1. Йаһоԝа де-баварʹа чь щабдари дайә?

ЙАҺОԜА жьн-мере пешьн пе хԝәстьна зарʹанине әʹфьранд. Ләма Кʹьтеба Пироз дьбежә: «Әԝләд пʹешкʹешед Хӧдан ьн» (Зәб. 127:3). Әԝ чь те һʹәсабе? Бьдьнә бәр чʹәʹве хԝә, һәваләки ԝәйи незик гәләк пʹәрә дайә ԝә, ԝәки һун бона ԝи хԝәй кьн. Ԝәйе ча хԝә тʹәхмин кьра? Фәʹмдари йә, ԝәйе һʹәсаб кьра кӧ әв йәк ԛәдьрәки мәзьн ә бона ԝә, чьмки әԝ итʹбарийа хԝә ԝә тинә. Ле һун ӧса жи дьбәкә бәрхԝә кʹәтана, кӧ ча әԝан пʹәра рʹьнд хԝәй кьн. Йаһоԝа, Досте мәйи незик, де-баварʹа тьштәки ӧса дайә, кӧ жь пʹәра дьһа ԛимәттьр ә. Әԝи ԝанрʹа щабдари дайә, сәва хәм бькьн бона һʹалхԝәши у бәхтәԝарийа зарʹед хԝә.

2. Кʹижан пьрса әме шеԝьр кьн?

² Ле кʹе сафи дькә зарʹ һәбьн йан на, у кʹәнге һәбьн? Де-бав чь дькарьн бькьн, сәва аликʹарийе бьдьнә зарʹед хԝә, ԝәки бь жийина бәхтәԝар бьжин? Дина хԝә бьдьн чәнд принсипед жь Хәбәра Хԝәде, кӧ дькарьн али Мәсиһийа бькьн сафикьрьнед билани бькьн.

3. а) Кʹе гәрәке сафи кә кӧ зарʹед жьн-мер һәбьн йан на? б) Һәвал у нәфәред жьн-мера гәрәке кʹижан принсипед Кʹьтеба Пироз бир нәкьн?

³ Нав һьнә мьләтада, ньһерʹандьнәкә ӧса һәйә, кӧ жьн-мер ча һәв дьстиньн, гәрәке зу зарʹа биньн. Һәла һе жи нәфәред ԝан у мәрьвед дьн, һәр гав ԝанрʹа дьбежьн, кӧ гәрәке зарʹа ԝан һәбә. Йетро, бьраки мә жь Асйайе, дьбежә: «Щьватеда әԝед кӧ зарʹед ԝан һәнә, жьн-меред  безарʹ һелан дькьрьн, ԝәки зарʹа биньн». Щефри, бьраки майин жь Асйайе, дьбежә: «Һьнәк дьбежьнә жьн-меред кӧ зарʹед ԝан тʹӧнәнә, ԝәки чахе әԝана әʹмьрда мәзьн бьн, ԝе кәсәк тʹӧнәбә мьԛати ԝан бә». Ле жьн-мер гәрәке хԝәха сафи кьн зарʹед ԝан һәбьн йан на. Әԝ ише ԝан у щабдарийа ԝан ә (Галт. 6:5). Фәʹмдари йә, ԝәки һәвал у нәфәред ԝан дьхԝазьн йед кӧ тʹәзә зәԝьщи нә, бәхтәԝар бьн. Ле гьшк гәрәке бир нәкьн, кӧ жьн-мер гәрәке хԝәха сафи кьн зарʹед ԝан һәбьн йан на (1 Тʹеслн. 4:11).

4-5. Жьн-мер гәрәке кʹижан дӧ пьрса шеԝьр кьн, у һе баш ә кʹәнге шеԝьр кьн? Шьровәкьн.

