1, 2. а) Йаһоԝа дәрһәԛа рʹожед мә чь пʹехәмбәрти кьр? б) Дь ве тʹемайеда әме щабед кʹижан пьрса пебьһʹәсьн? (Бьньһәрʹә шькьле әʹԝльн.)

ЙАҺОԜА дәрһәԛа ԝәʹде ньһа кӧ әм дьжин, пешда гот: «Дь ԝан рʹожанда жь һәр тәԝре зьманед нәтәԝәйанда [щьмәʹтада] дәһ кәс пе даԝа кәсәки Щьһудива бьгьрьн у ԝе бь готьна: ‹Әм бь ԝәрʹа һәрʹьн, жь бәр, мә бьһистьн кӧ Хԝәде бь ԝәрʹа йә!›» (Зәкәр. 8:23). Әԝ дәһ кәс кӧ «даԝа кәсәки Щьһудива» дьгьрьн, бь симболик тенә һʹәсабе мәрьв гӧмана кʹе жи жийина сәр әʹрде йә. У бона ԝан ԛәдьр ә кӧ шьхӧлкʹарийе дькьн тʹәви рʹункьрийа, демәк «Исраела Хԝәде», чьмки заньн кӧ Йаһоԝа ԝана кʹәрәм дькә (Галт. 6:16).

² Чаԝа кӧ Зәкәрйа пʹехәмбәр, Иса жи гот кӧ нава щьмәʹта Хԝәдеда ԝе йәкти һәбә. Иса дәрһәԛа пәйчуйед хԝә гот, кӧ әԝана жь дӧ кʹома нә, әԝ һәнә «кәрийе пези бьчʹук» у «пәзед дьн». Ле әԝи гот кӧ әԝана ԝе «кәрик» бьн у «шьванәки» ԝан ԝе һәбә (Луԛа 12:32; Йуһʹн. 10:16). Чьмки әԝана дӧ кʹом ьн, ләма һьнә пьрс пешда тен: 1) Гәло лазьм ә кӧ пәзед дьн бьзаньбьн наве һʹәму рʹункьрийа кӧ иро һәнә? 2) Рʹункьри ча гәрәке хԝә бьдьнә кʹьфше? 3) Һун ча  гәрәке хԝә кʹьфш кьн чахе кәсәк дь щьвата ԝәда дәстпедькә сәр Биранине симбола бьхԝә? 4) Гәло лазьм ә кӧ һун бәрхԝә кʹәвьн жь бо ве йәке, кӧ һәжмара йед кӧ симбола дьхԝьн зедә дьбә? Ԝәрә әм пебьһʹәсьн щабед ԝан пьрса.

3. Чьрʹа әм нькарьн сәд сәләфи бьзаньбьн кӧ кʹе ԝе бьбә пʹарәк жь 144 000?

³ Гәло лазьм ә кӧ пәзед дьн бьзаньбьн наве һʹәму рʹункьрийа? Һәрге кьн бежьн, на. Чьмки һәрге жи кәсәк һатә рʹункьрьне, әԝ найе һʹәсабе кӧ әԝ ԝе сәд сәләфи хәлата хԝә бьстинә, чьмки әԝ гәрәке һʹәта хьлазийе амьнийа хԝә избат кә. Шәйтʹан әԝе йәке занә, у ләма «пʹехәмбәред дәрәԝ» дьдә хәбате кӧ «бькарьбьн бьжартийед Хԝәде жи бьхальфиньн» (Мәт. 24:24). Мәсиһийед рʹункьри сәд сәләфи нькарьн баԝәр бьн кӧ әԝана ԝе хәлата хԝә бьстиньн, һʹәта кӧ Йаһоԝа мора хьлазийе нәдә сәр ԝан. Йаһоԝа ԝе йан пешийа мьрьна ԝан йан пешийа дәстпебуна «тәнгасийа мәзьн» мора хьлазийе бьдә сәр ԝан (Әʹйан. 2:10; 7:3, 14). Демәк әм нькарьн сәд сәләфи сәр кәсәки бежьн кӧ әԝ дькʹәвә нава 144 000 һʹәзара. ^[1]

4. Һәрге әм нькарьн бьзаньбьн наве һʹәму рʹункьрийа йед кӧ иро ль сәр әʹрде нә, ле ча әм дькарьн тʹәви ԝан «һәрʹьн»?

