1-2. Сәрһатийа Анхелито чь мә һин дькә?

ДЬԚӘԜЬМӘ де-баве тә ида Шәʹдед Йаһоԝа бун чахе тӧ мәзьн дькьрьн. Һәрге әре, бир нәкә ԝәки һәләԛәтийа тә тʹәви Йаһоԝа, жь ԝана нагьһижә тә. Фьрԛи тʹӧнә де-баве мә Хԝәдерʹа хьзмәт дькьн йан на, һәр кәс жь мә гәрәке хԝәха алийе хԝәда һәр тьшти бькә, сәва незики Йаһоԝа бә.

² Дина хԝә бьдьнә мәсәла бьраки бь наве Анхелито. Әԝ малбәта Шәʹдед Йаһоԝада мәзьн буйә. Ле щаһьлтийеда, әԝ тʹәви Хԝәде незик нибу. Әԝ дьбежә: «Мьн Йаһоԝарʹа хьзмәт дькьр, чьмки мьн дьхԝәст ве йәке бькьм, чь кӧ малбәта мьн дькьр». Ле паше Анхелито сафи кьр, ԝәки һе зедә ԝәʹдә хәрщ кә сәр хԝәндьна Хәбәра Хԝәде у фькьрандьна сәр, у ида һәр гав Йаһоԝарʹа дӧа дькьр. Ахьрийа ве йәке чь бу? Анхелито дьбежә: «Мьн фәʹм кьр, ԝәки әз һьнге дькарьм тʹәви Йаһоԝа Баве хԝәйи дәлал, незик бьм, һәрге хԝәха ԝи рʹьнд нас бькьм». Сәрһатийа Анхелито чәнд пьрсед фәрз пешда тинә: Чь фьрԛи һәйә ортʹа ве йәке кӧ дәрһәԛа Йаһоԝа бьзаньбьн у ве йәке кӧ ԝи рʹьнд нас бькьн? У ча әм дькарьн дьһа рʹьнд Йаһоԝа нас бькьн?

3. Чь фьрԛи һәйә ортʹа ве йәке кӧ дәрһәԛа Йаһоԝа бьзаньбьн у ве йәке кӧ ԝи рʹьнд нас бькьн?

³ Әм дьбәкә дьфькьрьн, ԝәки Йаһоԝа нас дькьн, чьмки наве ԝи заньн, йан жи дәрһәԛа һьнә кьред ԝи. Ле әв найе һʹәсабе, ԝәки әм Йаһоԝа рʹьнд нас дькьн. Әм гәрәке ԝәʹдә хәрщ кьн, сәва дәрһәԛа Йаһоԝа у хәйсәт-һʹӧнӧред ԝи  пебьһʹәсьн. Тʹәне һьнге әме бькарьбьн фәʹм кьн, кӧ чьрʹа әԝ ӧса дьфькьрә у чьрʹа ӧса дькә. Әԝ йәк ԝе али мә бькә тедәрхьн, һәла фькьр, сафикьрьн у кьред мә Йаһоԝа хԝәш тен йан на. Гава мә фәʹм кьр, кӧ Йаһоԝа чь дьхԝазә әм бькьн, әм гәрәке ван тьшта бькьн.

4. Әме кʹижан мәсәлед жь Кʹьтеба Пироз шеԝьр кьн?

⁴ Һьнә мәрьв дьԛәԝьмә мә дькʹәньн, кӧ әм дьхԝазьн Йаһоԝарʹа хьзмәт кьн,  у дьбәкә мьԛабьли мә дәртен чахе әм дәстпедькьн һәрʹьнә сәр щьвата. Ле һәрге әм итʹбарийа хԝә Йаһоԝа биньн, әԝ ԝе тʹӧ щар мә нәһелә. Әме һʹим дайньн бона достийа хԝә тʹәви Хԝәде, кӧ ԝе һʹәта-һʹәтайе бьминә. Ле гәло әм рʹасти дькарьн Йаһоԝа рʹьнд нас бькьн? Бәле! Сәрһатийа һьнә мәрьва, мәсәлә Муса у Даԝьд Пʹадша избат дькьн, кӧ әԝ йәк дьбә. Чахе әм дәрһәԛа кьред ԝан шеԝьр кьн, әме щаба ԝан дӧ пьрса пебьһʹәсьн: Ча ԝана Йаһоԝа нас кьр? У кʹижан дәрса әм дькарьн жь мәсәла ԝан һин бьн?