⁴ Жьн-мере кӧ сафи дькьн зарʹа биньн, гәрәке дӧ пьрсед фәрз ортʹа һәвда шеԝьр кьн: Йа пешьн, кʹәнге әԝана дьхԝазьн зарʹед ԝан һәбьн? У йа дӧда, әԝана дьхԝазьн чьԛас зарʹед ԝан һәбьн? Ле кʹәнге баш ә әԝан пьрса сафи кьн? У чьрʹа әԝ дӧ пьрс ӧса фәрз ьн?

⁵ Гәләк дәрәщада, һе баш ә пешийа зәԝаще хорт у ԛиз ортʹа һәвда шеԝьр кьн, һәла әԝана дьхԝазьн зарʹед ԝан һәбьн йан на. Ле чьрʹа һьнге әԝана сафи дькьн? Мәник әԝ ә, кӧ гәләк фәрз ә, ԝәки ве пьрседа әԝана һәрдӧ жи бенә сәр нетәкә. Ӧса жи, әԝана гәрәке шеԝьр кьн, кӧ һәла һазьр ьн әве щабдарийе һьлдьн сәр хԝә йан на. Һьнә жьн-мер сафи дькьн, ԝәки саләк йан дӧ сал паши зәԝаще зарʹа биньн, чьмки сәва бьбьнә де-бав, лазьм ә гәләк ԝәʹдә у ԛәԝат. Әԝана дьфькьрьн, кӧ һәрге һьнәки һивийе бьн, әԝана ԝе зәԝащеда һини һәвдӧ бьн у һе незики һәв бьн (Әфәс. 5:33).

6. Жь бо ԝан зәманед чәтьн, һьнә жьн-мер чь сафи дькьн?

⁶ Ле һьнә Мәсиһи сафи дькьн чʹәʹв бьдьнә се кӧрʹед Нӧһ у жьнед ԝан. Ԝана дәрберʹа зарʹ нәанин (Дәстп. 6:18; 9:18, 19; 10:1; 2 Пәт. 2:5). Иса ԝәʹде мә бәрамбәри «рʹожед Нӧһ» кьр, у әм жи бешьк «рʹожед ахьрийеда зәманед» хьрабда дьжин (Мәт. 24:37; 2 Тимтʹ. 3:1). Жь бо ве йәке, һьнә жьн-мер сафи дькьн, ԝәки һе зарʹед ԝан тʹӧнә бьн, сәва кӧ бькарьбьн һе зедә ԝәʹдә хьзмәтийеда хәрщ кьн.

7. Чаԝа принсипед жь Луԛа 14:28, 29 у Мәтʹәлок 21:5, дькарьн али жьн-мера бькьн?

⁷ Жьн-меред сәрԝахт чахе сафи дькьн, кӧ зарʹед ԝан һәбьн йан на, у чьԛас зарʹед ԝан һәбьн, хәрщед хԝә дьдьнә «бәр һʹәсеб». (Бьхунә Луԛа 14:28, 29.)  Зарʹед кʹе һәнә әԝана заньн, кӧ сәва зарʹа биньн у хԝәй кьн, нә кӧ тʹәне пʹәрә һәбә лазьм ә, ле ӧса жи ԝәʹдә у ԛәԝат. Ләма гәләк фәрз ә жьн-мер ван пьрса шеԝьр кьн: «Гәло гәрәке әм һәрдӧ жи бьхәбьтьн, сәва тьштед сәрәкә кӧ әм һʹәԝщә нә, бькʹьрʹьн? Әм һәрдӧ жи һәвра ԛайил ьн ве йәкеда, кӧ бь рʹасти әм һʹәԝще кʹижан тьштед сәрәкә нә? Һәрге әм һәрдӧ жи бьхәбьтьн, кʹе ԝе мьԛати зарʹа бә? Кʹе ԝе һʹӧкӧм кә сәр фькьрандьн у рʹабун-рʹуньштьна зарʹа?» Жьн-меред кӧ дәрһәԛа ԝан пьрса бь нәрми шеԝьр дькьн, әԝ ширәта жь Мәтʹәлок 21:5 (Бьхунә.) һьлдьдьн һʹәсаб.