⁴ Һәрге пәзед дьн нькарьн наве һʹәму рʹункьрийа бьзаньбьн, ле ԝе ча бькарьбьн тʹәви ԝан «һәрʹьн»? Дина хԝә бьдьне Зәкәрйа чь гот дәрһәԛа дәһ мера, кӧ бь симболик тенә һʹәсабе пәзед дьн. Әԝ дәһ мер «пе даԝа кәсәки Щьһудива бьгьрьн у ԝе бь готьна [бежьн]: ‹Әм бь ԝәрʹа һәрʹьн, жь бәр, мә бьһистьн кӧ Хԝәде бь ԝәрʹа йә!›» Рʹаст ә дь ве рʹезеда те готьне дәрһәԛа Щьһуйәки, ле гьлийе «бь ԝәрʹа» те һʹәсабе гәләк нә кӧ йәк. Демәк әԝ Щьһуйе рʹӧһʹани те һʹәсабе кʹом, нә кӧ мәрьвәк. Ләма нәлазьм ә кӧ әм һәр Щьһуйе рʹӧһʹани нас кьн у паше тʹәви ԝи һәрʹьн. Әм гәрәке ԝана һʹәсаб кьн чаԝа кʹом у пьштгьрийа ԝан бькьн. Кʹьтеба Пироз мәрʹа тʹӧ щар набежә кӧ әм пәй кәсәки һәрʹьн. Әм гәрәке тʹәне пәй Иса һәрʹьн, йе кӧ Рʹебәре мә йә (Мәт. 23:10).

5. Рʹункьри гәрәке бьфькьрьн сәр кʹижан ширәта фәрз, у чьрʹа?

⁵ Рʹункьри гәрәке гәләк кʹур дина хԝә бьдьн сәр ширәта жь 1 Корьнтʹи 11:27-29. (Бьхунә.) Паԝлос дь ԝан рʹезада дайә кʹьфше кӧ рʹункьри дькарә нәщайиз симбола бьхԝә у вәхԝә, һәрге һәләԛәтийа хԝә тʹәви Йаһоԝа хԝәй накә (Ибрн. 6:4-6; 10:26-29). Әԝ ширәт али рʹункьрийа дькә, кӧ бира хԝәда хԝәй кьн ԝәки ԝана һе хәлата хԝә нәстандьнә. Әԝана гәрәке ԛазанщ кьн «хәлата кӧ Хԝәде дь газикьрьна хԝә йа әʹзманида бь Мәсиһ Иса пʹешкʹеш дькә» (Фили. 3:13-16).

6. Мәсиһийед рʹункьри гәрәке ча хԝә бьдьнә кʹьфше?

⁶ Паԝлос Мәсиһийед рʹункьри һелан кьр кӧ әԝана «бьжин, чаԝа лайиԛи ԝе газийе йә, кʹижанерʹа [әԝана] һатьнә газикьрьне». Ле ԝана ча карьбу әԝ йәк бькьра? Паԝлос шьровәкьр: «Бь тʹәмамийа мьлуктийе у шкәсти, бь сәбьре һʹьзкьрьнеда ль бәр һәв дахьн. Бьщәʹдиньн, кӧ йәктийа рʹӧһʹ пе һәвгьредана әʹдьлайийе хԝәй кьн» (Әфәс. 4:1-3). Рʹӧһʹе Хԝәдейи пироз али хьзмәткʹаред ԝи дькә кӧ әԝана мьлук бьн, нә кӧ бабах бьн (Колс. 3:12).  Рʹункьри ӧса нафькьрьн кӧ Хԝәде рʹӧһʹе хԝәйи пироз ԝанрʹа һе зедә дьдә, нә кӧ йед нәрʹункьрирʹа. Әԝана набежьн кӧ занәбуна ԝан һе зедә йә. У әԝана нә жи дьдьнә кʹьфше, кӧ жь йед дьн баштьр ьн. У әԝана тʹӧ кәсирʹа набежьн кӧ әԝ жи рʹункьри йә, у кӧ әԝ гәрәке симбола бьхԝә. Чьмки әԝана заньн кӧ тʹәне Йаһоԝа дьжберә, кӧ кʹе ԝе бе бьжартьне.

7, 8. Рʹункьри һивийа чь ниньн, у чьрʹа?