5. Муса бьжарт кӧ чь бькә?

⁵ Муса сафи кьр, ԝәки Хԝәдерʹа хьзмәт кә. Чахе Муса ԝәкә 40 сали бу, сафи кьр ԝәки тʹәви щьмәʹта Хԝәде бә, демәк тʹәви Исраелийа, дәԝса кӧ «кӧрʹе ԛиза Фьрәԝьн» бе һʹәсабе (Ибрн. 11:24). Муса навдари у щийе бьльнд жь дәсте хԝә бәрʹда. Әԝ йәк кӧ әԝи пьшта Ибранийа гьрт, йед кӧ Мьсьреда хӧлам бун, дькарьбу һерса Фьрәԝьн бьанийа, кʹижан кӧ сәрԝере ԛәԝи бу у Мьсьрийа ԝи ча хӧдан һʹәсаб дькьрьн. Рʹасти жи баԝәрийа Муса ԛәԝи бу! Муса итʹбарийа хԝә Йаһоԝа дьани. Итʹбари һьндава Йаһоԝа әԝ һәйә һʹиме ԛәԝи, кӧ дьбә бәрбь достийа һʹәта-һʹәтайе (Мәтʹлк. 3:5).

6. Әм жь мәсәла Муса чь һин дьбьн?

⁶ Әм чь дәрсе хԝәрʹа һин дьбьн? Мина Муса, әм гьшк жи гәрәке бьжберьн, Хԝәдерʹа хьзмәт кьн у тʹәви щьмәʹта ԝи бьн йан на? Дьбәкә әм жи гәрәке ԛӧрбана бькьн, сәва Хԝәдерʹа хьзмәт кьн, у дьԛәԝьмә әԝед кӧ Йаһоԝа нас накьн пәй мә кʹәвьн. Ле һәрге әм итʹбарийа хԝә Баве хԝәйи әʹзмана тиньн, әм дькарьн дӧдьли нәбьн, ԝәки әԝ ԝе пьшта мә бьгьрә.

7-8. Муса бәрдәԝам дькьр дәрһәԛа чь пебьһʹәсә?

⁷ Муса бәрдәԝам дькьр дәрһәԛа хәйсәт-һʹӧнӧред Йаһоԝа пебьһʹәсә у ԛьрара Ԝи бинә сери. Мәсәлә, чахе Мусарʹа һатә готьне, ԝәки щьмәʹта Исраел жь дилтийа Мьсьре дәрхә, әԝ хԝәда дӧдьли дьбу у чәнд щара готә Йаһоԝа, ԝәки ԝе нькарьбә әԝи шьхӧли бинә сери. Ле Хԝәде һьндава ԝида дьлшәԝати да кʹьфше у али ԝи кьр (Дәркʹ. 4:10-16). Әԝе йәке мерхаси да Муса, ԝәки диԝана мәзьн Фьрәԝьнрʹа әʹлам кә. Паше Муса дит кӧ Йаһоԝа ча пе ԛәԝата хԝә Исраелийа хьлаз кьр, ле Фьрәԝьн у ордийед ԝи Бәʹра Сорда ԛьр кьр (Дәркʹ. 14:26-31; Зәб. 136:15).

⁸ Чахе Муса Исраелийа жь Мьсьре дәрхьст, ԝана гәләк щар дькьрьнә котә-кот. Һьнге Муса сәбьра Йаһоԝайә мәзьн дит һьндава щьмәʹте, кʹижан кӧ Әԝи жь дилтийе дәрхьст (Зәб. 78:40-43). Муса ӧса жи мьлуктийа Йаһоԝа дит, чахе Әԝи паши гьлийед Муса фькьред хԝә гӧһаст (Дәркʹ. 32:9-14).

