1, 2. Иро мәрьв ча дьньһерʹьн сәр хәбата хԝә?

ГӘЛӘК мәрьв иро дьфькьрьн, ԝәки хәбат ԝана йан бьльнд йан ньмьз дькә. Һьнә културада, чахе мәрьв һәврʹа дьбьнә нас, әʹдәт ә ԝәки һәв бьпьрсьн: «Тӧ чь хәбате дьки?»

² Щара Кʹьтеба Пироз мәрьва бь хәбата ԝан әʹйан дькә, мәсәлә әԝ дьбежә, «Мәттайе хәрщгьр», «Шьмһʹуне чʹәрмкәрда», у «Луԛайе дохторе дәлал» (Мәт. 10:3; Кʹар. Шанд. 10:6; Колс. 4:14). Кʹьтеба Пироз дьбежә кӧ мәрьв пе шьхӧл у щабдарийед хԝә тенә кʹьфше, кӧ әԝ чь щурʹә мәрьв ьн. Мәсәлә әм дьхуньн дәрһәԛа Даԝьд Пʹадша, Елйас пʹехәмбәр, у Паԝлосе шанди. Әԝ мәрьв гәләк ԛимәт дькьрьн әԝ шьхӧл, кӧ Хԝәде дабу ԝан. Әм жи гәрәке мина ԝан ԛимәт кьн һәр шьхӧле кӧ Хԝәде дайә мә.

3. Чьрʹа лазьм ә ԝәки бьред әʹмьрда мәзьн, бьред щаһьл һин кьн? (Бьньһерʹә шькле әʹԝльн.)

³ Әм һʹьз дькьн Йаһоԝарʹа хьзмәт кьн у ԛимәт дькьн әԝ шьхӧле кӧ әм тʹәшкиләта ԝида дькьн. Гәләк жь мә һʹьз дькьн шьхӧле хԝәйи щьватеда у дьбәкә әм дьхԝазьн тʹьме һәма әԝи шьхӧли бькьн. Ле йазьх, жь бо гӧне Адәм әм гьшк кал-пир дьбьн, у ида һаԛас ԛәԝата мә тʹӧнә, ча бәре (Ԝаиз 1:4). Ԝан пашԝәхтийа‚ жь бо ве йәке һьнә чәтьнайи пешда  һатьн. Иро шьхӧле бәлакьрьна мьзгинийе гәләк зедә у мәзьн дьбә. Ӧса жи тʹәшкиләта Йаһоԝа һащәт у техноложийед тʹәзә дьдә хәбате, сәва кӧ һе зедә мәрьв мьзгинийе пебьһʹәсьн. Ле бона мәрьвед әʹмьрда мәзьн, щара чәтьн ә һин бьн ԝан тьштед тʹәзә бьдьнә хәбате (Луԛа 5:39). Һәрге жи әԝ йәк ԝанрʹа чәтьн нинә, йәкә әԝана нькарьн һаԛас шьхӧл бькьн, чьԛас щаһьл * дькарьн (Мәтʹлк. 20:29). Ләма ԝе бь һʹьзкьрьн у билани бә, һәрге йед әʹмьрда мәзьн, һазьр кьн бьред щаһьл, сәва әԝана һе зедә щабдарийа һьлдьн сәр хԝә. (Бьхунә Зәбур 71:18.)

4. Чьрʹа һьнәкарʹа чәтьн ә ԝәки шьхӧле хԝә бьдьн дәсте кәсәки дьн? (Бьньһерʹьн чаргошә « Чьрʹа Дькарә Мәрʹа Чәтьн бә ԝәки Шьхӧле Хԝә Бьдьнә Дәсте Кәсәки Дьн?».)

⁴ Һьнәкарʹа һеса нинә щабдарийа хԝәйә щьватеда бьдьнә дәсте кәсәки дьн. Чьмки һьнәк нахԝазьн ӧнда кьн әԝ шьхӧле кӧ әԝана һʹьз дькьн у ԛимәт дькьн. Һьнәк жи дьфькьрьн ԝәки йед щаһьл нькарьн мина ԝан шьхӧл рʹьнд бькьн. Һьнәк жи дьбәкә дьфькьрьн, ԝәʹде ԝан тʹӧнә бьред дьн һин кьн. Ле бьред щаһьлрʹа лазьм ә сәбьр кьн, чахе шьхӧл һе надьн дәсте ԝан.

5. Ве тʹемайеда әме дәрһәԛа кʹижан пьрса шеԝьр кьн?