⁷ Рʹаст ә рʹункьри һʹәсаб дькьн ԛәдьрәки мәзьн кӧ әԝана ԝе һәрʹьнә әʹзмен, ле йәкә әԝана һивийе ниньн кӧ йед дьн щурʹәки мәхсус ԝана һӧрмәт кьн (Әфәс. 1:18, 19; бьхунә Филипи 2:2, 3.) Рʹӧһʹе Йаһоԝайи пироз, шәхси шәʹдәтийе дьдә ԝан кӧ әԝана рʹункьри нә. У тʹӧ кәс дәрһәԛа ве йәке ньзанә. Ләма рʹункьрийарʹа әʹщебмайи нинә, һәрге һьнә мәрьв дәрберʹа нькарьн баԝәр кьн кӧ әԝана бь рʹастийе рʹункьри нә. Чьмки Кʹьтеба Пироз ширәте дьдә, кӧ әм гәрәке дәрберʹа баԝәр нәкьн, һәрге кәсәк дьбежә кӧ әԝи жь Хԝәде щабдарийа мәхсус стандийә (Әʹйан. 2:2). Әԝана хԝә надьнә кʹьфше кӧ рʹункьри нә, сәва кӧ дина мәрьва нәкʹьшиньн сәр хԝә. Әԝана нә жи ԛӧрʹә дьбьн бь ве йәке кӧ әԝана ԝе чь шьхӧли бькьн ль әʹзмен (1 Корн. 1:28, 29; бьхунә 1 Корьнтʹи 4:6-8.)

⁸ Һьн жи, Мәсиһийед рʹункьри хԝә башԛә накьн, йан жи тʹәне тʹәви рʹункьрийед дьн ԝәʹдә дәрбаз накьн. Әԝана рʹункьрийед дьн нагәрʹьн, сәва кӧ тʹәви ԝан гьредайи бьн йан жи дьзива кʹома саз кьн сәва кӧ башԛә Кʹьтеба Пироз леколин бькьн (Галт. 1:15-17). Һәрге рʹункьри ӧса бькьн, щьват дькарә пʹаравәбә. Һьн жи әԝ ԝе бьдә кʹьфше кӧ әԝана мьԛабьли рʹӧһʹе пироз дьчьн, кʹижан кӧ әʹдьлайи у йәктийе тинә щьвате. (Бьхунә Рʹомайи 16:17, 18.)

9. Чьрʹа әм гәрәке фәсал бьн ве йәкеда кӧ ча бьн һьндава ԝан йед кӧ сәр Биранине симбола дьхԝьн? (Бьньһерʹә чаргошә « Һʹьзкьрьн ‹Бепʹәргал Нинә›».)

⁹ Һун гәрәке ча бьн һьндава хушкбьред рʹункьри? Иса шагьртед хԝәрʹа гот: «Һун һʹәму жи бьра нә». Паше әԝи зедә кьр у гот: «Кʹи кӧ хԝә бьльнд кә, әԝе ньмьз бә, ле кʹи кӧ хԝә ньмьз кә, әԝе бьльнд бә» (Мәт. 23:8-12). Ләма жи ԝе нәрʹаст бә һәрге кәсәк йәки дьн бьльнд кә, һәла һе һәрге жи әԝ рʹункьри йә. Чахе Кʹьтеба Пироз дәрһәԛа рʹуспийа дьбежә, әԝ мә һелан дькә кӧ әм чʹәʹв бьдьнә баԝәрийа ԝан. Ле Кʹьтеба Пироз тʹӧ щар набежә кӧ әм мәрьва һʹәсаб кьн чаԝа рʹебәре мә (Ибрн. 13:7). Бәле, Кʹьтеба Пироз дьбежә кӧ һьнәк «дӧбарә һежайи ԛәдьр» ьн. Әԝана һежайи ԛәдьр ьн, нә бона ве йәке кӧ әԝана рʹункьри нә, ле чьмки әԝана «сәрԝерийе рʹьнд дькьн» у «хәбәрдан у һинкьрьнеда дьхәбьтьн» (1 Тимтʹ. 5:17). Ләма ԝе нәлайиԛ бә, һәрге кәсәк рʹункьрийа рʹумәт кә йан зәʹф һӧрмәт кә. Һе хьраб әԝ ә, кӧ һәрге һәләԛәтийа мә тʹәви рʹункьрийа мәхсус бә, демәк әм ԝана зәʹф һӧрмәт кьн, дькарә ԝанрʹа чәтьн бә кӧ мьлук бьминьн (Рʹом. 12:3). Бәле, тʹӧ кәс жь мә нахԝазә хушк-бьрарʹа бьбә кәвьре лькʹӧмандьне! (Луԛа 17:2).

10. Әм ча дькарьн ԛәдьр бьдьнә кʹьфше һьндава Мәсиһийед рʹункьри?