8. Жьн-мер гәрәке чь һьлдьн һʹәсаб, у мере баш ԝе чь бькә?

⁸ Ча де ӧса жи бав, гәрәке епʹещә ԝәʹдә у ԛәԝате хәрщ кьн бона зарʹа хԝә. Ләма жи һәрге чәнд зарʹед жьн-мер һәнә кӧ салийед хԝәда гәләк жь һәв мәстьр ниньн, ԝанрʹа дькарә чәтьн бә, ԝәки башԛә дина хԝә бьдьнә һәр зарʹәке. Һьнә жьн-мер кӧ чәнд зарʹед ԝанә бьчʹук һәнә, дьбежьн ԝәки әԝана гәләк дьԝәстьн. Де дькарә һьн физикида һьн жи емосийалида сьст бә. Әԝ дькарә ӧса ԝәстийайи бә, кӧ ԛәԝата ԝе жи тʹӧнә бә сәва леколинкьрьне, дӧа у хьзмәтийе. Ӧса жи жерʹа дьбәкә нәһеса бә гӧһ бьдә бәрнама щьвате у кʹаре бьстинә. Һәмьки мере баш ԝе һәр тьшти бькә, сәва али жьна хԝә бькә кӧ ча щьватеда ӧса жи малда, мьԛати зарʹа бә. Мәсәлә, әԝ дькарә шьхӧле малда али жьна хԝә бькә. Ӧса жи әԝ ԝе алийе хԝәда һәр тьшти бькә, сәва һʹәму нәфәред ԝи һәр гав Ԛӧльхкьрьна тʹәви Малбәте дәрбаз кьн. У бав кӧ Мәсиһи нә, ԝе тʹәви нәфәред хԝә һәр гав дәркʹәвьн хьзмәтийе.

9-10. Де-бавед кӧ дьхԝазьн али зарʹед хԝә бькьн, гәрәке чь бькьн?

⁹ Де-бав чь дькарьн бькьн, сәва али зарʹед хԝә бькьн кӧ Йаһоԝа һʹьз бькьн? Чаԝа әԝана дькарьн зарʹед хԝә жь тьштед хьраб хԝәй кьн? Дина хԝә бьдьнә чәнд гава кӧ де-бав дькарьн бькьн.

¹⁰ Бона аликʹарийе Йаһоԝарʹа дӧа бькьн. Дина хԝә бьдьн мәсәла Маноаһ у жьна ԝи, кʹижанарʹа Шьмшон һатә буйине. Чахе Маноаһ пеһʹәсийа кӧ жерʹа ԝе кӧрʹ бьбә, әԝи жь Йаһоԝа һиви кьр, ԝәки рʹебәрийе бьдә ԝи, кӧ бьзаньбә ча зарʹа хԝә мәзьн кә.

11. Ль гора Һʹакьмти 13:8 де-бав чьда дькарьн чʹәʹв бьдьнә Маноаһ?

¹¹ Ниһад у Алма жь Боснйа у Һәрзәговина, чʹәʹв данә Маноаһ. Әԝана гьли  дькьн: «Мина Маноаһ, мә лавайа Йаһоԝа дькьр, ԝәки мә һин кә кӧ ча бьбьнә де-баве баш. У Йаһоԝа бь щурʹә-щурʹә тьшта щаба дӧайед мә дьда, пе Кʹьтеба Пироз, әʹдәбйәтед мә, щьвата, у щьватед мәзьн». (Бьхунә Һʹакьмти 13:8.)

12. Усьв у Мәрйәме бона зарʹед хԝә чь мәсәлә һиштьн?