⁵ Ԝәрә әм шеԝьр кьн дӧ пьрса: Йа пешийе, ча бьред әʹмьрда мәзьн дькарьн али бьред щаһьл бькьн, сәва әԝана һе зедә щабдарийа һьлдьн сәр хԝә, у чьрʹа әԝ йәк фәрз ә? (2 Тимтʹ. 2:2). Йа дӧда, чьрʹа фәрз ә ԝәки йед щаһьл әʹщьз нәбьн чахе бьред әʹмьрда мәзьн у щерьбанди ԝана һин дькьн? Ле ԝәрә пешийе әм биньн бира хԝә сәрһатийа Даԝьд Пʹадша, кӧ әԝи чаԝа кӧрʹе хԝә һазьр кьр сәва шьхӧләки мәзьн.

6. Даԝьд Пʹадша чь дьхԝәст бькьра, у дәрһәԛа ве йәке Йаһоԝа чь жерʹа гот?

⁶ Дьжмьна бь сала пәй Даԝьд дькʹәтьн у әԝ жь щики дьрʹәвийа щийе дьн.  Паше, чахе әԝ бу пʹадша, ида мала ԝийә баш һәбу, ле әԝ бәрхԝә дькʹәт ԝәки «мала», демәк пʹарьстгәһа Йаһоԝа тʹӧнә бу. Ләма әԝи хԝәрʹа нет дани, ԝәки бона Йаһоԝа пʹарьстгәһе ава кә. Әԝи дәрһәԛа ве йәке Натʹанрʹа гот: «Ва әз дьжим мала кӧ жь даре әрзе йә, ле сьндоԛа пәймана Йаһоԝа бьн чадьрада йә». Натʹан жи щаба ԝи да: «Тә чь нет кьрийә дьле хԝә бинә сери, чьмки Хԝәдейе рʹаст тʹәви тә йә». Ле Йаһоԝа щурʹәки майин щаба ԝи да, әԝи готә Натʹан ԝәки Даԝьдрʹа бежә: «Тӧ нини йе кӧ мьнрʹа мале ава кә сәва әз теда бьминьм». Рʹаст ә Йаһоԝа бь һʹьзкьрьн Даԝьд да баԝәркьрьне, ԝәки әԝе диса жи тʹьме тʹәви ԝи бә у ԝи кʹәрәм кә, ле йәкә әԝи гот, ԝәки кӧрʹе ԝи Сьлеман ԝе пʹарьстгәһе ава кә. Ле гәло Даԝьд ча хԝә да кʹьфше чахе дәрһәԛа ԝе йәке пеһʹәсийа? (1 Дир. 17:1-4, 8, 11, 12; 29:1, ДТʹ).

7. Даԝьд ча хԝә да кʹьфше чахе Йаһоԝа гот кӧ әԝ пʹарьстгәһе ава нәкә?

⁷ Даԝьд дьлтәнг нәбу, ԝәки ԝе пʹарьстгәһе ава нәкә у наве ԝи ԝе әʹйан нәбә кӧ әԝи пʹарьстгәһа Хԝәде ава кьр. Чахе пʹарьстгәһ ава бу, әԝ нас бу ча пʹарьстгәһа Сьлеман, нә кӧ йа Даԝьд. Даԝьд дьбәкә бәрхԝә дькʹәт, ԝәки нькарьбу нета дьле хԝә бинә сери, ле әԝи аликʹарийа мәзьн да бона авакьрьне. Әԝи сәва авакьрьне хәбатчи һазьр кьрьн, ӧса жи һәсьн, сьфьр, зив у зерʹ, у ӧса жи даред әрзе тʹоп кьр. Хенщи ве йәке әԝи дьл да бәр кӧрʹе хԝә Сьлеман: «Ньһа кӧрʹе мьн, бьра Йаһоԝа тʹәви тә бә, у тӧ пешда һәрʹи у мала Хԝәдейе хԝә Йаһоԝа ава ки, чаԝа кӧ әԝи дәрһәԛа тә готийә» (1 Дир. 22:11, 14-16, ДТʹ)

8. Чьрʹа Даԝьд фькьри ԝәки Сьлеман нәщерʹьбанди йә ԝи шьхӧлида, ле йәкә әԝи чь кьр?

⁸ Бьхунә 1 Дирок 22:5. Даԝьд фькьри ԝәки кӧрʹе ԝи Сьлеман ԝе нькарьбә рʹебәрийа авакьрьна пʹарьстгәһе бькә, чьмки Пʹарьстгәһ гәрәке гәләк мәзьн буйа, ле Сьлеман щаһьл у нәщерʹьбанди бу. Ле йәкә Даԝьд баԝәр бу, ԝәки Йаһоԝа ԝе али кӧрʹе ԝи бькә, сәва әԝи шьхӧли бинә сери. Ләма чь дәсте Даԝьд дьһат әԝи кьр, әԝи гәләк матерйал һазьр кьр бона авакьрьне.

