1. Иро ньһерʹандьна мәрьва һьндава хәбате чь щурʹәйи йә?

МӘРЬВЕД мьһала ԝәда ча ньн һьндава хәбате? Гәләк ԝәлатада мәрьв зәʹф дьхәбьтьн у чьԛас дьчә ԝәʹде хԝә сәр хәбате зәʹф хәрщ дькьн. Мәрьвед кӧ гәләк дьхәбьтьн, ԝәʹде ԝан тʹӧнә кӧ һьнәки һеса бьн, тʹәви нәфәред хԝә ԝәʹдә дәрбаз кьн, йан жи дәрһәԛа Хԝәде һе зедә пебьһʹәсьн (Ԝаиз 2:23). Алики дьнва жи һьнә мәрьв ԛә хәбате һʹьз накьн у мәʹнийа дьгәрьн, ԝәки нәхәбьтьн (Мәтʹлк. 26:13, 14).

2-3. Йаһоԝа у Иса алийе хәбатеда чь мәсәлә һиштьнә?

² Ньһерʹандьна мәрьвед ве дьнйайе һьндава хәбате, нәрʹаст ә, ләма жи ԝәрә пебьһʹәсьн кӧ Йаһоԝа у Иса ча дьньһерʹьн сәр хәбате. Әм заньн, ԝәки Йаһоԝа хәбатһʹьз ә. Иса әԝ йәк зәлал да кʹьфше чахе гот: «Баве мьн һʹәта ньһа шьхӧле хԝә дькә, әз жи дькьм» (Йуһʹн. 5:17). Бьфькьрьн сәр һʹәму шьхӧлед Хԝәде, чахе әԝи беһʹәсаб әʹфьринед рʹӧһʹани у гәрдуна мәзьн әʹфьрандьн. Әм ӧса жи пе чʹәʹве хԝә дьвиньн, кӧ чекьрнед дәсте Хԝәдейә сәр әʹрде чьԛас бәдәԝ ьн. Зәбурбеж дәрһәԛа ве йәке гьлийед ӧса гот: «Хӧдано, чьԛаси гәләк ьн кьред Тә! Һәр тьшт бь сәрԝахтийа Тә чебуйә, әʹфьринед Тәва әʹрд тʹьжи йә» (Зәб. 104:24).

³ Иса чʹәʹв дьда Баве хԝә. Кӧрʹ кʹижан кӧ сәрԝахтийа Баве хԝә әʹйан кьр, тʹәви Хԝәде «әʹзман чедькьрьн». Әԝ бал Йаһоԝа ча «чирәдәст» бу (Мәтʹлк. 8:27-31). Гәләк ԝәʹдә шунда, чахе Иса сәр әʹрде бу, әԝи һьнге жи шьхӧләки мәзьн дькьр. Әԝ шьхӧл бона ԝи ча хԝарьн бу, у кьред ԝи избат дькьрьн, ԝәки Хԝәде әԝ шандийә (Йуһʹн. 4:34; 5:36; 14:10).

4. Дәрһәԛа һесабуне әм жь Йаһоԝа у Иса чь һин дьбьн?

 ⁴ Ле гәло әԝ йәк кӧ Йаһоԝа у Иса гәләк дьхәбьтьн у мәсәла баш ьн бона мә, те һʹәсабе ԝәки әʹсәйи нинә әм һеса бьн? Тʹӧ щар на. Фәʹмдари йә, Йаһоԝа тʹӧ щар наԝәстә, у жерʹа нәлазьм ә алийе физикида һеса бә. Ле Кʹьтеба Пироз дьбежә, ԝәки чахе Йаһоԝа әʹзман у әʹрд әʹфьрандьн, «дәсте хԝә жь хәбате кьр у рʹьһʹәт бу» (Дәркʹ. 31:17). Әшкәрә жь ве йәке те кʹьфше, ԝәки чахе Йаһоԝа әʹфьрандьн хьлаз кьр, паше сәкьни дина хԝә да чекьрьна дәсте хԝә у перʹа ша дьбу. Ӧса жи Иса, рʹаст ә чахе әԝ сәр әʹрде бу, гәләк шьхӧл дькьр, ле ӧса жи хԝәрʹа ԝәʹдә дьдит, ԝәки һьнәки һеса бә у тʹәви һәвалед хԝә хԝарьне бьхԝә (Мәт. 14:13; Луԛа 7:34).