¹² Пе кьред хԝә ԝана һин кьн у ԝанрʹа бьбьнә мәсәлә. Рʹаст ә чь һун дьбежьнә зарʹед хԝә әв фәрз ә, ле дьһа зәʹф ԝе кьред ԝә сәр зарʹед ԝә һʹӧкӧм бьн. Усьв у Мәрйәм мәсәла баш бун бона зарʹед хԝә, демәк ӧса жи бона Иса. Усьв хәбата гьран дькьр, сәва әʹбура нәфәред хԝә бькә, ле әԝи ӧса жи ԝана һин дькьр, кӧ тьштед рʹӧһʹани ԛимәт кьн (Ԛан. Дщр. 4:9, 10). Рʹаст ә ль гора Ԛануне жь Усьв нәдьһатә дәʹԝакьрьне, ԝәки «һәр сал» нәфәред хԝә бьвә Оршәлиме, сәва Щәжьна Дәрбазбуне дәрбаз кьн, ле йәкә әԝи ԝана дьбьр (Луԛа 2:41, 42). Һьнге һьнә бав дькарьбун бьфькьрийана, ԝәки әԝ рʹеԝити бона малбәта ԝан ԝе баргьрани бә, гәләк ԝәхт бькʹьшинә у бьһа бә. Ле Усьв ӧса нәдьфькьри, әԝи тьштед рʹӧһʹани ԛимәт дькьр, у зарʹед хԝә һин дькьр, ԝәки әԝана жи ԛимәт кьн. Мәрйәме жи Ньвисаред Пироз рʹьнд заньбу, у бешьк әԝе һьн пе гьлийа һьн жи пе кьред хԝә, зарʹед хԝә һин дькьр, ԝәки Хәбәра Хԝәде һʹьз бькьн.

13. Чаԝа жьн-мерәки чʹәʹв данә мәсәла Усьв у Мәрйәме?

¹³ Ниһад у Алма, дәрһәԛа кʹижана мә жоре гот, дьхԝәстьн чʹәʹв бьдьнә Усьв у Мәрйәме. Ча әԝе йәке али ԝан кьр, ԝәки кӧрʹе хԝә ӧса мәзьн кьн, кӧ әԝ Хԝәде һʹьз бькә у жерʹа хьзмәт кә? Әԝана дьбежьн: «Мә пе жийина хԝә дьхԝәст кӧрʹе хԝәрʹа нишан кьн, ԝәки чьԛас баш ә пе принсипед Йаһоԝа бьжин». Ниһад дьбежә: «Тӧ гәрә ӧса би, чаԝа дьхԝази зарʹа тә бә».

14. Чьрʹа де-бав гәрәке һаш пе һәбьн, кӧ зарʹед ԝан тʹәви кʹе һәвалтийе дькьн?

¹⁴ Али зарʹед хԝә бькьн, ԝәки һәвалед баш хԝәрʹа бьвиньн. Де-бав гәрәке бьзаньбьн кӧ зарʹед ԝан чь дькьн у тʹәви кʹе һәвалтийе дькьн. Әԝ те һʹәсабе, ԝәки де-бав гәрәке һаш пе һәбьн, кӧ зарʹед ԝан пе интернете у тʹеле тʹәви кʹе хәбәр дьдьн у тʹәви кʹе һәвалтийе дькьн. Чьрʹа? Чьмки һәвал дькарьн сәр фькьр у рʹабун-рʹуньштьна зарʹа һʹӧкӧм кьн (1 Корн. 15:33).

15. Де-бав чь дькарьн һин бьн жь мәсәла Щеси?