9. Ча бьред әʹмьрда мәзьн дькарьн шабуне бьстиньн, чахе щабдарийа хԝә дьдьнә дәсте йед дьн? Мәсәле биньн.

⁹ Бьред әʹмьрда мәзьн гәрәке бәрхԝә нәкʹәвьн, чахе лазьм ә щабдарийед хԝә бьдьнә дәсте бьред щаһьл. Чахе йед щаһьл һинкьри нә сәва щабдарийа һьлдьнә сәр хԝә, әԝ йәк шьхӧле Хԝәде һе пешда дьбә. Бьред мәзьн гәрәке ша бьн, ԝәки йед щаһьл кʹижан кӧ ԝана хԝәха һин кьрийә, бунә щерʹьбанди у ԝе шьхӧле ԝан бькьн. Ԝәрә мәсәләке шеԝьр кьн. Бьдьнә бәр чʹәʹве хԝә, бав кӧрʹе хԝә һин дькә ԝәки әʹрәбе бажо. Чахе зарʹ бьчʹук ә, әԝ дина хԝә дьдә ажотьна баве хԝә. Әԝ мәзьн дьбә, паше бав жерʹа шьровәдькә кӧ әԝ  ча бажо. Ле гава кӧрʹ дьбә гьһишти, ида хԝәха әʹрәбе дажо, у бав жи һе зедә ԝи ширәт дькә кӧ һе рʹьнд ажотьне бьзаньбә. Щара бав дажо щара жи кӧрʹ. Бав ша дьбә ԝәки кӧрʹ бей аликʹарийа ԝи, дәԝса ԝи әʹрәбе дажо. Ӧса жи бьред әʹмьрда мәзьн фьрнаԛ дьбьн чахе бьред щаһьл дьвиньн, йед кӧ ԝана хԝәха һин кьрийә сәва щьватеда һе зедә шьхӧл бькьн.

10. Муса ча хԝә да кʹьфше чахе пеһʹәсийа кӧ Исраеледа һьнәк хԝә ча пʹехәмбәр дьдьнә кʹьфше?

¹⁰ Әм гәрәке хԝә хԝәй кьн, ԝәки һʹәвсудийе кәсәки нәкьн. Дина хԝә бьдьнә сәрһатийа Муса, ԝәки әԝи ча хԝә да кʹьфше чахе пеһʹәсийа кӧ зома Исраеледа һьнәк хԝә ча пʹехәмбәр дьдьнә кʹьфше. (Бьхунә Жьмар 11:24-29.) Йешу, бәрдәстийе Муса, дьхԝәст ԝана бьдә сәкьнандьне. Дьбәкә әԝ фькьри кӧ әԝана наве Муса хьраб дькьн у һʹӧкӧмәтийа ԝи ньмьз дькьн. Ле Муса готә ԝи: «Әԝ тӧ дәԝса мьн һʹәвсудийе дьки? Хԝәзи тʹәмамийа мьләте Хӧдан пʹехәмбәр буна, кӧ Хӧдан рʹӧһʹе хԝә данийа ль сәр ԝан». Муса дит ԝәки Йаһоԝа рʹебәрийа ԝе йәке дькә у әԝи дьхԝәст кӧ һʹәму хьзмәткʹар жи, бькарьбьн шьхӧле Хԝәде бькьн. Ԝәрә әм жи мина Муса ша бьн, чахе йед дьн щабдарийа дьстиньн.

11. Бьраки чь гот дәрһәԛа ве йәке чахе щабдарийе дьдьнә дәсте кәсәки дьн?

¹¹ Иро гәләк бьра һәнә йед кӧ бь дәһа сала, чьԛас дькарьбун дьхәбьтин кӧ йед майин һин кьн сәва әԝана жи һе зедә шьхӧл һьлдьнә сәр хԝә. Мәсәлә, бьраки бь наве Питер 74 сала хьзмәт дькьр ча хьзмәткʹаре һәртʹьм. Жь ԝи ԝәʹдәйи 35 сала әԝи хьзмәт дькьр филиаләкә Әԝропайеда. Гәләк сала әԝ хьзмәт дькьр ча сәркʹаре Идара Хьзмәтийе. Ньһа дәԝса Питер, бьраки щаһьл бь наве Пол, бу сәркʹар, әԝ чәнд сала тʹәви Питер дьхәбьти. Ле гәло Питер бәрхԝә дькʹәт, ԝәки дәԝса ԝи ида кәсәки дьн шьхӧл дькә? На, әԝи гот: «Әз ӧса ша мә, ԝәки һәнә бьред ӧса, йед кӧ тенә һинкьрьне сәва һе зедә шьхӧл һьлдьнә сәр хԝә у әԝи шьхӧли гәләк рʹьнд дькьн».