¹⁰ Ле әм ча дькарьн ԛәдьр бьдьнә кʹьфше һьндава рʹункьрийа? Әм гәрәке пьрсед шәхси нәдьнә ԝан дәрһәԛа рʹункьрьна ԝан. Изьна мә тʹӧнә йә кӧ әм әԝан тьштед шәхси бьзаньбьн  (1 Тʹеслн. 4:11; 2 Тʹеслн. 3:11). Әм ӧса жи гәрәке мәрьвед ԝани незик нәпьрсьн кӧ әԝ жи рʹункьри нә йан на. Чьмки һәрге кәсәк рʹункьри йә, рʹункьрьна ԝи дәрбази сәр нәфәред мала ԝи набә (1 Тʹеслн. 2:12). Әм ӧса жи гәрәке мер йан жьна рʹункьри нәпьрсьн, кӧ әԝана чь тʹәхмин дькьн, кӧ заньн ԝәки дьнйа тʹәзәда һәвалзәԝаще ԝан ԝе тʹәви ԝан нибә. Дәԝса ԝе йәке, кӧ бь ԝан гьлийа дьле ԝан бешиньн, ԝе һе баш бә кӧ әм баԝәр бьн ве йәкеда кӧ Йаһоԝа ԝе дәсте хԝә фьрә кә у «дахԝаза һәр жийандари бь щиһ» бинә (Зәб. 145:16, ИМ).

11. Әме хԝә жь кʹижан хофе хԝәй кьн, һәрге әм жь йед кӧ «һʹьләкʹарийа дькьн» дур бьн?

¹¹ Кʹе кӧ рʹункьрийа бьльнд накә, әԝ хԝә хԝәй дькә жь хофийе. Кʹьтеба Пирозда те готьне кӧ ԝе «бьрайед дәрәԝ» бькʹәвьнә щьвате (Галт. 2:4, 5; 1 Йуһʹн. 2:19). Һьнәк жь ԝан дькарьн һәла һе жи бежьн, кӧ әԝана рʹункьри нә. Һьн жи, һьнәк рʹункьри дьбәкә нәамьн бьминьн (Мәт. 25:10-12; 2 Пәт. 2:20, 21). Һәрге әм жь ԝан дур бьн йед кӧ «һʹьләкʹарийа дькьн», демәк дӧрʹутийе дькьн, әме пәй ԝан нәчьн у жь рʹийа рʹаст дәрнәйен. Һьн жи әме баԝәрийа хԝә ӧнда нәкьн, һәрге әм бьвиньн кӧ кәсәк гәләк ԝәхт Йаһоԝарʹа хьзмәт дькьр, ле нәамьн ма (Щьһуд. 16).

12, 13. Чьрʹа әм гәрәке бәрхԝә нәкʹәвьн жь бо зедәкьрьна һәжмара ԝан, йед кӧ сәр Биранине симбола дьхԝьн?

¹² Нава гәләк салада, әԝед кӧ сәр Биранине симбол дьхԝарьн һьнәк бун. Ле дь ԝан пашԝәхтийада, һәр сал һәжмара ԝан һе зедә дьбә. Гәло гәрәке әм жь бо ве йәке бәрхԝә кʹәвьн? На. Ԝәрә әм пебьһʹәсьн чьрʹа.

¹³ «Хӧдан, йед хԝә нас дькә» (2 Тимтʹ. 2:19, ИМ). Бьред кӧ сәр Биранине һʹәсаб дькьн чьԛас мәрьв симбола дьхԝьн, сәд сәләфи нькарьн бежьн кӧ кʹе йә бь рʹастийе жь ԝан рʹункьри. Һьнәк жь ԝан симбола дьхԝьн, чьмки дьфькьрьн кӧ рʹункьри нә. Һьнәк жи ԝәʹдәки дәстпекьрьн симбола бьхԝьн, паше ида симбол нәдьхԝарьн. Щәм һьнәка жи дьбәкә проблемед һʹьшда у емосиали һәйә, у ләма әԝана дьфькьрьн кӧ һәрʹьнә ль әʹзмен тʹәви Иса  сәрԝертийе бькьн. Ләма жи, һәжмара йед кӧ симбола дьхԝьн, рʹаст әʹйан накә һәжмара рʹункьрийа кӧ сәр әʹрде манә.

14. Кʹьтеба Пироз чь дьбежә дәрһәԛа һәжмара рʹункьрийа, кӧ ԝәʹде дәстпебуна тәнгасийа мәзьн ԝе сәр әʹрде бьн?