¹⁵ Ле де-бавед кӧ рʹьнд ньзаньн ча компӧтәре йан жи тʹеле бьдьнә хәбате, чь дькарьн бькьн? Щеси жь Филипине дьбежә: «Әм техноложийеда гәләк тьшт ньзаньн. Ле әԝ йәк рʹе мә нагьрә, ԝәки зарʹарʹа шьровәкьн дәрһәԛа хофед һащәтед електроники». Рʹаст ә Щеси ньзанә ча ԝан һащәта бьдә хәбате, ле әԝи зарʹед хԝәрʹа ԛәдәхә нәкьр, ԝәки әԝана бьдьнә хәбате. Әԝ шьровәдькә: «Мьн зарʹед хԝә һелан дькьр, ԝәки пе һащәтед електроники зьмане тʹәзә һин бьн, бона щьвата леколина бькьн, хԝә һазьр кьн у һәр рʹож Кʹьтеба Пироз бьхуньн». Һәрге зарʹед ԝә һәнә, ԝә тʹәви ԝан хԝәндийә у шеԝьр кьрийә дәрһәԛа смса у шьклед онлайн, сәр малпәра jw.org^® пʹара бь наве «Щаһьл»? Ԝә тʹәви ԝан шеԝьр кьрийә видео «Тӧ Контрол Дьки Һащәтед Електроник, йан Әԝана тә Контрол дькьн?» у «Малпәред Сосйал бь Билани Бьдә Хәбате»? * Әԝ тьшт дькарьн али зарʹед ԝә бькьн, ԝәки әԝана һин бьн ча  һащәтед електроник бь билани бьдьнә хәбате (Мәтʹлк. 13:20).

16. Гәләк де-бав чь дькьн, у ахьрийа ве йәке чь йә?

¹⁶ Гәләк де-бав мәщәла дьвиньн, сәва зарʹед ԝан тʹәви мәрьвед кӧ хьзмәтийеда мәсәла баш ьн, незик бьн. Мәсәлә, Дени у Бомин, жьн-мер кӧ жь Кот Девуаре нә, гәләк щар бәрпьрсийаре мьһале тʹәглиф дькьрьн, кӧ мала ԝанда бьминә. Дени гьли дькә: «Әԝ йәк гәләк баш сәр кӧрʹе мә һʹӧкӧм дьбу. Әԝ буйә пешәнг у ньһа ча аликʹарчийе бәрпьрсийаре мьһале хьзмәт дькә». Ле һун жи дькарьн ӧса бькьн, ԝәки зарʹед ԝә тʹәви мәрьвед рʹӧһʹани хәбәр дьн?

17-18. Кʹәнге де-бав гәрәке дәстпекьн зарʹед хԝә һин кьн?

¹⁷ Зарʹед хԝә жь бьчʹуктайе һин кьн. Де-бав чьԛас зу дәстпекьн зарʹед хԝә һин кьн, һаԛас баш ә (Мәтʹлк. 22:6). Дина хԝә бьдьнә мәсәла Тимотʹейо, йе кӧ тʹәви Паԝлос рʹеԝити дькьр. Дийа Тимотʹейо, Әйньк у пирька ԝи Лойис, ԝи «жь зарʹотийа» ԝида һин дькьрьн (2 Тимтʹ. 1:5; 3:15).

¹⁸ Диса жьн-мерәк жь Кот Девуаре, Жан-Клод у Пес, шәш зарʹед хԝә ӧса мәзьн кьрьн кӧ Йаһоԝа һʹьз бькьн у жерʹа хьзмәт кьн. Ле ве йәкеда чь али ԝан кьр? Ԝана чʹәʹв да Әйньке у Лойисе. Әԝана гьли дькьн: «Мә зарʹед хԝә жь зарʹотийе һини Хәбәра Хԝәде дькьр, һәма һьнә ԝәʹдә шунда паши буйина ԝан» (Ԛан. Дщр. 6:6, 7).

19. Чь те һʹәсабе зарʹед хԝә «һини» Хәбәра Хԝәде бькьн?