12. Әм чь дәрсе хԝәрʹа һин дьбьн жь сәрһатийа Рʹәһобоԝам?

¹² Паши мьрьна Сьлеман, кӧрʹе ԝи Рʹәһобоԝам бу пʹадша. Чахе Рʹәһобоԝамрʹа ширәт лазьм бу кӧ чаԝа сәрԝертийе бькә, әԝи пешийе жь меред әʹмьрда мәзьн пьрси. Ле йәкә әԝи ширәте ԝана ԛәбул нәкьр у чу ширәт жь ԝан щаһьла һьлда, тʹәви кʹе әԝ мәзьн бьбу. Ахьрийа ве йәке гәләк хьраб бу (2 Дир. 10:6-11, 19). Гәло әм жь ве йәке чь дәрсе хԝәрʹа һьлдьдьн? Ԝе билани бә һәрге әм ширәта жь мәрьвед әʹмьрда мәзьн һьлдьн, чьмки әԝана щерʹьбанди нә. Ләма йед щаһьл гәрәке әʹщьз нәбьн һәрге жь ԝан те хԝәстьне кӧ тьштәки бь щурʹәки майин бькьн нә кӧ ча ԝана бәре дькьр. Ԝе баш бә ԝәки бьред щаһьл ләз нәкʹәвьн у ширәтед бьред әʹмьрда мәзьн дәсте хԝә нәкьн.

13. Бьред щаһьл ча гәрәке һәвкʹарийе бькьн тʹәви бьред мәзьн?

¹³ Һьнә бьред щаһьл рʹебәрийе шьхӧлед ӧса дькьн, кʹижан кӧ бьред әʹмьрда мәзьн дькьн. Ԝе керһати бә сәва щаһьла, ԝәки жь ԝан бьред щерʹьбанди һин бьн. Пол, дәрһәԛа кʹижани мә жоре гот ԝәки әԝ дәԝса Питер идарәкә Бәйтʹәледа сәркʹар ә, гот: «Әз гәләк щар незики Питер дьбум ԝәки жь ԝи ширәта һьлдьм, у әз идара хԝәда бьред дьн жи һелан дькьм ԝәки ӧса бькьн».

14. Әм чь һин дьбьн жь ве йәке кӧ чаԝа Тимотʹейо тʹәви Паԝлосе шанди һәвкʹари дькьр?

¹⁴ Тимотʹейо кӧ щаһьл бу, гәләк сала  тʹәви Паԝлосе шанди һәвкʹари дькьр. (Бьхунә Филипи 2:20-22.) Паԝлос Корьнтʹийарʹа ньвиси: «Мьн Тимотʹейо сәр ԝәда шанд, лаԝе хԝәйи дәлал у һьндава Хӧданда амьн. Әԝе ԝан рʹе-дьрбед мьнә Мәсиһ Исада гьрти бькә бира ԝә, кӧ әз чаԝа ль һәр дәра, һʹәму щьвина һин дькьм» (1 Корн. 4:17). Әԝ гьли гәләк рʹьнд дьдьнә кʹьфше кӧ Паԝлос у Тимотʹейо ча тʹәвайи һәвкʹари дькьрьн. Паԝлос тʹьме ԝәʹдә дьдит сәва методед хԝә Тимотʹейо һин кә. Тимотʹейо рʹьнд һин бу у Паԝлос гәләк ша дьбу. Әԝи итʹбарийа хԝә Тимотʹейо дьани, ԝәки әԝ ԝе бькарьбә рʹӧһʹанида мьԛати хушк-бьред Корьнтʹеда бә. Рʹасти жи мәсәләкә чьԛас баш ә бона рʹуспийа, чахе әԝана бьред дьн һин дькьн сәва щьватеда рʹебәрийе һьлдьнә сәр хԝә.

15. Ширәта Паԝлос Мәсиһийед Рʹомерʹа, ча дькарә али мә бькә чахе дәрәщед мә тенә гӧһастьне?