9. Ль гора Ибрани 11:27, һәләԛәтийа Муса тʹәви Хԝәде чь щурʹәйи бу?

⁹ Паши дәркʹәтьна жь Мьсьре, һәләԛәтийа Муса тʹәви Йаһоԝа ӧса незик  бу, кӧ ча бежи әԝи Баве хԝәйи әʹзмана дьдит. (Бьхунә Ибрани 11:27.) Кʹьтеба Пирозда дәрһәԛа һәләԛәтийа ԝийә незик тʹәви Хԝәде, ӧса те готьне: «Хӧдан рʹу бь рʹу тʹәви Муса хәбәр дьда, чаԝа кӧ мәрьвәк тʹәви һәвале хԝә хәбәр дьдә» (Дәркʹ. 33:11).

10. Сәва Йаһоԝа рʹьнд нас кьн, әм гәрәке чь бькьн?

¹⁰ Әм чь дәрсе жь ве йәке һин дьбьн? Һәрге әм дьхԝазьн Йаһоԝа рʹьнд нас бькьн, бәс нинә тʹәне дәрһәԛа хәйсәт-һʹӧнӧред ԝи бьзаньбьн, ле лазьм ә ӧса жи ԛьрара ԝи биньн сери. Иро Йаһоԝа дьхԝазә, ԝәки «һʹәму мәрьв хьлаз бьн у рʹастийе нас кьн» (1 Тимтʹ. 2:3, 4). Мәщаләк кӧ ча әм дькарьн ԛьрара Хԝәде биньн сери әԝ ә, кӧ дәрһәԛа Йаһоԝа мәрьва һин кьн.

11. Чахе әм дәрһәԛа Йаһоԝа мәрьва һин дькьн, чь щурʹәйи әм ԝи һе рʹьнд нас дькьн?

¹¹ Чахе әм дәрһәԛа Йаһоԝа мәрьва һин дькьн, әм хԝәха жи ԝи дьһа рʹьнд нас дькьн. Мәсәлә, әм әшкәрә дьвиньн рʹәʹма Йаһоԝа, чахе әԝ рʹебәрийе мә дькә, кӧ мәрьвед дьлсах бьвиньн (Йуһʹн. 6:44; Кʹар. Шанд. 13:48). Әм ӧса жи дьвиньн, кӧ ԛәԝата Хәбәра Хԝәде чьԛас мәзьн ә, гава мәрьвед кӧ әм тʹәви ԝан һинбуна Кʹьтеба Пироз дәрбаз дьбьн, хәйсәтед хьраб дьтʹәрькиньн у мәрьве ну хԝәдькьн (Колс. 3:9, 10). У әм ӧса жи зәлал дьвиньн сәбьра Хԝәде ве йәкеда, кӧ диса у диса мәщале дьдә мәрьва дәрһәԛа ԝи пебьһʹәсьн у хьлаз бьн (Рʹом. 10:13-15).

12. Чаԝа Дәркʹәтьн 33:13-да әм дьхуньн, Муса жь Йаһоԝа чь һиви кьр у чьрʹа?

¹² Муса гәләк ԛимәт дькьр һәләԛәтийа хԝә тʹәви Йаһоԝа. Муса һәла һе паши кьред мәзьн жи, кӧ пе ԛәԝата Хԝәде кьр, бь ԛәдьр жь Йаһоԝа һиви кьр, ԝәки али ԝи бькә кӧ Йаһоԝа һе рʹьнд нас кә. (Бьхунә Дәркʹәтьн 33:13.) Чахе Муса әԝ йәк һиви кьр, һьнге ида 80 сали зедәтьр бу, ле әԝи заньбу, ԝәки гәрәке һе зедә дәрһәԛа Баве хԝәйи һʹьзкьри пебьһʹәсә.

13. Ча әм дькарьн избат кьн, ԝәки әм достийа хԝә тʹәви Хԝәде ԛимәт дькьн?