5. Иро гәләкарʹа чь чәтьн ә?

⁵ Кʹьтеба Пироз щьмәʹта Хԝәде һелан дькә, ԝәки хәбатһʹьз бьн. Хьзмәткʹаред ԝи гәрәке нә кӧ тʹәмбәл бьн, ле шьхӧлда хирәт бьн (Мәтʹлк. 15:19). Дьԛәԝьмә һун дьхәбьтьн, сәва әʹбура нәфәред хԝә бькьн. У ча һʹәму шагьртед Мәсиһ, һун жи щабдар ьн шьхӧле бәлакьрьна мьзгинийе бькьн. Ле ԝәрʹа ӧса жи лазьм ә һьнәки һеса бьн. Дьбә кӧ щара ԝәрʹа чәтьн ә ԝәʹдә бона хәбате, хьзмәтийе у һесабуне пʹарәвәкьн? Әм ча дькарьн тедәрхьн кӧ чьԛас ԝәʹдә мәрʹа лазьм ә бона хәбате у чьԛас бона һесабуне?

6. Чаԝа Марԛос 6:30-34 дьдә кʹьфше, ԝәки Иса сәр хәбате у һесабуне рʹаст дьньһерʹи?

⁶ Гәләк фәрз ә, ньһерʹандьна мә һьндава хәбате рʹаст бә. Сьлеман Пʹадша пе рʹебәрийа Хԝәде ньвиси: «Ԝәхте һәр . . . кьрьне һәйә». Мәсәлә, әԝи дәрһәԛа чандьне, авакьрьне, гьри, кʹән, рʹәԛасе у кьред майин дьгот (Ԝаиз 3:1-8). Әʹйан ә ԝәки әʹмьре мәда хәбат у һесабун фәрз ьн. Ньһерʹандьна Иса сәр хәбате у һесабуне рʹаст бу. Щарәке шанди чахе жь рʹеԝитийа хьзмәтийе вәгәрʹийан, ԝана һаԛас хьзмәт кьр, ԝәки «мәщал нәдьдит кӧ нане хԝә жи бьхԝарана». Ләма Иса ԝанрʹа гот: «Дә ԝәрьн әм тʹәне һәрʹьнә щики хәԝлә у һьнәки рʹьһʹәт бьн». (Бьхунә Марԛос 6:30-34.) Рʹаст ә әԝ у шагьртед ԝи һәр гав нькарьбун хԝәрʹа ӧса рʹьһʹәт буна ча ԝана дьхԝәст, ле Иса фәʹм дькьр ԝәки ԝан һʹәмуйарʹа һесабун лазьм ә.

7. Шеԝьркьрьна дәрһәԛа Рʹожа Шәмийе ԝе чьда али мә бькә?

⁷ Щара мәрʹа лазьм ә һеса бьн йан жи графика хԝәда гӧһастьна бькьн. Әве йәке әме рʹьнд фәʹм бькьн, гава әм шеԝьр кьн дәрһәԛа Рʹожа Шәмийе, йа кӧ Хԝәде тʹәми да Исраелийа ԝәки хԝәй кьн. Рʹаст ә әм бьн Ԛануна Мусада ниньн, ле чахе әм дәрһәԛа рʹожа Шәмийе шеԝьр кьн, әме кʹаре бьстиньн. Әԝ йәк ԝе али мә бькә кӧ ньһерʹандьна хԝә һьндава хәбате у һесабуне бьщерʹьбиньн.

8. Ль гора Дәркʹәтьн 31:12-15, рʹожа Шәмийе бона чь бу?