¹⁵ Әм ԝәʹде мәхсусда дьжин. Пʹара тʹәшкиләта Йаһоԝа йа әʹрде, гәләк алийава пешда дьчә у ләма һе зедә гӧһастьн жи лазьм ә бенә кьрьне. Һьнә гӧһастьн дькарьн сәр мә жи һʹӧкӧм бьн, у дьԛәԝьмә мәрʹа нәһеса бә һини ԝан гӧһастьна бьн. Ле ԝәрә әм ԝи чахи жи мьлук бьминьн у дина хԝә бьдьнә сәр шьхӧле Хԝәде, нә кӧ сәр хԝә. Чахе әм ӧса бькьн, әме йәктийе хԝәй кьн. Паԝлос Мәсиһийед Рʹомерʹа ньвиси: «Ԝә һәр кәсирʹа дьбежьм: Чьԛас жь ԝә дькʹәвә, жь ԝе зедәтьр нәфькьрьн, ле сәр хԝә бьн, бьра һәр кәс ԝәкә ԝе баԝәрийа кӧ Хԝәде пʹарәвәкьр, бьфькьрә. Чаԝа ԛальбе мәда гәләк әндәм һәнә у һʹәму әндәм кьрәки накьн, ӧса жи әм гәләк ьн, ле йәктийа Мәсиһда әм бәдәнәк ьн» (Рʹом. 12:3-5).

16. Чь дькарә аликʹарийе бьдә бьред әʹмьрда мәзьн у щаһьл, у ӧса жи жьнед ԝан, ԝәки тʹәшкиләта Хԝәдеда әʹдьлайе у йәктийе хԝәй кьн?

¹⁶ Һәр кәс жь мә дьхԝазә шьхӧле Пʹадшатийе пешда бьвә. Гәли бьред әʹмьрда мәзьн, бьред щаһьл һин кьн, ԝәки әԝана һе зедә щабдарийа һьлдьнә сәр хԝә. Ле һун, гәли бьред щаһьл, ԛәбул кьн әԝан щабдарийа у шьхӧла кӧ дьдьнә дәстед ԝә. Мьлук бьн у ԛәдьре мәзьна бьгьрьн. Гәли кʹӧлфәта ле һун чʹәʹв бьдьнә Прьскилайе, жьна Әкила, у бь амьни пьштгьрийа мере хԝә бькьн, чахе дәрәщә тенә гӧһастьне (Кʹар. Шанд. 18:2).

17. Иса шагьртед хԝә чь һин дькьр, у чьрʹа?

¹⁷ Иса мәсәләкә баш һишт, кӧ чаԝа һин кьн йед майин сәва әԝана һе зедә щабдарийа һьлдьнә сәр хԝә. Иса заньбу, ԝәки әԝ ԝе тʹьме сәр әрде нибә у йед дьн гәрәке шьхӧле ԝи бәрдәԝам кьн. Әԝи заньбу, ԝәки шагьртед ԝи гӧнәкʹар ьн, ле йәкә әԝи итʹбарийа хԝә ԝана дьани у ԝанрʹа гот кӧ әԝана ԝе ԝи зедәтьр бькьн (Йуһʹн. 14:12). Әԝи әԝана бь тʹәмами һазьр кьрьн у һин кьрьн бона ԝи шьхӧли. У ԝана мьзгини бәла дькьр һʹәму щийа кʹидәре дькарьбун (Колс. 1:23).

 18. Әм һивийа чь нә ахьрийеда, у әм чь дькарьн иро бькьн?

¹⁸ Паше чахе Иса әʹмьре хԝә ԛӧрбан кьр, әԝ һатә сахкьрьне у чу ль әʹзмен. Ԝедәре әԝи һе зедә шьхӧл станд. Хԝәде «әԝ дани сәр һʹәму сәрԝертийа, һʹӧкӧмәтийа, ԛәԝата, хӧдантийа» (Әфәс. 1:19-21). Һәрге жи ӧса бьԛәԝьмә кӧ пешийа Һармәгәдоне әм әʹмьре хԝә ӧнда кьн, әме бенә сахкьрьне дьнйа тʹәзәда. Әме ԝедәре гәләк шьхӧлед һʹәԝас бькьн у шабуне бьстиньн. Ле ньһа, һәр кәс жь мә дькарә шьхӧләки гәләк фәрз бькә, демәк мьзгинийе бәла кә у шагьрта һазьр кә. Ԝәрә әм гьшк ча щаһьл ӧса жи әʹмьрда мәзьн, «һәр гав шьхӧле Хӧданда пешда һәрʹьн» (1 Корн. 15:58).