¹³ Ле әм чь дәрсе жь ве йәке һин дьбьн? Фьрԛи тʹӧнә чьԛас сал ә кӧ әм Йаһоԝарʹа хьзмәт дькьн, әм гәрәке һәләԛәтийа хԝә тʹәви ԝи ԛимәт кьн. Щурʹе сәрәкә кӧ әм ча дькарьн нишан кьн, ԝәки достийа хԝә тʹәви Хԝәде ԛимәт дькьн, әԝ ә, кӧ һәр гав тʹәви ԝи дӧада хәбәр дьн.

14. Һәрге әм дьхԝазьн һе зедә дәрһәԛа Йаһоԝа пебьһʹәсьн, чьрʹа әм гәрәке дӧа бькьн?

¹⁴ Сәва кӧ һәвалтийа хԝә тʹәви кәсәки ԛәԝи кьн, әм гәрәке һәр гав тʹәвайи хәбәр дьн. Ләма жи тʹьме пе дӧа незики Хԝәде бьн, у тʹӧ щар нәтьрсьн кӧ дьле хԝә жерʹа вәкьн (Әфәс. 6:18). Криста, йа кӧ Тʹьркийайеда дьжи, дьбежә: «Һʹьзкьрьна мьн у итʹбарийа мьн һьндава Йаһоԝа һәр гав мәзьн дьбә, гава әз жерʹа дӧада фькьред хԝә гьли дькьм у паше дьвиньм әԝ ча али мьн дькә. Әз дьвиньм кӧ Йаһоԝа ча щаба дӧайед мьн дьдә, у бь сайа ве йәке Йаһоԝа бона мьн буйә ча Бав у Дост».

15. Йаһоԝа һьндава Даԝьд Пʹадшада ча бу?

¹⁵ Даԝьд Пʹадша нава ԝе малбәтеда у ԝи мьләтида һатә буйине, кʹижана кӧ Йаһоԝа дьһʹәбандьн. Ле Даԝьд нә бона хатьре малбәта хԝә Йаһоԝа дьһʹәбанд, әԝ хԝәха незики Хԝәде бу, у Йаһоԝа ԝи гәләк һʹьз дькьр. Йаһоԝа хԝәха сәр Даԝьд гот, ԝәки әԝ «мәрик дьле» Ԝи бу (Кʹар. Шанд. 13:22). Ле ча Даԝьд бу досте Йаһоԝайи ӧса незик?

16. Даԝьд чь пеһʹәсийа дәрһәԛа Йаһоԝа, чахе дина хԝә дьда әʹфьрина?

 ¹⁶ Даԝьд дина хԝә дьда әʹфьрина у дәрһәԛа Йаһоԝа педьһʹәсийа. Чахе Даԝьд щаһьл бу, әԝи гәләк ԝәʹдә дәрва дәрбаз дькьр, чьмки мьԛати пәзед баве хԝә дьбу. Дьԛәԝьмә әԝи һьнге дәстпекьр бьфькьрә сәр чекьрьнед дәсте Йаһоԝа. Мәсәлә, чахе Даԝьд шәв әʹзман дьньһерʹи, әԝи нә тʹәне гәләк стәйрк дьдитьн, ле ӧса жи тедәрдьхьст һʹӧнӧред ԝи, йе кӧ әԝ стәйрк әʹфьрандьнә. Даԝьд ньвиси: «Әʹзман бона рʹумәта Хԝәде дьбежьн, әʹрше әʹзмен шьхӧлед дәсте Ԝи кʹьфш дькьн» (Зәб. 19:1, 2). Чахе Даԝьд дьфькьри, кӧ әԝ у һʹәму мәрьв чь щурʹәйи һатьнә әʹфьрандьне, әԝи фәʹм дькьр кӧ биланийа Йаһоԝа чьԛас мәзьн ә (Зәб. 139:14). Гава Даԝьд дина хԝә дьда шьхӧлед дәсте Йаһоԝа, әԝи фәʹм дькьр кӧ әԝ бәр Йаһоԝа чьԛас бьчʹук ә (Зәб. 139:6).

