниела һәла һе ԝәкә 70 салийа хԝәда жи тʹьме бь бәшәра хԝәш у дәвкʹән бу, у нә жи дьһатә кʹьфше кӧ әԝ нәхԝәш ә. Әԝе хԝә гӧнә нәдькьр, дәԝсе тʹьме аликʹари дьда йед дьн. Әԝе заньбу кӧ һәрге әԝ гӧһ бьдә мәрьва, әԝ йәк дькарә дьле ԝан рʹьһʹәт кә (Мәтʹлк. 17:17). Даниелайе тʹӧ щар хԝә ча ширәткʹар һʹәсаб нәдькьр, ле әԝе пе  мәсәла хԝә али хушкед майин дькьр, сәва жь рʹәԛе нәтьрсьн.

Чәтьнайед мәйә дьн жи һәбун. Чахе Даниела ида нькарьбу ча хьзмәткʹаре һәртʹьм хьзмәт кә, әԝе һәр тьшт дькьр сәва али мьн бькә. Әԝе әʹмьре мьн сьвьк дькьр, у әԝе йәке али мьн дькьр 37 сала бәрдәԝам кьм ча кординаторе Комитейа Филиале хьзмәт кьм. Мәсәлә, әԝе тʹьме хԝарьна рʹоже һазьр дькьр, ԝәки әм тʹәвайи отʹаха хԝәда бьхԝьн у һьнәки һеса бьн (Мәтʹлк. 18:22).

Даниела тʹьме бь ве йәке әʹйан бу кӧ оптимист бу у әʹмьр һʹьз дькьр. Паше йазьх диса щара сьсийа рʹәԛа ԝе пешда һат. Әм ида гәләк бәрхԝә кʹәтьн. Химиотерапиа у радиотерапиа ӧса ԛәԝат же дьстандьн, кӧ әԝ щара нә жи дькарьбу рʹе һәрʹә. Те бежи шур дьле мьн дьхьстьн чахе мьн дьдит кӧ жьна мьнә дәлал, йа кӧ ԝәлгәрʹа ԛәԝи бу, анщах хәбәр дьдә.

Щара мә тʹәхмин дькьр кӧ әм ида нькарьн тәйах кьн, ле йәкә мә тʹьме дӧа дькьр у баԝәр дькьр ԝәки Йаһоԝа ԝе тʹӧ щар нәһелә әм жь ԛәԝата хԝә дәр бенә щерʹьбандьне (1 Корн. 10:13). Әм һәр гав рʹази бун жь Йаһоԝа кӧ әԝи бь сайа Хәбәра хԝә, хушк-бьред Бәйтʹәледа жь идара медисинайе, у бь сайа хушк-бьред дьн, аликʹари дьда мә.

Мә тʹьме рʹебәри жь Йаһоԝа дьгәрʹийа, кӧ кʹижан щурʹә ԛәнщкьрьн йан жи кʹижан дәрмана ԛәбул кьн. Ԝәʹдәки әм бей дәрман бун. Һʹәкиме Даниелайе, кʹижан кӧ 23 сала али ԝе дькьр, нькарьбу шьровәкьра кӧ чьрʹа паши химиотерапиа Даниела дьхәрьԛи. Һʹәким нә жи дькарьбу бьгота дәԝса химиотерапиа чь бькә. Мә тʹәхмин дькьр кӧ әм тʹәне манә у мә ньзаньбу ԝе чь бьԛәԝьмә. Паше һʹәкимәки дьн ԛайил бу, ԝәки мьԛати сьһʹәт-ԛәԝата ԝе бә. Әԝ чʹарә Йаһоԝа кьр, сәва али мә бькә әм бәрхԝә нәкʹәвьн.

Әм һин бун кӧ тʹәне бона рʹожәке хәм бькьн, у гәләк бәрхԝә нәкʹәвьн. Чаԝа Иса гот: «Хәмед рʹоже бәси ԝе нә» (Мәт. 6:34). Һʹәнәк у ньһерʹандьна позитив жи али мә дькьр. Мәсәлә, чахе Даниела дӧ мәһа химиотерапиа нәдькьр, әԝе бь бәшәра хԝәш мьнрʹа гот: «Зани, мьн тʹӧ щар хԝә ӧса баш тʹәхмин нәдькьр» (Мәтʹлк. 17:22). Рʹаст ә әԝ жь нәхԝәшийа хԝә дьчәрчьри, ле әԝе гәләк һʹьз дькьр бь дәнге бьльнд кʹьламед Пʹадшатийе йед тʹәзә бьстьре.

Ньһерʹандьна ԝейә позитив али мьн кьр, кӧ чәтьнайед хԝәда жи сәбьр кьм. Рʹаст бежьм, нава 57 салед зәԝаща мәда, әԝ тʹьме мьԛати мьн дьбу. Әԝ нәдьһишт әз тьштәки бькьм, чьмки хԝәха дькьр. Әԝе һәла һе жи нәдьхԝәст нишан кә ча һекәрʹуне чедькә! Ле чахе әԝ лап ԛӧдум кʹәт, мьн ида хԝәха гәрәке фьраԛ у кʹьнщ бьшушта у хԝарьн чекьра. Щарәке чахе мьн фьраԛ дьшушт, мьн чәнд шәлбьк шкенанд, ле мьн шабунәкә мәзьн дьстанд гава бона ԝе хәм дькьр. *

Чахе әз дәрһәԛа әʹмьре хԝә дьфькьрьм, әз дьвиньм ԝәки әз гәләк дәрс һин бумә жь чәтьнайед сьһʹәт-ԛәԝатева гьредайи у ӧса жи жь әʹмьре хԝәйи мәзьн. Дәрса пешьн әԝ ә, кӧ әм гәрәке һʹәйфа хԝә ԝәʹде хԝә нәйньн, сәва мьԛати жьн йан мере хԝә бьн. Һʹәта әм сьһʹәт-ԛәԝат ьн, әм гәрәке һьндава мәрьвед хԝәйи незик һʹьзкьрьне нишан кьн (Ԝаиз 9:9). Дәрса дӧда, әм гәрәке тʹӧ щар бона тьштед бьчʹук гәләк бәрхԝә нәкʹәвьн, чьмки әм дькарьн гәләк кʹәрәмед кӧ һәр рʹож дьстиньн, пьшт гӧһе хԝәва бавежьн (Мәтʹлк. 15:15).

Чахе әз дәрһәԛа хьзмәтийа мәйә һәртʹьм дьфькьрьм, дьле мьн бь шабуне тʹьжә дьбә, чьмки Йаһоԝа ӧса әм кʹәрәм дькьрьн, кӧ мә нә жи дькарьбу бьда бәр чʹәʹве хԝә. Әз мина зәбурбеж хԝә тʹәхмин дькьм, кʹижан гот кӧ Йаһоԝа һьндава ԝида ԛәнщ бу (Зәб. 116:7).