⁸ Хәбәра Хԝәдеда те готьне, ԝәки паши шәш «рʹожед» әʹфьрандьне, Хԝәде әʹфьрандьн хьлаз кьр (Дәстп. 2:2). Йаһоԝа хәбате һʹьз дькә у һʹәта иро жи «шьхӧле хԝә дькә» (Йуһʹн. 5:17). Йаһоԝа шәш «рʹожа» хәбьти у «рʹожа» һʹәфта һеса бу у ӧса жи готә Исраелийа ԝәки һәр рʹожа һʹәфта һеса бьн. Хԝәде гот, ԝәки Шәми ортʹа ԝи у Исраелийада ча нишан ә. Әԝ рʹож бь тʹәмами рʹожа «рʹьһʹәтийе» бу у бона Йаһоԝа «пироз» бу. (Бьхунә Дәркʹәтьн 31:12-15.)  Һʹәмушкʹара ԛәдәхә бу кӧ ве рʹоже бьхәбьтьн, зарʹарʹа, хӧламарʹа, у һәла һе һʹәйԝанед малерʹа жи (Дәркʹ. 20:10). Әԝе йәке мәщал дьда мәрьва, ԝәки һе зедә һʹьш-аԛьле хԝә бьдьн сәр тьштед рʹӧһʹани.

9. Ԝәʹде Исада дәрһәԛа рʹожа Шәмийе кʹижан ньһерʹандьна нәрʹаст һәбу?

⁹ Рʹожа Шәмийе бона щьмәʹта Хԝәде керһати бу. Ле йәкә гәләк сәрԝеред религийа Щьһуйа, ԝәʹде Исада дәрһәԛа ԛануна рʹожа Шәмийе гәләк ԛәйдә саз кьрьн. Ԝана дьгот кӧ нәԛануни йә, ԝәки рʹожа Шәмийе һәла һе жи сьмбьлед геньм бьчьньн бьхԝьн, йан жи мәрьвәки жь нәхԝәшийе ԛәнщ кьн (Марԛ. 2:23-27; 3:2-5). Ле хԝәстьна Хԝәде әԝ нибу, у Иса әԝ йәк зәлал да кʹьфше ԝанрʹа, йед кӧ гӧһ дьданә ԝи.

10. Әм жь Мәтта 12:9-12 чь дькарьн һин бьн дәрһәԛа ньһерʹандьна Иса һьндава рʹожа Шәмийе?

¹⁰ Иса у Щьһуйед кӧ пәй ԝи дьчун, ль гора Ԛануна Муса Шәми хԝәй дькьрьн. * Ле Иса һьн пе гьлийа һьн жи пе кьред хԝә нишан кьр, ԝәки рʹожа Шәмийе гәрәке бей ԛәйдед зедә хԝәй кьн, у тьштәки нәрʹаст нинә һәрге ве рʹоже кьред ԛәнщ бькьн у аликʹарийе бьдьн. Әԝи әшкәрә гот: «Рʹожа шәмийе ԛәнщикьрьн щайиз ә». (Бьхунә Мәтта 12:9-12.) Әԝ нәдьфькьри, ԝәки аликʹари у ԛәнщикьрьн ԛануна рʹожа Шәмийе дьтʹәрʹьбинә. Кьред Иса нишан дькьрьн, ԝәки әԝи фәʹм  дькьр, кӧ мәʹнийа хԝәйкьрьна Шәмийе чь йә. Мәʹни әԝ бу, кӧ щьмәʹта Хԝәде жь шьхӧлед хԝәйә һәррʹожи һеса бьн, сәва һʹьш-аԛьле хԝә бьдьн сәр тьштед рʹӧһʹани. Иса малбәтәкә ӧсада мәзьн бу, кʹижан кӧ һәр гав рʹожа Шәмийе хԝәй дькьрьн, сәва һе незики Хԝәде бьн. Әве йәке әм жь Кʹьтеба Пироз педьһʹәсьн, кʹидәре ньвисар ә дәрһәԛа Иса, чахе әԝ шәһәре хԝә Ньсрәтеда бу: «Мина әʹдәте хԝә рʹожа шәмийе [Иса] кʹәтә кʹьниште у рʹабу кӧ бьхунә» (Луԛа 4:15-19).

11. Кʹе алийе хәбатеда мәсәла баш һиштийә бона Иса?