17. Һәрге әм сәр әʹфьрина бьфькьрьн, әме чь пебьһʹәсьн?

¹⁷ Ле әм жь Даԝьд чь дәрсе һин дьбьн? Әм гәрәке дина хԝә бьдьнә әʹфьрина. Бона ве йәке әм гәрәке хԝәрʹа ԝәʹдә бьвиньн, сәва фәʹм бькьн кӧ Йаһоԝа дьнйа чьԛас бәдәԝ чекьрийә, у перʹа ша бьн! Жийина хԝәйә һәррʹожида бьфькьрьн, кӧ һун жь әʹфьринед дор бәре хԝә, мәсәлә жь шинкайе, һʹәйԝана у мәрьва, чь дькарьн һин бьн дәрһәԛа Йаһоԝа. Ӧса һуне һәр рʹож дәрһәԛа Баве хԝәйи әʹзмана һе зедә пебьһʹәсьн (Рʹом. 1:20). У һәр рʹож һуне бьвиньн, кӧ һʹьзкьрьна ԝә һьндава ԝи һе ԛәԝи дьбә.

18. Чаԝа Зәбур 18-да те кʹьфше, Даԝьд чь фәʹм дькьр?

¹⁸ Даԝьд дьдит, кӧ Йаһоԝа ча али ԝи дькьр. Мәсәлә, чахе Даԝьд пәзед баве хԝә жь шер у һʹьрчʹ хԝәй кьр, әԝи тедәрхьст, ԝәки Йаһоԝа али ԝи кьр, кӧ әԝи карьбу ԝан тәрәԝьлед бәйани бькӧжә. Чахе Даԝьд Голйатʹе тәрьки кӧшт, Даԝьд әшкәрә дит, ԝәки Йаһоԝа рʹебәри ԝи кьр (1 Сам. 17:37). У чахе әԝ жь Шаԝуле һʹәвсуд рʹәвийа, әԝи фәʹм кьр, ԝәки Йаһоԝа ԝи хьлаз кьр (Зәб. 18, бьнсәри). Һәрге Даԝьд мәрьвәки ԛӧрʹә буйа, ԝе һʹәсаб кьра, ԝәки әԝи хԝәха пе ԛәԝата хԝә һәр тьшт дькьр. Ле әԝ йәки мьлук бу, ләма жи әʹмьре хԝәда дәсте Йаһоԝа дьдит (Зәб. 138:6).

19. Әм жь мәсәла Даԝьд чь дькарьн һин бьн?

¹⁹ Әм жь ве йәке чь дәрсе һин дьбьн? Әм гәрәке жь Йаһоԝа нә тʹәне аликʹарийе бьхԝазьн, ле ӧса жи гәрәке тедәрхьн кʹәнге у ча әԝ аликʹарийе дьдә мә. Һәрге әм мьлук ьн, әме фәʹм кьн, ԝәки әм хԝәха нькарьн һәр тьшти бькьн, ле Йаһоԝа али мә дькә. У һәр щар, чахе әм аликʹарийа Йаһоԝа дьвиньн, һәләԛәтийа мә тʹәви ԝи һе ԛәԝи дьбә. Исак, бьраки мә жь Фижи, йе кӧ гәләк сала Йаһоԝарʹа хьзмәт дькә, фәʹм кьр кӧ әԝ йәк рʹасти жи ӧса нә. Әԝ дьбежә: «Чахе әз әʹмьре хԝә дьньһерʹьм, әз дьвиньм, ԝәки Йаһоԝа ча жь дәстпека һинбуна мьнә Кʹьтеба Пироз һʹәта иро, али мьн дькә. Ахьрийа ве йәке әԝ ә, кӧ Йаһоԝа бона мьн бу дьһа реали».

20. Жь һәләԛәтийа Даԝьд тʹәви Йаһоԝа, әм чь һин дьбьн?