¹⁹ Ле чь те һʹәсабе зарʹед хԝә «һини» Хәбәра Йаһоԝа бькьн? Кәсәки «һини» тьштәки бькьн, әԝ те һʹәсабе «һин кьн у гәләк щар биньн бире». Бона ве йәке, де-бав гәрәке һәр гав бона зарʹед хԝә ԝәʹдә хәрщ кьн. Щара де-бав гәләк дьԝәстьн, кӧ зарʹед хԝәрʹа ширәта бьԝәкʹьлиньн. Ле йәкә де-бав әве йәке ча мәщал һʹәсаб дькьн, сәва али зарʹед хԝә бькьн, ԝәки Хәбәра Хԝәде фәʹм кьн у әʹмьре хԝәда бьдьнә хәбате.

20. Шьровәкьн кӧ ча де-бав дькарьн рʹеза Зәбур 127:4 бона мәзьнкьрьна зарʹа бьдьнә хәбате.

²⁰ Зарʹед хԝә рʹьнд нас кьн. Зәбур 127  зарʹа бәрамбәри тира дькә. (Бьхунә Зәбур 127:4.) Чаԝа кӧ тир дькарә жь щурʹә-щурʹә материал бә у чапа ԝан жи щӧдә бә, һәр зарʹ жи щурʹәки йә. Ләма де-бав гәрәке сафи кьн, кӧ чаԝа һәр зарʹәкә хԝә һин кьн у ширәт кьн. Жьн-мерәк жь Исраела иройин, йед кӧ дӧ зарʹед хԝә ӧса мәзьнкьрьнә кӧ Йаһоԝарʹа хьзмәт кьн, дьбежьн ԝәки ве йәкеда чь али ԝан кьр: «Мә һинбуна Кʹьтеба Пироз тʹәви һәр зарʹәкә хԝә башԛә дәрбаз дькьр». Фәʹмдари йә, ԝәки һәр малхе мале ԝе сафи кә, кӧ ча лазьм ә зарʹед хԝә һин кә.

21. Де-бав дькарьн жь Йаһоԝа һивийа чь аликʹарийе бьн?

²¹ Де-бав щара дьфькьрьн кӧ гәләк чәтьн ә зарʹа һин кьн, ле зарʹ пʹешкʹешед жь Йаһоԝа нә. Йаһоԝа һәр гав һазьр ә али ԝә бькә. Әԝ бь дьл у щан гӧһ дьдә дӧайед де-бава. У әԝ щаба дӧайед ԝан дьдә пе Кʹьтеба Пироз, әʹдәбйәтед мә, ӧса жи пе мәсәлә у ширәтед хушк-бьред щерʹьбанди кӧ де-бав ьн.

22. Кʹижан һьнә тьштед лапә баш де-бав дькарьн бьдьн зарʹед хԝә?

²² Һьнә мәрьв дьбежьн, ԝәки мәзьнкьрьна зарʹа 20 сала дькʹьшинә, ле де-бав диса жи де-бав дьминьн. Һьнә тьштед лапә баш, кӧ әԝана дькарьн бьдьнә зарʹед хԝә, әԝ һәнә һʹьзкьрьн, ԝәʹдә у һинкьрьна сәр һʹиме Кʹьтеба Пироз. Һʹәму зарʹ ԝе мина һәв ԛәбул нәкьн әве һинкьрьне. Ле гәләк жь ԝан зарʹа, кʹижана мәзьн кьрьнә де-бавед кӧ Йаһоԝа һʹьз дькьн, хԝә тʹәхмин дькьн мина хушкәкә жь Асйайе, Щоана Мае, йа кӧ гот: «Чахе әз тиньм бира хԝә кӧ ча де-баве мьн әз мәзьн кьрьмә, әз гәләк рʹази мә, ԝәки ԝана чь щурʹәйи әз ширәт дькьрьм у һин дькьрьм, кӧ Йаһоԝа һʹьз бькьм. Ԝана нә тʹәне жийин данә мьн, ле жийина бәхтәԝар» (Мәтʹлк. 23:24, 25). Бь милйона хушк-бьред мә ӧса дьфькьрьн.