¹¹ Бешьк, Усьв сәр хәбате ӧса дьньһерʹи ча Хԝәде, у әԝи кӧрʹе хԝә Иса жи һин дькьр, ԝәки нәщартийе бькә (Мәт. 13:55, 56). У Иса хԝәха жи дьдит, ԝәки Усьв ча һәр рʹож хәбата гьран дькә, сәва әʹбура малбәта хԝәйә мәзьн бькә. Һʹәԝас ә ԝәки ԝәʹдә шунда Иса готә шагьртед хԝә: «Пʹалә һежайи һәԛе хԝә йә» (Луԛа 10:7). Бәле, әшкәрә йә, кӧ Иса заньбу, ԝәки хәбата гьран ча нә.

12. Кʹижан рʹез дьдьн кʹьфше, кӧ Кʹьтеба Пироз чь дьбежә дәрһәԛа хәбата гьран?

¹² Паԝлосе шанди жи хәбата гьран дькьр. Шьхӧле ԝийи сәрәкә әԝ бу, кӧ шәʹдәтийе бьдә дәрһәԛа наве Иса у мьзгинийа ԝи. Бәле, Паԝлос ӧса жи дьхәбьти сәва әʹбура хԝә бькә. Тʹесалоникийа заньбун, ԝәки Паԝлос бь «худана әʹнийа» хԝә «шәв у рʹож» дьхәбьти, сәва сәр тʹӧ кәси нәбә баргьрани (2 Тʹеслн. 3:8; Кʹар. Шанд. 20:34, 35). Паԝлос чахе дәрһәԛа хәбата хԝә дьгот, ча те кʹьфше дәрһәԛа чекьрьна кон дьгот. Чахе әԝ Корьнтʹеда бу, мала Әкила у Прьскилайеда дьма у «тʹәви ԝан хәбьти, чьмки пʹеше ԝан йәк бу, кон чедькьрьн». Ле чахе Паԝлос гот, ԝәки әԝ «шәв у рʹож» дьхәбьтә, әԝи нәдьхԝәст бьгота, ԝәки бей һесабун дьхәбьтә. Әԝ һеса жи дьбу, мәсәлә рʹожа Шәмийе. Әве рʹоже мәщал дьда ԝи, ԝәки Щьһуйарʹа шәʹдәтийе бьдә, йед кӧ мина ԝи рʹожа Шәмийе нәдьхәбьтин (Кʹар. Шанд. 13:14-16, 42-44; 16:13; 18:1-4).

13. Әм жь мәсәла Паԝлос чь дькарьн һин бьн?

¹³ Паԝлосе шанди рʹасти жи мәсәла баш һишт. Әԝ һьн дьхәбьти, һьн жи һәр гав «Мьзгинидайина Хԝәдеда» хьзмәткʹари дькьр (Рʹом. 15:16; 2 Корн. 11:23). Әԝи ӧса жи дьл дьда хушк-бьра, ԝәки ԝи шьхӧлида хирәт бьн. Әкила у Прьскила «шьхӧле Мәсиһ Исада», «һәвал-хәбатед» Паԝлос бун (Рʹом. 12:11; 16:3). Паԝлос дьл дьда Корьнтʹийа, ԝәки «шьхӧле Хӧданда пешда һәрʹьн» (1 Корн. 15:58; 2 Корн. 9:8). Йаһоԝа һәла һе жи рʹебәрийа Паԝлос кьр, ԝәки бьньвисә: «Кʹи нахԝазә бьхәбьтә, бьра нәхԝә жи» (2 Тʹеслн. 3:10).

14. Иса чь дьхԝәст бьгота чахе әԝи гьлийед жь Йуһʹәнна 14:12 гот?

¹⁴ Хәбата лапә фәрз, кӧ ԝан рʹожед ахьрийеда әм гәрәке бькьн, әԝ һәйә бәлакьрьна мьзгинийе у һазьркьрьна шагьрта. Иса пʹехәмбәрти кьр, ԝәки шагьртед ԝи ԝе жь кьред ԝи мәстьр бькьн. (Бьхунә Йуһʹәнна 14:12.) Ле әԝи нәгот, ԝәки әԝана ԝе мина ԝи кʹәрәмәта бькьн. Дәԝсе әԝи дьхԝәст бьгота, ԝәки шагьртед ԝи ԝе һе гәләк щийада у һе гәләк мәрьварʹа мьзгинийе бәла кьн у ԝана һин кьн, у һе зедә ԝәхт нә кӧ чьԛас Иса кьр.