¹⁴ Рʹункьри ԝе сәр әʹрде щурʹә-щурʹә щийада бьн, чахе Иса бе кӧ ԝана тʹоп кә ль әʹзмен. Дәрһәԛа ԝи ԝәʹдәйи, Кʹьтеба Пироз дьбежә кӧ Иса ԝе «мьлйакʹәтед хԝә . . . бьшинә у ԝе бьжартийед ԝи жь һәр чар ԛӧлба бәрәв кьн, жь пʹәрʹәки әʹзмана һʹәта пʹәрʹе дьн» (Мәт. 24:31). Кʹьтеба Пироз дьдә кʹьфше кӧ ԝәʹде рʹожед ахьрийе, сәр әʹрде ԝе һьнә рʹункьри һәбьн (Әʹйан. 12:17). Ле йәкә, Кʹьтеба Пироз набежә кӧ ԝәʹде дәстпебуна тәнгасийа мәзьн, чьԛас рʹункьри сәр әʹрде бьн.

15, 16. Әм чь гәрәке фәʹм кьн дәрһәԛа 144 000, кʹижана кӧ Йаһоԝа дьжберә?

¹⁵ Йаһоԝа хԝәха сафи дькә кӧ кʹәнге рʹункьрийа бьжберә (Рʹом. 8:28-30). Йаһоԝа дәстпекьр рʹункьрийа бьжберә паши мьрьн у сахкьрьна Иса. Те кʹьфше кӧ ԛьрʹна йәкеда һʹәму Мәсиһийед рʹаст, рʹункьри бун. Ле жь ԝи ԝәʹдәйи һʹәта дәстпебуна рʹожед ахьрийе, һʹәчʹи зәʹф жь ԝан кӧ дьготьн кӧ әԝана пәйчуйед Иса нә, бь рʹастийе Мәсиһийед дәрәԝ бун. Иса ԝана бәрамбәри «зиԝана» кьр. Ле йәкә, нава ԝан салада, Йаһоԝа бәрдәԝам дькьр рʹункьрийа бьжберә. У чаԝа кӧ Иса гот әԝана ԝе мина «гәньм» бьн (Мәт. 13:24-30). Нава ԝан рʹожед ахьрийеда, Йаһоԝа диса жи бәрдәԝам дькә бьжберә әԝед кӧ ԝе бькʹәвьнә нава 144 000. ^[2] Һәрге Йаһоԝа һьнәка дьжберә ԝәʹде кʹӧтасийа рʹожед ахьрийе, фәʹмдари йә кӧ әм гәрәке дӧдьли нибьн кӧ әԝ рʹаст дькә (Иша. 45:9; Дан. 4:35; бьхунә Рʹомайи 9:11, 16.) ^[3] Әм гәрәке фәсал бьн кӧ мина ԝан пʹала нибьн, йед кӧ сәр ахайе хԝә кьрьнә котә-кот, кӧ әԝ ча бу һьндава ԝан пʹала, йед кӧ евaре сьһʹәта 5 дәстпекьрьн хәбьтин. (Бьхунә Мәтта 20:8-15.)

¹⁶ Нә һʹәмуйед кӧ гӧмана ԝан жийина сәр әʹзмана йә, һәнә пʹара «хӧламе амьн у сәрԝахт» (Мәт. 24:45-47). Чаԝа кӧ ԛьрʹна йәкеда, иро жи Йаһоԝа у Иса бь сайа һьнәка, гәләкарʹа хԝарьна рʹӧһʹани дьдьн. Ԛьрʹна йәкеда тʹәне һьнәк рʹункьрийа Ньвисаред Йунани ньвисин. Ӧса жи иро, тʹәне һьнәк рʹункьри щабдар ьн бона ве йәке, кӧ «ԝәхтда хԝарьна» рʹӧһʹани бьдьн.

17. Һун чь пеһʹәсийан дь ве тʹемайеда?

¹⁷ Жь ве тʹемайе әм чь пеһʹәсийан? Йаһоԝа жийина һʹәта-һʹәтайе сәр әʹзмана пʹешкʹеш дьдә Щьһуйе рʹӧһʹани, ле жийина һʹәта-һʹәтайе сәр әʹрде пʹешкʹеш дьдә бь симболик дәһ мера. Ле Йаһоԝа жь ԝан һәрда жи дәʹԝа дькә, кӧ әԝана амьн бьн. Һьн жи, һәрдӧ жи гәрәке мьлук бьн. Һәрдӧ жи гәрәке әʹдьлайе бькьнә щьвате. Дә ԝәрә әм ԝан рʹожед хьлазийе бь амьни йәктийеда Хԝәдерʹа хьзмәт кьн у пәй Иса һәрʹьн.