²⁰ Даԝьд чʹәʹв дьда һʹӧнӧред Йаһоԝа. Йаһоԝа мәрьв ӧса әʹфьрандийә, кӧ әм дькарьн чʹәʹв бьдьнә хәйсәт-һʹӧнӧред ԝи (Дәстп. 1:26). Чьԛас һе зедә әм дәрһәԛа хәйсәт-һʹӧнӧред Йаһоԝа пебьһʹәсьн, һаԛас һе зедә әме бькарьбьн чʹәʹв бьдьнә ԝи. Даԝьд Баве хԝәйи әʹзмана рʹьнд нас дькьр, ләма жи әԝи дькарьбу чʹәʹв бьда ԝи, һәләԛәтийа  һьндава мәрьвада. Дина хԝә бьдьн һәма мәсәләке. Даԝьд бәр Йаһоԝа гӧнә кьр чахе тʹәви Бат-Шәбайе бенамуси кьр у паше мере ԝе да кӧштьне (2 Сам. 11:1-4, 15). Ле Йаһоԝа сафи кьр, ԝәки һьндава ԝи рʹәʹмтийе бьдә кʹьфше, чьмки әԝи жи һьндава мәрьвада рʹәʹмти дабу кʹьфше. Һәләԛәтийа Даԝьд тʹәви Йаһоԝа ӧса ԛәԝи бу, кӧ әԝ Исраеледа бу пʹадшаки лапи һʹьзкьри, у Йаһоԝа ԝи һʹәсаб дькьр ча мәсәла баш бона пʹадшед Исраеле (1 Пʹадш. 15:11; 2 Пʹадш. 14:1-3).

21. Ль гора Әфәси 4:24 у 5:1, әм чахе чʹәʹв дьдьнә Хԝәде чь кʹаре дьстиньн?

²¹ Әм чь дәрсе хԝәрʹа һин дьбьн? Әм гәрәке «чʹәʹв бьдьнә Хԝәде». Чахе әм ӧса дькьн, әм нә тʹәне кʹаре дьстиньн, ле ӧса жи дәрһәԛа ԝи һе зедә педьһʹәсьн. Чахе әм чʹәʹв дьдьнә хәйсәт-һʹӧнӧред Хԝәде, әм избат дькьн, ԝәки әм зарʹед ԝи нә. (Бьхунә Әфәси 4:24; 5:1.)

22-23. Һәрге әм ԝан тьшта бьдьнә хәбате чь кӧ әм дәрһәԛа Йаһоԝа педьһʹәсьн, әме чь кʹаре бьстиньн?

²² Ча мә дит, Йаһоԝа бь әʹфьринед хԝә у Хәбәра хԝә, мәрʹа дәрһәԛа хәйсәте хԝә әʹйан дькә. Ве кʹьтебеда гәләк мәсәлед хьзмәткʹаред амьн һәнә, мәсәлә Муса у Даԝьд, кӧ әм дькарьн чʹәʹв бьдьнә ԝан. Йаһоԝа мәрʹа гәләк тьшт дәрһәԛа хԝә әʹйан дькә, ле ида мәва гьредайи йә, дәрһәԛа ԝи чьԛаси бьзаньбьн.

²³ Әме һʹәта-һʹәтайе дәрһәԛа Йаһоԝа һе зедә пебьһʹәсьн (Ԝаиз 3:11). Йа фәрз нә кӧ әԝ ә, әм чьԛас тьшт заньн дәрһәԛа ԝи, ле әԝ ә кӧ әм чь дькьн чахе дәрһәԛа ԝи занәбуне дьстиньн. Һәрге әм чь педьһʹәсьн, әʹмьре хԝәда дьдьнә хәбате у чʹәʹв дьдьнә Баве хԝәйи һʹьзкьри, ӧса әм бәрдәԝам дькьн һе незики ԝи дьбьн (Аԛуб 4:8). Йаһоԝа бь Хәбәра хԝә мәрʹа соз дьдә, ԝәки ԝе тʹӧ щар нәһелә ԝан мәрьва, йед кӧ ԝи дьгәрʹьн.