15. Әм гәрәке кʹижан пьрса бьдьнә хԝә, у чьрʹа?

¹⁵ Һәрге һун дьхәбьтьн, ван пьрса бьдьнә хԝә: «Щийе хәбате, мәрьв мьн нас дькьн ча йәки хәбатһʹьз? Әз ԝәʹдәда хәбата хԝә хьлаз дькьм у чьԛас дәсте мьн те шьхӧл рʹьнд дькьм?». Һәрге  щаба ԝә әре йә, ԝәки ӧса нә һуне бал мәзьне хәбата хԝә навәки баш ԛазанщ кьн. Ӧса жи мәрьвед сәр хәбата ԝә, ԝе һе зедә бьхԝазьн гӧһ бьдьнә мьзгинийе. Дәрһәԛа хьзмәтийа хԝә пьрсед ӧса бьдьнә хԝә: «Хьзмәтийеда мьн нас дькьн ча мәрьве хирәт? Әз хԝә рʹьнд һазьр дькьм бона сәрледанед пешьн? Әз зу сәрледана дӧбарә дькьм? Әз щурʹә-щурʹә хьзмәтийеда кʹар дькьм?» Һәрге әре, һуне хьзмәтийа хԝәда шабуне бьвиньн.

16. Чьда ньһерʹандьна Иса у шандийед ԝи сәр рʹьһʹәтийе, щӧдә дьбә жь ньһерʹандьна мәрьвед иройин?

¹⁶ Иса заньбу, ԝәки щара жерʹа у шандийед ԝирʹа һесабун лазьм ә. Ле гәләк мәрьвед һьнге у йед иро, мина ԝи мәрьве дәԝләти нә, дәрһәԛа кʹижани Иса мәтʹәлокеда гот. Әԝи мерьки хԝәрʹа дьгот: «Рʹуне бьхԝә, вәхԝә у ша бә» (Луԛа 12:19; 2 Тимтʹ. 3:4). Дьле ԝи педа сәр рʹьһʹәтийе у ләзәте бу. Ле бона Иса у шандийед ԝи, рʹьһʹәти у ләзәте тʹӧ щар щийе пешьн нәдьгьртьн.

17. Әм чахе дьчьн һеса бьн, ԝәʹде хԝә ча хәрщ дькьн?

¹⁷ Иро, әм чʹәʹв дьдьнә Иса ве йәкеда, кӧ чахе әм һеса дьбьн жи, әм ԝи ԝәʹде хԝә жи дьдьнә хәбате, сәва шәʹдәтийе бьдьн у һәрʹьн сәр щьвата. Бона мә хьзмәти у щьват ӧса фәрз ьн, ԝәки әм тʹӧ мәщәла дәсте хԝә бәрʹнадьн (Ибрн. 10:24, 25). Һәла һе жи чахе дьчьн щики һеса бьн, әм ԝедәре жи дьчьн щьвате, у һәр мәщале дьдьнә хәбате, сәва шәʹдәтийе бьдьнә ԝан мәрьва, йед кӧ рʹасти мә тен (2 Тимтʹ. 4:2).

18. Пʹадше мә Иса Мәсиһ, дьхԝазә кӧ әм чь бькьн?

¹⁸ Әм чьԛас рʹази нә, ԝәки Пʹадше мә Мәсиһ Иса жь мә һаԛас дәʹԝа накә чьԛас әм нькарьн, у әԝ али мә дькә, ԝәки сәр хәбате у рʹьһʹәтийе рʹаст бьньһерʹьн (Ибрн. 4:15). Әԝ дьхԝазә, ԝәки әм чахе лазьм ә рʹьһʹәт бьн. Әԝ ӧса жи дьхԝазә, ԝәки әм бьхәбьтьн, сәва әʹбура хԝә бькьн у ӧса жи хьзмәт кьн у шабуне бьстиньн. Готара дьнда әме шеԝьр кьн, кӧ Иса бона мә чь кьр сәва мә жь хӧламтийа берʹәʹми хьлаз кә.